Be KListiani Lẹpo Wẹ Yin Klistiani Nugbo Ya?

KLISTIANI nẹmu wẹ tin? Sọgbe hẹ owe lọ Atlas of Global Christianity, diblayi Klistiani liva 2,3 wẹ tin lẹdo aihọn pé to 2010. Ṣigba, owe dopolọ sọ dohia dọ Klistiani enẹlẹ tin to ṣọṣi voovo 41000 linlán mẹ, podọ ṣọṣi enẹlẹ dopodopo wẹ tindo sinsẹ̀n-nuplọnmẹ po nujinọtedo walọyizan tọn yetọn lẹ po. Na sinsẹ̀n Klistiani tọn lẹ to susudeji mapote wutu, e ma yin nupaṣamẹ dọ mẹdelẹ nọ jẹflumẹ kavi tlẹ nọ gbọjọ gando whẹho sinsẹ̀n tọn go. Yé sọgan nọ kanse yede dọ: ‘Be mẹhe ylọ yede dọ Klistiani lẹpo wẹ yin Klistiani nugbonugbo ya?’

Gbọ mí ni lẹnnupọn yinukọn do whẹho ehe ji. E nọ saba yin bibiọ to mẹhe to gbejizọnlin basi de si nado do tòvi-yinyin etọn hia to whenue ewọ jlo na dasá dogbó otò etọn tọn. E sọ dona do kalti mẹdohia tọn de hia, vlavo aṣẹ-wema tògodo yìyì tọn de. Mọdopolọ, mẹhe yin Klistiani nugbo de dona wà nususu hugan didọ poun dọ emi yise to Klisti mẹ. E sọ dona tindo ohia delẹ. Etẹwẹ yin ohia enẹlẹ?

To owhe 44 W.M. godo wẹ hogbe lọ “Klistiani” yin yiyizan whla tintan. Whenuho-kantọ Biblu tọn Luku na linlin dọmọ: “Gbọn anademẹ Jiwheyẹwhe tọn dali, Antioku wẹ devi lẹ yin yiylọ whla tintan dọ Klistiani lẹ te.” (Owalọ lẹ 11:26) Mẹhe yin devi Klisti tọn lẹ wẹ yin yiylọdọ Klistiani lẹ. Etẹwẹ nọ dohia dọ mẹde yin devi Jesu Klisti tọn? Owe lọ The New International Dictionary of New Testament Theology basi zẹẹmẹ dọmọ: “Nado hodo Jesu taidi devi de zẹẹmẹdo nado yí gbẹzan [mẹtọn] blebu do sanvọ́ . . . mahopọnna ninọmẹ depope.” Enẹwutu, mẹhe yin Klistiani nugbo nọ hodo nuplọnmẹ gọna anademẹ voovo Jesu he yin Dowatọ sinsẹ̀n Klistiani tọn lọ tọn mlẹnmlẹn.

Be gbẹtọ mọnkọtọn lẹ tin to mẹsusu he sọalọakọ́n nado yin Klistiani to egbehe lẹ mẹ ya? Etẹwẹ Jesu lọsu dọ gando nuhe na dohiagona hodotọ nugbo etọn lẹ go? Mí to tulina we nado gbadopọnna gblọndo he Biblu na gando kanbiọ ehelẹ go. To hosọ he bọdego lẹ mẹ, mí na gbadopọnna hodidọ Jesu tọn atọ́n delẹ he dona dohiagona hodotọ nugbo etọn lẹ. Mí na mọ lehe Klistiani owhe kanweko tintan tọn lẹ jẹ nubiọtomẹsi enẹlẹ kọ̀n do. Podọ mí nasọ mọ mẹhe tindo ohia enẹlẹ to mẹsusu he sọalọakọ́n nado yin Klistiani to egbehe lẹ mẹ.