KANBIỌ SINAI DO BIBLU JI

Omẹ nankọ wẹ Jiwheyẹwhe yin?

Jiwheyẹwhe yin gbigbọ mayinukundomọ de. Ewọ wẹ dá olọn, aigba, po nutogbẹ̀ lẹpo po. Ewọ ma tindo didatọ, mọ e masọ tindo bẹjẹeji. (Psalm 90:2) Jiwheyẹwhe jlo dọ gbẹtọvi lẹ ni dín emi bo yọ́n nugbo lọ gando emi go.—Hia Owalọ lẹ 17:24-27.

Mí sọgan yọ́n yinkọ Jiwheyẹwhe tọn. Mí sọgan doayi delẹ to jẹhẹnu dagbedagbe etọn lẹ mẹ go gbọn ayihamẹlinlẹnpọn do nuhe e dá lẹ ji dali. (Lomunu lẹ 1:20) Ṣigba, nado yọ́n Jiwheyẹwhe ganji, mí dona plọn Ohó etọn, Biblu. Enẹ na gọalọna mí nado yọ́n jẹhẹnu etọn lẹ.—Hia Psalm 103:7-10.

Etẹwẹ nọ yin numọtolanmẹ Jiwheyẹwhe tọn gando whẹdida mawadodo go?

Mẹdatọ mítọn Jehovah gbẹwanna whẹdida mawadodo. Podọ e dá gbẹtọvi lẹ to apajlẹ etọn mẹ. (Deutelonomi 25:16) Enẹ wẹ zọ́n bọ suhugan mítọn do nọ gbẹwanna whẹdida mawadodo. Whẹdida mawadodo he lẹdo mí lẹ ma wá sọn Jiwheyẹwhe dè. Jiwheyẹwhe na mẹdekannujẹ nudide bibasi tọn gbẹtọvi lẹ. E blawu dọ mẹsusu nọ ṣì mẹdekannujẹ enẹ zan bo nọ doalọ to mawadodo mẹ. Enẹ nọ ‘doadi na Jehovah taun.’—Hia Gẹnẹsisi 6:5, 6; Deutelonomi 32:4, 5.

Jehovah yiwanna whẹdida dodo, podọ ewọ ma na jotẹnna whẹdida mawadodo kakadoi. (Psalm 37:28, 29) Biblu dopagbe dọ to madẹnmẹ, Jiwheyẹwhe na de whẹdida mawadodo lẹpo sẹ̀.—Hia 2 Pita 3:7-9, 13.