Be Hiẹ to Gbàndọn Wẹ Ya?
To gbàndọn na etẹ? Na wekinkan gọ́ kalti DPA he yin awuwlena na Kunnudetọ he ko yí baptẹm lẹ lọ mẹ. To whenuena e yindọ “mì ma yọ́n nuhe ogbẹ̀ mìtọn na yin to osọ he ja,” nujọnu wẹ e yin nado basi nudide jẹnukọn bo wlan nukunpedomẹgo po aliho nuyiwa dotowhé tọn he hiẹ na kẹalọyi to nujijọ ajiji whenu lẹ po dai. (Jak. 4:14; Owalọ 15:28, 29) Nado gọalọna we, video lọ Soigner sans transfuser—Besoins et droits du patient [Aliho Nukunpedomẹgo Matin Hùndido Tọn—Nuhudo po Jlọjẹ Awutunọ Tọn lẹ Po] ko yin awuwlena. Pọ́n video lọ, enẹgodo, yí kanbiọ he tin to odò lẹ zan nado gbadopọnna nuhe hiẹ plọn sọn e mẹ lẹ to odẹ̀ mẹ.—Ayidonugo: Na video lọ bẹ apadewhe mẹzizẹ tọn kleun delẹ hẹn wutu, mẹjitọ lẹ dona yí wuntuntun zan to whenuena yé to video lọ pọ́n po yọpọ lẹ po.
(1) Naegbọn pipli dotozọ́nwatọ lẹ tọn do to hùndonamẹ vọ́ gbeje pọ́n? (2) Na apajlẹ mẹzizẹ he gẹdẹ atọ̀n tọn, he yin bibasi matin hùndido. (3) Dotozọ́nwatọ po mẹzẹtọ nẹmu po wẹ ko do ojlo yetọn hia nado penukundo awutunọ lẹ go matin hùndido lẹdo aihọn pé? Naegbọn yé jlo nado wàmọ? (4) Etẹwẹ dodinnanu dotowhé tọn agọe tọn lẹ dehia gando yizan ohùn tọn go? (5) Owù tẹlẹ wẹ hùndido bẹhẹn to amasinzọnwiwa-liho? (6) Tadona tẹ kọ̀n wẹ azọ́nyọnẹntọ susu ko wá gando ale he tin to nunọnutẹnmẹ hùndido tọn lẹ mẹ go? (7) Etẹwẹ nọ hẹn whèdomẹ ohùn tọn wá? Nawẹ awutu lọ sọgan dẹn to gbẹtọ go sọ? Etẹwẹ sọgan yin wiwà nado hẹn ohùn he whè lọ gọwá? (8) Etẹwẹ sọgan gọalọ nado hẹn nuvikun vẹẹ ohùn tọn [globule rouge] gọwá lanmẹ na awutunọ de? (9) Ayiha tẹlẹ wẹ ko yin kinkàn nado de ohùn hẹngu pò to mẹzizẹ whenu? (10) Be nunọnutẹnmẹ hùndido tọn lẹ sọgan wazọ́n na yọpọ lẹ kavi na mẹhe tin to kúdonu lẹ ya? (11) Etẹwẹ yin dopo to nuhe dona yin wiwà jẹnukọn lẹ mẹ gando nukunpedomẹgo dotowhé tọn dagbe de go? (12) Naegbọn e do yin nujọnu na Klistiani lẹ nado basi nudide nukunpedomẹgo matin hùndido tọn jẹnukọn? Nawẹ mí sọgan wà ehe gbọn?
Nudide mẹdetiti tọn he sinai do ayihadawhẹnamẹnu mẹdopodopo tọn he yin pinplọn gbọn Biblu dali ji wẹ e yin nado kẹalọyi delẹ to nukunpedomẹgo he yin didohia to video lọ mẹ lẹ mẹ. Be hiẹ ko magbe wunmẹ nukunpedomẹgo matin hùndido tọn he hiẹ to jijlo nado kẹalọyi na dewe podọ na ovi towe lẹ, bo ko kanwe gọ́ kalti DPA de mẹ ya? Na nudọnamẹ gigọ́ lẹ do whẹho ehe ji, yí sọwhiwhe do gbadopọnna weta 7tọ owe Owanyi tọn po alọdlẹndonu he e bẹhẹn lẹ po. Sọ pọ́n owe-to-wemẹ lọ “Nawẹ Yẹn Dona Basi Nudide Gando Nugonu Pẹvi Ohùn Tọn lẹ Gọna Nukunpedomẹgo Dotowhé Tọn He Bẹ Ohùn Yẹnlọsu-Titi Tọn Hẹn Go Gbọn?” to Lizọnyizọn Ahọluduta Tọn Mítọn novembre 2006 tọn mẹ. Enẹgodo, hẹn ẹn diun dọ hiẹ kàn nudide towe lẹ do kalti DPA towe mẹ ganji. Nudide towe lẹ dona yin didọna afọzedaitọ towe do whẹho agbasalilo tọn ji lẹ po hagbẹ whẹndo towe tọn depope he ma yin Kunnudetọ lẹ po to gigọ́ mẹ.
[Yẹdide to weda 3]
• Be hiẹ ko magbe wunmẹ nukunpedomẹgo matin hùndido tọn he hiẹ to jijlo nado kẹalọyi na dewe podọ na ovi towe lẹ ya?
• Be hiẹ nọ hẹn kalti DPA he yin awuwlena ganji de to whepoponu na nujijọ madonukun lẹ wutu ya?