Jọja lẹ Emi—Be Mì Ko Wleawufo Nado Yí Baptẹm Ya?

1, 2. (a) Etẹwẹ nọ hẹn ayajẹ wá na omẹ Jiwheyẹwhe tọn lẹ to egbehe? (b) Nawẹ mẹjitọ Klistiani lẹ po mẹho agun tọn lẹ po nọ gọalọna jọja lẹ nado mọnukunnujẹ zẹẹmẹ baptẹm tọn mẹ gbọn?

MẸHO agun tọn de dọna Christopher he tindo owhe 12 dọmọ: “N’ko yọ́n we sọn ovu whenu towe gbọ́n, podọ homẹ ṣie hùn nado sè dọ a jlo na yí baptẹm. Todin dọna mi, ‘Naegbọn a jlo na ze afọdide enẹ?’” Kanbiọ mẹho lọ tọn sọgbe. Na nugbo tọn, mímẹpo wẹ nọ gọ́ na ayajẹ nado mọdọ to whemẹwhemẹ, jọja fọtọ́n susu wẹ nọ yí baptẹm lẹdo aihọn pé. (Yẹwh. 12:1) To ojlẹ dopolọ mẹ, mẹjitọ Klistiani lẹ po mẹho agun tọn lẹ po dona nọ hẹn ẹn diun dọ jọja ehelẹ basi dide sọn ojlo mẹ wá bọ nudide yetọn sọ tindo dodonu dagbe.

² Ohó Jiwheyẹwhe tọn dohia dọ afọdide klandowiwe po baptẹm po tọn yin bẹjẹeji gbẹzan de tọn, ehe mẹ Klistiani lẹ nọ mọ dona lẹ yí sọn Jehovah dè, ṣigba bosọ nọ pehẹ nukundiọsọmẹ sọn Satani dè. (Howh. 10:22; 1 Pita 5:8) Enẹwutu, mẹjitọ Klistiani lẹ nọ yí whenu zan nado plọn ovi yetọn lẹ nuhe devi Klisti tọn yinyin bẹhẹn. Na nuhe dù jọja he mẹjitọ yetọn lẹ ma yin Klistiani lẹ, mẹho agun tọn lẹ na gbọn owanyi dali gọalọna yé nado lẹnnupọndo nuhe devi-yinyin bẹhẹn ji. (Hia Luku 14:27-30.) Kẹdẹdile ohọ̀ de gbigbá po kọdetọn dagbe po nọ biọ awuwiwle do, mọ wẹ e nọ biọ awuwiwle nado sẹ̀n Jehovah po nugbonọ-yinyin po “kakajẹ opodo” do niyẹn. (Mat. 24:13) Ṣigba, etẹwẹ jọja lẹ lọsu sọgan wà nado magbe nado yí pipotọ gbẹzan yetọn tọn do sẹ̀n Jehovah? Mì gbọ mí ni gbadopọnna.

3. (a) Etẹwẹ hogbe Jesu po Pita po tọn lẹ plọn mí gando nujọnu-yinyin baptẹm tọn go? (Mat. 28:19, 20; 1 Pita 3:21) (b) Kanbiọ tẹlẹ wẹ mí na gbadopọnna, podọ etẹwutu?

³ Be jọja de wẹ a yin bo to nulẹnpọn do baptẹm ji ya? Eyin mọ wẹ, a jẹna pipà! Lẹblanulọkẹyi daho de wẹ e yin nado yí baptẹm bo lẹzun dopo to Kunnudetọ Jehovah tọn lẹ mẹ. Humọ, baptẹm yin nubiọtomẹsi de nado lẹzun Klistiani, bosọ yin afọdide titengbe de nado mọ whlẹngán. (Mat. 28:19, 20; 1 Pita 3:21) Na ojlo sisosiso wẹ a tindo nado hẹn opà he a do na Jehovah di wutu, nujọnu wẹ e yin dọ a ni wleawudai whẹpo do ze afọdide titengbe ehe. Enẹwutu, e sọgbe dọ a ni lẹnnupọndo kanbiọ atọ̀n delẹ ji he sọgan gọalọna we nado yọnẹn eyin a ko wleawufo nado yí baptẹm. Kanbiọ lọ lẹ die: (1) Be n’ko whèwhín jẹ obá lọ mẹ nado basi nudide ehe ya? (2) Be yẹnlọsu wẹ tindo ojlo nado wàmọ ya? (3) Be n’mọnukunnujẹ nuhe e zẹẹmẹdo nado basi klandowiwe hlan Jehovah mẹ ya? Mì gbọ mí ni gbadopọnna kanbiọ enẹlẹ.

