“Na Nugbo Tọn, Mẹnu Wẹ Afanumẹ Nugbonọ Podọ Nuyọnẹntọ Lọ?”
“Mẹnu wẹ afanumẹ nugbonọ podọ nuyọnẹntọ lọ he oklunọ etọn de do devizọnwatọ whégbè tọn etọn lẹ ji?”—MAT. 24:45.
BE HIẸ SỌGAN MỌ GBLỌNDO LỌ YA?
Mẹnu wẹ yin afanumẹ nugbonọ podọ nuyọnẹntọ lọ?
Mẹnu wẹ yin devizọnwatọ whégbè tọn lẹ, podọ whetẹnu wẹ Jesu de afanumẹ nugbonọ lọ do yé ji?
Whetẹnu wẹ Klisti na de afanumẹ nugbonọ lọ do nutindo etọn lẹpo ji, podọ etẹlẹ wẹ nutindo enẹlẹ bẹhẹn?
1, 2. Mẹnu wẹ Jesu nọ yizan nado na mí núdùdù to egbehe, podọ naegbọn e do yin nujọnu dọ mí ni yọ́n afanumẹ enẹ?
“MẸMẸSUNNU lẹ emi, n’ma gán dọ whla nẹmu he mì ko zín hosọ he n’tindo nuhudo etọn pẹpẹ jẹgbonu to ojlẹ he mẹ n’tindo nuhudo etọn hugan te.” Nuhe mẹmẹyọnnu de dọ to wekanhlanmẹ de mẹ hlan mẹmẹsunnu he nọ wazọ́n to tatọ́-tẹnnọ mítọn lẹ niyẹn nado dopẹ́ na yé. Be hiẹ lọsu tindo numọtolanmẹ enẹ pọ́n ya? Susu to mí mẹ ko wàmọ pọ́n. Be enẹ dona paṣa mí wẹ ya? Lala.
2 Núdùdù gbigbọmẹ tọn he mí nọ mọyi to ojlẹ sisọ mẹ yin kunnudenu lọ dọ Jesu he yin Ota agun lọ tọn, to opagbe he e do nado na mí núdùdù hẹndi. Mẹnu gblamẹ wẹ ewọ to ehe wà gbọn? To whenue Jesu to hodọ gando ohia tintin tofi etọn tọn go, e dọ dọ emi na yí “afanumẹ nugbonọ podọ nuyọnẹntọ lọ” zan nado na ‘núdùdù devizọnwatọ whégbè tọn emitọn lẹ to ojlẹ sisọ mẹ.’a (Hia Matiu 24:45-47.) Afanumẹ nugbonọ enẹ wẹ Jesu to yiyizan nado nọ na núdùdù hodotọ nugbonọ etọn lẹ to ojlẹ opodo tọn ehe mẹ. Nujọnu wẹ e yin dọ mí ni yọ́n afanumẹ enẹ. Dagbemẹninọ mítọn to gbigbọ-liho sinai do núdùdù gbigbọmẹ tọn mimọyi sọn afanumẹ enẹ dè ji.—Mat. 4:4; Joh. 17:3.
3. Zẹẹmẹ tẹwẹ yin nina to owe mítọn lẹ mẹ wayi do apajlẹ he Jesu na gando afanumẹ nugbonọ lọ go ji?
3 Enẹwutu, nawẹ mí dona mọnukunnujẹ apajlẹ he Jesu na gando afanumẹ nugbonọ lọ go mẹ gbọn? To ojlẹ delẹ mẹ wayi, owe mítọn lẹ dọ nuhe bọdego ehelẹ: To Pẹntikọsti 33 W.M., Jesu de afanumẹ lọ do devizọnwatọ whégbè tọn etọn lẹ ji. Sọn ojlẹ enẹ mẹ, mẹyiamisisadode lẹpo he tin to aigba ji to ojlẹ tangan de mẹ to pọmẹ wẹ yin afanumẹ lọ. Devizọnwatọ whégbè tọn etọn lẹ nọtena mẹyiamisisadode dopodopo. To 1919, Jesu de afanumẹ nugbonọ lọ “do nutindo etọn lẹpo ji,” enẹ wẹ nutindo Ahọluduta etọn tọn lẹpo to aigba ji. Ṣigba, to whenue mí yí sọwhiwhe do hodẹ̀ bo plọnnu sisosiso bosọ lẹnayihamẹpọn yinukọn dogọ, mí mọdọ mí dona basi vọjlado to nukunnumọjẹnumẹ mítọn mẹ na nuhe dù hogbe Jesu tọn lẹ gando afanumẹ nugbonọ podọ nuyọnẹntọ lọ go. (Howh. 4:18) Mì gbọ mí ni gbadopọnna apajlẹ lọ bo pọ́n lehe e gando mí go do, vlavo mí tindo todido olọn mẹ tọn kavi aigba ji tọn.
