Nawẹ Jiwheyẹwhe Nọ Yin?

Eyin a to tintẹnpọn nado yọ́n mẹde, onú tintan he a gán kanse mẹlọ wẹ, “Nawẹ a nọ yin?” Eyin a kàn kanbiọ enẹ sè Jiwheyẹwhe, etẹwẹ e na gblọn?

“Yẹn wẹ Jehovah. Yinkọ ṣie niyẹn.”​—Isaia 42:8.

Oyín enẹ taidi onú yọyọ na we wẹ ya? E gán yinmọ, na susu lẹdogbedevomẹtọ Biblu tọn lẹ tọn ma zan yinkọ Jiwheyẹwhe tọn bọ delẹ zan ẹn whla vude poun. Yé nọ saba yí tẹnmẹ-yinkọ lọ “OKLUNỌ” do diọtẹnna ẹn. Amọ́, whla 7 000 nkọ wẹ yinkọ Jiwheyẹwhe tọn sọawuhia to Biblu mẹ to ogbè dowhenu tọn mẹ. Yinkọ lọ bẹ wekun Heblugbe tọn asu ẹnẹ hẹn, ehe sọgbe hẹ wekun lọ lẹ YHWH kavi JHVH bo wá yin lilẹdo “Jehovah” to Gungbe mẹ.

Yinkọ Jiwheyẹwhe tọn sọawuhia to Owe-wiwe Heblu tọn blebu mẹ podọ to lẹdogbedevomẹ susu mẹ

NUHEWUTU OYÍN JIWHEYẸWHE TỌN DO YIN NUJỌNU

Oyín lọ yin nujọnu to nukun Jiwheyẹwhe lọsu tọn mẹ. Mẹde ma do oyín na Jiwheyẹwhe; ewọ lọsu wẹ de oyín lọ na ede. Jehovah dọmọ: “Enẹ wẹ oyín ṣie kakadoi, podọ oyín enẹ wẹ dona nọ yin yiyizan nado flin mi sọn whẹndo de mẹ jẹ devo mẹ.” (Eksọdusi 3:15) To Biblu mẹ, yinkọ Jiwheyẹwhe tọn sọawuhia hú tẹnmẹ-yinkọ devo depope taidi Ganhunupotọ, Otọ́, Oklunọ, kavi Jiwheyẹwhe, podọ hú yinkọ mẹdetiti tọn devo depope taidi Ablaham, Mose, Davidi kavi Jesu. Humọ, ojlo Jehovah tọn wẹ yindọ oyín etọn ni yin yinyọnẹn. Biblu dọmọ: “Gbọ gbẹtọ lẹ ni yọnẹn dọ hiẹ, mẹhe oyín towe nọ yin Jehovah, hiẹ dopo kẹdẹ wẹ yin Gigogán to aigba lẹpo ji.”—Salmu lẹ 83:18.

Oyín lọ yin nujọnu to nukun Jesu tọn mẹ. To odẹ̀ he nọ yin yiylọdọ Odẹ̀ Oklunọ tọn mẹ, Jesu plọn hodotọ etọn lẹ nado nọ vẹvẹna Jiwheyẹwhe dọmọ: “Na oyín towe ni yin kinklandowiwe.” (Matiu 6:9) Jesu lọsu hodẹ̀ hlan Jiwheyẹwhe dọmọ: “Otọ́, pagigona oyín towe.” (Johanu 12:28) Gigopipana oyín Jiwheyẹwhe tọn wẹ yin nujọnu hugan na Jesu to gbẹzan etọn mẹ, enẹwutu wẹ e do dọ to odẹ̀ mẹ dọmọ: “N’ko hẹn oyín towe zun yinyọnẹn na yé bo nasọ hẹn ẹn zun yinyọnẹn.”—Johanu 17:26.

