Mì Nọ Jona Ode Awetọ sọn Ojlo mẹ Wá
“Mì nọ to linsinyẹn hẹ ode awetọ bo nọ to jijona ode awetọ sọn ojlo mẹ wá zọnmii.”—KỌL. 3:13.
NAWẸ HIẸ NA NA GBLỌNDO GBỌN?
Naegbọn mí dona nọ jonamẹ sọn ojlo mẹ wá?
Apajlẹ tẹwẹ Jesu yizan nado zinnudo nuhewutu mí dona nọ jonamẹ ji?
Ale tẹlẹ wẹ mí nọ mọyi eyin mí nọ jona ode awetọ sọn ojlo mẹ wá?
1, 2. Naegbọn hiẹ dona gbeje dewe pọ́n nado yọnẹn eyin a tindo ojlo nado nọ jona mẹdevo lẹ?
BIBLU gọalọna mí nado yọ́n lehe Jehovah nọ pọ́n ylando hlan do po lehe e nọ yinuwa to whenue mí waylando do po. Ohó etọn sọ de nususu hia gando jonamẹ go. To hosọ he wayi mẹ, mí plọnnu do nuhewutu Jehovah do jona Davidi po Manasse po ji. Nuhe yé wà lẹ vẹna yé bọ yé yigbe ylando yetọn lẹ tọn na Jehovah, bosọ magbe ma nado waylando mọnkọtọn lẹ gbede ba. Yé lẹnvọjọ nugbonugbo, enẹwutu Jehovah vọ́ nukundagbe etọn dohia yé whladopo dogọ.
2 Todin, mì gbọ mí ni gbadopọnna lehe mílọsu lẹ na nọ jona mẹdevo lẹ sọn ojlo mẹ wá do. Etẹwẹ na ko yin numọtolanmẹ towe eyin dopo to hẹnnumẹ towe lẹ mẹ tin to homẹvọnọ he Manasse hù lẹ mẹ? Be hiẹ na ko penugo nado jona Manasse ya? Kanbiọ titengbe de wẹ enẹ yin to egbehe, na mí to gbẹnọ to aihọn sẹ́nhẹngba, danuwiwa, po ṣejannabi po tọn de mẹ. Enẹwutu, naegbọn Klistiani lẹ dona wleawuna gbigbọ jonamẹ tọn? Podọ eyin hiẹ yin nuyiwa hẹ to aliho agọ̀ mẹ kavi jiya whẹdida mawadodo tọn, etẹwẹ sọgan gọalọna we nado duto numọtolanmẹ towe lẹ ji bo yinuwa sọgbe hẹ ojlo Jehovah tọn, bosọ jonamẹ sọn ojlo mẹ wá?
NUHEWUTU MÍ DONA NỌ JONAMẸ
3-5. (a) Apajlẹ tẹwẹ Jesu yizan nado gọalọna todoaitọ etọn lẹ nado lẹnnupọndo nuhewutu yé dona nọ jonamẹ ji? (b) Etẹ ji wẹ apajlẹ Jesu tọn he tin to Matiu 18:21-35 mẹ zinnudo?
3 Eyin mí na tin to jijọho mẹ hẹ hagbẹ whẹndo tọn lẹ, họntọn lẹ, gbẹtọvi hatọ lẹ po Jehovah po, nujọnu wẹ e yin dọ mí ni nọ jona mẹhe ṣinuwa do mí lẹ sọn ojlo mẹ wá, vlavo yé yin hagbẹ agun Klistiani tọn kavi lala. Owe-wiwe lẹ dohia dọ nubiọtomẹsi de wẹ e yin na Klistiani lẹ nado nọ jona mẹdevo lẹ sọn ojlo mẹ wá mahopọnna whla nẹmu he yé ṣinuwa do mí. Nado dohia dọ nubiọtomẹsi ehe sọgbe hẹ lẹnpọn dagbe, Jesu na apajlẹ de gando afanumẹ he duahọ de go.