WHETẸNU WẸ APAJLẸ LỌ MỌ HẸNDI?
4-6. Naegbọn mí sọgan wá tadona kọ̀n dọ 1914 godo wẹ apajlẹ he Jesu na gando afanumẹ nugbonọ lọ go jẹ hẹndi mọyi ji?
4 Lẹdo wefọ he dọhodo afanumẹ lọ ji lẹ tọn dohia dọ apajlẹ lọ jẹ hẹndi mọyi ji to ojlẹ opodo lọ tọn ehe mẹ, e ma yin to Pẹntikọsti 33 W.M. Mì gbọ mí ni pọ́n lehe Biblu gọalọna mí nado wá tadona ehe kọ̀n do.
5 Apajlẹ he Jesu na gando afanumẹ lọ go yin apadewhe dọdai etọn tọn gando “ohia tintin tofi [etọn] tọn po vivọnu titonu lọ tọn po” go. (Mat. 24:3) Adà tintan dọdai lọ tọn he tin to Matiu 24:4-22 mẹ mọ hẹndi whla awe. Tintan, bẹsọn owhe 33 W.M. jẹ 70 W.M., podọ awetọ, to aliho he gbloada hugan de mẹ to azán mítọn gbè. Be ehe zẹẹmẹdo dọ hogbe Jesu tọn lẹ gando afanumẹ nugbonọ lọ go lẹ lọsu na tindo hẹndi awe wẹ ya? Lala.
6 Bẹsọn hogbe he yin kinkandai to Matiu 24:29 mẹ lẹ ji, Jesu zinnudo nujijọ he na wá aimẹ to azán mítọn gbè lẹ ji. (Hia Matiu 24:30, 42, 44.) To whenue Jesu to hodọ gando nuhe na jọ to nukunbibia daho lọ whenu lẹ go, e dọ dọ gbẹtọ lẹ “nasọ mọ Visunnu gbẹtọ tọn ja to aslọ olọn tọn lẹ mẹ.” Enẹgodo, to whenue e to hodọ gando mẹhe na nọgbẹ̀ to azán godo tọn lẹ mẹ go, e dotuhomẹna yé nado nọ aṣeji bo dọmọ: “Mì ma yọ́n azán he gbè Oklunọ mìtọn ja,” podọ “Ogàn he mẹ mì ma lẹn do wẹ Visunnu gbẹtọ tọn ja.”b Sọgbe hẹ lẹdo wefọ ehe tọn, to whenue Jesu to hodọ gando nujijọ he na wá aimẹ to azán godo tọn lẹ mẹ go wẹ e na apajlẹ afanumẹ nugbonọ lọ tọn. Enẹwutu, e họnwun dọ nuhe Jesu dọ gando afanumẹ nugbo enẹ go lẹ jẹ hẹndi mọyi ji to whenue azán godo tọn lẹ bẹjẹeji to 1914 godo. Tadona mọnkọtọn sọgbe hẹ lẹnpọn dagbe. Etẹwutu?
