Hẹn Biblu Pinplọn Towe Yin Kọdetọn Dagbenọ Podọ Awuvivinu Dogọ

Jọṣua to Osẹ́n lọ hia; adó Jẹliko tọn lẹ họ́ bọ owhé Lahabi tọn pò to ote; Jọṣua dlẹnalọ etọn lẹ hlan olọn bo to dẹ̀ho

JỌṢUA pannukọn avùnnukundiọsọmẹnu de he dobu. E dona deanana akọta Islaeli tọn gbọn nuhahun sinsinyẹn lẹ mẹ sọyi Aigba Pagbe tọn ji. Ṣigba, Jehovah na ẹn jide dọ ewọ na tindo kọdetọn dagbe, podọ e na ẹn tuli dọmọ: ‘Yin adọgbotọ bo yin huhlọnnọ. Nọ yìn Osẹ́n ṣie. Nọ hia ẹ to okle po ozán po, na hiẹ nido sọgan yí sọwhiwhe do yìn nuhe yin kinkan do e mẹ lẹpo. To whenẹnu, hiẹ na yin kọdetọn dagbenọ podọ hiẹ na nọ yinuwa po nuyọnẹn po.’—Jọṣ. 1:7, 8.

Mílọsu nọ pehẹ avùnnukundiọsọmẹnu he kàn dẹpẹ biọ lẹ to “ojlẹ awusinyẹn tọn he vẹawu nado pehẹ” ehelẹ mẹ. (2 Tim. 3:1) Taidi Jọṣua, mí na tindo kọdetọn dagbe eyin mí hodo ayinamẹ he Jehovah na ewọ. Mí sọgan nọ hia Biblu to gbesisọ mẹ, bo nọ yí sọwhiwhe do yí nunọwhinnusẹ́n etọn lẹ zan na whlepọn he mí nọ pannukọn lẹ.

Amọ́, susu mítọn na kẹalọyi dọ mí ma yin nuplọntọ dagbe hugan lẹ, podọ e ma nọ bọawuna mí nado plọnnu. Etomọṣo, na e yin nujọnu taun nado plọn Biblu wutu, gbadopọnna apotin lọ “Tẹ́n Ayinamẹ Ehelẹ Pọ́n,” nado mọ ayinamẹ dagbe delẹ he na hẹn nupinplọn towe yin kọdetọn dagbenọ podọ awuvivinu dogọ.

Salmu-kantọ lọ jihàn dọmọ: “Deanana mi gbọn ali gbedide towe lẹ tọn ji, na enẹ mẹ wẹ n’nọ mọ awuvivi te.” (Salm. 119:35) Dogbigbapọnna Ohó Jiwheyẹwhe tọn sọgan hẹn awuvivi susu wá na we. A na plọn nuhọakuẹ susu dile a to dodinnanu basi nado mọ adọkunnu gbigbọmẹ tọn lẹ.

Dile etlẹ yindọ hiẹ ma na deanana akọta de dile Jọṣua wà do, hiẹ lọsu nọ pehẹ avùnnukundiọsọmẹnu mẹdetiti tọn lẹ. Enẹwutu taidi Jọṣua, nọ plọnnu bo nọ wanu sọgbe hẹ nuhe yin kinkandai na ale towe lẹ. Eyin a wàmọ, hiẹ lọsu na yin kọdetọn dagbenọ podọ hiẹ na nọ yinuwa po nuyọnẹn po.

