Plọnnu sọn Ohó Jiwheyẹwhe Tọn Mẹ

Nawẹ Mí Sọgan De Họntọn Dagbe lẹ Gbọn?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Naegbọn mí dona yí sọwhiwhe do de họntọn mítọn lẹ?

Suhugan gbẹtọ lẹ tọn wẹ nọ jlo dọ mẹdevo lẹ ni kẹalọyi yé. Ojlo ehe nọ saba hẹn mí nado yinuwa taidi mẹhe lẹdo mí lẹ. Họntọn mítọn lẹ nọ yinuwado ahun mítọn ji sinsinyẹn. Enẹwutu, họntọn he mí de lẹ sọgan do mẹhe mí na wá lẹzun hia.—Hia Howhinwhẹn lẹ 4:23; 13:20.

Biblu-kantọ Davidi de họntọn etọn lẹ po nuyọnẹn po. Mẹhe gọalọna ẹn nado hẹn tenọgli etọn go taidi devizọnwatọ Jiwheyẹwhe tọn lẹ wẹ e dogbẹ́ hẹ. (Psalm 26:4, 5, 11, 12) Di apajlẹ, Davidi duvivi họntọnjiji hẹ Jonatani tọn, na Jonatani na ẹn tuli nado dejido Jehovah go.—Hia 1 Samuẹli 23:16-18.

2. Nawẹ hiẹ sọgan lẹzun họntọn Jiwheyẹwhe tọn gbọn?

Dile etlẹ yindọ Jehovah yin ganhunupotọ, mí sọgan lẹzun họntọn etọn nugbonugbo. Di apajlẹ, Ablaham lẹzun họntọn Jiwheyẹwhe tọn. Ablaham dejido Jehovah go bo setonuna ẹn, enẹwutu Jehovah pọ́n ẹn hlan taidi họntọn de. (Gẹnẹsisi 22:2, 9-12; Jakọbu 2:21-23) Eyin mí dejido Jehovah go bo wà nuhe e biọ to mí si lẹ, mílọsu sọgan lẹzun họntọn Jiwheyẹwhe tọn.—Hia Psalm 15:1, 2.

3. Nawẹ họntọn dagbe lẹ sọgan hẹn ale wá na we gbọn?

Họntọn dagbe lẹ nọ yin nugbonọ podọ yé sọgan gọalọna we nado wà nuhe sọgbe. (Howhinwhẹn lẹ 17:17; 18:24) Di apajlẹ, dile etlẹ yindọ Jonatani yí nudi owhe 30 do yin mẹho na Davidi bo tlẹ dona ko dugu ofìn Islaeli tọn, Jonatani nọgodona Davidi po nugbonọ-yinyin po taidi mẹhe Jehovah de nado duahọlu. Họntọn dagbe lẹ nasọ tindo adọgbigbo nado gbẹnuna we eyin yé mọdọ a to nuhe ma sọgbe wà. (Psalm 141:5) Họntọn he yiwanna Jiwheyẹwhe lẹ na gọalọna we nado wleawuna walọ dagbe.—Hia 1 Kọlintinu lẹ 15:33.

To Plitẹnhọ Ahọluduta tọn Kunnudetọ Jehovah tọn lẹ tọn mẹ, a sọgan mọ mẹhe yiwanna nuhe sọgbe wiwà taidi hiẹ nkọ lẹ. A na mọ họntọn lẹ to finẹ he na nọgodona vivẹnudido towe nado hẹn homẹ Jiwheyẹwhe tọn hùn.—Hia Heblu lẹ 10:24, 25.

Etomọṣo, họntọn he yiwanna Jiwheyẹwhe lẹ lọsu tlẹ sọgan wá hẹn mí jẹflumẹ. A dike nuṣiwa yetọn lẹ ni nọ yawu hẹn we gblehomẹ blo. (Yẹwhehodọtọ 7:9, 20-22) Flindọ họntọn pipé de ma tin, podọ nuhọakuẹ wẹ họntọn he yiwanna Jiwheyẹwhe lẹ yin na mí. Ohó Jiwheyẹwhe tọn dotuhomẹna mí nado nọ de ayiha sọn awugbopo Klistiani hatọ lẹ tọn ji.—Hia Kọlọsinu lẹ 3:13.

4. Etẹwẹ lo, eyin “họntọn lẹ” diọnukunsọ we?

Mẹsusu nọ mọdọ to whenue yé jẹ Ohó Jiwheyẹwhe tọn plọn ji, họntọn yetọn dai tọn delẹ nọ diọnukunsọ yé. Vlavo họntọn enẹlẹ ma mọnukunnujẹ ayinamẹ yọ́n-na-yizan kavi todido dejidego he a ko mọ to Biblu mẹ lẹ mẹ. Hiẹ sọgan gọalọna yé.—Hia Kọlọsinu lẹ 4:6.

To alọ devo mẹ, “họntọn lẹ” sọgan ṣàn wẹndagbe he tin to Biblu mẹ lọ kò. (2 Pita 3:3, 4) Họntọn delẹ sọgan ṣàn we kò na vivẹnudido towe nado wà nuhe sọgbe. (1 Pita 4:4) Eyin enẹ jọ do gowe, e na biọ dọ hiẹ ni de nado yin họntọn yetọn kavi Jiwheyẹwhe tọn. Eyin hiẹ de nado yin họntọn Jiwheyẹwhe tọn, be họntọn dagbe hugan he mẹde sọgan tindo lọ wẹ a de.—Hia Jakọbu 4:4, 8.

Na nudọnamẹ dogọ, pọ́n weta 12 po 19 owe Etẹwẹ Bliblu Plọn Mí Taun tọn po, he Kunnudetọ Jehovah tọn lẹ zinjẹgbonu.