7. Kanbiọ titengbe tẹwẹ fọndote to whenue ojlẹ jibẹwawhé tọn bẹjẹeji, podọ etẹwutu?
7 Yì agbọ́ ji vude bo lẹnnupọndo kanbiọ ehe ji: “Na nugbo tọn, mẹnu wẹ yin afanumẹ nugbonọ podọ nuyọnẹntọ lọ?” To owhe kanweko tintan whenu, e na vẹawu nado fọ́n kanbiọ mọnkọtọn dote. Dile mí mọ to hosọ he wayi mẹ do, apọsteli lẹ sọgan wà azọ́njiawu lẹ bo tlẹ sọgan namẹ nunina jiawu lẹ, ehe yin kunnudenu dọ yé tindo godonọnamẹ Jiwheyẹwhe tọn. (Owalọ 5:12) Enẹwutu, mẹdepope ma tindo nuhudo nado kanse dọ mẹnu na taun tọn wẹ Klisti de nado yin nukọntọ na hodotọ etọn lẹ. Ṣigba to 1914, ninọmẹ lọ gbọnvo taun. Ojlẹ jibẹwawhé tọn bẹjẹeji to owhe enẹ mẹ. Ojlẹ lọ wá sọ̀ nado klan ogbé ylankan lẹ sọn likun lọ go. (Mat. 13:36-43) Kanbiọ titengbe de fọndote to whenẹnu: To whenuena e yindọ Klistiani lalo susu wẹ nọ ylọ yede dọ hodotọ nugbo Jesu tọn lẹ, nawẹ likun lọ he nọtena Klistiani yiamisisadode lẹ sọgan yin yinyọnẹn gbọn? Apajlẹ he Jesu na gando afanumẹ nugbonọ lọ go gọalọna mí nado yọ́n gblọndo lọ. Hodotọ yiamisisadode Klisti tọn lẹ wẹ na mọ núdùdù gbigbọmẹ tọn he yé tindo nuhudo etọn yí.
MẸNU WẸ YIN AFANUMẸ NUGBONỌ PODỌ NUYỌNẸNTỌ LỌ?
8. Naegbọn e do sọgbe hẹ lẹnpọn dagbe dọ afanumẹ nugbonọ lọ ni bẹ Klistiani yiamisisadode lẹ hẹn?
8 Afanumẹ nugbonọ lọ dona bẹ Klistiani yiamisisadode lẹ hẹn. Omẹ mọnkọtọn lẹ nọ yin yiylọdọ “yẹwhenọ he to sinsẹ̀n di ahọlu lẹ” bosọ yin azọ́ndena nado “‘lá gigo daho’ omẹ lọ he ylọ [yé] sọn zinvlu mẹ wá hinhọ́n jiawu etọn mẹ tọn lẹ.” (1 Pita 2:9) Enẹwutu, e sọgbe hẹ lẹnpọn dagbe dọ hagbẹ “yẹwhenọ he to sinsẹ̀n di ahọlu lẹ” tọn enẹlẹ ni tindo mahẹ tlọlọ to nugbo lọ pinplọn yisenọ hatọ yetọn lẹ mẹ.—Mal. 2:7; Osọ. 12:17.
9. Be Klistiani yiamisisadode lẹpo wẹ yin afanumẹ nugbonọ lọ ya? Basi zẹẹmẹ.
9 Ṣigba, be mẹyiamisisadode he tin to aigba ji lẹpo wẹ yin afanumẹ nugbonọ lọ ya? Lala. Nugbo lọ wẹ yindọ e ma yin mẹyiamisisadode lẹpo wẹ tindo azọngban nado nọ na núdùdù gbigbọmẹ tọn yisenọ hatọ lẹ lẹdo aihọn pé. To mẹmẹsunnu yiamisisadode he nọtena likun lọ lẹ mẹ, mẹdelẹ tin he sọgan to sinsẹ̀n taidi devizọnwatọ kavi mẹho to agun yetọn lẹ mẹ. Yé nọ plọnmẹ sọn whédegbè jẹ whédegbè podọ to agun yetọn mẹ, bosọ nọ yí nugbonọ-yinyin do kẹalọyi anademẹ he wá sọn tatọ́-tẹnnọ lọ lẹ. Ṣigba, yé ma nọ tindo mahẹ to núdùdù gbigbọmẹ tọn nina pipli mẹmẹsunnu lẹ tọn lẹdo aihọn pé mẹ gba. Humọ, mẹmẹyọnnu he yin mẹyiamisisadode lẹ ma nọ tẹnpọn gbede nado didá azọngban mẹpinplọn tọn to agun mẹ.—1 Kọl. 11:3; 14:34.
