Sinsẹ̀n-Bibasi Whẹndo Tọn—Hiẹ Sọgan Hẹn Ẹn Yin Awuvivinu Dogọ

Otọ́ de to Brésil dọ dọ, “Hodọdopọ to sinsẹ̀n-bibasi whẹndo tọn mítọn whenu nọ yin awuvivinu sọmọ bọ eyin n’ma doalọtena ẹn, mí sọgan zindonukọn kakajẹ zánhomẹ.” Tatọ́ whẹndo tọn de to Japon dọ dọ visunnu owhe ao mẹvi emitọn ma tlẹ nọ doayi e go dọ gànmẹ to yìyì bo nọ jlo dọ yé ni zindonukọn. Etẹwutu? Otọ́ lọ dọ dọ, “Sinsẹ̀n-bibasi whẹndo tọn lọ nọ whàn ẹn taun, podọ e nọ yidogọna ayajẹ etọn.”

Na nugbo tọn, e ma yin ovi lẹpo wẹ sinsẹ̀n-bibasi whẹndo tọn nọ whàn, podọ nado dọ hójọhó, mẹdelẹ sọgan nọma duvivi etọn paali. Ṣigba, naegbọn e do yinmọ? Otọ́ de to Togo dọ dọ, “Jehovah sinsẹ̀n ma dona yin apọṣimẹnu.” Eyin sinsẹ̀n-bibasi whẹndo tọn nọ ṣiapọmẹ, vlavo be e ma yin aliho he mẹ e nọ yin anadena te wẹ zọ́n nẹ? Whẹndo susu ko mọdọ sinsẹ̀n-bibasi whẹndo tọn sọgan yin azán “homẹhun” tọn de dile Isaia dọ gando gbọjẹzan go do.—Isa. 58:13, 14.

Otọ́ Klistiani lẹ nọ mọdọ eyin hagbẹ whẹndo yetọn tọn lẹ na tindo ayajẹ to sinsẹ̀n-bibasi whẹndo tọn whenu, e dona nọ yin bibasi to ninọmẹ awuvivo tọn de mẹ. Ralf he tindo viyọnnu atọ̀n po visunnu dopo po, dọ dọ sinsẹ̀n-bibasi whẹndo tọn yetọn ma yin nupinplọn de poun, ṣigba e nọ taidi hodọdopọ to họntọn lẹ ṣẹnṣẹn, podọ mẹlẹpo wẹ nọ tindo mahẹ to e mẹ. Na nugbo tọn, nado hẹn mẹlẹpo tindo ojlo to nupinplọn lọ mẹ podọ nado tindo mahẹ gigọ́ to e mẹ sọgan yin avùnnukundiọsọmẹnu to whedelẹnu. Onọ̀ de yigbe dọmọ: “N’ma nọ penugo to whelẹponu nado hẹn sinsẹ̀n-bibasi whẹndo tọn mítọn yin awuvivinu dile n’nọ jlo do.” Nawẹ hiẹ sọgan duto avùnnukundiọsọmẹnu enẹ ji gbọn?

NỌ DIỌADA BOSỌ NỌ BASI I TO ALIHO VOOVO MẸ

Otọ́ de he tindo ovi awe bo nọ nọ̀ Allemagne dọ dọ, “Mí dona nọ diọada.” Natalia, onọ̀ de he tindo ovi awe dọ dọ, “Onú titengbe hugan he whẹndo mítọn dona nọ wà wẹ nado nọ to alọdiọ zọnmii.” Whẹndo susu ko má sinsẹ̀n-bibasi whẹndo tọn yetọn do adà voovo mẹ. “Enẹ nọ zọ́n bọ oplọn lọ nọ fọnjlodotenamẹ dogọ bọ mẹlẹpo to whẹndo lọ mẹ nọ tindo mahẹ to e mẹ,” wẹ Cleiton, otọ́ de he tindo ovi aflanmẹ awe bo nọ nọ̀ Brésil dọ. Gbọn gànmẹ oplọn lọ tọn mimá do adà voovo mẹ dali, mẹjitọ lẹ sọgan na ayidonugo nuhudo ovi dopodopo tọn eyin ovi delẹ whẹ́n taun hugan devo lẹ. Mẹjitọ lẹ sọgan lẹnnupọndo nuhudo hagbẹ whẹndo lọ tọn dopodopo ji bo nọ diọalọ to nuhe ji yé na dọhodo lẹ po wunmẹ yetọn po dide whenu.

