Dotẹnmẹ Kunnudide Tọn Daho De
1. Gbọnvona hodidọ Oflin lọ tọn, etẹwẹ sọgan sọ yinuwado jonọ he wá lẹ ji? Basi zẹẹmẹ.
1 Dotẹnmẹ kunnudide tọn daho de na hundote to azán Oflin tọn gbè. Vivẹnu susu ko yin dido nado basi oylọna gbẹtọ lẹ wá hùnwhẹ ehe tẹnmẹ. E ma yin nuhe jonọ he wá lẹ na sè kẹdẹ wẹ na yinuwado yé ji gba. To whenue yọnnu de yì hùnwhẹ Oflin tọn de godo, e basi zẹẹmẹ nuhe e mọ lẹ tọn—yèdọ lehe mẹlẹpo jọmẹ do po Plitẹnhọ whanpẹnọ he to wiweji he yin gbigbá bo nọ yin nukunpedego gbọn ojlo dagbenọ lẹ dali po. Enẹwutu, gbọnvona hodọtọ lọ, mímẹpo wẹ na yí adà de wà nado dike nujijọ titengbe hugan owhe lọ tọn ehe ni yinuwado mẹhe wá lẹ ji.—Efe. 4:16.
2. Nawẹ dopodopo mítọn sọgan yinuwado jonọ he wá lẹ ji gbọn?
2 Dọnudo Jonọ lẹ po Zohunhun Po: Nukiko yẹsẹ mítọn po zohunhun yíyí do dọnudo jonọ lẹ po na yinuwado yé ji taun. (Joh. 13:35) Eyin a ma tlẹ sọgan dọho hẹ mẹlẹpo, tẹnpọn bo dọnudo mẹhe to apá towe lẹ po zohunhun po bo dọ yinkọ towe na yé. (Heb. 13:1, 2) Na ayidonugo jonọ depope he e taidi dọ yé ma jẹakọ hẹ mẹmẹsunnu de. E sọgan yindọ yé mọ oylọ-basinamẹwe yí to nujijla lọ whenu poun wẹ. A sọgan kanse yé dọ, “Be tintan die bọ mì wáfi ya?” Basi oylọna yé nado sinai do apá towe bo dohia yé dọ homẹ towe na hùn nado na gblọndo na kanbiọ depope he yé sọgan tindo. Eyin agun mìtọn dona yawu jotẹnna agun devo he na zan nọtẹn dopolọ, a sọgan dọ: “E na jlo mi nado yọ́n nuhe mì lẹn gando opli lọ go. Nawẹ n’sọgan mọ mì gbọn?”
3. Nawẹ mí sọgan hẹn mẹhe gbọjọ lẹ voawu gbọn?
3 Hẹn Mẹhe Gbọjọ lẹ Voawu: Matin ayihaawe, wẹnlatọ he ko gbọjọ lẹ na wá, etlẹ yin mẹhe masọ nọ wá opli devo de ba gbọnvona Oflin whemẹwhemẹ tọn lọ lẹ. Hẹn yé voawu bo dohia yé dọ homẹ towe hùn taun nado mọ yé. (Lom. 15:7) Mẹho lẹ sọgan yì owhé yetọn gbè to Oflin lọ godo bo na tuli yé nado zindonukọn to opli agun tọn lẹ wiwá mẹ. Odẹ̀ mítọn wẹ yindọ susu mẹhe wá lẹ tọn na yin whinwhàn nado pagigona Jiwheyẹwhe, e ma yin na nuhe yé na sè wutu kẹdẹ wẹ gba, ṣigba na ‘azọ́n dagbe mítọn lẹ he yé na mọ po nukun po’ wutu ga.—1 Pita 2:12.