10. Mẹnu wẹ yin afanumẹ nugbonọ podọ nuyọnẹntọ lọ?
10 To whelọnu lo, mẹnu wẹ yin afanumẹ nugbonọ podọ nuyọnẹntọ lọ? Sọgbe hẹ tito he Jesu zedai nado na núdùdù mẹsusu gbọn omẹ vude gblamẹ, afanumẹ enẹ yin pipli pẹvi mẹmẹsunnu yiamisisadode lẹ tọn de he nọ tindo mahẹ tlọlọ to awuwiwlena núdùdù gbigbọmẹ tọn po mimá etọn po mẹ to tintin tofi Klisti tọn whenu. To azán godo tọn ehelẹ mẹ, mẹmẹsunnu yiamisisadode lẹ he nọpọ́ nado yin afanumẹ nugbonọ lọ to sinsẹ̀nzọn wà to pọmẹ to tatọ́-tẹnnọ mítọn. To owhe agọe tọn lẹ mẹ, Hagbẹ Anademẹtọ Kunnudetọ Jehovah tọn lẹ tọn wẹ yin afanumẹ enẹ. Humọ, doayi e go dọ Jesu dlẹnalọdo “afanumẹ” lọ taidi mẹdopo, bo gbọnmọ dali dohia dọ pipli de wẹ afanumẹ ehe yin. Enẹwutu, Hagbẹ Anademẹtọ lọ nọ basi nudide yetọn lẹ to pọmẹ.
MẸNU WẸ YIN DEVIZỌNWATỌ WHÉGBÈ TỌN LẸ?
11, 12. (a) Azọ́ndenamẹ awe tẹlẹ wẹ afanumẹ nugbonọ podọ nuyọnẹntọ lọ mọyi? (b) Whetẹnu wẹ Jesu deazọ́nna afanumẹ nugbonọ lọ nado penukundo devizọnwatọ whégbè tọn etọn lẹ go, podọ mẹnu lẹ wẹ e de?
11 E jẹna ayidego taun dọ to apajlẹ Jesu tọn mẹ, afanumẹ nugbonọ podọ nuyọnẹntọ lọ mọ azọ́ndenamẹ voovo awe yí. Tintan gando devizọnwatọ whégbè tọn lẹ go, podọ awetọ gando nutindo oklunọ lọ tọn lẹpo go. To whenuena e yindọ azán godo tọn lẹ kẹdẹ mẹ wẹ apajlẹ lọ na mọ hẹndi te, azọ́ndenamẹ awe lọ lẹ na wá aimẹ to tintin tofi Jesu tọn whenu taidi ahọlu, ehe bẹjẹeji to 1914.
12 Whetẹnu wẹ Jesu de afanumẹ nugbonọ lọ do devizọnwatọ whégbè tọn etọn lẹ ji? Nado na gblọndo kanbiọ enẹ tọn, mí dona lẹkọyi 1914, yèdọ to bẹjẹeji ojlẹ jibẹwawhé tọn. Dile mí plọn wayi do, pipli susu wẹ nọ ylọ yede dọ Klistiani to ojlẹ enẹ mẹ. Pipli tẹ mẹ wẹ Jesu na de afanumẹ nugbonọ lọ sọn bo deazọ́nna ẹn? Kanbiọ enẹ mọ gblọndo to whenue ewọ po Otọ́ etọn po wá nado gbeje tẹmpli kavi tito gbigbọmẹ tọn na sinsẹ̀n-bibasi lọ pọ́n, bẹsọn 1914 jẹ bẹjẹeji 1919 tọn.c (Mal. 3:1) Homẹ yetọn hùn nado mọdọ pipli pẹvi Biblu Plọntọ nugbonọ lẹ tọn de dohia dọ yé yiwanna Jehovah bosọ kẹalọyi Ohó etọn. Nugbo wẹ dọ, yé tindo nuhudo nado yin kiklọ́we, ṣigba yé yinuwa po whiwhẹ po to ojlẹ kleun mẹtẹnpọn po vọjlado po tọn enẹ mẹ. (Mal. 3:2-4) Biblu Plọntọ nugbonọ enẹlẹ wẹ yin Klistiani nugbo he nọtena likun lọ. To 1919, yèdọ to ojlẹ vọjlado gbigbọmẹ tọn lọ whenu, Jesu de mẹmẹsunnu yiamisisadode he penugo delẹ sọn yé mẹ nado yin afanumẹ nugbonọ podọ nuyọnẹntọ lọ bo deazọ́nna ẹn nado penukundo devizọnwatọ whégbè tọn etọn lẹ go.