TẸ́N AYINAMẸ EHELẸ PỌ́N

Nọ hodẹ̀ whẹpo do plọnnu. Linlẹn Jiwheyẹwhe Ganhunupotọ lọ tọn lẹ wẹ yin kinkandai to Biblu mẹ na ale towe. Enẹwutu, to whenue a to Biblu hia, nọ biọ alọgọ etọn nado mọnukunnujẹemẹ, nado yí nuhe a plọn lẹ hẹn bosọ yí yé zan to gbẹzan towe mẹ.—Ẹzla 7:10.
Nọ kàn kanbiọ lẹ sè dewe dile a to Biblu kavi owe sinai do Biblu ji lẹ hia: ‘Etẹwẹ kandai ehe to didọna mi gando Jehovah go? Kanṣiṣa tẹwẹ e tindo hẹ owẹ̀n titengbe he tin to Ohó etọn mẹ? Nawẹ n’sọgan yí linlẹn ehelẹ zan nado gọalọna mẹdevo lẹ gbọn?’
Nọ lẹnayihamẹpọn do nuhe a plọn ji. Nọ nọte to wehihia whenu bo nọ lẹnnupọn: ‘Numọtolanmẹ tẹwẹ nudọnamẹ ehelẹ hẹn mi nado tindo? Naegbọn e do hẹn mi tindo numọtolanmẹ mọnkọtọn? Kanṣiṣa tẹwẹ e tindo hẹ nuhe ko jọ do go e wayi lẹ, ninọmẹ ṣie to alọnu, kavi hẹ nuhe sọgan wá jọ to sọgodo lẹ? Nawẹ n’sọgan yí nunọwhinnusẹ́n Biblu tọn lẹ po ayinamẹ ehe po zan to gbẹzan ṣie mẹ gbọn?’ (Jobu 23:5; Salm. 49:3) Pọ́n eyin a sọgan basi zẹẹmẹ nuhewutu Jehovah do dotuhomẹna omẹ etọn lẹ nado dapana walọyizan delẹ, kavi kọdetọn he nuyiwa to aliho he gbọnvo mẹ sọgan hẹnwa lẹ tọn.—Deut. 32:28, 29.
Nọ yí nukun homẹ tọn do pọ́n nujijọ he go kandai he hia a te donù lẹ. Di apajlẹ, be a sọgan yí nukun homẹ tọn do pọ́n nujijọ lọ to whenue nọvisunnu Josẹfu tọn lẹ to sisà ẹ na Iṣmaelinu lẹ ya? (Jen. 37:18-28) Etẹlẹ wẹ a mọ, sè, podọ owán tẹlẹ wẹ a to sisè? Ze dewe do otẹn mẹhe go kandai lọ donù lẹ tọn mẹ? Etẹ lẹn wẹ yé te podọ numọtolanmẹ tẹlẹ wẹ yé tindo? Linlẹn mọnkọtọn lẹ na zọ́n bọ nupinplọn towe na yin awuvivinu bosọ hẹn ale wá na we dogọ.
Nọ yí azọ́nwanu nupinplọn tọn he yin awuwlena nado hẹn dodinnanu towe pọnte lẹ zan. Nọ jẹakọ hẹ azọ́nwanu ọdinatẹẹ ji tọn kavi wema ji tọn he tin to ogbè towe mẹ lẹ. A whleawu nado biọ alọgọ mẹdevo lẹ tọn nado yọ́n lehe a na yí yé zan po kọdetọn dagbe po do blo. Di apajlẹ, Anademẹwe Dodinnanu Tọn na gọalọna we nado mọ nuhe yin kinkando hosọ susu ji lẹ, podọ zẹẹmẹ wefọ susu lẹ tọn. Nọ yí nudọnamẹ dogọ he tin to Owe Wiwe lẹ—Lẹdogbedevomẹ Aihọn Yọyọ Tọn mẹ lẹ zan. Ehelẹ nọ bẹ nudọnamẹ he yọ́n-na-yizan lẹ hẹn gando lẹdo otò tọn, todohukanji ojlẹ hihia tọn, zínpinpẹn gọna nujlẹnu lẹ, po mọmọ po sọyi go.
Nọ basi bladopọ nuagokun he tin to hosọ lọ mẹ lẹ tọn, ehe na gọalọna we nado flin nuhe a ṣẹṣẹ plọn lẹ. Nuhe sọ yọ́n humọ wẹ nado nọ má ẹn hẹ mẹdevo lẹ. Be nudọnamẹ de tin to e mẹ he a sọgan yizan to lizọnyizọn lọ mẹ ya? To aliho ehelẹ mẹ, gbọnvona dọ a na zín nuagokun lẹ do ayiha towe mẹ, a nasọ yí nuhe a plọn lẹ zan nado hẹn ale wá na mẹdevo lẹ.