Jehovah Nọ Basi Hihọ́na Mí Na Whlẹngán
“Huhlọn Jiwheyẹwhe tọn to hihọ́-basina [mì] gbọn yise dali na whlẹngán he whenu etọn ko sọ̀ nado yin didehia to ojlẹ godo tọn mẹ.”—1 PITA 1:5.
NAWẸ HIẸ NA NA GBLỌNDO GBỌN?
Nawẹ Jehovah dọ̀n mí wá sinsẹ̀n-bibasi nugbo mẹ gbọn?
Nawẹ mí sọgan dike Jehovah ni yí ayinamẹ etọn lẹ do deanana mí gbọn?
Nawẹ Jehovah nọ na mí tuli gbọn?
1, 2. (a) Etẹwẹ hẹn mí deji dọ Jiwheyẹwhe na gọalọna mí nado hẹn tenọgli mítọn go? (b) Obá tẹ mẹ wẹ Jehovah yọ́n dopodopo mítọn jẹ?
“MẸHE doakọnna kakajẹ opodo, omẹ enẹ wẹ na yin whinwhlẹngán.” (Mat. 24:13) Po hogbe enẹlẹ po, Jesu dohia hezeheze dọ eyin mí na mọ whlẹngán to whenue Jiwheyẹwhe na hẹn whẹdida ṣẹ do aihọn Satani tọn ehe ji, mí dona hẹn tenọgli mítọn go kakajẹ opodo. Ṣigba, ehe ma zẹẹmẹdo dọ Jehovah nọ donukun dọ mí ni doakọnnanu po huhlọn kavi nuyọnẹn mítọn titi po gba. Biblu na mí jide dọmọ: “Nugbonọ wẹ Jiwheyẹwhe, podọ ewọ ma na dike mì ni yin whiwhlepọn zẹ̀ nuhe mì sọgan doakọnna go, ṣigba eyin whlepọn lọ wá, ewọ nasọ deali na mìwlẹ nido penugo nado doakọnna ẹn.” (1 Kọl. 10:13) Etẹwẹ hogbe enẹlẹ zẹẹmẹdo?
2 Na Jehovah nido hẹn ẹn diun dọ mí ma yin whiwhlepọn zẹ̀ nuhe mí sọgan doakọnna go, ewọ dona yọ́n nulẹpo gando mí go, yèdọ avùnnukundiọsọmẹnu he mí nọ pehẹ lẹ, nuhe dopodopo mítọn yin kitokito, po obá he mẹ mí sọgan doakọnnanu jẹ po. Ṣigba, be Jiwheyẹwhe yọ́n mí jẹ obá mọnkọtọn mẹ ya? Mọwẹ. Owe-wiwe lẹ dohia dọ Jehovah yọ́n dopodopo mítọn to gigọ́ mẹ. E yọ́n walọ po nuwiwa egbesọegbesọ tọn mítọn lẹ po ganji. E tlẹ sọgan yọ́n linlẹn po ojlo ahun mẹ tọn mítọn lẹ po.—Hia Psalm 139:1-6.
3, 4. (a) Nawẹ numimọ Davidi tọn dohia dọ Jehovah nọ na ayidonugo dopodopo mítọn gbọn? (b) Azọ́n ayidego tọn tẹwẹ Jehovah to wiwà to egbehe?
3 Be Jiwheyẹwhe Ganhunupotọ lọ sọgan tindo ojlo mọnkọtọn to gbẹtọvi paa lẹ mẹ nugbonugbo ya? Whẹho enẹ ji wẹ Psalm-kantọ Davidi lẹnnupọndo to whenuena e dọna Jehovah dọmọ: “Whenuena yẹn lẹn olọn towe lẹ pọ́n, azọ́n alọviyẹyẹ towe tọn lẹ, osun po sunwhlẹvu lẹ po he hiẹ ko zẹ̀ali dai na; etẹwẹ gbẹtọ, bọ hiẹ do to nuflin jẹ e go?” (Ps. 8:3, 4) Vlavo numimọ Davidi tọn titi wẹ na ko zọ́n bọ ewọ do kàn kanbiọ enẹ sè. Ewọ he yin visunnu pẹvi pete Jẹsse tọn wẹ Jehovah mọ taidi ‘mẹde he ahun etọn kẹalọyi’ bo de e ‘sọn lẹngbọ lẹ hihodo mẹ, nado yin ahọlu’ do Islaeli ji. (1 Sam. 13:14; 2 Sam. 7:8) Yí nukun homẹ tọn do pọ́n nuhe na ko yin numọtolanmẹ Davidi tọn to whenue e doayi e go dọ Didatọ wẹkẹ lọ tọn na ayidonugo ayihamẹlinlẹnpọn po numọtolanmẹ ewọ he yin jọja lẹngbọhọtọ de tọn lẹ po!