13. Mẹnu lẹ wẹ yin devizọnwatọ whégbè tọn lẹ, podọ etẹwutu?
13 To whelọnu lo, mẹnu lẹ wẹ yin devizọnwatọ whégbè tọn lẹ? Do glido, mẹhe nọ mọ núdùdù gbigbọmẹ tọn lọ yí lẹ wẹ. To bẹjẹeji azán godo tọn lẹ tọn, mẹyiamisisadode lẹpo wẹ yin devizọnwatọ whégbè tọn lẹ. To nukọn mẹ, gbẹtọ susugege lẹngbọ devo lẹ tọn lọsu wá kọnawudopọ hẹ yé. To egbehe, lẹngbọ devo lẹ wẹ suhugan to “lẹngbọpa dopo” he tin to anademẹ Klisti tọn glọ lọ mẹ. (Joh. 10:16) Pipli awe lẹpo nọ mọaleyi sọn núdùdù gbigbọmẹ tọn dopolọ he afanumẹ nugbonọ lọ nọ na yé to ojlẹ sisọ mẹ lọ mẹ. Etẹwẹ dogbọn mẹmẹsunnu he tin to Hagbẹ Anademẹtọ lọ he yin afanumẹ nugbonọ podọ nuyọnẹntọ lọ mẹ to egbehe dali? Mẹmẹsunnu ehelẹ lọsu tindo nuhudo nado dùnú to gbigbọ-liho. Enẹwutu, yé nọ gbọn whiwhẹ dali kẹalọyi dọ dopodopo yetọn yin devizọnwatọ whégbè tọn lẹ kẹdẹdile hodotọ nugbo Jesu tọn he pò lẹpo yin do.
14. (a) Azọngban tẹwẹ yin zizedo alọmẹ na afanumẹ nugbonọ lọ, podọ etẹwẹ ehe bẹhẹn? (b) Avase tẹwẹ Jesu na afanumẹ nugbonọ podọ nuyọnẹntọ lọ? (Pọ́n apotin lọ, “Eyin Afanumẹ Ylankan Enẹ . . .”)
14 Azọngban sinsinyẹn de wẹ Jesu zedo alọmẹ na afanumẹ nugbonọ lọ. To ojlẹ Biblu tọn mẹ, afanumẹ kavi họ̀nkọnsi dejidego de wẹ nọ yin dide nado penukundo whédo ogán etọn tọn go. (Luku 12:42) Enẹwutu, afanumẹ lọ tindo azọngban nado penukundo whédo yise tọn lọ go. Enẹ bẹ nukunpipedo nutindo, azọ́n yẹwhehodidọ tọn, tito plidopọ lẹ tọn, zinjẹgbonu owe sinai do Biblu ji he na yin yiyizan to lizọnyizọn kunnudegbe tọn mẹ lẹ gọna Biblu pinplọn mẹdetiti tọn po agun tọn po go hẹn. Núdùdù gbigbọmẹ tọn he afanumẹ lọ nọ wleawuna lẹpo wẹ nọ hẹn devizọnwatọ whégbè tọn lẹ dogbẹ̀ to gbigbọ-liho.
WHETẸNU WẸ AFANUMẸ LỌ YIN DIDE DO NUTINDO OKLUNỌ ETỌN TỌN LẸ JI?
15, 16. Whetẹnu wẹ Jesu na de afanumẹ nugbonọ lọ do nutindo etọn lẹpo ji?
15 Whetẹnu wẹ Jesu ze azọngban awetọ lọ do alọmẹ na afanumẹ lọ, enẹ wẹ nado de e “do nutindo etọn lẹpo ji”? Jesu dọmọ: “Ayajẹnọ wẹ afanumẹ enẹ eyin oklunọ etọn wá bo mọdọ e to mọwà! Nugbo wẹ yẹn dọna mì, Ewọ na de e do nutindo etọn lẹpo ji.” (Mat. 24:46, 47) Doayi e go dọ Jesu na de afanumẹ lọ do nutindo etọn lẹpo ji to whenue ewọ na wá bo mọdọ afanumẹ lọ “to mọwà,” enẹ wẹ yindọ e to núdùdù gbigbọmẹ tọn namẹ po nugbonọ-yinyin po. Enẹwutu, to whenue Jesu de afanumẹ lọ do devizọnwatọ whégbè tọn etọn lẹ ji godo, ojlẹ de na juwayi whẹpo ewọ nado de e do nutindo etọn lẹpo ji. Nado yọ́n lehe Jesu na de afanumẹ lọ do nutindo etọn lẹpo ji do po whenue ewọ na wàmọ po, mí dona yọ́n whenue ewọ na wá podọ nuhe nutindo etọn lẹpo bẹhẹn.