4 Ahọ́ he afanumẹ lọ dù do oklunọ etọn sọ azọ́nkuẹ azán livi 60 tọn; etomọṣo oklunọ etọn jo ahọ́ lọ na ẹn. Enẹgodo, afanumẹ lọ tọ́n bo mọ afanumẹ hatọ etọn de he duahọ azọ́nkuẹ azán 100 poun tọn do e. Ahọ́tọnọ lọ vẹ̀ ẹ dọ ni nọtepọn emi, ṣigba afanumẹ he yè jo ahọ́ daho na lọ ze afanumẹ hatọ etọn dlan gànpamẹ. Nuhe e wà lọ gblehomẹna oklunọ yetọn. “Be e ma jẹ dọ hiẹ lọsu ni do lẹblanu hia afanumẹ hatọ towe ga, yèdọ dile yẹn ko do lẹblanu hia we do ya?” wẹ oklunọ lọ kanse. “Na enẹwutu, oklunọ etọn gblehomẹ, bo jo [afanumẹ he ma jonamẹ lọ] na gàntọ-ṣọ́tọ lẹ, kaka e nado suahọ he e dù lẹpo.”—Mat. 18:21-34.
5 Etẹ ji wẹ Jesu jlo na zinnudo to apajlẹ ehe mẹ? E basi zẹẹmẹ dọmọ: “Mọkẹdẹ wẹ Otọ́ ṣie olọn tọn na yinuwa hẹ mì do eyin dopodopo mìtọn lẹ ma nọ jona mẹmẹsunnu etọn sọn ahun mẹ wá.” (Mat. 18:35) Nuhe dọ Jesu te họnwun. Ylando he mí nọ wà to gbẹwhenu mítọn lẹ na mí yin mapenọ wutu dohia dọ mí ma sọgan jẹ nujinọtedo Jehovah tọn lẹ kọ̀n. Etomọṣo, ewọ tindo ojlo nado jo nuṣiwa mítọn lẹ na mí podọ nado wọnji yé go taidi dọ mí ma wà yé wẹ nkọ. Enẹwutu, dandannu wẹ e yin na mẹdepope he jlo na yin họntọn Jehovah tọn nado nọ jo nuṣiwa gbẹtọvi hatọ etọn lẹ tọn na yé. Podọ Jesu dọ to Yẹwhehodidọ Osó ji tọn lọ mẹ dọmọ: “Eyin mì jo sẹ́nmẹjijẹ gbẹtọ lẹ tọn na yé, Otọ́ mìtọn olọn tọn na jona mì ga; ṣigba eyin mì ma jo sẹ́nmẹjijẹ gbẹtọ lẹ tọn na yé, mọdopolọ Otọ́ mìtọn olọn tọn ma na jo sẹ́nmẹjijẹ mìtọn lẹ na mì.”—Mat. 6:14, 15.
6. Naegbọn e ma nọ saba bọawu nado jonamẹ?
6 Hiẹ sọgan dọ dọ: ‘Enẹ lẹpo yọ́nsè, ṣigba e bọawu nado dọ hugan nado wà.’ Enẹ yinmọ na to whenue mẹde ṣinuwa do mí, ehe nọ yinuwado mí ji to aliho sinsinyẹn mẹ. Mí sọgan gblehomẹ taun bo mọdọ mẹlọ gbẹwanna mí podọ mí tlẹ sọgan jlo nado yiahọsu kavi jlo dọ mẹlọ ni yin yasana. Na nugbo tọn, mẹdelẹ nọ tindo numọtolanmẹ dọ yé ma sọgan penugo gbede nado jona mẹhe ṣinuwa do yé. Eyin numọtolanmẹ dopolọ wẹ hiẹ nọ tindo, nawẹ a sọgan wleawuna gbigbọ jonamẹ tọn he Jehovah biọ to mí si gbọn?
GBEJE NUMỌTOLANMẸ TOWE PỌ́N
7, 8. Etẹwẹ sọgan gọalọna we nado nọ jonamẹ eyin a gblehomẹ na nuyiwa he ma jọmẹ mẹdevo lẹ tọn wutu?
7 Mí sọgan gblehomẹ taun eyin mẹde ṣinuwa do mí kavi eyin mí lẹndọ mẹde ṣinuwa do mí. To dodinnanu he gando homẹgble go de whenu, dẹpẹ de dọ lehe e yinuwado dọmọ: “To gbèdopo . . . na n’gblehomẹ wutu, n’tọ́n sọn whégbè bo dopà ma nado lẹkọ pọ́n gbede. Alunlun whenu wẹ bọ n’zinzọnlin gbọn ali pẹvi he yọnwhanpẹ de ji; lẹdo whanpẹnọ he to abọẹ enẹ zọ́n bọ homẹgble ṣie jẹ didepo ji bọ n’fá, podọ to gànhiho delẹ godo, n’lẹkọyi whégbè bọ e vẹna mi dọ n’gblehomẹ sọmọ.” Eyin hiẹ yí whenu zan nado gọ̀ biọ dewe mẹ dile dẹpẹ ehe wà do, a sọgan lẹnnupọn ganji do ninọmẹ towe ji kakati nado yinuwa to aliho de mẹ he na wá vẹna we.—Ps. 4:4; Howh. 14:29; Jak. 1:19, 20.
