Lizọnyizọn Mítọn Nọ De Sinsẹ́n Dagbe Susu Tọ́n

1. Etẹwẹ sọgan hẹn mí gbọjọ gando lizọnyizọn mítọn go?

¹ Ojlo Jiwheyẹwhe tọn wẹ yindọ gbẹtọ ni nọ ‘duvivi sinsẹ́n azọ́n sinsinyẹn etọn tọn.’ (Yẹwh. 2:24) Ṣigba, eyin lizọnyizọn mítọn ma to sinsẹ́n he mí to nukundo lẹ detọ́n, enẹ sọgan hẹn mí gbọjọ. Taidi kọdetọn de, mí sọgan hẹn ayajẹ mítọn bu, podọ zohunhun mítọn to lizọnyizọn lọ mẹ sọgan depò. Enẹwutu, etẹwẹ sọgan gọalọna mí nado hẹn pọndohlan dagbe go gando lizọnyizọn mítọn go?

2. Naegbọn mí dona tindo pọndohlan dagbe gando kọdetọn lizọnyizọn mítọn tọn go?

² Hẹn Pọndohlan Dagbe Go: Dile etlẹ yindọ omẹ vude poun to mẹhe Jesu dọyẹwheho na lẹ mẹ wẹ lẹzun devi etọn lẹ, e họnwun dọ lizọnyizọn Jesu tọn de sinsẹ́n dagbe susu tọ́n. (Joh. 17:4) Flindọ to apajlẹ nudotọ lọ tọn mẹ, Jesu dohia dọ ahun gbẹtọ vude poun lẹ tọn ji wẹ owẹ̀n Ahọluduta lọ tọn na yinuwado. (Matiu 13:3-8, 18-22) Ṣigba, enẹ ma dohia dọ vivẹnu he do mí te to lizọnyizọn lọ mẹ lẹ ma to sinsẹ́n dagbe detọ́n gba.

3. Vlavo gbẹtọ lẹ kẹalọyi owẹ̀n mítọn kavi lala, nawẹ mí gbẹ́ nọ de ‘sinsẹ́n tọ́n’ gbọn?

³ Nuhe Sinsẹ́n Dagbe Susu Didetọn Zẹẹmẹdo: Sọgbe hẹ apajlẹ Jesu tọn gando nudotọ lọ go, mẹhe kẹalọyi owẹ̀n lọ lẹ na de ‘sinsẹ́n tọ́n.’ (Matiu 13:23) To whenuena okún likun tọn de wú bo wá whẹ́n, sinsẹ́n he e nọ detọ́n lẹ ma nọ yin getin pẹvipẹvi likun tọn devo lẹ gba, ṣigba okún likun tọn yọyọ susu devo lẹ. Enẹwutu, sinsẹ́n he Klistiani kọdetọn dagbenọ lẹ nọ detọ́n lẹ ma yin devi yọyọ lẹ dandan gba, ṣigba okún Ahọluduta lọ tọn susu he yé nọ vúnvún pé gbọn yẹwhehodidọ yetọn dali. Na nugbo tọn, wẹndagbe Ahọluduta lọ tọn lilá nọ hẹn ayajẹ wá na mí, vlavo gbẹtọ lẹ kẹalọyi owẹ̀n lọ kavi lala. Gbọn azọ́n enẹ wiwà dali, mí nọ klan oyín Jehovah tọn do wiwe. (Isa. 43:10-12; Matiu 6:9) Humọ, mí nọ duvivi lẹblanulọkẹyi lọ tọn nado yin azọ́nwatọgbẹ́ Jiwheyẹwhe tọn lẹ. (1 Kọl. 3:9) Podọ, “sinsẹ́n nùflo tọn” mítọn lẹ nọ hẹn homẹ Jehovah tọn hùn taun.—Heb. 13:15, 16.

4. Kọdetọn dagbe he mí sọgan nọma yọnẹn tẹlẹ wẹ vivẹnudido mítọn lẹ to lizọnyizọn lọ mẹ nọ hẹnwa?

⁴ Gbọnvona enẹ, vivẹnudido mítọn lẹ to lizọnyizọn lọ mẹ nọ hẹn kọdetọn dagbe he mí sọgan nọma yọnẹn lẹ wá. E yọnbasi dọ delẹ to mẹhe Jesu dọyẹwheho na lẹ mẹ wá lẹzun devi etọn lẹ to whenue e ko dotana lizọnyizọn aigba ji tọn etọn godo. Mọdopolọ, okún Ahọluduta lọ tọn he mí nọ do dó ahun gbẹtọ lẹ tọn mẹ lẹ sọgan wá whẹ́n to ojlẹ susu godo bọ yé na kẹalọyi nugbo lọ bọ mí ma tlẹ na yọnẹn. Na nugbo tọn, lizọnyizọn mítọn nọ de sinsẹ́n dagbe susu tọ́n. Enẹwutu, mì gbọ mí ni “nọ to sinsẹ́n susu detọ́n” bo gbọnmọ dali dohia dọ devi Jesu tọn lẹ wẹ mí yin.—Joh. 15:8.