Be Yẹn Pegan Nado Dọyẹwheho Ya?
1. Naegbọn mí ma dona tindo numọtolanmẹ nugomape tọn na nuhe dù yẹwhehodidọ?
1 Eyin hiẹ ko kàn kanbiọ ehe nkọ sè dewe pọ́n, ma dibu blo! E ma yin wepinplọn paa kavi nugopipe jọwamọ tọn vonọtaun de wẹ nọ hẹn mí pegan taidi lizọnyizọnwatọ gba. Delẹ to devi dowhenu tọn lẹ mẹ yin alọdlẹndo taidi mẹhe “ma sewé bosọ yin omẹ tata lẹ.” Etomọṣo, yé yin yẹwhehodọtọ wẹndagbe lọ tọn kọdetọn dagbenọ lẹ na yé yí ahun yetọn lẹpo do hodo apajlẹ he Jesu zedai na yé.—Owalọ 4:13; 1 Pita 2:21.
2. Etẹwẹ yin delẹ to nuhe nọ dohiagona nuplọnmẹ Jesu tọn lẹ mẹ?
2 Lehe Jesu Plọnmẹ Do: Nuplọnmẹ etọn lẹ họnwun, yọ́n-na-yizan, bo ma vẹawu nado mọnukunnujẹemẹ. Kanbiọ, apajlẹ, po homẹbibiọ he ma doglẹ etọn lẹ po nọ dọ̀n ayidonugo hosetọ lẹ tọn. (Mat. 6:26) E nọ do ojlo ahundopo tọn hia gbẹtọ lẹ. (Mat. 14:14) Humọ, Jesu nọ dọho po adọgbigbo po gọna aṣẹpipa na e yọnẹn dọ Jehovah ko de emi bosọ na emi huhlọn nado hẹn azọ́ndenamẹ emitọn di.—Luku 4:18.
3. Nawẹ Jehovah nọ gọalọna mí nado hẹn lizọnyizọn mítọn di gbọn?
3 Jehovah Nọ Gọalọna Mí: Gbọn Ohó etọn po titobasinanu etọn po gblamẹ Nuplọnmẹtọ Daho mítọn nọ wleawuna azọ́nplọnmẹ he mí tindo nuhudo etọn nado dọyẹwheho wẹndagbe lọ tọn po kọdetọn dagbe po. (Isa. 54:13) Na Jehovah hẹn kandai aliho he mẹ Jesu plọnmẹ te tọn tin-to-aimẹ wutu, mí sọgan gbadopọnna aliho nuplọnmẹ tọn etọn lẹ bo hodo apajlẹ etọn. Jehovah nọ na mí gbigbọ wiwe etọn bosọ nọ plọnazọ́n mí gbọn opli agun tọn lẹ gblamẹ. (Joh. 14:26) To yidogọ mẹ, ewọ nọ yí wẹnlatọ numimọnọ he sọgan gọalọna mí nado tindo kọdetọn dagbe dogọ lẹ zan.
4. Naegbọn mí tindo whẹwhinwhẹ́n nado mọdọ mí pegan nado má wẹndagbe lọ hẹ mẹdevo lẹ?
4 Mí tindo whẹwhinwhẹ́n lẹpo nado mọdọ mí pegan na yẹwhehodidọ, na “pipegan mlẹnmlẹn mítọn wá sọn Jiwheyẹwhe dè” wutu. (2 Kọl. 3:5) Eyin mí ganjẹ Jehovah go bo nọ yí awuwledainanu owanyi tọn etọn lẹ zan ganji po nugbonọ-yinyin po, mí na “pegan to gigọ́ mẹ, bo yin hinhẹn sọgbe mlẹnmlẹn na azọ́n dagbe lẹpo.”—2 Tim. 3:17.