TO WHENUE A WHÈWHÍN JẸ OBÁ DE MẸ

4, 5. (a) Naegbọn e ma do yin mẹhe ko yin mẹho lẹ kẹdẹ wẹ sọgan yí baptẹm? (b) Etẹwẹ e zẹẹmẹdo na Klistiani de nado whèwhín?

⁴ Biblu ma dọ dọ mẹhe ko yin mẹho kavi mẹhe ko whẹ́n jẹ obá de mẹ bo sọgan mọ jlọjẹ delẹ yí sọgbe hẹ osẹ́n kẹdẹ wẹ sọgan yí baptẹm. Mí hia to Howhinwhẹn lẹ 20:11 mẹ dọmọ: “Walọ yọpọvu tọn wẹ yè do nọ yọnẹn eyin azọ́n etọn yin dagbe, eyin e sọgbe.” Mẹhe tlẹ yin jọja de sọgan mọnukunnujẹ nuhe e zẹẹmẹdo nado wà nuhe sọgbe podọ nado basi klandowiwe hlan Mẹdatọ etọn mẹ. Enẹwutu, nujọnu wẹ e yin dọ jọja he ko dohia jẹ obá he sọgbe hẹ lẹnpọn dagbe mẹ dọ emi whèwhín bo ko sọ basi klandowiwe hlan Jehovah lẹ ni yí baptẹm, podọ afọdide ehe sọgbe.—Howh. 20:7.

⁵ Etẹwẹ e zẹẹmẹdo nado whèwhín? Nado whèwhín bẹ nususu hẹn hugan nado whẹ́n to agbasa mẹ. Biblu dọ dọ mẹhe whèwhín lẹ “ko plọn huhlọn wuntuntun tọn yetọn gbọn yíyí i zan dali nado nọ yọ́n vogbingbọn to dagbe po oylan po ṣẹnṣẹn.” (Heb. 5:14) Di apajlẹ, mẹhe whèwhín lẹ nọ yọ́n nuhe sọgbe to nukun Jehovah tọn mẹ bo nọ magbe to ahun yetọn mẹ nado tẹdo e go. Taidi kọdetọn de, yé ma nọ yin kiklọ po awubibọ po nado wà nuhe ylan; mọjanwẹ yè ma nọ to didọna yé mapote nado wà nuhe sọgbe do niyẹn. Na nugbo tọn, nuhe sọgbe wẹ e yin nado donukun dọ jọja he yí baptẹm de ni tẹdo nujinọtedo Jiwheyẹwhe tọn lẹ go, etlẹ yin to whenue mẹjitọ etọn lẹ kavi mẹhe yin mẹho na ẹn lẹ ma to finẹ.—Yijlẹdo Filippinu lẹ 2:12 go.

6, 7. (a) Basi zẹẹmẹ avùnnukundiọsọmẹnu he Daniẹli pehẹ to whenue e tin to Babilọni lẹ tọn. (b) Nawẹ Daniẹli dohia gbọn dọ emi whèwhín?

