Nọ Hodo Apajlẹ Yẹwhegán lẹ Tọn—Hosea
1. Kanbiọ tẹwẹ a na ko kanse dewe?
1 ‘Avọ́sinsan tẹlẹ wẹ n’jlo na basi na Jehovah?’ Vlavo a na ko kàn kanbiọ enẹ sè dewe to whenue a to ayihamẹlẹnpọndo dagbewà po lẹblanu susugege etọn po ji. (Ps. 103:2-4; 116:12) Hosea desọn ojlo mẹ bo wà nuhe Jehovah degbena ẹn nado wà, dile etlẹ yindọ enẹ biọ avọ́sinsan mẹdetiti tọn to e si. Nawẹ mí sọgan hodo apajlẹ Hosea tọn gbọn?
2. Nawẹ mí sọgan hodo apajlẹ dagbe Hosea tọn na nuhe dù linsinsinyẹn to azọ́n yẹwhehodidọ tọn lọ mẹ gbọn?
2 Nọ Dọyẹwheho to Ojlẹ Awusinyẹn Tọn Mẹ: Owẹ̀n Hosea tọn yin didohlan ahọluduta whẹndo ao Islaeli tọn tlọlọ, yèdọ fie sinsẹ̀n-bibasi nugbo ko dibla yin kúnsúdona te. Ahọlu Jeloboami II wà nuhe ylan to nukun Jehovah tọn mẹ bo hẹn sinsẹ̀n-bibasi oyìnvu tọn he yin didoai gbọn Jeloboami I dali gbayipe. (2 Ahọ. 14:23, 24) Ahọlu he bọdego lẹ zindonukọn nado hẹn ahọluduta whẹndo ao tọn lọ do ninọmẹ gbigbọmẹ tọn ylankan enẹ mẹ kakajẹ whenue e wá yin vivasudo to owhe 740 J.W.M. Mahopọnna sinsẹ̀n-bibasi lalo he gbayipe lọ, Hosea wadevizọn taidi yẹwhegán de, e whè gbau na owhe 59. Be mílọsu magbe nado to yẹwhehodọ to whemẹwhemẹ mahopọnna ojlo matindo kavi nukundiọsọmẹ he mí nọ pehẹ ya?—2 Tim. 4:2.
3. Nawẹ gbẹzan Hosea tọn do lẹblanu Jehovah tọn hia gbọn?
3 Nọ Ze Ayiha Do Lẹblanu Jehovah Tọn Ji: Jehovah degbena Hosea nado yí ‘asi galọtọ de na ede.’ (Hos. 1:2) Mahopọnna dọ asi etọn Gomẹli ji visunnu de na ẹn, e taidi dọ e wá ji ayọvi awe delẹ. Lehe Hosea desọn ojlo mẹ bo jona asi etọn do yin apajlẹ lẹblanu daho Jehovah tọn hlan akọta Islaeli atẹṣitọ he lẹnvọjọ lọ. (Hos. 3:1; Lom. 9:22-26) Be mí sọgan yí ojlo mẹdetiti tọn mítọn lẹ do sanvọ́ nado sọgan hẹn lẹblanu Jehovah tọn zun yinyọnẹn na gbẹtọ wunmẹ lẹpo ya?—1 Kọl. 9:19-23.
4. Etẹwẹ yin delẹ to avọ́sinsan he mí sọgan basi na Jehovah lẹ mẹ?
4 Devizọnwatọ Jehovah tọn delẹ ko yí agbasazọ́n he pekuẹ lẹ do sanvọ́ nado yí whenu susu dogọ zan na lizọnyizọn lọ. Mẹdevo lẹ ko gbọṣi tlẹnmẹ kavi ma jivi nado sọgan ze Ahọluduta lọ do otẹn tintan mẹ. To whenue mí to nulẹnpọn do gbẹzan Hosea tọn ji, mí sọgan tindo linlẹn lọ dọ, ‘Yẹn ma sọgan wà nuhe e wà enẹ pọ́n gbede.’ Etomọṣo, dile mí to pinpẹn-nutọn-yinyọnẹn mítọn na nukundagbe majẹhẹ Jehovah tọn hẹn siso deji bo nọ ganjẹ gbigbọ wiwe etọn go nado mọ huhlọn yí, ewọ sọgan yí mí zan to aliho he mí ma lẹn pọ́n gbede lẹ mẹ, dile e yindo to whẹho Hosea tọn mẹ.—Mat. 19:26; Flp. 2:13.