4 To egbehe, awú nọ ji mílọsu to whenue mí lẹnayihamẹpọn do ojlo vonọtaun he Jehovah nọ tindo to dopodopo mítọn lẹ mẹ ji. E to ‘onú họakuẹ akọta lẹpo tọn’ bẹpli do sinsẹ̀n-bibasi nugbo mẹ, bosọ to alọgọna devizọnwatọ etọn lẹ nado hẹn tenọgli yetọn go. (Hag. 2:7) Nado mọnukunnujẹ lehe Jehovah nọ gọalọna mí nado hẹn tenọgli mítọn go do mẹ ganji, mì gbọ mí ni lẹnnupọndo lehe ewọ nọ dọ̀n gbẹtọvi lẹ wá sinsẹ̀n-bibasi nugbo mẹ do ji whẹ́.
JIWHEYẸWHE WẸ DỌ̀N MÍ
5. Nawẹ Jehovah nọ dọ̀n gbẹtọ lẹ wá Visunnu etọn dè gbọn? Na apajlẹ.
5 Jesu dọmọ: “Mẹdepope ma sọgan wá dè e adavo Otọ́ he do mi hlan dọ̀n ẹn.” (Joh. 6:44) Hogbe enẹlẹ dohia dọ nado lẹzun devi Jesu tọn, mí tindo nuhudo alọgọ Jiwheyẹwhe tọn. Nawẹ Jehovah nọ dọ̀n gbẹtọ taidi lẹngbọ lẹ wá Visunnu etọn dè gbọn? E nọ yí azọ́n wẹndagbe lọ lilá tọn po gbigbọ wiwe etọn po zan nado wàmọ. Di apajlẹ, whenue Paulu po mẹdehlan gbẹdohẹmẹtọ etọn lẹ po tin to Filippi, yé dukosọ hẹ nawe de he nọ yin Lidia bo jẹ wẹndagbe lọ lá na ẹn ji. Kandai gbọdo lọ dọ dọ: “Jehovah sọ hùn ahun etọn nado na ayidonugo nuhe dọ Paulu te lẹ.” Mọwẹ, Jiwheyẹwhe yí gbigbọ wiwe etọn do gọalọna ẹn nado mọnukunnujẹ owẹ̀n lọ mẹ, podọ taidi kọdetọn de, ewọ po whédo etọn po yin bibaptizi.—Owalọ 16:13-15.
6. Nawẹ Jiwheyẹwhe dọ̀n dopodopo mítọn wá sinsẹ̀n-bibasi nugbo mẹ gbọn?
6 Be Lidia kẹdẹ go wẹ ehe jọ do ya? Paali. Eyin hiẹ yin Klistiani klandowiwe de, be Jiwheyẹwhe ko dọ̀n hiẹ lọsu wá sinsẹ̀n-bibasi nugbo lọ mẹ niyẹn. Kẹdẹdile Otọ́ olọn mẹ tọn mítọn mọ nuhọakuẹ de to ahun Lidia tọn mẹ do, mọjanwẹ e mọ onú dagbe de to hiẹ lọsu mẹ do niyẹn. To whenue hiẹ jẹ todoaina wẹndagbe lọ ji, Jehovah gọalọna we nado mọnukunnujẹemẹ gbọn gbigbọ wiwe etọn nina we dali. (1 Kọl. 2:11, 12) To whenue hiẹ dovivẹnu nado yí nuhe a plọn lẹ do yizan mẹ, ewọ dona vivẹnudido towe nado wà ojlo etọn. To whenue hiẹ klan gbẹzan towe do wiwe na ẹn, homẹ etọn hùn. Na nugbo tọn, Jehovah gọalọna we to whenue hiẹ jẹ sinsẹ̀n ẹn ji, bosọ to mọwà kakajẹ din.