⁶ Be jọja lẹ sọgan whèwhín jẹ obá mọnkọtọn mẹ nugbonugbo ya? Eyọ́n, mí ni lẹnnupọndo apajlẹ Daniẹli tọn he tin to Biblu mẹ ji. Ewọ sọgan ko ṣẹṣẹ biọ owhe aflanmẹ tọn mẹ to whenue e yin wiwle po huhlọn po sọn mẹjitọ etọn lẹ dè sọyi kanlinmọgbenu to Babilọni. Daniẹli wá mọ ede to gbẹtọ he tindo pọndohlan devo pete gando dagbe po oylan po go lẹ ṣẹnṣẹn. Humọ, Daniẹli pehẹ avùnnukundiọsọmẹnu devo: E nọ yin nuyiwa hẹ taidi omẹ vonọtaun de to Babilọni. Na nugbo tọn, Daniẹli yin dopo to jọja susu he yin dide nado nọ sẹ̀n to ahọlu nukọn lẹ mẹ! (Dan. 1:3-5, 13) E taidi dọ Daniẹli mọ lẹblanulọkẹyi delẹ yí to Babilọni, ehe e ma sọgan ko mọ gbede to Islaeli.

⁷ Nawẹ jọja Daniẹli yinuwa to ninọmẹ ehe mẹ gbọn? Be gigo po yẹyi Babilọni tọn lẹ po doyẹklọ ẹ wẹ ya? Be e na dotẹnmẹ lẹdo yọyọ he mẹ e tin te nado diọ mẹhe e yin kavi nado hù yise etọn sudo wẹ ya? Lala! Biblu dọ dọ to whenue Daniẹli tin to Babilọni, e ‘magbe to ahun etọn mẹ ma nado hẹn ede flu’ po nudepope he tindo kanṣiṣa hẹ sinsẹ̀n lalo po. (Dan. 1:8) Daniẹli dohia dọ emi whèwhín taun!

8. Etẹwẹ a sọgan plọn sọn apajlẹ Daniẹli tọn mẹ?

⁸ Etẹwẹ a sọgan plọn sọn apajlẹ Daniẹli tọn mẹ? Jẹnukọn whẹ́, jọja he whèwhín nọ tẹdo nuyise etọn lẹ go. E ma nọ taidi agànma he nọ diọ sinmẹ sọgbe hẹ lẹdo he mẹ e te gba. E ma nọ yinuwa taidi họntọn Jiwheyẹwhe tọn to Plitẹnhọ Ahọluduta tọn mẹ, ṣigba bo nọ yinuwa taidi họntọn aihọn tọn to wehọmẹ. Kakati nido yin yigọyigọ-dona, e nọ hẹn tenọgligo etlẹ yin to whlepọn yise tọn lẹ whenu.—Hia Efesunu lẹ 4:14, 15.

9, 10. (a) Ale tẹwẹ jọja de sọgan mọyi eyin e lẹnnupọndo lehe e yinuwa do to whlepọn yise tọn he e pehẹ gbọngodo lẹ whenu ji? (b) Etẹwẹ baptẹm yíyí nọ dohia?

⁹ Na nugbo tọn, gbẹtọvi pipé de ma tin; jọja po mẹho po nọ ṣinuwa sọn ojlẹ de mẹ jẹ devo mẹ. (Yẹwh. 7:20) Etomọṣo, dile a to nulẹnpọn do baptẹm ji, nuyọnẹnnu wẹ e na yin nado lẹnayihamẹpọn do obá he mẹ a magbe jẹ to ahun mẹ nado tẹdo nujinọtedo Jehovah tọn lẹ go ji. Nawẹ a sọgan yọ́n obá he mẹ gbemima towe sinyẹn jẹ gbọn? Kanse dewe dọ, ‘Be n’ko tindo aṣa lọ nado nọ tẹdo nujinọtedo Jiwheyẹwhe tọn lẹ go ya?’ Lẹnnupọndo lehe a yinuwa do to whlepọn yise tọn he a pehẹ gbọngodo lẹ whenu ji. Be a dohia dọ a tindo zinzin nado yọ́n dagbe dovo na oylan ya? Taidi Daniẹli, nawẹ a na yinuwa do eyin mẹde to aihọn Satani tọn mẹ dohia we dọ a tindo nugopipe vonọtaun lẹ he a dona zan? Be a penugo nado “to ayido nuhe ojlo Jehovah tọn yin go zọnmii” etlẹ yin to whenue a yin whiwhlepọn nado wà nuhe jẹagọdo ojlo Jiwheyẹwhe tọn ya?—Efe. 5:17.

