Whetẹnu Wẹ Ahọluduta Jiwheyẹwhe Tọn Jẹ Gandu Ji? (Apá 2)

ODLỌ NẸBUKADNẸZALI TỌN—BLADOPỌ KLEUN DE

Sọnayọn: Homẹ ṣie hùn nado gọ̀ we mọ, Nudewhenu. N’nọ yiwanna hodọdopọ he mí nọ tindo to sẹmẹsẹmẹ to Biblu pinplọn mítọn whenu lẹ.a Na a te do?

Nudewhenu: N’to kẹdẹ, a wanu.

Sọnayọn: Pẹdido wẹ. To gbetẹgbe die, mí gbadopọnna nuhewutu Kunnudetọ Jehovah tọn lẹ do nọ dọ dọ Ahọluduta Jiwheyẹwhe tọn jẹ gandu ji to 1914.b To hodọdopọ he wayi mẹ, mí mọ kunnudenu tangan ehe tọn de to dọdai he to weta 4tọ owe Daniẹli tọn mẹ to Biblu mẹ. Be a flin nuhe kandai lọ bẹhẹn ya?

Nudewhenu: E bẹ odlọ he Ahọlu Nẹbukadnẹzali kú gando atin daho de go hẹn.

Sọnayọn: Pẹẹ. Nẹbukadnẹzali mọ atin daho de to odlọ etọn mẹ he yiji sọ́ olọn. E sè bọ wẹnsagun Jiwheyẹwhe tọn de degbe dọ atin lọ ni yin sinsán liai, amọ́ dọ adọ̀ po dodonu etọn lẹ po ni yin jijodo aigba mẹ. To “ojlẹ ṣinawe godo,” atin lọ na vọ́ wú whladopo dogọ.c Mí sọ mọ nuhewutu dọdai lọ na mọ hẹndi do whla awe ji. Be a flin hẹndi tintan dọdai lọ tọn ya?

Nudewhenu: Hẹndi tintan lọ gando Nẹbukadnẹzali lọsu go, kavi? E hùnalẹ na owhe ṣinawe.

Sọnayọn: Nugbo wẹ. Nẹbukadnẹzali hùnalẹ na ojlẹ de, bọ gandudu etọn yin alọhẹndotena. Amọ́, dọdai lọ nasọ mọ hẹndi to aliho he gbloada de mẹ to whenue gandudu Jiwheyẹwhe tọn na yin alọhẹndotena to linlẹn de mẹ na ojlẹ ṣinawe. Dile mí mọ do, ojlẹ ṣinawe lọ lẹ bẹjẹeji to whenue Jelusalẹm yin vivasudo to 607 J.W.M. Sọn whenẹnu sọyi, ahọlu depope ma tin to aigba ji he ze afọ Jehovah Jiwheyẹwhe tọn dai nado deanana omẹ etọn lẹ ba. Amọ́, to vivọnu ojlẹ ṣinawe lọ lẹ tọn, Jiwheyẹwhe na do Ahọlu yọyọ de ai he na dugán do omẹ etọn lẹ ji, amọ́ e ma na yin mẹde sọn aigba ji ba kakatimọ sọn olọn mẹ. To hogbe devo mẹ, vivọnu ojlẹ ṣinawe lọ lẹ tọn na dohia dọ Ahọluduta olọn mẹ tọn Jiwheyẹwhe tọn jẹ gandu ji. Todin, mí ko mọ whenue ojlẹ ṣinawe lọ lẹ bẹjẹeji te. Enẹwutu, eyin mí penugo nado yọ́n lehe ojlẹ ṣinawe lọ lẹ dẹnsọ, be mí na yọ́n ojlẹ he mẹ Ahọluduta Jiwheyẹwhe tọn jẹ gandu ji te. Be nuhe n’dọ jẹ din họnwun na we ya?

Nudewhenu: Gbau, bladopọ ehe gọalọna mi nado flin nue mí dọ wayi lẹ.

Sọnayọn: Eyọn. Eyin mọ wẹ, gbọ mí ni bẹjẹeji bo pọ́n lehe ojlẹ ṣinawe lọ lẹ dẹnsọ. Yẹnsu ṣẹṣẹ gbadopọnna hosọ ehe wẹ, na ma do flin nuagokun lọ lẹ. N’na tẹnpọn nado basi zẹẹmẹ yetọn na we, dile n’pé e go do.