16 Whetẹnu wẹ Jesu na wá? Lẹdo hodidọ etọn tọn do gblọndo lọ hia. Flindọ, to whenue Jesu dọ to wefọ he jẹnukọn lẹ mẹ dọ emi “ja,” hogbe he e yizan lọ dlẹnalọdo ojlẹ he mẹ ewọ na wá nado dawhẹ bo hẹn whẹdida ṣẹ to vivọnu titonu ehe tọn.d (Mat. 24:30, 42, 44) Enẹwutu, sọgbe hẹ apajlẹ he Jesu na gando afanumẹ nugbonọ lọ go, nukunbibia daho lọ whenu wẹ ewọ “ja” kavi na “wá.”
17. Etẹwẹ nutindo Jesu tọn lẹ bẹhẹn?
17 Etẹwẹ “nutindo [Jesu tọn] lẹpo” bẹhẹn? To whenue Jesu yí hogbe lọ “lẹpo” zan, ewọ ma to alọdlẹndo nutindo etọn he tin to aigba ji lẹ kẹdẹ gba. Na nugbo tọn, Jesu tindo aṣẹpipa he gbloada to olọn mẹ. Ewọ dọmọ: “Aṣẹ lẹpo ko yin nina mi to olọn mẹ podọ to aigba ji.” (Mat. 28:18; Efe. 1:20-23) To alọnu din, nutindo etọn lẹ bẹ Ahọluduta Mẹsia tọn he lẹzun etọn sọn 1914 gbọ́n, podọ ehe ewọ na má hẹ hodotọ yiamisisadode etọn lẹ hẹn.—Osọ. 11:15.
18. Naegbọn homẹ Jesu tọn na hùn nado deazọ́nna afanumẹ lọ do nutindo etọn lẹpo ji?
18 Po nuhe mí ko gbadopọnna kakajẹ din lẹ po, tadona tẹ kọ̀n wẹ mí sọgan wá? To whenue Jesu na wá nado dawhẹ to nukunbibia daho lọ whenu, ewọ na mọdọ afanumẹ lọ yí nugbonọ-yinyin do to núdùdù gbigbọmẹ tọn na devizọnwatọ whégbè tọn lọ lẹ to ojlẹ sisọ mẹ. To whenẹnu, homẹ Jesu tọn na hùn nado ze azọ́ndenamẹ awetọ lọ do alọmẹ na afanumẹ lọ, enẹ wẹ nado de e do nutindo etọn lẹpo ji. Mẹhe wleawuna afanumẹ nugbonọ lọ lẹ na mọ azọ́ndenamẹ ehe yí to whenue yé na mọ ahọsumẹ olọn mẹ tọn yetọn yí, bo na gbọnmọ dali lẹzun gandutọgbẹ́ Klisti tọn lẹ.
19. Be ahọsumẹ he afanumẹ nugbonọ lọ na mọyi to olọn mẹ na hugan mẹyiamisisadode he pò lẹ tọn wẹ ya? Basi zẹẹmẹ.
19 Be ehe zẹẹmẹdo dọ ahọsumẹ he afanumẹ nugbonọ lọ na mọyi to olọn mẹ na hugan mẹyiamisisadode he pò lẹ tọn wẹ ya? Lala. To whedelẹnu, yè sọgan dopà ahọsumẹ de tọn na pipli pẹvi de bọ mẹdevo lẹ sọgan wá mọaleyi sọn e mẹ. Di apajlẹ, lẹnnupọndo nuhe Jesu dọna apọsteli nugbonọ 11 etọn lẹ ji to ozán he jẹnukọnna okú etọn mẹ. (Hia Luku 22:28-30.) Jesu dopà na pipli pẹvi sunnu lẹ tọn enẹ dọ ahọsumẹ dagbe de to tepọn yé, eyin yé hẹn nugbonọ-yinyin yetọn go. Yé na duahọlu hẹ ẹ to ahọluduta etọn mẹ. Ṣigba, to owhe lẹ godo, ewọ dohia dọ gbẹtọ 144 000 lẹpo wẹ na sinai to ofìn lẹ ji bo na duahọlu hẹ emi. (Osọ. 1:1; 3:21) Mọdopolọ, dile Matiu 24:47 dohia do, ewọ dopà na pipli pẹvi sunnu lẹ tọn enẹ, yèdọ mẹmẹsunnu yiamisisadode he nọpọ́ do yin afanumẹ lọ dọ emi na de yé do nutindo emitọn lẹpo ji. Na nugbo tọn, gbẹtọ 144 000 lẹpo na tindo mahẹ to aṣẹpipa he gbloada olọn mẹ tọn etọn mẹ.—Osọ. 20:4, 6.