Oyín lọ yin nujọnu na mẹhe yọ́n Jiwheyẹwhe lẹ. To hohowhenu, omẹ Jiwheyẹwhe tọn lẹ yọnẹn dọ hihọ́ po whlẹngán yetọn po gando oyín Jiwheyẹwhe tọn he gọ́ na zẹẹmẹ go. “Atọ̀họ̀ gángán de wẹ oyín Jehovah tọn yin. Dodonọ nọ họ̀nwezun biọ e mẹ bo nọ mọ hihọ́.” (Howhinwhẹn lẹ 18:10) “Mẹdepope he dawhá ylọ oyín Jehovah tọn wẹ na yin whinwhlẹngán.” (Joẹli 2:32) Biblu dohia dọ oyín Jiwheyẹwhe tọn wẹ yè nado nọ yọ́n mẹhe to sinsẹ̀n ẹn lẹ. “Na gbẹtọ lẹpo na nọ zinzọnlin, yèdọ mẹdopodopo to oyín yẹwhe etọn tọn mẹ, ṣigba, míwlẹ na nọ zinzọnlin to oyín Jehovah Jiwheyẹwhe mítọn tọn mẹ kakadoi podọ doidoi.”—Mika 4:5; Owalọ lẹ 15:14.

NUHE YINKỌ LỌ ZẸẸMẸDO

Jiwheyẹwhe kẹdẹ wẹ tindo yinkọ lọ. Weyọnẹntọ susu dọ dọ yinkọ lọ Jehovah zẹẹmẹdo “E Nọ Hẹn Nado Lẹzun.” Jehovah Jiwheyẹwhe do nuhe yinkọ etọn zẹẹmẹdo hia to whenue e yí hogbe ehelẹ zan na ede dile e to hodọna Mose. E dọmọ: “Yẹn Na Lẹzun Nuhe Yẹn De Nado Lẹzun.” (Eksọdusi 3:14) Enẹwutu, zẹẹmẹ yinkọ lọ tọn ma do e hia taidi Mẹdatọ de he hẹn nulẹpo wá tintin mẹ poun gba. Yinkọ lọ sọ dohia dọ e tindo nugopipe nado hẹn ede gọna nudida etọn lẹ zun nudepope he e biọ nado hẹn ojlo etọn di. Tẹnmẹ-yinkọ Jiwheyẹwhe tọn lẹ gán basi zẹẹmẹ otẹn, aṣẹpipa kavi huhlọn etọn tọn, amọ́ oyín lọ Jehovah kẹdẹ wẹ gán do nuhe e yin po nuhe e gán lẹzun lẹpo po hia.

Oyín lọ dohia dọ Jiwheyẹwhe nọ dọ mítọn. Zẹẹmẹ yinkọ Jiwheyẹwhe tọn dohia dọ ewọ yiwanna nudida etọn lẹ, ehe bẹ mílọsu lẹ hẹn. Humọ, nugbo lọ dọ Jiwheyẹwhe hẹn yinkọ etọn zun yinyọnẹn dohia dọ ewọ jlo dọ mí ni yọ́n emi. Hú popolẹpo, ewọ lọsu wẹ desọn ojlo mẹ bo dọ yinkọ etọn na mí. E họnwun dọ Jiwheyẹwhe ma jlo dọ mí ni nọ pọ́n ẹn taidi yẹwhe dabla kavi he ma do ojlo to mí mẹ gba, ṣigba taidi Omẹ nujọnu tọn de he mí gán jihọntọn hẹ.—Salmu lẹ 73:28.

Oyín Jiwheyẹwhe tọn yiyizan nọ dohia dọ mí yiwanna ẹn. Di apajlẹ, mí ni dọ dọ a biọ to mẹhe a jlo na jihọntọn hẹ de si nado nọ yí yinkọ towe do ylọ we. Nukun tẹwẹ a na yí do pọ́n mẹlọ eyin e sù oyín na we bo gbẹ́ nado nọ yí yinkọ towe do ylọ we? A gán nọ kanse dewe eyin omẹ enẹ jlo na jihọntọn hẹ we nugbo. Nudopolọ wẹ na Jiwheyẹwhe. Jehovah ko dọ yinkọ etọn na gbẹtọvi lẹ bosọ nọ na tuli mí nado yí i zan. To whenue mí yí oyín lọ zan, mí nọ dohia Jehovah dọ mí jlo na jihọntọn hẹ ẹ. E tlẹ nọ doayi “mẹhe nọ lẹnayihamẹpọn do [kavi, “yọ́n pinpẹn,” nudọnamẹ odò tọn] oyín etọn ji lẹ” go!—Malaki 3:16.

Oyín Jiwheyẹwhe tọn yinyọnẹn wẹ yin afọdide tintan nado yọ́n ewọ. Amọ́, e ma fó do finẹ. Mí dona yọ́n Omẹ nankọ he mẹhe tindo yinkọ lọ yin. Mí dona yọ́n ewọ ganji.