8 Ṣigba, etẹwẹ lo eyin homẹgble towe ma depò? Tẹnpọn nado yọ́n nuhewutu a do gblehomẹ. Be na hiẹ yin nuyiwa hẹ to aliho agọ̀ mẹ, vlavo to aliho mẹmasi tọn mẹ wutu wẹ ya? Be a lẹndọ mẹlọ desọn ojlo mẹ nado gbleawuna we wẹ zọ́n ya? Be nuyiwa mẹlọ tọn ylan na nugbo tọn ya? Eyin hiẹ tẹnpọn nado yọ́n nuhewutu a do gblehomẹ, a sọgan mọ nunọwhinnusẹ́n Biblu tọn he na gọalọna we nado duto numọtolanmẹ towe ji bo yinuwa to aliho he Jehovah kẹalọyi mẹ. (Hia Howhinwhẹn lẹ 15:28; 17:27.) Nulinlẹnpọn to aliho mọnkọtọn mẹ na gọalọna we nado tindo pọndohlan he sọgbe gando whẹho lọ go bo jonamẹ sọn ojlo mẹ wá. Gbọn nuyiwa to aliho enẹ mẹ dali, dile etlẹ yindọ e ma nọ bọawu, hiẹ na na dotẹnmẹ Ohó Jiwheyẹwhe tọn nado dindona “linlẹn po ojlo ahun [towe] mẹ tọn lẹ po” bo deanana we nado hodo apajlẹ jonamẹ Jehovah tọn.—Heb. 4:12.
BE HIẸ DONA GBLEHOMẸ WẸ YA?
9, 10. (a) Nawẹ mẹde sọgan yinuwa gbọn to whenue e lẹndọ mẹde ṣinuwa do emi? (b) Numọtolanmẹ tẹwẹ a na tindo eyin a ma nọ yawu gblehomẹ bo nọ jonamẹ sọn ojlo mẹ wá?
9 Ninọmẹ susu lẹ wẹ sọgan zọ́n bọ mẹde na gblehomẹ. Di apajlẹ, hiẹ sọgan to mọto kùn bọ mọto-kùntọ devo na dibla wá sọ́ mọto towe. Nawẹ hiẹ na yinuwa gbọn? Mẹdelẹ nọ gblehomẹ sọmọ bọ yé nọ jẹ nuli mọto-kùntọ awetọ lọ ji. Ṣigba e họnwun dọ Klistiani de ma na wà onú mọnkọtọn.
10 Lehe e na yọ́n hugan nado yí whenu vude zan do lẹnnupọndo whẹho lẹ ji do sọ! Vlavo hiẹ lọsu sọgan yin whẹgbledo jẹ obá de mẹ na nuhe jọ lọ, na a yin ayihafẹsẹna to aliho de mẹ wutu. Kavi mọto mọto-kùntọ awetọ lọ tọn sọgan ko tindo nuhahun de. Nuhe mí sọgan plọn sọn nujijọ enẹ mẹ wẹ yindọ mẹde sọgan de homẹgble, flumẹjijẹ po numọtolanmẹ agọ̀ devo lẹ po pò eyin e mọnukunnujẹ ninọmẹ lọ mẹ bo nọ joawunanu bosọ tindo ojlo nado jonamẹ. Yẹwhehodọtọ 7:9 dọmọ: “A yawu to ayiha towe mẹ nado gblehomẹ blo, na homẹgble gbọjẹ to otù nulunọ tọn ji.” Ma nọ yawu gblehomẹ blo. Whlasusu wẹ nuhe nọ yin pinpọnhlan taidi nuṣiwa de ma nọ yinmọ; kọdetọn mapenọ-yinyin kavi nukunnumamọjẹnumẹ tọn de poun wẹ e nọ yin. Nọ tẹnpọn nado nọ joawunanu to whenue a lẹndọ mẹde yinuwa hẹ we to aliho agọ̀ mẹ kavi ṣì hodọna we, podọ nọ dike owanyi ni whàn we nado nọ jonamẹ sọn ojlo mẹ wá. Hiẹ na tindo ayajẹ eyin a wàmọ.—Hia 1 Pita 4:8.