7. Nawẹ mí wagbọn do yọnẹn dọ Jiwheyẹwhe na gọalọna mí nado gbọṣi nugbonọ-yinyin mẹ na ẹn?
7 Jehovah ma nọ gọalọna mí nado jẹ zọnlinzin hẹ ẹ ji bo nọ wá jo mí do na míde to godo mẹ nado gbọṣi nugbonọ-yinyin mẹ na ẹn gba. E yọnẹn dọ to whenuena e yindọ mí ma wá nugbo lọ mẹ na míde, mọ wẹ mí ma sọgan gbọṣi e mẹ na míde do niyẹn. To whenue apọsteli Pita to wekanhlan Klistiani yiamisisadode lẹ, e dọmọ: “Huhlọn Jiwheyẹwhe tọn to hihọ́-basina [mì] gbọn yise dali na whlẹngán he whenu etọn ko sọ̀ nado yin didehia to ojlẹ godo tọn mẹ.” (1 Pita 1:5) Hogbe enẹlẹ gando Klistiani lẹpo go to paa mẹ, podọ dopodopo mítọn dona tindo ojlo to yé mẹ to egbehe. Etẹwutu? Na mímẹpo wẹ tindo nuhudo alọgọ Jiwheyẹwhe tọn nado gbọṣi nugbonọ-yinyin mẹ na ẹn.
JIWHEYẸWHE SỌGAN GỌALỌNA MÍ MA NADO ṢINUWA
8. Naegbọn mí dona họ́ míde ma nado ṣí afọ ze?
8 Kọgbidinamẹnu gbẹ̀mẹ tọn lẹ po mape mítọn po sọgan fẹayihasẹna mí sọn gbigbọnu lẹ ji bo hẹn mí biọ owù afọdide he ma sọgbe zize tọn mẹ to mayọnẹn mẹ. (Hia Galatianu lẹ 6:1.) Nujijọ de he wá aimẹ to gbẹzan Davidi tọn mẹ do enẹ hia.
9, 10. Nawẹ Jehovah glọnalina Davidi ma nado ṣinuwa gbọn, podọ etẹwẹ E nọ wà na mílọsu lẹ to egbehe?
9 To whenue Ahọlu Sauli to ogbé Davidi tọn yàn, ewọ duto ede ji taun bo ma víhlọ̀n to ahọlu awuwhàntọ enẹ go. (1 Sam. 24:2-7) Ṣigba to ojlẹ kleun de godo, Davidi gboawupo nado duto ede ji. Davidi to núdùdù dín na sunnu he hodo e lẹ, bo gbọn sisi dali biọ alọgọ Islaelivi hatọ de he nọ yin Nabali tọn. Ṣigba, Nabali yí homẹgble do zun yé. Ehe vẹna Davidi sọmọ bọ e magbe nado sukúndona sunnu he tin to whédo Nabali tọn mẹ lẹpo, bo gbọnmọ dali gboawupo nado yọnẹn dọ homẹvọnọ lẹ hùhù na hẹn ẹn nado dù hùnhọ́ to Jiwheyẹwhe nukọn. Nuyiwa Abigaili, asi Nabali tọn to ojlẹ he sọgbe mẹ wẹ glọnalina Davidi ma nado ṣinuwa. Whenuena Davidi doayi e go dọ Jehovah dádo whẹho lọ mẹ, e dọna Abigaili dọmọ: “Donanọ OKLUNỌ yin, Jiwheyẹwhe Islaeli tọn, he do we hlan to egbé nado pé mi: Donanọ nuyọnẹn towe ni yin, donanọ hiẹ ni yin, he ko glọn mi to egbé sọn hùnwhẹ̀yinylan mẹ, podọ sọn alọ ṣie titi yí do yiahọsu na dee mẹ.”—1 Sam. 25:9-13, 21, 22, 32, 33.
10 Etẹwẹ mí sọgan plọn sọn nujijọ ehe mẹ? Jehovah yí Abigaili zan nado glọnalina Davidi ma nado ṣinuwa. Nudopolọ wẹ e nọ wà na mílọsu lẹ to egbehe. Nugbo wẹ dọ mí ma dona donukun dọ Jiwheyẹwhe ni nọ do mẹde hlan nado wá glọnalina mí to whedepopenu he mí jlo na ṣinuwa; mọdopolọ, mí ma sọgan yọ́n lehe Jiwheyẹwhe na yinuwa do taun to ninọmẹ tangan de mẹ kavi nuhe e na na dotẹnmẹ etọn nado sọgan hẹn lẹndai etọn di. (Yẹwh. 11:5) Etomọṣo, mí sọgan deji dọ Jehovah yọ́n ninọmẹ mítọn lẹ ganji bo nasọ gọalọna mí nado gbọṣi nugbonọ-yinyin mẹ na ẹn. E na mí jide dọmọ: “Yẹn na plọn we, yẹn nasọ yí afọ towe do ali he ji hiẹ na gbọn: yẹn na yí nukun ṣie do dewé hẹ we.” (Ps. 32:8) Nawẹ Jehovah nọ “dewé hẹ” mí kavi na mí ayinamẹ gbọn? Nawẹ ayinamẹ lọ lẹ sọgan hẹn ale wá na mí gbọn? Podọ naegbọn mí sọgan deji dọ Jehovah to anadena omẹ etọn lẹ to egbehe? Mì gbọ mí ni pọ́n gblọndo he owe Osọhia tọn na do kanbiọ enẹlẹ ji.
