Nọ Hodo Apajlẹ Yẹwhegán lẹ Tọn—Joẹli
1. Nawẹ mí sọgan do whiwhẹ Joẹli tọn nkọ hia to lizọnyizọn lọ mẹ gbọn?
1 Mẹnu wẹ yẹwhegán Joẹli? Nudọnamẹ dopo gee he e na gando ede go wẹ yindọ emi yin “visunnu Pẹtuẹli tọn.” (Joẹ. 1:1) Yẹwhegán whiwhẹnọ ehe zinnudo owẹ̀n Jehovah tọn ji, e ma yin do azọngban etọn taidi wẹnsagun de ji gba. Mọdopolọ, to lizọnyizọn mítọn mẹ, mí ma nọ dín gigo kavi yindidi na míde, kakatimọ mí nọ lẹ́ ayidonugo mẹdevo lẹ tọn do Jehovah po Biblu po ji. (1 Kọl. 9:16; 2 Kọl. 3:5) Humọ, owẹ̀n he mí nọ lá lọ nọ na mí huhlọn. To egbehe, adà dọdai Joẹli tọn tẹlẹ wẹ sọgan whàn mí nado gọ́ na zohunhun po todido po?
2. Etẹwẹ azán Jehovah tọn he sẹpọ dona whàn mí nado wà?
2 “Azán OKLUNỌ Tọn lọ Tin to Alọ Ji.” (Joẹ. 1:15): Dile etlẹ yindọ hogbe enẹlẹ yin kinkan sọn owhe fọtọ́n susu lẹ die wayi, mí to gbẹnọ to adà godo tọn hẹndi yetọn tọn mẹ. Lehe ninọmẹ aihọn lọ tọn fọ́n bo to yinylan deji do gọna ojlo matindo po mẹṣanko he mí nọ pehẹ to aigba-denamẹ mítọn lẹ ji po yin kunnudenu he họnwun lẹ dọ azán godo tọn titonu ylankan ehe tọn lẹ ko wá. (2 Tim. 3:1-5; 2 Pita 3:3, 4) Nulinlẹnpọn do lehe opodo lọ ko sẹpọ do ji nọ whàn mí nado nọ ze lizọnyizọn lọ do otẹn tintan mẹ to gbẹzan mítọn mẹ.—2 Pita 3:11, 12.
3. Dile nukunbibia daho lọ to sisẹpọ, naegbọn lizọnyizọn lọ do yin nujọnu taun?
3 “OKLUNỌ Na Yin Fibẹtado de Hlan Omẹ Etọn Lẹ.” (Joẹ. 3:16): Whinwhàn he go wefọ ehe donù ma sọgan yin yiyizan na nudevo zẹ̀ whẹdida he Jehovah na hẹnṣẹ to nukunbibia daho lọ whenu go. Homẹmiọnnamẹnu wẹ e yin na mí nado yọnẹn dọ Jehovah na whlẹn devizọnwatọ nugbonọ etọn lẹ to ojlẹ enẹ mẹ. (Osọ. 7:9, 14) Dile mí to mahẹ tindo to azọ́n yẹwhehodidọ tọn lọ mẹ bo to mimọ lehe Jehovah to godonọna mí bosọ to hinhẹn mí lodo do, mí nọ wleawuna yise po akọndonanu po, podọ jẹhẹnu ehelẹ na gọalọna mí to nukunbibia daho he ja lọ whenu.
4. Naegbọn mí sọgan yin homẹhunnọ bosọ yí jidide do to nukọnpọnhlan sọgodo?
4 Dile etlẹ yindọ mẹdelẹ dọ dọ owẹ̀n Joẹli tọn ma yin owẹ̀n ayajẹ tọn de, nuhe e dọ lẹ ze todido jiawu whlẹngán tọn donukọnna omẹ Jiwheyẹwhe tọn lẹ. (Joẹ. 2:32) Enẹwutu, mì gbọ mí ni yí jidide do to nukọnpọnhlan sọgodo bosọ yí zohunhun do lá wẹndagbe Ahọluduta Jiwheyẹwhe tọn. Enẹ na dohia dọ mí to nuyiwa sọgbe hẹ Joẹli 2:23 he dọmọ: “Mì ni yin homẹhunnọ, . . . bosọ nọ jaya to OKLUNỌ Jiwheyẹwhe mìtọn mẹ.”