Dọnsẹpọ Jiwheyẹwhe

‘Akọta lẹ Nasọ Yọnẹn Dọ Yẹn Wẹ Jehovah’

ETẸWẸ na yin numọtolanmẹ towe eyin yè sawhẹ sẹ́nhẹngba tọn dokọna we bọ a ma ka wàmọ? Etẹwẹ lo eyin sẹ́nhẹngba lọ hẹn yajiji wá mẹdevo lẹ ji, kakajẹ homẹvọ lẹ ji? E họnwun dọ a na jlo nado de vlẹko sọn yinkọ towe go! Be a yọnẹn dọ Jehovah to pipehẹ avùnnukundiọsọmẹ mọnkọtọn de ya? Mẹsusu to egbehe nọ gbọn nuṣiwa dali gblewhẹdo Jiwheyẹwhe na whẹdida mawadodo po yajiji he tin to aihọn ehe mẹ lẹ po. Be e nọ duahunmẹna Jehovah nado de vlẹko sọn oyín etọn go ya? Gbau! Lẹnnupọndo nuhe owe Ezekiẹli tọn dọ ji.—Hia Ezekiẹli 39:7.

“Yẹn ma na dike oyín wiwe ṣie nado yin fuflú ba,” wẹ Jehovah dọ. To whenue gbẹtọvi lẹ gblewhẹdo ewọ na whẹdida mawadodo lẹ, yinkọ etọn hẹnflu wẹ yé te. Gbọnna? To Biblu mẹ, hogbe lọ “oyín” nọ saba nọtena nuhe mẹde yin yinyọnẹn na. Owe alọdlẹndonu tọn de dọ dọ yinkọ Jiwheyẹwhe dlẹnalọdo “nuhe yin yinyọnẹn gando ewọ go—[enẹ wẹ] nuhe e do ede hia nado yin; e sọ nọtena yindidi etọn, podọ gbégbò etọn.” Yinkọ Jehovah tọn bẹ nuhe ewọ yin yinyọnẹn na hẹn. Etẹwẹ Jehovah yin yinyọnẹn na na nuhe dù whẹdida mawadodo? Ewọ gbẹwanna ẹn! E sọ nọ do awuvẹmẹ hia mẹhe jiya mawadodo tọn lẹ.a (Eksọdusi 22:22-24) To whenue gbẹtọvi lẹ dọ dọ Jiwheyẹwhe wẹ zọ́n bọ nuhe ewọ gbẹwanna lẹ nọ jọ, masin kọ̀n do oyín dagbe etọn go wẹ yé te. Gbọnmọ dali, yé “to nùzan do oyín [etọn] go.”—Psalm 74:10.

Doayi e go dọ whla awe wẹ Jehovah yí hogbe lọ “oyín wiwe ṣie” zan. (Wefọ 7) To Biblu mẹ, whlasusu wẹ yinkọ Jehovah tọn tindo kanṣiṣa hẹ hogbe lọ “wiwe” po wiwe-yinyin po. Hogbe lọ “wiwe” nọ dohia dọ nude yin kinklandovo; e sọ zẹẹmẹdo madodiho po wiwe-ṣeke po. Yinkọ Jehovah tọn yin wiwe na Jiwheyẹwhe he nọ yinmọ lọ yin wiwe wutu—enẹ wẹ yindọ e yin kinklandovo mlẹnmlẹn na nudepope he yin ylando po mawé po. Be a mọ nuhewutu mẹhe nọ dowhẹ Jehovah na kanyinylan lẹ to masin kọ̀n do “oyín wiwe” etọn go to aliho he ylan hugan mẹ ya?

Lẹndai Jehovah tọn nado klọ oyín etọn wé gbọn Ahọluduta etọn gblamẹ wẹ hosọ tangan Biblu tọn. Hosọ enẹ yin nùzindeji to owe Ezekiẹli tọn mẹ, ehe dọ whlasusu dọ “akọta lẹ bo nasọ yọnẹn dọ yẹn wẹ [Jehovah].” (Ezekiẹli 36:23; 37:28; 38:23; 39:7) Doayi e go dọ akọta lẹ ma na basi dide nado yọnẹn dọ ewọ wẹ Jehovah kavi lala. Kakatimọ, yé “nasọ yọnẹn.” To hogbe devo mẹ, lẹndai Jehovah tọn wẹ nado wà nude he na sisẹ́ akọta he tin to aigba ji lẹ nado kẹalọyi dọ mẹhe ewọ dọ dọ emi yin lọ wẹ e yin nugbo—yèdọ Jehovah, Oklunọ Nupojipetọ, mẹhe oyín etọn nọtena madodiho, podọ wiwe-ṣeke.

Opagbe lọ he yin dido whlasusu dọ “akọta lẹ bo nasọ yọnẹn dọ yẹn wẹ [Jehovah]” yin wẹndagbe de na mẹhe to jejeji nado mọ opodo mawadodo po yajiji po tọn lẹ. Jehovah na hẹn opagbe enẹ di to madẹnmẹ bo na de vlẹko lẹpo sẹ̀ sọn oyín etọn go. Ewọ na de kanyinylan po mẹhe nọ nọgodona ẹn lẹ po sẹ̀, ṣigba e na pò mẹhe yọ́n yinkọ etọn bo nọ na sisi yinkọ lọ po nuhe e nọtena po lẹ do ogbẹ̀. (Howhinwhẹn lẹ 18:10) Be ehe ma whàn we nado plọn lehe hiẹ sọgan dọnsẹpọ Jehovah pẹkipẹki do, yèdọ Jiwheyẹwhe wiwe lọ he “yiwanna whẹdida” dodo ya?—Psalm 37:9-11, 28.

[Nudọnamẹ odò tọn]