AYINAMẸ LẸ NỌ BASI HIHỌ́NA MÍ
11. Obá tẹ mẹ wẹ Jehovah yọ́n nuhe to jijọ to agun lẹ mẹ jẹ?
11 To numimọ he yin kinkandai to weta 2tọ po 3tọ owe Osọhia tọn po mẹ, Jesu Klisti he yin gigopana lọ dla agun ṣinawe he tin to Asia Pẹvi lẹ pọ́n. Numimọ lọ dohia dọ e ma yin ninọmẹ paa lẹ kẹdẹ go wẹ Klisti nọ doayi gba, ṣigba e sọ nọ doayi ninọmẹ tangan lẹ go ga. To whedelẹnu, e tlẹ donù yinkọ mẹdelẹ tọn go tlọlọ, podọ e sọ na pipà kavi ayinamẹ he jẹ to ninọmẹ dopodopo mẹ. Etẹwẹ enẹ dohia? To hẹndi numimọ lọ tọn mẹ, agun ṣinawe lọ lẹ nọtena Klistiani yiamisisadode lẹ to 1914 godo, podọ to paa mẹ, ayinamẹ he e na agun ṣinawe lọ lẹ sọ gando agun omẹ Jiwheyẹwhe tọn lẹpo tọn go lẹdo aihọn pé to egbehe. Enẹwutu, e sọgbe hẹ lẹnpọn dagbe nado wá tadona lọ kọ̀n dọ Jehovah yí zohunhun do to anadena omẹ etọn lẹ gbọn Visunnu etọn gblamẹ. Nawẹ mí sọgan mọaleyi sọn anademẹ enẹ mẹ gbọn?
12. Nawẹ mí sọgan dike Jehovah ni deanana nuwiwa mítọn lẹ gbọn?
12 Oplọn mẹdetiti tọn yin dopo to aliho he mẹ mí sọgan mọaleyi sọn anademẹ owanyinọ Jehovah tọn lẹ mẹ te. Jehovah nọ na mí ayinamẹ sinai do Owe-wiwe ji susu gbọn owe he pipli afanumẹ nugbonọ podọ nuyọnẹntọ lọ tọn nọ wleawuna lẹ gblamẹ. (Mat. 24:45) Ṣigba, nado mọaleyi sọn yé mẹ, mí dona nọ yí whenu zan nado plọn owe enẹlẹ bosọ yí nuhe mí plọn lẹ do yizan mẹ. Oplọn mẹdetiti tọn yin dopo to awuwledainanu he Jehovah sọgan yizan nado “basi hihọ́na [mí] ma nado dahli” lẹ mẹ. (Juda 24) Be hiẹ ko plọn nude to owe mítọn lẹ mẹ pọ́n bo tindo numọtolanmẹ lọ dọ hiẹ wẹ e yin kinkan na ya? Nọ pọ́n wọhẹ lọ hlan taidi dọ Jehovah dè wẹ e wá sọn. Kẹdẹdile họntọn de sọgan doalọ abọ́ ji na we nado dọ̀n ayiha towe wá nude ji do, mọdopolọ wẹ Jehovah sọgan yí gbigbọ wiwe etọn zan nado dọ̀n ayiha towe wá adà walọyizan kavi gbẹtọ-yinyin towe tọn—podọ matin ayihaawe mẹdevo lẹ lọsu tọn—he biọ vọjlado de ji. Eyin mí kẹalọyi alọgọ gbigbọ wiwe tọn, mí na dike Jehovah ni deanana nuyiwa mítọn lẹ. (Hia Psalm 139:23, 24.) Enẹwutu, mí na wà dagbe nado gbeje aṣa nupinplọn tọn mítọn lẹ pọ́n.