Nudewhenu: Eyọn.

OJLẸ ṢINAWE LỌ LẸ WÁ VIVỌNU BỌ AZÁN GODO TỌN LẸ BẸJẸEJI

Sọnayọn: To tintan whenu he dọdai lọ mọ hẹndi gando Nẹbukadnẹzali go, kunnudenu lẹ dohia dọ ojlẹ ṣinawe lọ lẹ dẹn na owhe ṣinawe. Amọ́, na nuhe dù hẹndi dọdai lọ tọn he gbloada gando Ahọluduta Jiwheyẹwhe tọn go, ojlẹ ṣinawe lọ lẹ na dẹn taun hú owhe ṣinawe poun.

Nudewhenu: Naegbọn a do dọ mọ?

Sọnayọn: Jẹnukọn whẹ́, flindọ ojlẹ ṣinawe lọ lẹ bẹjẹeji to whenue Jelusalẹm yin vivasudo to 607 J.W.M. Eyin mí lẹn owhe ṣinawe bẹsọn owhe enẹ mẹ, e na hẹn mí wá owhe 600 J.W.M. Amọ́, nujijọ ayidego tọn depope ma wá aimẹ to owhe 600 J.W.M. mẹ gando gandudu Jiwheyẹwhe tọn go. Humọ, dile mí mọ do wayi, whenue Jesu wá aigba ji to owhe kanweko susu godo, e dohia dọ ojlẹ ṣinawe lọ lẹ ma ko wá vivọnu.

Nudewhenu: Gbau. N’flin din.

Sọnayọn: Enẹwutu, ojlẹ ṣinawe lọ lẹ ma dẹn na owhe ṣinawe paa de poun, kakatimọ yé dẹn taun humọ.

Nudewhenu: Bọ owhe nẹmu wẹ yé dẹn na?

Sọnayọn: Owe Osọhia tọn to Biblu mẹ, he do kanṣiṣa taun hẹ owe Daniẹli tọn, gọalọna mí nado yọ́n lehe ojlẹ ṣinawe lọ lẹ dẹnsọ po gbesisọ po. E donù ojlẹ atọ̀n daa de go he sọzẹn hẹ azán 1 260.d Enẹwutu, ojlẹ ṣinawe—yèdọ ojlẹ atọ̀n daa donù awe—na sọzẹn hẹ azán 2 520. Be a to hihodo mi ya?

Nudewhenu: Gbau, n’to hihodo we. Amọ́, n’ma mọ lehe enẹ dohia dọ Ahọluduta Jiwheyẹwhe tọn jẹ gandu ji to 1914 do.

Sọnayọn: Ma hanú blo, mí na mọ kanṣiṣa lọ todin. To whedelẹnu, to dọdai Biblu tọn lẹ mẹ, azán dopo nọ nọtena owhe dopo.e Eyin mí hodo nunọwhinnusẹ́n azán dopo nọtena owhe dopo tọn enẹ, ojlẹ ṣinawe lọ lẹ na dẹn na owhe 2520. Eyin mí lẹn owhe 2 520 bẹsọn 607 J.W.M., e na hẹn mí wá owhe 1914.f Lehe mí wagbọn do yọnẹn dọ 1914 wẹ yin owhe he mẹ ojlẹ ṣinawe lọ lẹ wá vivọnu te niyẹn bọ Jesu jẹ gandu ji taidi Ahọlu do Ahọluduta Jiwheyẹwhe tọn ji. Na nugbo tọn bẹsọn 1914, nujijọ ayidego tọn susu wẹ aimẹ lẹdo aihọn pé—podọ Biblu ko dọ dọdai dọ onú mọnkọ lẹ na jọ to azán godo tọn lẹ mẹ.

Nudewhenu: Nujijọ wunmẹ tẹlẹ?

