Họ́ Dewe Sọta Biblu Yiyizan to Aliho Agọ̀ Mẹ

“OHÓ Jiwheyẹwhe tọn tin to ogbẹ̀ bo tindo huhlọn.” (Heb. 4:12) Po hogbe ehelẹ po, apọsteli Paulu to nùzindo huhlọn he ohó Jiwheyẹwhe tọn tindo nado jẹ ahun gbẹtọ lẹ tọn mẹ podọ nado diọ gbẹzan yetọn ji.

Ṣigba, to whenue atẹṣiṣi he dọdai etọn yin didọ lọ doadọ̀do to okú apọsteli lẹ tọn godo, linlẹn gbẹtọ lẹ tọn gando huhlọn he Biblu tindo go jẹ didiọ ji. (2 Pita 2:1-3) To nukọn mẹ, nukọntọ ṣọṣi tọn lẹ jẹ Ohó Jiwheyẹwhe tọn pọnhlan ji taidi nuhe tindo huhlọn bojijlẹ tọn de. Mẹplọntọ wehọmẹ alavọ tọn Harry Y. Gamble wlanwe gando Owe-wiwe Klistiani tọn lẹ yiyizan taidi obó go. E doayi e go dọ to owhe kanweko atọ̀ntọ whenu, Origène he yin Nukọntọ Ṣọṣi tọn de linlẹn lọ tọ́n dọ “hogbe Owe-wiwe tọn lẹ sisè do otó mẹ tata sọgan gọalọnamẹ to aliho de kavi devo mẹ: eyin hogbe bogbèsisa tọn lẹ tindo huhlọn, be ohó nugbo Jiwheyẹwhe tọn he tin to owe-wiwe mẹ lẹ dona tindo huhlọn taun humọ.” Jean Chrisostome he nọgbẹ̀ to vivọnu owhe kanweko ẹnẹtọ tọn wlan dọ “lẹgba ma tlẹ na gboadọ bo sẹpọ owhé he gbè owe Wẹndagbe tọn de tin te.” E sọ dọ dọ mẹdelẹ nọ plá apadewhe owe Wẹndagbe lẹ tọn do okọ̀ taidi núglónu huhlọnnọ de sọta gbigbọ ylankan lẹ. Mẹplọntọ Gamble na linlin yinukọn dogọ dọ sinsẹ̀n-nuplọnmẹtọ Katoliki tọn Augustin “nọ mọdọ eyin ota to mẹde dù, e sọgan ze vọkan owe Wẹndagbe Johanu tọn do kọ̀donu glọ whẹpo do damlọn.” Enẹwutu, gbẹtọ lẹ jẹ owe Biblu tọn lẹ yizan ji na lẹndai bojijlẹ tọn. Be dèfinfẹ̀n kavi obó tadagbe tọn he sọgan basi hihọ́na we sọn nuylankan mẹ de wẹ hiẹ nọ yí Biblu do mọ ya?

Aliho he mẹ Biblu nọ saba yin ṣiṣizan te hugan wẹ dehe nọ yin yiylọdọ bibliomancie. Etẹwẹ ehe zẹẹmẹdo? E zẹẹmẹdo nado hùn owe de, titengbe Biblu, do weda etọn depope ji poun, bo hia onú tintan he ji nukun mẹtọn jẹ po nuyise lọ po dọ nuhe yè hia lọ na namẹ anademẹ he sin nuhudo yè tindo. Di apajlẹ, mẹplọntọ Gamble wlan dọ, to gbèdopo he Augustine sè ogbè ovivu de tọn sọn owhé he bọdo owhé etọn gbè go he to didọmọ: “Ze bo hia, ze bo hia”, e pọ́n hogbe ehelẹ taidi gbedide de sọn Jiwheyẹwhe dè nado hùn Biblu bo hia owe tintan he ji nukun etọn na jẹ.

Mẹdelẹ nọ hodẹ̀ hlan Jiwheyẹwhe whenue yé to pipehẹ nuhahun de podọ enẹgodo nọ hùn Biblu do weda depope ji poun, po nuyise lọ po dọ wefọ tintan he ji yé na tọ́n jẹ wẹ na gọalọna yé nado didẹ nuhahun lọ. Eyin yé tlẹ nọ wàmọ po mẹwhinwhàn dagbe po, e ma yin lehe Klistiani lẹ dona nọ dín anademẹ sọn Biblu mẹ do niyẹn gba.

Jesu na jide devi etọn lẹ dọ emi na do “alọgọtọ lọ, yèdọ gbigbọ wiwe” hlan yé. E zindonukọn dọmọ: “Enẹ lọ wẹ na plọn mì onú lẹpo bo na hẹn onú lẹpo he yẹn ko dọna mì wá oflin mẹ na mì.” (Joh. 14:26) To vogbingbọn mẹ, nuyiwa bibliomancie tọn ma nọ biọ dọ yè ni tindo oyọnẹn Owe-wiwe lẹ tọn.

Aṣa bibliomancie po Biblu yiyizan to aliho agọ̀ mẹ tọn devo lẹ po ko gbayipe taun. Ṣigba Biblu jẹagọdo afinyọnnuwiwa. (Lev. 19:26; Deut. 18: 9-12; Owalọ 19:19) “Ohó Jiwheyẹwhe tọn tin to ogbẹ̀ bo tindo huhlọn,” ṣigba mí dona yí i zan po azọ́nyinyọnẹn po. Oyọnẹn he pegan Biblu tọn tintindo wẹ nọ hẹn gbẹzan mẹtọn pọnte, e ma yin owe lọ yiyizan to aliho agọ̀ mẹ. Oyọnẹn enẹ ko gọalọna mẹsusu nado tindo walọ dagbe, jo gbẹzan ylankan zinzan do, bo hẹn gbẹzan whẹndo tọn yetọn lodo, bo wleawuna haṣinṣan mẹdetiti tọn de hẹ Dowatọ Biblu tọn.