¹⁰ Naegbọn mí do fọ́n kanbiọ ahundopo tọn enẹlẹ dote? Yanwle yetọn wẹ nado gọalọna we nado wleawuna pọndohlan dagbe gando baptẹm go. Dile mí dọ do wayi, baptẹm yíyí nọ dohia dọ a dopà vonọtaun de na Jehovah. A dopà dọ a na yiwanna ewọ bo na yí ahun towe lẹpo do sẹ̀n ẹn kakadoi. (Malku 12:30) Mẹhe yí baptẹm lẹpo dona magbe nado yinuwa sọgbe hẹ opà yetọn.—Hia Yẹwhehodọtọ 5:4, 5.

BE HIẸ LỌSU WẸ JLO YA?

11, 12. (a) Etẹwẹ mẹhe to nulẹnpọn do baptẹm yíyí ji de dona hẹn ẹn diun dọ emi wà? (b) Etẹwẹ na gọalọna we nado hẹn pọndohlan he sọgbe go gando tito baptẹm tọn he Jehovah zedai go?

¹¹ Biblu dọ dọ omẹ Jehovah tọn lẹ he bẹ jọja lẹ hẹn, “na yin ojlonọ” nado sẹ̀n ewọ. (Ps. 110:3) Enẹwutu, mẹhe to nulẹnpọn do baptẹm yíyí ji dona hẹn ẹn diun dọ emi lọsu wẹ tindo ojlo nado wàmọ. Ehe sọgan biọ dọ a ni gbeje ahun towe mẹ pọ́n, titengbe eyin a yin pinplọn whẹ́n to nugbo lọ mẹ.

¹² E yọnbasi dọ to owhe lẹ gblamẹ, a ko mọ bọ mẹsusu yí baptẹm, bọ delẹ to yé mẹ yin hagbẹ towe lẹ podọ etlẹ sọgan yin mẹdaho kavi nọvi towe. Eyin ninọmẹ towe niyẹn, etẹ go wẹ a dona payi? Nọ aṣeji ma nado pọ́n baptẹm hlan taidi aṣa de he jọja lẹpo dona hodo to whenue yé tindo owhe tangan de blo. Etẹwẹ a sọgan wà nado hẹn ẹn diun dọ a na hẹn pọndohlan he sọgbe go gando tito baptẹm tọn he Jehovah zedai go? Nọ yiagbọji bo nọ lẹnnupọn whẹwhẹ do whẹwhinwhẹ́n he wutu baptẹm yíyí do yin nujọnu taun lẹ ji. Na nugbo tọn, a sọgan mọ whẹwhinwhẹ́n dagbe susu to hosọ ehe po dehe bọdego po mẹ.

