Be Hiẹ Sọgan Gọalọna Alọwlemẹ Mayisenọ de Nado Kẹalọyi Nugbo lọ Ya?
1. Naegbọn e ma yin Klistiani he tindo alọwlemẹ mayisenọ lẹ kẹdẹ wẹ nọ tindo ojlo nado gọalọna alọwlemẹ yetọn nado kẹalọyi nugbo lọ?
1 Be wẹnlatọ delẹ tin to agun towe mẹ he tindo asu kavi asi mayisenọ ya? Eyin mọ wẹ, ayihaawe ma tin dọ wẹnlatọ ehelẹ nọ jlo dọ alọwlemẹ yetọn ni kọnawudopọ hẹ yé to sinsẹ̀n-bibasi nugbo mẹ. Ṣigba e ma yin yewlẹ kẹdẹ wẹ tindo ojlo enẹ gba. Taidi Jiwheyẹwhe, agun lọ blebu wẹ nọ tindo ojlo dọ “gbẹtọ wunmẹ lẹpo ni yin whinwhlẹngán bo wá oyọnẹn he pegan nugbo tọn kọ̀n.” (1 Tim. 2:4) Nawẹ mí sọgan gọalọna alọwlemẹ mayisenọ wẹnlatọ he to agun mítọn mẹ lẹ tọn nado kẹalọyi nugbo lọ gbọn?
2. Nawẹ zinzin na hẹn mí penugo nado gọalọna alọwlemẹ mayisenọ de gbọn?
2 Tintan whẹ́, mí dona tẹnpọn nado yọ́n pọndohlan alọwlemẹ mayisenọ lọ tọn do whẹho lẹ ji. Alọwlemẹ mayisenọ susu nọ yiwanna whẹndo yetọn bo nọ tẹnpọn nado yin alọwlemẹ kavi mẹjitọ dagbe. Yé sọgan yí ahun lẹpo do yise to sinsẹ̀n-nuplọnmẹ he gbọnvo na mítọn lẹ mẹ. Yé sọgan nọma yọ́n nususu gando Kunnudetọ Jehovah tọn lẹ go adavo nuhe gbẹdohẹmẹtọ yetọn he ma yọ́n mí ganji kavi tindo pọndohlan agọ̀ gando mí go lẹ nọ dọna yé. Delẹ to yé mẹ nọ gblehomẹ na alọwlemẹ yetọn nọ yí whenu he e nọ yizan hẹ whẹndo lọ dai zan na sinsẹ̀n-bibasi. Zinzin na gọalọna mí nado yí homẹdagbe po sisi po do yinuwa hẹ mayisenọ de bo dapana homẹgble he ma yin dandan tọn to whenue mí topọ hẹ ẹ.—Howh. 16:20-23.
3. Aliho dagbe hugan tẹ mẹ wẹ alọwlemẹ mayisenọ de sọgan yin dindọn wá nugbo lọ mẹ te?
3 Nọ Do Ojlo Hia: Aliho dagbe hugan nado dọ̀n alọwlemẹ mayisenọ de wá nugbo lọ mẹ to tintan whenu sọgan yin gbọn nuyiwa mítọn lẹ dali, e ma yin gbọn hodọdopọ sinai do Biblu ji de dali gba. (1 Pita 3:1, 2) Nujọnu lọ to whẹho ehe mẹ wẹ nado nọ do ojlo hia. Mẹmẹyọnnu he to agun lọ mẹ lẹ sọgan nọ do ojlo hia to asi mayisenọ de mẹ, podọ mẹmẹsunnu lẹ sọgan wà nudopolọ na asu mayisenọ de. Gbọnna?
