Ma Dike Nudepope Ni Hẹn We Jẹla sọn Jehovah Dè Blo
“Mì bo de to azán he gbè mẹhe mì na nọ sẹ̀n.”—JỌṢ. 24:15.
1-3. (a) Naegbọn mí sọgan dọ dọ Jọṣua yin apajlẹ dagbe de na mí? (b) Etẹwẹ mí dona hẹn do ayiha mẹ to whenue mí to nudide lẹ basi?
NUDIDE he mí nọ basi to gbẹ̀mẹ lẹ yin nujọnu taun. Yé nọ gọalọna mí nado deanana gbẹzan mítọn. Ehe yin nudopolọ taidi to whenue mẹde to yìyì to ali de ji bo wá mọdọ ali lọ klan do awe. E dona de dehe e na ze. E sọgan de ali he na plan ẹn yì fihe e jei kakati nado de ali awetọ he na plan ẹn yì fidevo pete.
2 Biblu bẹ apajlẹ mẹsusu he basi nudide titengbe lẹ tọn hẹn. Di apajlẹ, Kaini dona de vlavo nado yinuwa sọgbe hẹ homẹgble etọn kavi dava ẹ. (Gẹn. 4:6, 7) Jọṣua dona de nado sẹ̀n Jiwheyẹwhe nugbo lọ kavi yẹwhe lalo lẹ. (Jọṣ. 24:15) Yanwle Jọṣua tọn wẹ nado gbọṣi adà Jehovah tọn mẹ; enẹwutu, e basi nudide he gọalọna ẹn nado jẹ yanwle enẹ kọ̀n. Kaini ma tindo yanwle mọnkọtọn, podọ e basi nudide he hẹn ẹn jẹla pete sọn Jehovah dè.
3 To whedelẹnu, e sọgan biọ dọ mí ni basi nudide to onú awe ṣẹnṣẹn. Eyin enẹ jọ do mí go, mí dona flin dọ nudide mítọn lẹ sọgan pagigona Jehovah bo gọalọna mí nado gbọṣi adà etọn mẹ kavi yé sọgan klan mí sọn ewọ go. (Hia Heblu lẹ 3:12.) To hosọ ehe po dehe bọdego po mẹ, mí na gbadopọnna adà gbẹzan tọn voovo ṣinawe he mẹ mí ma dona dike nudepope ni hẹn mí jẹla sọn Jehovah dè te.
AGBASAZỌ́N
4. Naegbọn e do yin nujọnu nado tindo agbasazọ́n de?
4 Dandannu wẹ e yin na Klistiani lẹ nado penukundo yede po whẹndo yetọn po go. Biblu dohia dọ eyin mẹde ma jlo na wleawudaina whédo etọn, e ylanhu mayisenọ. (2 Tẹs. 3:10; 1 Tim. 5:8) E họnwun dọ agbasazọ́n de tintindo yin onú titengbe de to gbẹzan mítọn mẹ, etomọṣo eyin mí ma tin to aṣeji, agbasazọ́n lọ sọgan hẹn mí jẹla sọn Jehovah dè. Gbọnna?
5. Etẹlẹ ji wẹ mí dona lẹnnupọndo eyin mí to agbasazọ́n de dín?
5 Mí ni dọ dọ a to agbasazọ́n de dín, ṣigba bo nọ nọ̀ otò he mẹ agbasazọ́n mimọ vẹawu te de mẹ. A sọgan yin whiwhlepọn nado kẹalọyi azọ́n tintan kavi azọ́n depope he a mọ. Ṣigba, eyin nuhe azọ́n lọ bẹhẹn lẹ jẹagọdo nunọwhinnusẹ́n Biblu tọn lẹ lo? Etẹwẹ lo eyin tito-to-whinnu azọ́n lọ tọn kavi gbejizọnlin he e na biọ dọ a na nọ basi lẹ na glọnalina we nado nọ tindo mahẹ to nuwiwa Klistiani tọn lẹ mẹ kavi na zọ́n bọ a na dẹn do whẹndo towe? Be a na kẹalọyi azọ́n lọ poun po linlẹn lọ po dọ azọ́n de tintindo pọnte hú de matindo wẹ ya? Flindọ nudide he ma sọgbe de bibasi to ninọmẹ mọnkọtọn mẹ sọgan hẹn we jẹla sọn Jehovah dè. (Heb. 2:1) Eyin a to azọ́n dín kavi to nulẹnpọn nado diọ agbasazọ́n he a tindo to alọnu din, nawẹ a sọgan basi nudide nuyọnẹn tọn gbọn?
