Mì Gbọ Mí Ni Do Pinpẹn-Nutọn-Yinyọnẹn Mítọn Hia
Oflin Na Yin Bibasi to 17 Avril
1. Numọtolanmẹ he taidi psalm-kantọ lọ tọn tẹwẹ mí dona wleawuna to ojlẹ Oflin tọn lọ whenu?
1 Nuyiwa lẹblanu po whlẹngán Jehovah tọn lẹ tọn po whàn psalm-kantọ lọ nado kanse dọmọ: “Etẹ yẹn na na hlan OKLUNỌ na dagbewà etọn lẹ hlan dali ṣie?” (Ps. 116:12) To egbehe, devizọnwatọ Jiwheyẹwhe tọn lẹ tindo whẹwhinwhẹ́n susu dogọ nado nọ do pinpẹn-nutọn-yinyọnẹn hia. Owhe kanweko susu to whenue hogbe ehelẹ ko yin kinkan godo, Jehovah na gbẹtọvi lẹ nunina daho hugan lọ—enẹ wẹ ofligọ. Dile mí to awuwle nado flin okú Klisti tọn to 17 avril, mí tindo whẹwhinwhẹ́n dagbe susu nado dopẹ́.—Kọl. 3:15.
2. Etẹwẹ yin delẹ to whẹwhinwhẹ́n he wutu mí do nọ yọ́n pinpẹn ofligọ lọ tọn lẹ mẹ?
2 Dotẹnmẹ He Ofligọ lọ Hundote Lẹ: Gbọn ofligọ lọ gblamẹ, mí sọgan mọ “jona ylando mítọn lẹ tọn” yí. (Kọl. 1:13, 14) Ehe nọ hẹn mí penugo nado sẹ̀n Jehovah po ayihadawhẹnamẹnu wiwe de po. (Heb. 9:13, 14) Mí sọgan yí awuvivo hodidọ tọn do dọnsẹpọ Jehovah to odẹ̀ mẹ. (Heb. 4:14-16) Mẹhe do yise hia to ofligọ lọ mẹ lẹ tindo todido jiawu ogbẹ̀ madopodo tọn!—Joh. 3:16.
3. Nawẹ mí sọgan dohia Jehovah dọ mí yọ́n pinpẹn ofligọ lọ tọn gbọn?
3 Do Pinpẹn-Nutọn-Yinyọnẹn Hia: Dopo to aliho he mẹ mí sọgan do pinpẹn-nutọn-yinyọnẹn mítọn hia te lẹ mẹ wẹ nado nọ gbadopọnna Biblu hihia Oflin tọn to azán dopodopo ji bosọ nọ lẹnayihamẹpọn do e ji. Mí sọ sọgan yí ahundopo do hodẹ̀ hlan Jehovah bo do lehe ofligọ lọ yin nujọnu na mí do hia. (1 Tẹs. 5:17, 18) Eyin mí setonuna gbedide Jesu tọn bo tin to hùnwhẹ Oflin tọn lọ tẹnmẹ, ehe na do pinpẹn-nutọn-yinyọnẹn mítọn hia. (1 Kọl. 11:24, 25) Humọ, mí sọgan hodo apajlẹ owanyi madodogbó Jehovah tọn bo basi oylọna mẹsusu dile e sọgan yọnbasi do nado wá Oflin lọ tẹnmẹ.—Isa. 55:1-3.
4. Etẹwẹ dona yin gbemima mítọn?
4 Devizọnwatọ Jehovah tọn pinpẹn-nutọn-yọnẹntọ lẹ ma nọ pọ́n hùnwhẹ Oflin tọn lọ hlan di opli agun tọn devo de poun. Hùnwhẹ lọ wẹ opli titengbe hugan he mí nọ basi to whemẹwhemẹ! Dile Oflin lọ to dindọnsẹpọ, na gbemima mítọn ni taidi psalm-kantọ lọ tọn, mẹhe wlan dọmọ: “Dona OKLUNỌ, hiẹ ayiha ṣie, a wọn dagbe etọn lẹ blo.”—Ps. 103:2.