13. Naegbọn e do yin nuyọnẹnnu nado nọ gbeje aṣa nupinplọn tọn mítọn lẹ pọ́n?
13 Whenu susu yiyizan na ayidedai sọgan hò whenu he mí na yizan na oplọn mẹdetiti tọn yí sọn mí si. Mẹmẹsunnu de dọmọ: “E bọawu taun dọ oplọn mẹdetiti tọn ni nọ súnadu. Ayidedai ko gbayipe todin hugan gbede pọ́n, bosọ pọ̀kuẹ hugan gbede pọ́n. E tin-to-aimẹ to televiziọn, ọdinatẹẹ, po alokan apòmẹ tọn po ji. E gbayipe taun.” Eyin mí ma tin to aṣeji, ayidedai sọgan to whenu mítọn dù vudevude sọmọ bọ mí ma nasọ tindo whenu depope nado nọ basi oplọn mẹdetiti tọn he siso de ba. (Efe. 5:15-17) Dopodopo mítọn na wà dagbe nado kanse ede dọ: ‘Be n’tindo aṣa lọ nado nọ basi dodinnanu sisosiso to whenue n’to Ohó Jiwheyẹwhe tọn plọn ya, kavi whenue n’tindo hodidọ kavi azọ́ndenamẹ de to opli ji kẹdẹ wẹ n’nọ wàmọ?’ Eyin mọ wẹ, mí sọgan yí whèjai he yin didedovo na sinsẹ̀n-bibasi whẹndo tọn kavi na oplọn mẹdetiti tọn zan ganji nado dindona nuyọnẹn gbigbọmẹ tọn he Jehovah nọ na mí na whlẹngán.—Howh. 2:1-5.
TULINAMẸ LẸ NỌ GỌALỌNA MÍ NADO DOAKỌNNANU
14. Nawẹ Owe-wiwe lẹ dohia dọ Jehovah nọ doayi numọtolanmẹ mítọn lẹ go gbọn?
14 Davidi pehẹ ayimajai susu to gbẹzan etọn mẹ. (1 Sam. 30:3-6) Ohó gbọdo he e kàn lẹ dohia dọ Jehovah yọ́n numọtolanmẹ etọn lẹ. (Hia Psalm 34:18; 56:8.) Jiwheyẹwhe yọ́n numọtolanmẹ mílọsu tọn lẹ ga. Whenue mí yin “ayiha gbigbànọ” kavi “ayiha finfinyọ́nnọ,” ewọ nọ dọnsẹpọ mí. Ehe sọgan na mí homẹmimiọn jẹ obá de mẹ dile e yin do na Davidi, mẹhe jihàn dọmọ: “Yẹn na yin homẹhunnọ bosọ jaya to dagbewanyi towe mẹ: na hiẹ ko lẹn magbọjẹ ṣie pọ́n; bosọ yọ́n ayiha ṣie to nukunbibia mẹ.” (Ps. 31:7) Ṣigba, Jehovah ma nọ doayi ayimajai mítọn lẹ go poun gba. E sọ nọ hẹn mí lodo gbọn homẹmimiọn po tuli po nina mí dali. Opli Klistiani tọn lẹ yin dopo to aliho he mẹ e nọ wàmọ te lẹ mẹ.
15. Etẹwẹ mí sọgan plọn sọn numimọ Asafu tọn mẹ?
15 Numimọ he Psalm-kantọ lọ Asafu tindo, do dopo to ale he mí nọ mọyi to opli lẹ yìyì mẹ hia. Ayiha zizedo kọdetọn dagbe he tindo mẹylankan lẹ te ji zọ́n bọ Asafu tindo ayihaawe gando nujọnu-yinyin Jiwheyẹwhe sinsẹ̀n tọn go. Asafu jẹflumẹ. E basi zẹẹmẹ numọtolanmẹ etọn lẹ tọn dọmọ: “Yẹn yin fifiẹtọ, yè sọ sọnú mi to ayiha ṣie mẹ.” Taidi kọdetọn de, e ko dibla doalọtena Jehovah sinsẹ̀n. Ṣigba, etẹwẹ gọalọna Asafu nado gọ̀ biọ ede mẹ? E dọmọ: “Yẹn . . . yì biọ fiwiwe Jiwheyẹwhe tọn mẹ.” Pọninọ hẹ Jehovah sẹ̀ntọ hatọ etọn lẹ to finẹ gọalọna Asafu nado jla pọndohlan etọn do. E mọnukunnujẹemẹ dọ kọdetọn dagbe mẹylankan lẹ tọn yin na ojlẹ gli de poun, podọ Jehovah na vọ́ nulẹ jlado dandan. (Ps. 73:2, 13-22) Nudopolọ wẹ e yin na mílọsu. Nuyiwa mawadodo tọn he mí nọ pehẹ to aihọn Satani tọn mẹ lẹ sọgan hẹn mí gbọjọ. Ṣigba, pipli dopọ hẹ mẹmẹsunnu mítọn lẹ nọ miọnhomẹna mí bosọ nọ gọalọna mí nado hẹn ayajẹ mítọn go to sinsẹ̀nzọn Jehovah tọn mẹ.