6, 7. (a) Yanwle tẹlẹ wẹ mẹde sọgan tindo gando agbasazọ́n go? (b) Yanwle tẹwẹ na hẹn we dọnsẹpọ Jehovah, podọ etẹwutu?
6 Dile mí dọ do wayi, hẹn yanwle towe do ayiha mẹ. Kanse dewe dọ, ‘Etẹwutu n’to azọ́n dín?’ Eyin hiẹ nọ pọ́n agbasazọ́n towe hlan taidi nuhe na gọalọna we nado jẹ yanwle de kọ̀n, yèdọ nado penukundo dewe po whẹndo towe po go na mì nido to Jehovah sẹ̀n zọnmii, Jehovah na dona vivẹnudido towe lẹ. (Mat. 6:33) Jehovah nọ yọ́n nuhe e na wà nado gọalọ to whenue azọ́n gble do mẹde kavi to whenue mẹlọ wá mọ ede to nuhahun sinsinyẹn akuẹzinzan tọn mẹ. (Isa. 59:1) Ewọ “yọ́n lehe e nọ whlẹn mẹhe ze yede jo na Jiwheyẹwhe lẹ sọn whlepọn mẹ do.”—2 Pita 2:9.
7 Ṣigba, etẹwẹ lo eyin yanwle towe wẹ nado jẹ adọkun? Vlavo e sọgan pà we. Ṣigba, eyin a tlẹ lẹzun adọkunnọ, flindọ nude janwẹ a yí do sanvọ́—yèdọ nude he a na suahọ etọn to aliho sinsinyẹn mẹ. (Hia 1 Timoti 6:9, 10.) Ayidonugo nina adọkunnu lẹ po agbasazọ́n po zẹjlẹgo na hẹn we jẹla sọn Jehovah dè.
8, 9. Etẹ ji wẹ mẹjitọ lẹ dona lẹnnupọndo na nuhe dù pọndohlan yetọn gando agbasazọ́n go? Basi zẹẹmẹ.
8 Eyin mẹjitọ de wẹ a yin, flin dọ apajlẹ towe sọgan yinuwado ovi towe lẹ ji. Etẹwẹ yé nọ mọdọ e yin nujọnu na we hugan—agbasazọ́n towe wẹ ya kavi haṣinṣan he a tindo hẹ Jehovah? Eyin yé nọ mọdọ otẹn he mẹ a tin te to azọ́nmẹ, yindidi po adọkun po wẹ nọ duahunmẹna we hugan, be yelọsu ma na basi nudide dopolọ he na hẹn kọdetọn ylankan wá ya? Be sisi he yé tindo na we ma na depò ya? Klistiani jọja de dọmọ: “N’flindọ to ojlẹ de mẹ wayi, otọ́ ṣie hẹn alọnu ján to agbasazọ́n etọn mẹ. To tintan whenu, e taidi dọ e nọ wazọ́n taun na e jlo dọ whẹndo mítọn ni tindo onú dagbe hugan lẹ. E jlo dọ mí ni mọ nukunpedomẹgo dagbe hugan yí. Ṣigba, nude diọ to owhe agọe tọn lẹ mẹ. E nọ to azọ́nwa poun bo nọ họ̀ onú akuẹgegenu tọn he ma yin dandannu na whẹndo lọ. Enẹ zọ́n bọ mí wá yin yinyọnẹn taidi whẹndo adọkunnọ, kakati nido yin whẹndo he nọ na tuli mẹdevo lẹ nado doafọna gbigbọnu lẹ. Nuhe yin ojlo ṣie to whepoponu wẹ yindọ otọ́ ṣie ni gọalọna mi to gbigbọ-liho, kakati nido yin to agbasa-liho.”