13. Nawẹ a sọgan yọnẹn gbọn eyin nudide towe nado yí baptẹm wá sọn ahun towe mẹ kavi lala?

¹³ Aliho susu mẹ wẹ a sọgan yọnẹn te eyin nudide towe nado yí baptẹm wá sọn ahun towe mẹ kavi lala. Di apajlẹ, odẹ̀ towe lẹ na nọ dohia dọ a tindo ojlo sisosiso nado sẹ̀n Jehovah. Whla nẹmu he a nọ hodẹ̀ po nuhe ji a nọ zinnudo to odẹ̀ towe lẹ mẹ po nọ do obá he mẹ haṣinṣan towe hẹ Jehovah siso jẹ hia. (Ps. 25:4) Aliho titengbe de he mẹ Jehovah nọ na gblọndo odẹ̀ mítọn lẹ te wẹ gbọn ayidonugo mítọn dindọn wá Ohó etọn ji dali. Eyin mọ wẹ, vivẹnudido mítọn nado nọ plọn Biblu yin kunnudenu devo he nọ dohia dọ mí jlo nugbonugbo nado dọnsẹpọ Jehovah bo yí ahun lẹpo do sẹ̀n ẹn. (Jọṣ. 1:8) Enẹwutu, kanse dewe dọ: ‘Etẹlẹ ji wẹ n’nọ zinnudo to odẹ̀ ṣie lẹ mẹ? Be n’nọ plọn Biblu to gbesisọ mẹ ya?’ Podọ eyin whẹndo towe tindo tito de na sinsẹ̀n-bibasi whẹndo tọn, kanse dewe dọ: ‘Be n’nọ yí ojlo do tindo mahẹ to tito whẹndo lọ tọn ehe mẹ ya?’ Gblọndo towe na kanbiọ ehelẹ na gọalọna we nado yọnẹn eyin nudide towe nado yí baptẹm wá sọn ahun towe mẹ kavi lala.

NUHE KLANDOWIWE ZẸẸMẸDO

14. Vogbingbọn tẹwẹ tin to klandowiwe po baptẹm po ṣẹnṣẹn?

¹⁴ Mẹdelẹ sọgan nọma yọ́n vogbingbọn he tin to klandowiwe po baptẹm po ṣẹnṣẹn. Di apajlẹ, jọja delẹ nọ dọ dọ emi ko basi klandowiwe hlan Jehovah, amọ́ emi ma ko wleawufo nado yí baptẹm. Be ehe sọgbe hẹ lẹnpọn dagbe ya? Klandowiwe bibasi zẹẹmẹdo nado dọna Jehovah dọ a na sẹ̀n ewọ kakadoi. To baptẹm whenu, mẹde nọ dohia mẹdevo lẹ dọ emi ko basi klandowiwe. Enẹwutu, baptẹm yin gbeyiyi gbangba tọn he dohia dọ a ko basi klandowiwe mẹdetiti tọn to odẹ̀ mẹ hlan Jehovah. Whẹpo a nido yí baptẹm, a dona hẹn ẹn diun dọ a mọnukunnujẹ nuhe klandowiwe zẹẹmẹdo mẹ.

15. Etẹwẹ klandowiwe zẹẹmẹdo?

¹⁵ Nado dọ hójọhó, to whenue a klan gbẹzan towe do wiwe na Jehovah, a masọ tindo aṣẹ do dewe ji ba. A dopà na Jehovah dọ ojlo etọn wiwà wẹ a na zedo otẹn tintan mẹ to gbẹzan towe mẹ. (Hia Matiu 16:24.) Eyin mí dona nọ yí nukun nujọnu tọn do pọ́n opagbe depope he mí do, nẹmunẹmu wẹ mí ma na yí nukun nujọnu tọn do pọ́n opagbe he mí do na Jehovah Jiwheyẹwhe! (Mat. 5:33) Ṣigba, nawẹ a sọgan dohia dọ a ko mọ́n dewe nugbonugbo bo lẹzun Jehovah tọn gbọn?—Lom. 14:8.

16, 17. (a) Na apajlẹ de nado do nuhe mẹdetiti mimọ́n zẹẹmẹdo hia. (b) Etẹwẹ mẹhe basi klandowiwe de to didọ na taun tọn?

¹⁶ Mí ni dọ dọ họntọn towe de na we mọto de. E bẹ mọto lọ sin wema lẹ na we bo dọmọ: “Mọto towe wẹ.” Ṣigba, mí ni dọ dọ họntọn towe yidogọ dọmọ: “N’na hẹn họnhungan lọ lẹ go. Podọ yẹn wẹ na nọ kùn mọto lọ, e ma yin hiẹ.” Numọtolanmẹ tẹwẹ a na tindo gando “nunina” enẹ go? Etẹwẹ a na lẹn gando mẹhe nanú we lọ go?

