HOSỌ HE JẸNUKỌN | LEHE HIẸ SỌGAN PEHẸ MAGBỌJẸ DO
Filẹpo Wẹ Magbọjẹ Tin Te!
“N’yì núdùdù họ̀ gbé, ṣigba akla kẹdẹ wẹ n’mọ, bọ akuẹ yetọn sọ jẹeji—whla 10 000 hú dai tọn! To wunkẹngbe, núdùdù de ma pò to nusatẹn lẹ ba.”—Paul, Zimbabwe.
“Asu ṣie dọna mi dọ emi na jo mí do bo yì. Nawẹ n’sọgan doakọnna nugbonọ-mayin etọn gbọn? Nawẹ n’na penukundo ovi ṣie lẹ go gbọn?”—Janet, États-Unis.
“To whenue ogàn avase namẹ tọn lẹ jẹ núdọ ji, n’họ̀n bo mlọnai do kọmẹ, dile bọmbu lẹ to wúwú. To gànhiho susu godo, alọ ṣie lẹ gbẹ́ to sisọsisọ.”—Alona, Israel.
Mí to gbẹnọ to ojlẹ magbọjẹ tọn lẹ mẹ, yèdọ “ojlẹ awusinyẹn tọn he vẹawu nado pehẹ lẹ.” (2 Timoti 3:1) Mẹsusu wẹ ko jẹflumẹ na nuhahun akuẹzinzan tọn lẹ, gbakija whẹndo tọn, awhàn, azọ̀nylankan he nọ gbajẹgbonu lẹ, gọna nugbajẹmẹji jọwamọ tọn kavi dehe gbẹtọvi lẹ lọsu nọ hẹnwa lẹ. Gbọnvona enẹ, mẹdevo lẹ nọ to nuhà dọ: ‘Be nutitẹ̀ he to go e ehe ma na wá lẹzun azọ̀n kansẹẹ tọn nẹ?’ ‘Nawẹ gbẹninọ na te to ovivi ṣie lẹ sin whenu?’
E ma yin magbọjẹ lẹpo wẹ ylan. To paa mẹ, mímẹpo wẹ nọ jẹflumẹ eyin mí pannukọn mẹtẹnpọn de kavi hokansemẹ mẹyiyidoazọ́nmẹ tọn. Podọ budidi na owùnu lẹ nọ gọalọna mí nado dapana kọdetọn ylankan lẹ. Etomọṣo, magbọjẹ tintindo zẹjlẹgo nọ hẹn awugble sinsinyẹn wá. Dodinnanu agọe tọn susu dohia dọ hugan jọja 68 000 wẹ dọ dọ etlẹ yin magbọjẹ vude tintindo nọ hẹn okú azán mape tọn wá. Enẹwutu, owhẹ̀ Jesu tọn whẹ́n nado kanse dọ: “Mẹnu to mì mẹ wẹ sọgan gbọn magbọjẹnọ-yinyin dali yí awagbà dopo dogọ tedidi gbẹzan etọn tọn?” Na nugbo tọn, nuhiha ma nọ yidogọna tedidi gbẹzan mẹde tọn. Abajọ Jesu do na ayinamẹ dọmọ: ‘Mì sọ yin magbọjẹnọ ba blo.’ (Matiu 6:25, 27) Ṣigba, nawẹ enẹ sọgan yọnbasi gbọn?
Nado mọ gblọndo lọ, mí dona yí nuyọnẹn he pé zan, bo tindo yise dolido to Jiwheyẹwhe mẹ, bosọ tindo todido nujọnu tọn na sọgodo. Eyin mí ma tlẹ pehẹ ninọmẹ sinsinyẹn lẹ todin, mí sọgan wá pehẹ yé to nukọn mẹ. Enẹwutu, mì gbọ mí ni pọ́n lehe afọdide ehelẹ zize ko gọalọna Paul, Janet po Alona po nado doakọnna magbọjẹ lẹ do.