“Nunina Dagbe Hugan He N’Ko Mọyi Niyẹn”

Numọtolanmẹ he viyọnnu owhe 13 mẹvi de tindo niyẹn to whenue yè na ẹn avún pẹvi de. Yọnnu ajọwatọ adọkunnọ de dọ dọ ọdinatẹẹ he otọ́ emitọn na emi to whenue emi to wehọmẹ daho wẹ yin nunina he diọ gbẹzan emitọn. Podọ asu he ṣẹṣẹ wlealọ de dọ dọ kalti nudọdomẹ tọn he asi emitọn yí alọ do basi bo na emi to whenue alọwle yetọn pé owhe dopo wẹ yin nunina dagbe hugan he emi ko mọyi.

To whemẹwhemẹ, mẹsusu nọ yí whenu zan bo nọ dovivẹnu nado dín nunina “dagbe hugan” he yé na na họntọn kavi hẹnnumẹ de to nujijọ vonọtaun lẹ whenu. Podọ nunamẹtọ susu wẹ nọ jlo nado sè nuhe nkọ mẹhe yin nùdego ehelẹ dọ. Bọ hiẹ lo? Be e na jlo we nado namẹ nunina he họakuẹ taun de kavi mọ ẹn yí ya?

Enẹ sọgan wà dagbe taun, e ma yin na nuyiwadomẹji he nunina de sọgan tindo do mẹhe mọ ẹn yí ji poun wutu gba, ṣigba na numọtolanmẹ he e sọgan hẹn nunamẹtọ lọ lọsu nado tindo. Na Biblu dọmọ: “Ayajẹ sù to nunamẹ mẹ hú to mimọyi mẹ.” (Owalọ lẹ 20:35) Na nugbo tọn, ayajẹ he nunamẹ nọ hẹnwa sọgan sọ vọ́ jẹeji eyin mẹhe mọ nunina lọ yí yọ́n pinpẹn etọn taun.

Amọ́, etẹwẹ a sọgan wà bọ nunina towe na hẹn ayajẹ nujọnu tọn wá na hiẹ po mẹhe mọ ẹn yí po? Podọ eyin e ma yọnbasi nado namẹ nunina “dagbe hugan,” etẹwẹ a sọgan wà bọ yè na yọ́n pinpẹn nunina towe tọn ganji?