20. Naegbọn Jesu do de afanumẹ nugbonọ lọ, podọ etẹwẹ yin gbemima towe?
20 Gbọn afanumẹ nugbonọ podọ nuyọnẹntọ lọ gblamẹ, Jesu zindonukọn nado nọ hodo tito he e zedai to owhe kanweko tintan whenu, enẹ wẹ nado na núdùdù mẹsusu gbọn omẹ vude gblamẹ. Jesu de afanumẹ nugbonọ enẹ nado hẹn ẹn diun dọ hodotọ nugbo etọn lẹpo na nọ mọ núdùdù gbigbọmẹ tọn yí to gbesisọ mẹ to azán godo tọn lẹ mẹ. Mì gbọ mí ni magbe nado do pinpẹn-nutọn-yinyọnẹn mítọn hia bo yí nugbonọ-yinyin do nọgodona afanumẹ nugbonọ lọ.—Heb. 13:7, 17.
AYIDONUGO: (Na yin hihia taidi nudọnamẹ odò tọn to hukan he yé sọgbe hẹ lẹ hihia whenu.)
[Nudọnamẹ odò tọn]
a Hukan 2: To nujijọ de mẹ jẹnukọn, Jesu na apajlẹ mọnkọtọn de he mẹ e ylọ “afanumẹ” lọ dọ “họ̀nkọnsi” podọ “devizọnwatọ whégbè tọn” lẹ dọ “pipli devizọnwatọ etọn lẹ tọn” te.—Luku 12:42-44.
b Hukan 6: ‘Wiwá’ Klisti tọn (he yin erʹkho·mai to Glẹkigbe mẹ,) gbọnvona “tintin tofi” etọn (he yin pa·rou·siʹa to Glẹkigbe mẹ). Tintin tofi mayinukundomọ etọn na bẹjẹeji whẹpo ewọ nado wá nado hẹn whẹdida ṣẹ.
c Hukan 12: Pọ́n hosọ lọ “Mì Pọ́n! Yẹn Tin po Mì po to Azán Lẹpo Gbè,” to zinjẹgbonu ehe mẹ, weda 10-12, hukan 5-8.
d Hukan 16: Pọ́n hosọ lọ “Dọna mí, Whetẹnu Wẹ Onú Ehelẹ Na Jọ? to zinjẹgbonu ehe mẹ, weda 7-8, hukan 14-18.
[Yẹdide to weda 20]
[Apotin to weda 22]
BE HIẸ DOAYI NUAGOKUN LỌ GO YA?
“Afanumẹ nugbonọ podọ nuyọnẹntọ lọ”: Pipli pẹvi mẹmẹsunnu yiamisisadode lẹ tọn de he nọ tindo mahẹ tlọlọ to awuwiwlena núdùdù gbigbọmẹ tọn po mimá etọn po mẹ to ojlẹ tintin tofi Klisti tọn whenu. To egbehe, mẹmẹsunnu yiamisisadode ehelẹ wẹ yin Hagbẹ Anademẹtọ lọ
“Devizọnwatọ whégbè tọn etọn lẹ”: Mẹhe nọ mọ núdùdù gbigbọmẹ tọn lọ yí lẹpo, vlavo e yin mẹyiamisisadode kavi lẹngbọ devo lẹ
‘Yin dide do devizọnwatọ whégbè tọn lẹ ji’: To 1919, Jesu de mẹmẹsunnu yiamisisadode he pegan delẹ nado yin afanumẹ nugbonọ lọ
“Ewọ na de e do nutindo etọn lẹpo ji”: Mẹhe tin to pipli afanumẹ lọ tọn mẹ lẹ na mọ azọ́ndenamẹ ehe yí to whenue yé na mọ ahọsumẹ olọn mẹ tọn yetọn yí. Yewlẹ po gbẹtọ 144 000 he pò lẹ po na paṣẹ hẹ Klisti do nutindo etọn lẹpo ji
[Yẹdide to weda 22, 23]
Vlavo mí tindo todido olọn mẹ tọn kavi aigba ji tọn, mímẹpo wẹ yin devizọnwatọ whégbè tọn lẹ bo tindo nuhudo núdùdù gbigbọmẹ tọn dopolọ he nọ yin nina mí to ojlẹ sisọ mẹ tọn
[Apotin to weda 24]
“EYIN AFANUMẸ YLANKAN ENẸ . . .”
