“Ayinamẹ lẹ Nado Ze Linlinnamẹwe lẹ Donukọnnamẹ to . . .”

Lẹndai adà Opli Sinsẹ̀nzọn tọn he nọ gando linlinnamẹwe lẹ zizedonukọnnamẹ go ma yin nado dọ nuhe yé bẹhẹn, ṣigba nado dọhodo lehe mí sọgan ze yé donukọnnamẹ do ji. Mẹhe to nukunpedo adà ehe go na nọ basi homẹbibiọ kleun de nado fọ́n ojlo mẹplidopọ lẹ tọn dote na linlinnamẹwe lọ lẹ. E na biọ to yé si nado dọ lehe mí sọgan ze hosọ tangan de (kavi hosọ he nọ tọ́n whẹwhẹ lẹ) donukọnnamẹ do. Enẹ na zọ́n bọ mẹlẹpo na duvivi linlẹn enẹlẹ tọn bo pọ́n dehe yé sọgan zan lẹ. E ma na biọ to wẹnlatọ lẹ si nado dọ to gigọ́ mẹ lehe nuzedonukọnnamẹ de na yin bibasi do, ṣigba kanbiọ gọna wefọ he sọgan yin yiyizan lẹ. To tadona mẹ, wadohia na yin bibasi do linlinnamẹwe dopodopo ji. E na yọ́n dọ mí ni nọ hia yé whẹpo do wá opli ji bo nọ wleawufo nado dọhodo lehe mí sọgan ze yé donukọnnamẹ do ji. Eyin mí nọ wleawu ganji, adà ehe na gọalọna mí nado nọ plọnnu sọn ode awetọ dè.—Howh. 27:17.