Oylọ-Basinamẹwe Oflin Tọn lẹ Na Yin Mimá Bẹsọn 2 Avril
1. Whetẹnu wẹ mí na má oylọ-basinamẹwe Oflin tọn lẹ to owhe ehe mẹ, podọ nawẹ nujijla whemẹwhemẹ tọn ehe yin nujọnu sọ?
1 Bẹsọn 2 avril jẹ 17 avril, mí na má oylọ-basinamẹwe lẹ nado ylọ gbẹtọ lẹ wá nujijọ titengbe hugan owhe ehe tọn tẹnmẹ—enẹ wẹ Oflin okú Klisti tọn. To owhe he wayi lẹ mẹ, jlodotọ susu wẹ kọnawudopọ hẹ mí to whenue yé yin oylọ-basina to nujijla whemẹwhemẹ tọn ehe whenu. Di apajlẹ, nawe de ylọ wekantẹn alahọ tọn to azán Oflin tọn gbè bo dọmọ: “N’wá whégbè din tlolo bo mọ oylọ-basinamẹwe de to ohọ̀n ṣie glọ. N’jlo na yì nujijọ lọ tẹnmẹ, amọ́ n’ma yọ́n ogàn lọ mẹ taun.” Mẹmẹsunnu he yí alokan lọ dọ fie nudọnamẹ ehe sọgan yin mimọ te to oylọ-basinamẹwe lọ ji. Nawe lọ dotana hodọdopọ lọ bo dopà dọ, “N’na yì nujijọ mìtọn tẹnmẹ to whèjai!”
2. Etẹwẹ mí sọgan dọ to whenue mí to oylọ-basinamẹwe lọ zedonukọnnamẹ?
2 Lehe Mí Na Wazọ́n lọ Do: Na ojlẹ vude wẹ mí tindo nado wazọ́n gbọn aigba-denamẹ mítọn blebu ji wutu, e na yọ́n hugan dọ mí ni nọ glido. Mí sọgan dọmọ: “Mì kudo lewhenu. Mí jlo na basi oylọna whẹndo mìtọn wá nujijọ whemẹwhemẹ tọn titengbe de tẹnmẹ he na yin bibasi lẹdo aihọn pé to Sẹgbe 17 avril. [Yí oylọ-basinamẹwe lọ na whétọ lọ.] Azán enẹ gbè wẹ mí na basi hùnwhẹ okú Jesu tọn. Hodidọ sinai do Biblu ji de na yin nina vọnu nado basi zẹẹmẹ lehe mí sọgan mọaleyi sọn ofligọ Klisti tọn mẹ do tọn. Nọtẹn po ogàn he mẹ opli lọ na yin bibasi to lẹdo mítọn mẹ po ko yin kinkan do oylọ-basinamẹwe lọ ji.”
3. Nawẹ mí sọgan basi oylọna mẹsusu gbọn?
3 Eyin aigba-denamẹ agun mìtọn tọn klo, mẹho agun tọn lẹ sọgan na mì ayinamẹ nado nọ ze oylọ-basinamẹwe lọ dai na mẹhe ma tin to whégbè lẹ, ṣigba mí na wàmọ kiki eyin mí sọgan ze e do fie mẹdevo depope ma na mọ ẹn te. Mì hẹn ẹn diun dọ mì basi oylọna gọyìpọn, hẹnnumẹ, azọ́nwatọgbẹ́, wehọmẹvigbẹ́, po mẹyinyọnẹn mìtọn devo lẹ po. To sẹfifo lẹ, mì nọ ze linlinnamẹwe lẹ donukọnnamẹ to pọmẹ hẹ oylọ-basinamẹwe lọ to whedepopenu he e yọnbasi. Be a sọgan basi gbehosọnalitọ alọgọtọ tọn to avril mẹ bo tindo mahẹ gigọ́ to nujijla ojlofọndotenamẹ tọn ehe mẹ ya?
4. Naegbọn mí do jlo dọ jlodotọ lẹ ni wá Oflin lọ?
4 Hodidọ he whànmẹ nankọ die jlodotọ he wá lẹ na sè! Yé na sèhó gando owanyi sisosiso he sisẹ́ Jehovah nado wleawuna ofligọ lọ go. (Joh. 3:16) Yé na sè lehe Ahọluduta Jiwheyẹwhe tọn na hẹn ale wá na gbẹtọvi lẹ do. (Isa. 65:21-23) Yé nasọ yin tulina nado dọnsẹpọ aisinnunamẹtọ lẹ eyin yé jlo na plọn Biblu nado yọ́n nususu dogọ. Odẹ̀ mítọn wẹ yindọ ahunjijlọnọ susu ni kẹalọyi oylọ-basinamẹ ehe bo kọnawudopọ hẹ mí to Oflin lọ whenu!