Azọngban sinsinyẹn lẹ wẹ Jesu zedo alọmẹ na afanumẹ nugbonọ podọ nuyọnẹntọ lọ, yèdọ nado penukundo devizọnwatọ whégbè tọn etọn lẹ go bosọ nọ na núdùdù yé to ojlẹ sisọ mẹ. Jesu yọnẹn dọ nususu na yin bibiọ to mẹhe azọngban susu yin zizedo alọmẹ na lẹ si. (Luku 12:48) Enẹwutu, e dotana apajlẹ he e na gando afanumẹ nugbonọ podọ nuyọnẹntọ lọ go po avase sinsinyẹn de po.
Jesu na avase gando afanumẹ he na dọ to ahun etọn mẹ dọ oklunọ emitọn to dindẹn bo na jẹ afanumẹ hatọ etọn lẹ hò ji go. Jesu dọ dọ to whenue oklunọ etọn na wá, e na sayana afanumẹ ylankan enẹ “to aliho he sinyẹn hugan mẹ.”—Hia Matiu 24:48-51.
Be dọdai dọ wẹ Jesu te dọ pipli afanumẹ ylankan lẹ tọn de na tin to azán godo tọn lẹ mẹ ya? Lala. Nugbo wẹ dọ mẹdelẹ ko do gbigbọ afanumẹ ylankan he go Jesu donù lọ tọn nkọ hia to nuyiwa yetọn mẹ. Mí sọgan ylọ omẹ enẹlẹ dọ atẹṣitọ lẹ, vlavo yé yin mẹyiamisisadode kavi “gbẹtọ susugege.” (Osọ. 7:9) Ṣigba, omẹ enẹlẹ ma wleawuna pipli afanumẹ ylankan lẹ tọn de gba. Jesu ma dọ dọ emi na de pipli afanumẹ ylankan lẹ tọn de. Na nugbo tọn, avase de wẹ hogbe etọn ehelẹ yin na afanumẹ nugbonọ lọ.
Doayi e go dọ Jesu bẹ avase etọn jẹeji po hogbe ehe po dọ “eyin.” Hogbe enẹ dohia dọ e ma yin dandan dọ nuhe Jesu dọ bọdego lẹ na jọ. Na nugbo tọn, nuhe dọ Jesu te wẹ yindọ: ‘Eyin e wá jọ gbede bọ afanumẹ nugbonọ lọ yinuwa hẹ afanumẹ hatọ etọn lẹ to aliho agọ̀ ehelẹ mẹ, nuhe oklunọ etọn na wà to whenue ewọ na wá lọ niyẹn.’ (Sọ pọ́n Luku 12:45.) Ṣigba, afanumẹ nugbonọ lọ ko zindonukọn nado tin to aṣeji podọ nado nọ wleawu núdùdù dojó gbigbọmẹ tọn.
Mẹmẹsunnu yiamisisadode he to sinsẹ̀n to pọmẹ taidi afanumẹ nugbonọ lọ lẹ, yọnẹn dọ emi na dogbè na Oklunọ lọ na nuhe dù aliho he mẹ yé penukundo devizọnwatọ whégbè tọn etọn lẹ go te. Ojlo mẹmẹsunnu yiamisisadode ehelẹ tọn wẹ nado hẹn azọngban yetọn di po nugbonọ-yinyin po, na Oklunọ yetọn nido sọgan dọna yé to whenue ewọ na wá to godo mẹ dọ “a basi do ganji.”
[Yẹdide to weda 25]
Gbẹtọ 144 000 lẹpo na tindo mahẹ to aṣẹpipa he gbloada olọn mẹ tọn Jesu tọn mẹ (Pọ́n hukan 19)