16. Nawẹ mí sọgan mọaleyi sọn apajlẹ Hanna tọn mẹ gbọn?
16 Ṣigba, etẹwẹ lo eyin ninọmẹ de to agun lọ mẹ hẹn ẹn vẹawuna mí nado nọ yì opli lẹ? Vlavo hiẹ tin to dandannu glọ nado jo azọngban de do bọ enẹ hẹn we jẹflumẹ, kavi dọ a tindo gbemanọpọ hẹ mẹmẹsunnu kavi mẹmẹyọnnu de. Eyin mọ wẹ, apajlẹ Hanna tọn sọgan gọalọna we. (Hia 1 Samuẹli 1:4-8.) Asisi etọn Pẹnina nọ saba doadihomẹna ẹn badabada. Ninọmẹ lọ nọ sinyẹn taun to whenue whẹndo lọ yì Ṣilo to whemẹwhemẹ nado basi avọ́sinsan na Jehovah. Ehe hẹn Hanna jẹflumẹ sọmọ bọ “e nọ viavi, bo ma [nọ] dùnú.” Etomọṣo, Hanna ma dike ehe ni hò dotẹnmẹ hundote he e tindo nado nọ sẹ̀n Jehovah lẹ yí sọn e si gba. Jehovah doayi nugbonọ-yinyin etọn go bosọ dona ẹn.—1 Sam. 1:11, 20.
17, 18. (a) Aliho tẹlẹ mẹ wẹ opli agun tọn lẹ nọ na tuli mí te? (b) Etẹwẹ yin numọtolanmẹ towe gando nukunpedomẹgo owanyinọ he mí nọ mọyi sọn Jehovah dè na whlẹngán go?
17 To egbehe, Klistiani lẹ tindo whẹwhinwhẹ́n dagbe nado hodo apajlẹ Hanna tọn. Mí dona yin nugbonọ gbọn opli lẹ yìyì to gbesisọ mẹ dali. Dile mímẹpo ko tindo numimọ etọn do, opli lẹ nọ na mí tuli taun. (Heb. 10:24, 25) Owanyi Klistiani hatọ mítọn lẹ tọn nọ miọnhomẹna mí. Hogbe kleun he mẹde yizan to hodidọ kavi gblọndo de mẹ sọgan yinuwado ahun mítọn ji. To hodọdopọ de mẹ jẹnukọn kavi to opli de godo, yisenọ hatọ de sọgan yí sọwhiwhe do dotoaina mí kavi miọnhomẹna mí gbọn hogbe etọn lẹ dali. (Howh. 15:23; 17:17) Ogbè mítọn lẹ zizedaga nado jihàn hlan Jehovah nọ jlọ mí dote. Titengbe to whenue mí tin to “tùmajai” mẹ wẹ mí nọ tindo nuhudo tulinamẹ he mí nọ mọyi to opli lẹ ji tọn, yèdọ fie Jehovah nọ yí “homẹmiọn” etọn lẹ do hẹn mí lodo bosọ nọ nọgodona mí to gbemima mítọn nado gbọṣi nugbonọ-yinyin mẹ na ẹn te.—Ps. 94:18, 19.
18 To hihọ́-basinamẹ owanyinọ Jiwheyẹwhe mítọn tọn glọ, mí nọ tindo numọtolanmẹ Psalm-kantọ Asafu tọn nkọ, mẹhe jihàn hlan Jehovah dọmọ: “Hiẹ sọ hẹn adusilọ ṣie go gligli. Hiẹ na yí hónamẹ towe do dó aliho hia mi.” (Ps. 73:23, 24) Lehe mí dopẹ́ dọ Jehovah nọ basi hihọ́na mí na whlẹngán do sọ!
[Yẹdide to weda 28]
Jehovah ko dọ̀n hiẹ lọsu
[Yẹdide to weda 30]
Ayinamẹ Jiwheyẹwhe tọn lẹ yíyí-do-yizan mẹ nọ basi hihọ́na mí
[Yẹdide to weda 31]
Tulinamẹ he mí nọ mọyi lẹ nọ hẹn mí lodo