Etẹwẹ whẹndo delẹ nọ wà nado hẹn alọdidiọ yetọn pọnte? Mẹdelẹ nọ bẹ sinsẹ̀n-bibasi whẹndo tọn yetọn jẹeji gbọn ohàn jiji hlan Jehovah dali. Juan he nọ nọ̀ Mexique dọ dọ, “Enẹ nọ wleawuna ninọmẹ dagbe bo nọ gọalọna mí nado wleawu to apọ̀nmẹ na nuhe ji mí jlo na dọhodo lọ.” Hagbẹ whẹndo etọn tọn lẹ nọ ṣinyan ohàn he tindo kanṣiṣa hẹ delẹ to nuhe ji yé jlo na dọhodo to whèjai lọ lẹ mẹ.

Whẹndo delẹ nọ hia adà Biblu tọn de to pọmẹ. Nado diọalọ, hagbẹ whẹndo tọn voovo lẹ nọ hia hodidọ omẹ voovo lẹ tọn to adà Biblu tọn de mẹ. Otọ́ de to Japon yigbe dọ, “to tintan whenu, e ma bọawuna mi nado nọ hiawe to aliho enẹ mẹ.” Ṣigba, homẹ visunnu etọn awe lẹ tọn nọ hùn nado mọdọ mẹjitọ yetọn lẹ to vivi nude tọn dù dopọ hẹ yé. Whẹndo delẹ tlẹ nọ basi wadohia otàn Biblu tọn lẹ tọn. Roger, otọ́ de he tindo visunnu awe bo nọ nọ̀ Afrique du Sud dọ dọ, ovi lẹ “nọ saba mọ onú delẹ to kandai Biblu tọn de mẹ, ehe míwlẹ he yin mẹjitọ lẹ ma tlẹ nọ doayi e go.”

Aliho devo he mẹ mí sọgan diọalọ te wẹ nado wà onú delẹ to pọmẹ, taidi nado gbá aki Noa tọn kavi tẹmpli Sọlomọni tọn nkọ. Onú mọnkọtọn lẹ wiwà nọ biọ dodinnanu he sọgan fọnjlodotenamẹ. Di apajlẹ to Asie, viyọnnu owhe atọ́n mẹvi de po mẹjitọ etọn lẹ po gọna onọ̀-daho etọn pli dopọ to agbà owhé yetọn tọn ji, bo wleawuna aihundida de he sinai do gbejizọnlin mẹdehlan tọn apọsteli Paulu tọn lẹ ji. Whẹndo devo lẹ ko wleawuna aihundida delẹ he sinai do kandai he tin to owe Eksọdusi tọn mẹ lẹ ji. Donald he tindo owhe 19 bo nọ nọ̀ Togo dọ dọ alọdidiọ “ko zọ́n bọ mí basi vọjlado susu to sinsẹ̀n-bibasi whẹndo tọn mítọn mẹ podọ to whẹndo mítọn lọsu mẹ.” Be hiẹ sọgan lẹnnupọndo onú mọnkọtọn devo lẹ ji he na zọ́n bọ sinsẹ̀n-bibasi whẹndo tọn towe na yin awuvivinu dogọ ya?