9 Mẹjitọ lẹ emi, mì ma hẹn mìde jẹla sọn Jehovah dè gbọn ayidonugo nina agbasazọ́n mìtọn zẹjlẹgo blo. Mì nọ dohia ovi mìtọn lẹ gbọn apajlẹ mìtọn dali dọ mì kẹalọyi nugbonugbo dọ adọkunnu daho hugan he mí sọgan tindo lẹ wẹ gbigbọnu lẹ, e ma yin agbasanu lẹ.—Matiu 5:3.
10. Etẹ ji wẹ jọja de dona lẹnnupọndo to whenue e to nudide basi gando azọ́n he e na wà to gbẹ̀mẹ go?
10 Eyin jọja de wẹ hiẹ yin bo to nulẹnpọn do azọ́n he a na wà to gbẹ̀mẹ ji, nawẹ a sọgan basi nudide he sọgbe gbọn? Dile mí dọ do wayi, nudide towe na sinai do nuhe a jlo na yí gbẹzan towe do wà ji. Be azọ́nplọnmẹ he a jlo na mọyi kavi agbasazọ́n he a to dindin na hẹn ẹn bọawuna we nado doafọna nuhe gando Ahọluduta lọ go lẹ to gigọ́ mẹ ya, kavi e na hẹn we jẹla sọn Jehovah dè? (2 Tim. 4:10) Be yanwle towe wẹ nado zan gbẹzan towe dile mẹhe ayajẹ yetọn nọ sinai do akuẹ he yé tindo ji lẹ nọ wà do ya? Kavi be a na tindo jide taidi Davidi, mẹhe wlan dọmọ: “Yẹn ko tin to yọpọ, yẹn sọ whẹ́n; ganṣo yẹn ma ko mọ yè gbẹ́ dodonọ dai, kavi okún etọn ni to núdùdù biọ”? (Ps. 37:25) Flindọ dopo to nudide lọ lẹ mẹ na hẹn we jẹla sọn Jehovah dè to whenue awetọ na zọ́n bọ a na mọ ogbẹ̀ he yọ́n hugan lọ. (Hia Howhinwhẹn lẹ 10:22; Malaki 3:10.) Nudide tẹwẹ a na basi?a
AYIDEDAI
11. Etẹwẹ Biblu dọ gando ayidedai go, ṣigba etẹwẹ mí dona hẹn do ayiha mẹ?
11 Biblu ma jẹagọdo ayidedai, mọjanwẹ e ma do ayidedai hia taidi nuhe nọ hẹn whenu gú do niyẹn. Apọsteli Paulu wlan hlan Timoti dọmọ: “Agbasa yiyizan yin alenu na onú vude.” (1 Tim. 4:8) Biblu tlẹ dọ dọ “whenu nukiko tọn” po “whenu wedudu tọn” po tin, podọ e na tulimẹ nado nọ gbọjẹ ganji. (Yẹwh. 3:4; 4:6, NW) Ṣigba, eyin mí ma tin to aṣeji, ayidedai sọgan hẹn mí jẹla sọn Jehovah dè. Gbọnna? Suhugan owù he ayidedai bẹhẹn lẹ tọn sinai do ayidedai wunmẹ he mí de po whenu nẹmu he mí nọ yizan na ẹn po ji.