¹⁷ Todin, lẹnnupọndo nuhe Jehovah nọ yí jlọjẹ do donukun sọn mẹde si ji to whenue mẹlọ basi klandowiwe hlan ẹn bo dọna ẹn dọmọ: “N’na we gbẹzan ṣie. N’lẹzun towe.” Ṣigba, etẹwẹ lo eyin mẹlọ jẹ gbẹzan awe zan ji, vlavo bo biọ họntọn mẹ hẹ mayisenọ de? Eyin mẹlọ ka wá kẹalọyi agbasazọ́n he na glọnalina ẹn ma nado nọ tindo mahẹ gigọ́ to lizọnyizọn lọ mẹ kavi ma nado nọ yì opli Klistiani tọn lẹ to gbesisọ mẹ lo? Be enẹ ma taidi mẹhe namẹ mọto bo ka hẹn họnhungan mọto lọ tọn lẹ go ya? Na nugbo tọn, mẹhe klan ede do wiwe na Jehovah to didọna ẹn dọmọ: “A tindo aṣẹ do gbẹzan ṣie ji hugan yẹnlọsu. Eyin e wá jọ to whedepopenu bọ nuhe a yiwanna jẹagọdo nuhe yẹn yiwanna, nuhe a yiwanna wẹ n’na nọ wà.” Enẹ na sọgbe hẹ aliho nulẹnpọn tọn Jesu tọn, mẹhe dọ to whenue e to aigba ji dọmọ: “Yẹn ko jẹte sọn olọn mẹ wá, e ma yin nado wà ojlo ṣie gba, ṣigba ojlo ewọ he do mi hlan tọn.”—Joh. 6:38.

18, 19. (a) Nawẹ nuhe Rose po Christopher po dọ dohia dọ baptẹm yíyí yin lẹblanulọkẹyi de he nọ hẹn dona susu wá gbọn? (b) Etẹwẹ hiẹ lẹn gando lẹblanulọkẹyi lọ nado yí baptẹm go?

¹⁸ E họnwun dọ baptẹm yin afọdide titengbe de he hiẹ kavi mẹdepope ma dona yí nukunpẹvi do pọ́n. To ojlẹ dopolọ mẹ, lẹblanulọkẹyi daho de wẹ e yin nado basi klandowiwe bo yí baptẹm. Jọja he yiwanna Jehovah bosọ mọnukunnujẹ nuhe klandowiwe zẹẹmẹdo mẹ lẹ ma nọ dọ̀n yonu do godo nado yí baptẹm; mọjanwẹ nudide he yé basi ma nọ wá vẹna yé do niyẹn. Jọja aflanmẹ de he nọ yin Rose dọmọ: “N’yiwanna Jehovah, podọ nudepope ma nọ hẹn ayajẹ wá na mi hugan nado sẹ̀n ewọ. Nudide he n’basi nado yí baptẹm họnwun na mi hugan nudide devo depope to gbẹzan ṣie mẹ.”

¹⁹ Podọ etẹwẹ dogbọn Christopher he go mí donù to bẹjẹeji hosọ ehe tọn dali? Be nudide etọn nado yí baptẹm to whenue e tindo owhe 12 sinai do dodonu dagbe ji ya? Whedepopenu he Christopher flinnu gando klandowiwe etọn po baptẹm po go, homẹ etọn nọ hùn. E lẹzun gbehosọnalitọ whepoponu tọn to whenue e tindo owhe 17, bo yin pipà taidi devizọnwatọ lizọnyizọnwiwa tọn to whenue e tindo owhe 18. Todin e to sinsẹ̀n to Bẹtẹli. E dọmọ: “Nudide he sọgbe wẹ e yin nado yí baptẹm. N’yí gbẹzan ṣie blebu do to azọ́n pekọhẹnwanamẹ tọn wà na Jehovah po titobasinanu etọn po.” Eyin a to nulẹnpọn do baptẹm yíyí ji, nawẹ a sọgan wleawudai gbọn? Hosọ he bọdego na dọhodo ehe ji.