‘A Dibu Blo’
1. Nuhahun he taidi Jelemia tọn nkọ tẹlẹ wẹ dopodopo mítọn sọgan pehẹ?
1 To whenue Jelemia mọ azọ́ndenamẹ yí taidi yẹwhegán de, e lẹn to tintan whenu dọ emi ma pegan. Ṣigba Jehovah vọ́ jide na ẹn dọ, ‘a Dibu Blo,’ podọ ewọ gbọn homẹdagbe dali na ẹn huhlọn nado hẹn azọ́ndenamẹ etọn di. (Jel. 1:6-10) To egbehe, winyan po jide matindo po sọgan yinuwado lizọnyizọn mítọn ji. Obu gando lehe gbẹtọ lẹ na kẹalọyi kavi pọ́n mí do go sọgan nọ glọnalina mí to whedelẹnu nado dekunnu. Nawẹ mí sọgan duto obu mọnkọtọn ji gbọn, podọ dona tẹlẹ wẹ enẹ na hẹnwa na mí?
2. Nawẹ awuwiwle sọgan gọalọna mí nado de obu pò to lizọnyizọn lọ mẹ gbọn?
2 Wleawu Jẹnukọn: Awuwiwle dagbe sọgan gọalọna mí nado de obu pò. Di apajlẹ, eyin mí nọ lẹnnupọndo nuhe gbẹtọ lẹ nọ dọ nado hẹnalọdotena hodọdopọ lẹ ji jẹnukọn, mí na penugo nado na gblọndo na agọjẹdonu he mí nọ yawu dukosọna lẹ. (Howh. 15:28) Be e ma na yọ́n dọ mí ni nọ basi zepọn to Sinsẹ̀n-Bibasi Whẹndo tọn whenu nado wleawudai na nuhahun voovo he mí sọgan pehẹ to wehọmẹ podọ to lizọnyizọn lọ mẹ lẹ ya?—1 Pita 3:15.
3. Nawẹ jidide do Jehovah go nọ gọalọna mí nado duto obu ji gbọn?
3 Dejido Jehovah Go: Eyin mí ganjẹ Jiwheyẹwhe mítọn go, mí na penugo nado duto obu ji. Jehovah na mí jide mlẹnmlẹn dọ emi na gọalọna mí. (Isa. 41:10-13) Hihọ́ daho tẹwẹ mí sọgan tindo humọ? To yidogọ mẹ, Jesu na mí jide dọ eyin ninọmẹ he mí ma tlẹ donukun lẹ wá aimẹ, gbigbọ-wiwe Jiwheyẹwhe tọn na hẹn mí penugo nado dekunnu to aliho dagbe mẹ. (Malku 13:11) Enẹwutu, mì gbọ mí ni nọ vẹ̀ Jehovah to whepoponu nado na mí gbigbọ-wiwe etọn.—Luku 11:13.
4. Dona tẹlẹ wẹ mí na mọyi eyin mí nọ dovivẹnu to lizọnyizọn lọ mẹ mahopọnna avùnnukundiọsọmẹnu lẹ?
4 Dona Lẹ: Dile mí to vivẹnudo to lizọnyizọn lọ mẹ mahopọnna avùnnukundiọsọmẹnu lẹ, mí nọ yin hinhẹn lodo nado sọgan pehẹ whlepọn sọgodo tọn lẹ po kọdetọn dagbe po. Mí nọ wleawuna adọgbigbo, yèdọ jẹhẹnu he mẹhe gọ́ na gbigbọ-wiwe lẹ nọ dohia. (Owalọ 4:31) Humọ, dile mí to duduto obu mítọn lẹ ji po alọgọ Jehovah tọn po, mí nọ hẹn yise mítọn lodo podọ jidide mítọn to awà whlẹngán tọn etọn mẹ nọ sinyẹn deji. (Isa. 33:2) Mí sọ nọ duvivi ayajẹ po pekọ po tọn na mí yọnẹn dọ mí to homẹ Otọ́ mítọn olọn mẹ tọn hẹn hùn wutu. (1 Pita 4:13, 14) Enẹwutu, mì gbọ mí ni ma dibu nado lá owẹ̀n Ahọluduta lọ tọn po adọgbigbo po blo, bo nọ deji whepoponu dọ Jehovah na gọalọna mí!