12. Etẹlẹ ji wẹ a dona lẹnnupọndo gando ayidedai wunmẹ he a de go?
12 Tintan, lẹnnupọndo wunmẹ ayidedai lọ tọn ji. Deji dọ a sọgan mọ ayidedai dagbe. Nugbo wẹ dọ suhugan ayidedai he tin lẹ tọn nọ doyẹyigona nuhe Jiwheyẹwhe gbẹwanna lẹ, ehe bẹ danuwiwa, afinyọnnuwiwa po zanhẹmẹ he gblezọn po hẹn. Enẹwutu, a dona nọ gbeje ayidedai he mẹ a nọ tindo mahẹ te pọ́n ganji. Nawẹ e nọ yinuwado jiwe gbọn? Be e nọ whàn we nado tindo gbigbọ danuwiwa, agbàwhinwhlẹn po wanyina akọta mẹtọn po tọn wẹ ya? (Howh. 3:31) Be e nọ vọ̀ akuẹ na we ya? Be e sọgan hẹn mẹdevo lẹ dahli wẹ ya? (Lom. 14:21) Mẹnu lẹ wẹ a nọ dogbẹ́ hẹ to ayidedai lọ whenu? (Howh. 13:20) Be e nọ zọ́n bọ a nọ tindo ojlo nado wà nuhe ma sọgbe lẹ wẹ ya?—Jak. 1:14, 15.
13, 14. Etẹ ji wẹ hiẹ dona lẹnnupọndo na nuhe dù whenu nẹmu he a nọ yizan na ayidedai?
13 Sọ lẹnnupọndo whenu nẹmu he a nọ yizan na ayidedai ji. Kanse dewe dọ, ‘Be n’nọ yí whenu susu zan na ayidedai sọmọ bọ whenu vude wẹ nọ pò na mi na onú gbigbọmẹ tọn lẹ ya?’ Eyin a de nado nọ yí whenu zan na ayidedai zẹjlẹgo, a na mọdọ gbọjẹ whenu towe ma na nọ hẹn ayajẹ wá na we dile e jẹ do. Na nugbo tọn, mẹhe nọ nọ̀ jlẹkaji gando ayidedai go lẹ nọ mọ ayajẹ susu. Etẹwutu? Na yé yọnẹn dọ yé ko wà “nuhe yin nujọnu hugan lẹ” jẹnukọn wutu, yé ma nọ tindo numọtolanmẹ whẹhuhu tọn to whenue yé to ayidedai.—Hia Filippinu lẹ 1:10, 11.
14 Dile etlẹ yindọ whenu susu yiyizan na ayidedai sọgan taidi nuhe sọgbe, nudide mọnkọtọn bibasi sọgan hẹn we jẹla sọn Jehovah dè. Mẹmẹyọnnu owhe 20 mẹvi de he nọ yin Kim tindo numimọ enẹ tọn. E dọmọ: “N’nọ tin to nuwiwa pọmẹ tọn lẹpo tẹnmẹ. Nuwiwa pọmẹ tọn de nọ tin to sẹfifo lẹpo—yèdọ vendredi, samedi po dimanche po. Ṣigba n’wá mọ todin dọ nujọnu susu lẹ wẹ tin he n’dona wà. Di apajlẹ, taidi gbehosọnalitọ de, n’nọ fọ́n to ogàn 6 mẹ afọnnu nado tọ́n na sinsẹ̀nzọn kunnudegbe tọn, enẹwutu n’ma sọgan tin to nuwiwa pọmẹ tọn lẹ tẹnmẹ kakajẹ ogàn dopo kavi awe mẹ to zánmẹ. N’yọnẹn dọ e ma yin nuwiwa pọmẹ tọn lẹpo wẹ ylan, ṣigba yé sọgan fẹayihasẹnamẹ taun. Taidi to whẹho devo lẹ mẹ, mí dona nọ jlẹkaji gando ayidedai go.”
15. Nawẹ mẹjitọ lẹ sọgan gọalọna ovi yetọn lẹ nado de ayidedai he na hẹn ayajẹ wá na yé gbọn?
15 Azọngban mẹjitọ lẹ tọn wẹ e yin nado nọ penukundo yede po ovi yetọn lẹ po go to agbasa-liho, to gbigbọ-liho podọ to numọtolanmẹ-liho. Enẹ bẹ tito bibasina ayidedai lẹ hẹn. Eyin hiẹ yin mẹjitọ de, ma yin hẹngogonọ he nọ pọ́n ayidedai lẹpo hlan taidi nuhe ylan blo. To ojlẹ dopolọ mẹ, tin to aṣeji gando nuyiwadomẹji agọ̀ yetọn lẹ go. (1 Kọl. 5:6) Eyin hiẹ yí sọwhiwhe do lẹnnupọndo ayidedai lẹ ji jẹnukọn, a na penugo nado de ayidedai he na hẹn ayajẹ wá na whẹndo towe.b Gbọnmọ dali, hiẹ po ovi towe lẹ po na basi nudide he na gọalọna mì nado dọnsẹpọ Jehovah.