AWUWIWLE JẸNUKỌN YIN DANDANNU

Dile etlẹ yindọ alọdidiọ sọgan zọ́n bọ sinsẹ̀n-bibasi whẹndo na nọ fọnjlodotenamẹ, eyin e na plọnnumẹ nugbonugbo, mẹlẹpo dona nọ wleawu jẹnukọn. Agbọ́ nọ pé ovi lẹ to whedelẹnu, enẹwutu, otọ́ lẹ dona nọ yí sọwhiwhe do lẹnnupọndo nuhe yé de nado dọhodeji lẹ ji jẹnukọn bo nọ yí whenu zan nado wleawu ganji. Otọ́ de dọ dọ, “Eyin n’wleawu, mẹlẹpo nọ duvivi nupinplọn lọ tọn ganji.” Otọ́ de to Allemagne nọ dọna whẹndo etọn jẹnukọn nuhe yé na plọn to osẹ he ja lẹ mẹ. Otọ́ de to Bénin he tindo ovi ṣidopo he tin to gblagbla owhe awe jẹ wiawe tọn mẹ bọ eyin e basi tito nado pọ́n DVD he sinai do Biblu ji taidi adà sinsẹ̀n-bibasi whẹndo tọn yetọn, e nọ wleawuna kanbiọ lẹ jẹnukọnna ojlẹ lọ. Na nugbo tọn, awuwiwle nọ zọ́n bọ sinsẹ̀n-bibasi whẹndo tọn mítọn nọ pọnte dogọ.

Eyin mẹhe tin to whẹndo lọ mẹ lẹ yọ́n nuhe ji yé na plọnnu do jẹnukọn, yé sọgan dọho gandego to osẹ lọ gblamẹ bọ ehe na yidogọna ojlo he yé tindo to e mẹ. Podọ eyin mẹdopodopo tindo azọ́ndenamẹ de, yé na mọdọ sinsẹ̀n-bibasi whẹndo tọn emitọn wẹ.

DOVIVẸNU NADO NỌ BASI I TO GBESISỌ MẸ

Whẹndo susu wẹ e nọ vẹawuna nado nọ basi sinsẹ̀n-bibasi whẹndo tọn to gbesisọ mẹ.

Otọ́ susu dona nọ wazọ́n na gànhiho susu nado sọgan penukundo nuhudo dandan tọn whẹndo yetọn tọn go. Di dohia, otọ́ de to Mexique nọ tọ́n sọn whégbè to ogàn ṣidopo mẹ afọnnu bo ma nọ lẹkọ kakajẹ ogàn ṣinatọ̀n mẹ whèjai. Humọ, to whedelẹnu e sọgan biọ dọ mí ni diọ gànmẹ sinsẹ̀n-bibasi whẹndo tọn mítọn, na nuwiwa gbigbọmẹ tọn devo lẹ wutu.

Etomọṣo, mí dona magbe nado nọ basi sinsẹ̀n-bibasi whẹndo tọn to gbesisọ mẹ. Loïs he yin owhe 11 mẹvi de to Togo dọ gbemima whẹndo yetọn tọn gando sinsẹ̀n-bibasi whẹndo tọn go dọmọ: “Dile etlẹ yindọ mí nọ gbọwhenu to whedelẹnu nado bẹ sinsẹ̀n-bibasi whẹndo tọn mítọn jẹeji na nude jọ to azán lọ gbè wutu, mí nọ basi sinsẹ̀n-bibasi whẹndo tọn mítọn to whelẹponu.” Enẹwutu wẹ whẹndo delẹ nọ basi sinsẹ̀n-bibasi whẹndo tọn yetọn to bẹjẹeji osẹ lọ tọn. Eyin nujijọ madonukun de jọ, yé sọgan basi sinsẹ̀n-bibasi whẹndo tọn yetọn to ojlẹ devo mẹ to osẹ lọ mẹ.

Dile yinkọ lọ dohia do, “sinsẹ̀n-bibasi whẹndo tọn” yin adà sinsẹ̀n-bibasi towe tọn hlan Jehovah. Mì gbọ hagbẹ whẹndo mítọn tọn lẹpo ni nọ hẹn “avọ́nunina nùflo” tọn lẹ wá na Jehovah to osẹ lẹpo mẹ. (Hos. 14:2) Podọ, enẹ ni yin ojlẹ ayajẹ tọn de na mẹdopodopo to whẹndo mìtọn mẹ, “na ayajẹ OKLUNỌ tọn wẹ huhlọn mìtọn.”—Nẹh. 8:9, 10.