Sọnayọn: Pọ́n nuhe Jesu dọ to kandai he tin to Matiu 24:7 mẹ. Jesu dọ gando ojlẹ he mẹ ewọ na jẹ gandu ji te to olọn mẹ go dọmọ: “Akọta na fọ́n do akọta ji podọ ahọluduta do ahọluduta ji, bọ núdùdù whèdomẹ po aigba sisọsisọ lẹ po na tin sọn fide jẹ fide.” Doayi e go dọ Jesu dọ dọdai dọ núdùdù whèdomẹ po aigba sisọsisọ lẹ po na tin to ojlẹ enẹ mẹ. To owhe kanweko he wayi mẹ, nuhahun mọnkọ susu lẹ wẹ wá aimẹ lẹdo aihọn pé, kavi na?

Nudewhenu: Nugbo wẹ.

Sọnayọn: To wefọ lọ mẹ, Jesu sọ dọdai dọ awhàn lẹ na tin to ojlẹ tintin tofi etọn taidi Ahọlu Ahọluduta Jiwheyẹwhe tọn tọn mẹ. Podọ owe Osọhia tọn to Biblu mẹ sọ dọ dọ awhàn ehelẹ ma na jọ to fi tauntaun delẹ poun gba, amọ́ lẹdo aihọn pé to ojlẹ opodo tọn mẹ.g Be a flin whenue wẹkẹ-whàn tintan lọ gbajẹgbonu ya?

Nudewhenu: Owhe 1914 mẹ wẹ be, owhe he mẹ mì dọ dọ Jesu jẹ gandu ji te lọ! N’ma tlẹ lẹnnu yì finẹ pọ́n gbede.

Sọnayọn: Eyin mí lẹnnupọndo onú ehe lẹpo ji to pọmẹ—enẹ wẹ dọdai he donù ojlẹ ṣinawe lẹ go gọna dọdai Biblu tọn devo lẹ he gando ojlẹ opodo tọn go—mí na mọdọ nuhe mí dọ lẹ sọgbe nugbonugbo. Kunnudetọ Jehovah tọn lẹ kudeji dọ Jesu jẹ gandu ji to olọn mẹ taidi Ahọlu do Ahọluduta Jiwheyẹwhe tọn ji to 1914 podọ owhe enẹ dopolọ mẹ wẹ azán godo tọn lẹ bẹjẹeji te.h

Nudewhenu: N’gbẹ́ to tintẹnpọn nado wle nuhe dọ a te.

Sọnayọn: Owhẹ̀ towe whẹ́n. Dile n’dọ do jẹnukọn, e yì whenu susu to yẹnsu si nado mọnukunnujẹemẹ to gigọ́ mẹ. Amọ́ e whè gbau, n’lẹndọ hodọdopọ mítọn ko gọalọna we nado mọnukunnujẹemẹ dọ, dile etlẹ yindọ owhe lọ 1914 ma sọawuhia to fidepope to Biblu mẹ, nuhe Kunnudetọ Jehovah tọn lẹ yise gando owhe enẹ go lẹ sinai do Owe-wiwe lẹ ji nugbonugbo.

Nudewhenu: Gbau. Nuhe tlẹ sọ nọ yinuwado ji e to ohó mìtọn mẹ wẹ yindọ, mì nọ yí wefọ de do nọgodona nuhe dọ mì te janwẹ. Mì ma nọ pọ́n jẹhọn mẹ do dọho gbede. Amọ́, n’gbẹ́ to kinkanse dee nuhewutu whẹho lọ do gẹdẹ sọmọ. Naegbọn Jiwheyẹwhe ma gán dọna mí to Biblu mẹ poun dọ owhe 1914 mẹ wẹ Jesu na jẹ gandu ji te to olọn mẹ?

Sọnayọn: Kanbiọ towe yọ́n taun, Nudewhenu. Nado dọ hójọhó, nususu wẹ tin he Owe-wiwe lẹ ma hùn nú sọn e ji tlọlọ. Amọ́, be a yọ́n nuhewutu Jiwheyẹwhe do biọ dọ Biblu ni yin kinkan to aliho de mẹ bọ gbẹtọ lẹ dona dovivẹnu whẹpo do mọnukunnujẹemẹ ya? Mí gán dọhodo ehe ji to whedevonu.

Nudewhenu: E na vivi na mi taun.