Apotin Kanbiọ Tọn

◼ Eyin wẹnlatọ yọnnu de jlo na deanana plọnmẹ Biblu de to họntonu bọ wẹnlatọ sunnu de hodo e, be dandannu wẹ e yin dọ ewọ ni blata ya?

Eyin wẹnlatọ yọnnu de nọ deanana plọnmẹ Biblu gbesisọ tọn de, bọ wẹnlatọ Ahọluduta tọn sunnu de to finẹ, ewọ dona blata. (1 Kọl. 11:3-10) Atọ̀họ̀-Nuhihọ́ lọ Tọn 15 juillet 2002, weda 27, basi zẹẹmẹ dọmọ: “Adà nupinplọn tọn he ko yin tito-basina jẹnukọn de wẹ ehe yin bọ mẹhe to anadena oplọn lọ nọ saba yin nukọntọ. To ninọmẹ mọnkọtọn lẹ glọ oplọn de nọ lẹzun apadewhe nuwiwa agun lọ tọn. Eyin mẹmẹyọnnu he ko yí baptẹm de to anadena oplọn mọnkọtọn bọ mẹmẹsunnu he ko yí baptẹm de tin to finẹ, ewọ dona ṣinyọnnudo ota.” Mẹmẹyọnnu lọ dona wà nudopolọ eyin vlavo e to anadena oplọn lọ to whégbè, họntonu, kavi fidevo depope.

To alọ devo mẹ, eyin plọnmẹ Biblu de he nọ yin anadena to họntonu ma ko lẹzun oplọn gbesisọ tọn de, e ma yin dandan dọ mẹmẹyọnnu de ni blata to whenue wẹnlatọ Ahọluduta tọn sunnu de to finẹ, dile etlẹ yindọ yanwle gọyìpọn lọ tọn wẹ nado do lehe plọnmẹ Biblu de nọ yin bibasi do hia kavi nado plọnnu to dopo to nuplọnmẹwe mítọn lẹ mẹ. To whenuena e yindọ gọyìpọn debọdo-dego lẹ wẹ nọ saba yin bibasi whẹpo mẹde nido jẹ nuplọn ji to họntonu, wẹnlatọ lẹ dona lẹnnupọndo ninọmẹ lẹ ji bo yí zinzin zan nado yọ́n whenue wẹnlatọ yọnnu de dona blata.