HAṢINṢAN WHẸNDO TỌN
16, 17. Ninọmẹ awubla tọn tẹwẹ ko yinuwado mẹjitọ susu ji, podọ nawẹ mí wagbọn do yọnẹn dọ Jehovah mọnukunnujẹ awufiẹsa yetọn mẹ?
16 Haṣinṣan he nọ tin to mẹjitọ de po ovi etọn po ṣẹnṣẹn sinyẹn sọmọ bọ Jehovah yí haṣinṣan enẹ zan nado do owanyi he ewọ tindo na omẹ etọn lẹ hia. (Isa. 49:15) Enẹwutu nuhe sọgbe wẹ e yin na mẹde nado sè vivẹ́ to whenue hagbẹ whẹndo tọn etọn he e yiwanna de jo Jehovah do. Mẹmẹyọnnu he viyọnnu etọn yin didesẹ sọn agun mẹ de dọmọ: “N’jẹflumẹ taun. N’kanse dee dọ ‘Naegbọn e do jo Jehovah do?’ N’tindo numọtolanmẹ dọ owhẹ̀ ṣie wẹ podọ n’dowhẹ dee.”
17 Jehovah mọnukunnujẹ awufiẹsa towe mẹ, na e “doadi na [ewọ lọsu] to ayiha etọn mẹ” to whenue gbẹtọvi tintan lẹ po suhugan mẹhe wá nọgbẹ̀ jẹnukọnna Singigọ lẹ tọn po ṣiatẹ. (Gẹn. 6:5, 6) E sọgan vẹawuna mẹhe hẹnnumẹ etọn ma yin didesẹ sọn agun mẹ pọ́n de nado mọnukunnujẹ lehe enẹ nọ hẹnmẹ jẹflumẹ do mẹ. Etomọṣo, e ma yin nuyọnẹnnu nado dike nuyiwa he ma sọgbe hagbẹ whẹndo tọn he yin didesẹ sọn agun mẹ de tọn ni hẹn we jẹla sọn Jehovah dè. To whelọnu lo, nawẹ a sọgan yinuwa to awubla sinsinyẹn he hagbẹ whẹndo tọn he jo Jehovah do de nọ hẹnwa mẹ gbọn?
18. Naegbọn mẹjitọ lẹ ma dona dowhẹ yede eyin ovi yetọn de jo Jehovah do?
18 Ma dowhẹ dewe na nuhe jọ wutu blo. Jehovah ko na gbẹtọvi lẹ mẹdekannujẹ nudide bibasi tọn, podọ hagbẹ whẹndo tọn dopodopo he klan ede do wiwe bo yí baptẹm dona “hẹn agbàn edetiti tọn.” (Gal. 6:5) To popolẹpo mẹ, ylandonọ lọ wẹ na dogbè nudide he e basi tọn na Jehovah, e ma yin hiẹ. (Ezek. 18:20) Podọ ma dowhẹ mẹdevo lẹ blo. Nọgodona tito mẹplọnlọdidomẹgo tọn he Jehovah wleawuna. Diọnukunsọ Lẹgba, e ma yin lẹngbọhọtọ he ze afọdide nado basi hihọ́na agun lọ lẹ.—1 Pita 5:8, 9.
19, 20. (a) Nawẹ mẹjitọ he ovi yetọn yin didesẹ sọn agun mẹ lẹ sọgan yinuwa to awubla yetọn mẹ gbọn? (b) Todido tẹwẹ mẹjitọ mọnkọtọn lẹ sọgan tindo?
