Mí Dona Nọ Basi Gọyìpọn Na Jlodotọ Lẹ
1. Etẹwẹ mí dona húsinna na e nido sọgan whẹ́n ganji?
1 Okún he yè do dó jipa de mẹ dona yin sinhúna nado sọgan whẹ́n ganji. Nudopolọ wẹ gando okún nugbo lọ tọn lẹ he nọ yin dido do ahun gbẹtọ lẹ tọn mẹ to aigba-denamẹ mítọn ji go. (1 Kọl. 3:6) Mí dona nọ basi gọyìpọn lẹ bo húsinna okún yẹhiadonu tọn ehelẹ gbọn Ohó Jiwheyẹwhe tọn yiyizan dali eyin mí jlo dọ yé ni doadọ̀do, whẹ́n bo de sinsẹ́n tọ́n.
2. Nawẹ mí sọgan ze dodonu dai na gọyìpọn de gbọn?
2 Nọ Fọ́n Kanbiọ de Dote: To awuwiwlena nuzedonukọnnamẹ towe whenu, e na yọ́n dọ hiẹ nisọ nọ wleawuna kanbiọ ojlofọndotenamẹ tọn de he a na na gblọndo etọn to gọyìpọn whenu. Nọ fọ́n kanbiọ lọ dote to vivọnu hodọdopọ tintan tọn bo basi tito dagbe nado lẹkọyi. Mẹsusu wẹ nọ mọdọ alenu wẹ e yin nado de hosọ de sọn owe Biblu Plọn Mí mẹ bo yí i do basi dohia plọnmẹ Biblu tọn de.
3. Nudọnamẹ tẹlẹ wẹ kandai he a basi gando jlodotọ de go sọgan bẹhẹn?
3 Nọ Basi Kandai: Tlolo he a fó dlapọn tintan, yí whenu zan nado basi kandai de. Wlan yinkọ po adlẹsi mẹlọ tọn po dai. Onú dagbe wẹ e sọ yin nado wlan azán gọna ogàn he mẹ a dọho hẹ mẹlọ te, nuhe ji mì dọhodo po owe he mẹlọ kẹalọyi po dai. Be mẹlọ dọ dọ emi nọ kọnawudopọ hẹ sinsẹ̀n tangan de ya? Be whẹndonọ de wẹ e yin ya? Be e donù ojlo po ahunmẹdunamẹnu etọn lẹ po go ya? Nudọnamẹ mọnkọtọn lẹ na gọalọna we nado yọ́n hosọ he ji a na dọhodo to gọyìpọn whenu. Sọ wlan whenu he a kọngbedopọ hẹ mẹlọ nado lẹkọwa po kanbiọ he a na na gblọndo na po dai.
4. Naegbọn mí dona nọ sinyẹnlin to afọdidona jlodotọ lẹ mẹ?
4 Nọ Sinyẹnlin: Agbọ́ ma na pé Satani to vivẹnudido etọn nado “ṣinyan ohó” he mí do dó ahun jlodotọ de tọn mẹ sẹ̀ gba. (Malku 4:14, 15) Enẹwutu, ma gbọjọ blo eyin etlẹ vẹawu nado vọ́ jlodotọ de mọ to whégbè. Be a sọgan do wekanhlanmẹ de hlan ẹn kavi kanwe kleun de bo zedo ohọ̀n etọn glọ ya? Gbehosọnalitọ de bẹ plọnmẹ Biblu de jẹeji to họntonu hẹ nawe de, ṣigba na e ma nọ mọ nawe lọ to whégbè wutu, e do wekanhlanmẹ de hlan ẹn. To godo mẹ he mẹmẹyọnnu lọ wá mọ ẹn to whégbè, nawe lọ dọ dọ ojlo mẹdetiti tọn he mẹmẹyọnnu lọ dohia emi yinuwado emi ji taun. Dile mí to sinhúna okún nugbo lọ tọn lẹ, mí sọgan mọ ayajẹ to whenue mí na mọdọ yé tọ́nkun, whẹ́n bo “de sinsẹ́n tọ́n, yèdọ donu gbàn podọ kandeko podọ kanweko.”—Malku 4:20.