‘NA JIJỌHO MÌTỌN NI LẸKỌ DO MÌ DÈ’
11. Numọtolanmẹ tẹwẹ mí dona tindo mahopọnna lehe gbẹtọ lẹ yinuwa hẹ mí do to lizọnyizọn lọ mẹ?
11 Eyin mẹde yinuwa hẹ we to aliho agọ̀ mẹ to whenue hiẹ to mahẹ tindo to sinsẹ̀nzọn kunnudegbe tọn mẹ, nawẹ hiẹ sọgan duto dewe ji gbọn? To whenue Jesu do yẹwhehodọtọ 70 hlan, e dọna yé nado nọ biọ jijọho do mẹhe to owhé he yé dlapọn lẹ gbè lẹpo ji. Jesu dọmọ: “Eyin họntọn jijọho tọn de tin to finẹ, jijọho mìtọn na tin to e ji. Ṣigba eyin e ma tin, e na lẹkọ do mì dè.” (Luku 10:1, 5, 6) Eyin gbẹtọ lẹ kẹalọyi owẹ̀n mítọn mí nọ jaya, na yé sọgan mọaleyi sọn e mẹ wutu. Ṣigba to whedelẹnu, yé ma nọ kẹalọyi owẹ̀n lọ po jijọho po. Nawẹ mí na yinuwa gbọn to whenẹnu? Jesu dọ dọ mí dona hẹn jijọho he mí biọ do mẹhe tin to owhé lọ gbè lẹ ji go. Depope he whẹho lọ yin, mí dona tẹnpọn nado tọ́n sọn ohọ̀n dopodopo kọ̀n po numọtolanmẹ jijọho tọn po, mahopọnna lehe gbẹtọ lẹ yinuwa hẹ mí do. Eyin mí gblehomẹ to whenue whétọ de yinuwa hẹ mí to aliho agọ̀ mẹ, mí ma sọgan hẹn jijọho mítọn go.
12. Sọgbe hẹ hogbe Paulu tọn lẹ to Efesunu lẹ 4:31, 32 mẹ, nawẹ mí dona nọ yinuwa gbọn?
12 Nọ dovivẹnu nado hẹn jijọho towe go to ninọmẹ lẹpo mẹ, e ma yin to lizọnyizọn Klistiani tọn mẹ kẹdẹ. Nugbo wẹ dọ nado jona mẹde ma zẹẹmẹdo nado mọdọ walọ ylankan etọn lẹ sọgbe kavi nado yinuwa to aliho de mẹ taidi dọ yé ma gbleawuna we. Ṣigba e zẹẹmẹdo ma nado hẹnmẹdohomẹ na nuṣiwa mọnkọtọn lẹ. Hiẹ dona dovivẹnu nado hẹn jijọho towe go. Mẹdelẹ ko dike na walọ mẹdevo lẹ tọn ni hò ayajẹ yetọn yí, na yé nọ to onú agọ̀ lẹn mapote do lehe yé yin nuyiwa hẹ to aliho ylankan mẹ do ji. Ma dike linlẹn mọnkọtọn lẹ ni yinuwado jiwe blo. Flindọ hiẹ ma sọgan tindo ayajẹ to whenue a hẹnmẹdohomẹ. Enẹwutu, nọ jonamẹ!—Hia Efesunu lẹ 4:31, 32.
NỌ YINUWA TO ALIHO HE JEHOVAH KẸALỌYI MẸ
13. (a) Nawẹ Klistiani de nọ bẹ “akán he to jiji” do ota na kẹntọ etọn gbọn? (b) Etẹwẹ sọgan yin kọdetọn lọ eyin mẹde do homẹdagbe hia to whenue mẹdevo lẹ yinuwa hẹ ẹ to aliho agọ̀ mẹ?