19 To alọ devo mẹ, eyin a de nado gblehomẹ do Jehovah go, ehe na hẹn we jẹla sọn ewọ dè. Na nugbo tọn, hagbẹ whẹndo towe tọn lọ dona mọdọ a magbe gligli nado ze Jehovah do otẹn tintan mẹ to onú lẹpo mẹ—etlẹ yin haṣinṣan he a tindo hẹ whẹndo towe lọsu. Enẹwutu nado pehẹ ninọmẹ lọ, dovivẹnu nado hẹn haṣinṣan towe hẹ Jehovah lodo. Ma klan dewe dovo na mẹmẹsunnu po mẹmẹyọnnu nugbonọ towe lẹ po blo. (Howh. 18:1) Dọ numọtolanmẹ towe lẹ na Jehovah to odẹ̀ mẹ. (Ps. 62:7, 8) Ma dín whẹjijọ nado nọ dogbẹ́ hẹ hagbẹ whẹndo towe tọn he yin didesẹ sọn agun mẹ blo, di apajlẹ, gbọn hodidọ hẹ ẹ to alokan kavi Internet ji dali. (1 Kọl. 5:11) Hẹn alọnu towe ján to nuwiwa gbigbọmẹ tọn lẹ mẹ. (1 Kọl. 15:58) Mẹmẹyọnnu he dọho wayi lọ dọmọ: “N’yọnẹn dọ n’dona hẹn alọnu ṣie ján to sinsẹ̀nzọn Jehovah tọn mẹ bo hẹn gbigbọnọ-yinyin ṣie go gligli, na to whenue viyọnnu ṣie na lẹkọwa Jehovah dè, n’na tin to otẹn dagbe mẹ nado gọalọna ẹn.”
20 Biblu dọ dọ owanyi “nọ do todido to onú lẹpo mẹ.” (1 Kọl. 13:4, 7) E ma ylan nado tindo todido dọ mẹyiwanna towe na lẹkọwa Jehovah dè. To owhe dopodopo mẹ, ylanwatọ susu nọ lẹnvọjọ bo nọ lẹkọwa titobasinanu Jehovah tọn mẹ. Jehovah ma gbẹ́ nọ to homẹgble do yé go to whenue yé lẹnvọjọ godo. Kakatimọ ewọ nọ “wleawu nado jona” yé.—Ps. 86:5.
NỌ BASI NUDIDE NUYỌNẸN TỌN
21, 22. Etẹwẹ yin gbemima towe gando mẹdekannujẹ nudide bibasi tọn towe yiyizan go?
21 Jehovah na gbẹtọvi lẹ mẹdekannujẹ nudide bibasi tọn. (Hia Deutelonomi 30:19, 20.) Ṣigba mẹdekannujẹ enẹ bẹ azọngban sinsinyẹn de hẹn. Klistiani dopodopo dona kanse ede dọ: ‘Nudide tẹ basi wẹ n’te? Be n’ko na dotẹnmẹ agbasazọ́n, ayidedai kavi haṣinṣan whẹndo tọn nado hẹn mi jẹla sọn Jehovah dè wẹ ya?’
22 Owanyi he Jehovah tindo na omẹ etọn lẹ ma nọ diọ. Nudepope ma sọgan hẹn mí jẹla sọn Jehovah dè, adavo mí basi nudide he ma sọgbe. (Lom. 8:38, 39) Ṣigba mí sọgan dapana enẹ. Enẹwutu, magbe ma nado dike nudepope ni hẹn we jẹla sọn Jehovah dè. Hosọ he bọdego na dọhodo adà voovo ẹnẹ devo lẹ ji, ehe mẹ mí sọgan do gbemima enẹ hia te.
[Nudọnamẹ odò tọn]
a Na nudọnamẹ dogọ gando azọ́n he a na wà to gbẹ̀mẹ dide go, pọ́n hosọ lọ “Jọja lẹ Emi—Mì Doafọna Yanwle He Nọ Gbògbéna Jiwheyẹwhe Lẹ” to Atọ̀họ̀-Nuhihọ́ lọ Tọn 1er mai 2007, weda 24 mẹ.
b Nado mọ ayinamẹ lẹ gando ayidedai go, pọ́n Mì Gbọṣi Owanyi Jiwheyẹwhe Tọn Mẹ, weta 6.