4. Nawẹ mí sọgan do ojlo hia alọwlemẹ mayisenọ de gbọn?
4 Eyin hiẹ ma ko doafọna alọwlemẹ mayisenọ lọ, vlavo a sọgan wàmọ to whenue a dọho hẹ alọwlemẹ Klistiani lọ godo. Ma gbọjọ blo eyin alọwlemẹ mayisenọ lọ ma yí we ganji to tintan whenu. Họntọnjihẹmẹ po ojlo he mí dohia po sọgan whàn ẹn nado diọ pọndohlan etọn gando Kunnudetọ Jehovah tọn lẹ go. (Lom. 12:20) Klistiani he whèwhín delẹ ko basi oylọna alọwlemẹ mayisenọ de po whẹndo etọn po nado wá dù núdùdù whèjai tọn to owhé yetọn gbè po linlẹn lọ po nado jẹakọ hẹ ẹ podọ nado de linlẹn agọ̀ depope he sọgan ko tin to ahun etọn mẹ sẹ̀. Klistiani enẹlẹ dọhodo nuhe mẹ mayisenọ lọ tindo ojlo te lẹ ji, kakati nado hẹn ẹn po huhlọn po nado dọhodo gbigbọnu lẹ ji. To godo mẹ, e sọgan yọnbasi nado dọhodo Owe-wiwe ji to whenue alọwlemẹ mayisenọ lọ ko voawu ganji. Kavi e sọgan kẹalọyi oylọ-basinamẹ nado wá dopo to opli mítọn lẹ mẹ nado sọgan pọ́n nuhe asi etọn to pinplọn, titengbe to whenuena e yindọ e ko yọ́n mẹdelẹ to agun lọ mẹ. Eyin e ma tlẹ ko wleawufo nado dindona nugbo lọ, mí sọgan pá ẹ na godoninọna alọwlemẹ yisenọ etọn.
5. Nawẹ mẹho lẹ sọgan gọalọna alọwlemẹ mayisenọ de gbọn?
5 Titengbe mẹho agun tọn lẹ wẹ dona gọalọna alọwlemẹ mayisenọ lẹ bo nọ tin to aṣeji nado yí dotẹnmẹ hundote lẹ zan nado dekunnuna yé. Alọwlemẹ mayisenọ he ma nọ tindo ojlo to hodọdopọ Biblu tọn mẹ dai de sọgan dotoaina tulinamẹ Owe-wiwe tọn to whenue e tin to dotowhé kavi to pipehẹ manọna sinsinyẹn. Eyin whẹndo alọwlemẹ mayisenọ de tọn to pipehẹ ninọmẹ sinsinyẹn de, taidi okú hagbẹ whẹndo tọn de tọn, mẹho lẹ sọgan biọ to e si nado kọnawudopọ hẹ yé dile yé jlo na miọnhomẹna whẹndo lọ.
6. Whẹwhinwhẹ́n tẹlẹ wẹ mí tindo nado gọalọna alọwlemẹ mayisenọ lẹ?
6 Lẹnnupọndo ayajẹ he Klistiani de na tindo to whenue alọwlemẹ etọn wá kẹalọyi nugbo lọ ji! Nujijọ ayajẹ tọn mọnkọtọn nasọ hẹn Jehovah, angẹli lẹ, po pipotọ agun lọ tọn lẹ po jaya taun. (Luku 15:7, 10) Ṣigba, eyin alọwlemẹ mayisenọ lọ ma kẹalọyi nugbo lọ to tintan whenu, mí sọgan gbẹ́ jaya dọ vivẹnudido mítọn nọ hẹn homẹ Jehovah tọn hùn, yèdọ mẹhe “ma jlo dọ mẹdepope ni yin vivasudo ṣigba jlo dọ mẹlẹpo ni wá lẹnvọjọ kọ̀n.”—2 Pita 3:9.
[Blurb on page 6]
Aliho dagbe hugan nado dọ̀n alọwlemẹ mayisenọ de wá nugbo lọ mẹ to tintan whenu sọgan yin gbọn nuyiwa mítọn lẹ dali, e ma yin gbọn hodọdopọ sinai do Biblu ji de dali gba