13 To whedelẹnu, hiẹ sọgan tindo ojlo nado gọalọna mẹhe ma yin Klistiani bo ṣinuwa do we de nado yọ́n nujinọtedo Biblu tọn lẹ. Apọsteli Paulu wlan dọmọ: “‘Eyin huvẹ hù kẹntọ towe, na núdùdù i; eyin nugbla hù i, na ẹn nude nado nù; na gbọn ehe wiwà dali, hiẹ na bẹ akán he to jiji do ota na ẹn.’ A dike oylan gbawhàn towe blo, ṣigba nọ yí dagbe do gbawhàn oylan tọn.” (Lom. 12:20, 21) Eyin hiẹ nọ do walọ dagbe hia to whenue mẹdevo lẹ yinuwa hẹ we to aliho agọ̀ mẹ, enẹ sọgan yinuwado yé ji bo na tlẹ whàn yé nado do jẹhẹnu dagbe lẹ hia. Eyin hiẹ tẹnpọn nado mọnukunnujẹ nuhewutu mẹlọ do ṣinuwa do we mẹ bo do awuvẹmẹ hia ẹ, a sọgan penugo nado gọalọna ẹn nado plọn nugbo Biblu tọn lẹ. Vlavo mẹlọ kẹalọyi kavi lala, homẹdagbe he a dohia ẹ sọgan hùn dotẹnmẹ dote na ẹn nado lẹnnupọndo walọyizan dagbe towe ji.—1 Pita 2:12; 3:16.
14. Mahopọnna obá he mẹ mẹde sọgan yinuwa hẹ we jẹ, naegbọn hiẹ ma dona hẹnmẹdohomẹ?
14 E ma sọgbe dọ mí ni dogbẹ́ hẹ mẹdelẹ. Di apajlẹ mí ma dona nọ dogbẹ́ hẹ mẹdesẹ sọn agun mẹ lẹ. Yé yin didesẹ sọn agun lọ mẹ na yé wà ylando sinsinyẹn bo ma lẹnvọjọ wutu. Eyin ylando sinsinyẹn he omẹ mọnkọtọn de wà wẹ hẹn we nado gblehomẹ, e sọgan vẹawuna we nado jona ẹn eyin ewọ tlẹ lẹnvọjọ, na nuṣiwa mọnkọtọn lẹ nọ yinuwadomẹji taun. To ninọmẹ mọnkọtọn lẹ mẹ, hiẹ dona to bibiọ Jehovah zọnmii nado gọalọna we nado wleawuna gbigbọ jonamẹ tọn gando ylanwatọ he lẹnvọjọ lọ go. Nujọnu wẹ ehe yin, na hiẹ ma sọgan yọ́n nuhe tin to ahun mẹlọ tọn mẹ. Ṣigba Jehovah yọnẹn. E nọ dindona ayilinlẹn sisosiso mẹde tọn bosọ nọ fahomẹ hẹ ylanwatọ lẹ. (Ps. 7:9; Howh. 17:3) Abajọ Owe-wiwe lẹ do dọmọ: “Mì yí oylan do suahọ oylan tọn na mẹdepope blo. Mì nọ wleawu nuhe yin dagbe to nukun gbẹtọ lẹpo tọn mẹ na yé. Eyin e yọnbasi, dile mì penugo do, mì nọ nọ̀ jijọho mẹ hẹ gbẹtọ lẹpo. Mẹyiwanna lẹ emi, mì yiahọsu na mìde blo, ṣigba mì natẹn homẹgble Jiwheyẹwhe tọn; na e ko yin kinkandai dọmọ: ‘Ṣie wẹ ahọsuyi; yẹn na yiahọsu, wẹ Jehovah dọ.’” (Lom. 12:17-19) Be hiẹ tindo jlọjẹ nado dawhẹna mẹdevo ya? Lala. (Mat. 7:1, 2) Ṣigba hiẹ sọgan deji dọ Jiwheyẹwhe wẹ nọ dawhẹ dodo.
15. Etẹ yinyọnẹn wẹ na gọalọna mí ma nado gblehomẹ zẹjlẹgo do mẹhe yinuwa hẹ mí to aliho agọ̀ mẹ de go?
15 Eyin hiẹ tindo numọtolanmẹ lọ dọ mẹde ko yinuwa hẹ we to aliho agọ̀ mẹ bọ e vẹawuna we nado jona mẹlọ dile etlẹ yindọ ewọ lẹnvọjọ, e na yọ́n nado flindọ mẹlọ lọsu to oyà onú sinsinyẹn de tọn ji. Mape he mí dugu etọn to nuyiwa do ewọ lọsu ji. (Lom. 3:23) Jehovah nọ do awuvẹmẹ hia gbẹtọvi mapenọ lẹpo. Enẹwutu, nuhe sọgbe wẹ e yin nado nọ hodẹ̀ na mẹhe ṣinuwa do mí. E na vẹawu dọ mí ni to homẹgble zọnmii do mẹhe tamẹ mí nọ hodẹ̀ do de go. Humọ, Jesu hẹn ẹn họnwun dọ mí ma dona nọ hẹn mẹhe yinuwa hẹ mí to aliho agọ̀ mẹ lẹ do homẹ dọmọ: “Mì zindonukọn nado nọ yiwanna kẹntọ mìtọn lẹ bo nọ hodẹ̀ na mẹhe to homẹkẹndo mì lẹ.”—Mat. 5:44.
16, 17. Nawẹ hiẹ dona yinuwa gbọn to whenue mẹho agun tọn lẹ wá tadona kọ̀n dọ ylanwatọ de lẹnvọjọ, podọ etẹwutu?
16 Jehovah ko ze azọngban lọ do alọmẹ na mẹho agun tọn lẹ nado nọ didẹ whẹho ylanwiwa tọn lẹ to agun mẹ. Mẹmẹsunnu enẹlẹ ma nọ yọ́n nulẹpo taidi Jiwheyẹwhe, ṣigba yé nọ tẹnpọn nado ze nudide yetọn lẹ sinai do Ohó Jiwheyẹwhe tọn ji to anademẹ gbigbọ wiwe tọn glọ. Enẹwutu, nudide he yé basi to whẹho mọnkọtọn lẹ mẹ to alọgọ Jehovah tọn dindin to odẹ̀ mẹ godo nọ do pọndohlan etọn hia.—Mat. 18:18.
17 Fihe nugbonọ-yinyin yin nujọnu te niyẹn. Eyin mẹho lẹ wá tadona kọ̀n dọ mẹde lẹnvọjọ, be hiẹ na jona mẹlọ bo dohia ẹ dọ a gbẹ́ yiwanna ẹn ya? (2 Kọl. 2:5-8) Ehe sọgan nọma bọawu, titengbe eyin hiẹ kavi hẹnnumẹ towe de jiya na ylando he mẹlọ wà wutu. Etomọṣo, eyin a dejido Jehovah po aliho he mẹ ewọ nọ penukundo whẹho lẹ go to agun lọ mẹ te po go, hiẹ na yinuwa po nuyọnẹn po. Hiẹ na dohia dọ a nọ jonamẹ sọn ojlo mẹ wá nugbonugbo.—Howh. 3:5, 6.
18. Ale tẹlẹ wẹ hiẹ sọgan mọyi eyin a nọ jonamẹ sọn ojlo mẹ wá?
18 Doto he nọ penukundo apọ̀nmẹ-zọ̀n go lẹ mọdọ ale susu wẹ mí nọ mọyi eyin mí nọ jonamẹ sọn ojlo mẹ wá. E nọ zọ́n bọ mí nọ tindo agbasalilo dagbe na mí ma nọ hẹn adi do homẹ kavi gbọṣi awubla mẹ, podọ mí nọ tindo haṣinṣan dagbe hẹ mẹdevo lẹ. To vogbingbọn mẹ, eyin mí ma nọ jonamẹ sọn ojlo mẹ wá, mí sọgan jẹazọ̀n kavi jẹflumẹ, podọ e na nọ vẹawuna mí nado dọhodopọ hẹ mẹdevo lẹ kavi tindo haṣinṣan dagbe hẹ yé. Ṣigba, ale daho hugan he mí nọ mọyi eyin mí nọ jonamẹ sọn ojlo mẹ wá wẹ yindọ, mí nọ tindo haṣinṣan dagbe hẹ Jehovah, yèdọ Otọ́ olọn mẹ tọn mítọn.—Hia Kọlọsinu lẹ 3:12-14.
[Yẹdide to weda 27]
Etẹ ji wẹ Jesu jlo na zinnudo to apajlẹ he e yizan ehe mẹ?
[Yẹdide to weda 30]
Nubiọtomẹsi de wẹ e yin na Klistiani lẹ nado nọ jona mẹdevo lẹ sọn ojlo mẹ wá