Nọ Hodo Apajlẹ Yẹwhegán lẹ Tọn—Mika
1. Kanbiọ tẹ ji wẹ Mika na ko lẹnnupọndo, ṣigba naegbọn yẹwhehodidọ etọn ma yin to ovọ́ mẹ?
1 ‘Whetẹnu wẹ opodo aihọn gblezọn ehe tọn na wá taun?’ Yẹwhegán Mika na ko lẹnnupọndo kanbiọ mọnkọtọn ji dile ewọ to whẹdida Jehovah tọn lá sọta ahọluduta Islaeli po Juda po tọn lẹ. Etomọṣo, yẹwhehodidọ etọn ma yin to ovọ́ mẹ. To gbẹwhenu Mika tọn to 740 J.W.M., Jehovah hẹn nuhe e dọ sọta Samalia lọ di. (Mika 1:6, 7) To nukọn mẹ, Jelusalẹm yin vivasudo to owhe 607 J.W.M. (Mika 3:12) Dile mí to tenọpọn ojlẹ he mẹ Jehovah na hẹn whẹdida etọn ṣẹ te to azán mítọn gbè, nawẹ mí sọgan hodo apajlẹ Mika tọn gbọn?
2. Nawẹ mí nọ do homẹfa hia dile mí to tenọpọn azán Jehovah tọn gbọn, podọ etẹwutu?
2 Nọ Fahomẹ: Mika wlan dọmọ: “Na yẹn tọn, yẹn na nọ pọnhlan OKLUNỌ dè; yẹn na nọtepọn Jiwheyẹwhe whlẹngán ṣie tọn lọ.” (Mika 7:7) Mika ma blá alọ dogo dile e to tenọpọn opodo lọ. Ṣigba, e hẹn alọnu etọn ján to azọ́n he Jehovah dena ẹn lọ mẹ. Dile mílọsu to tenọpọn azán Jehovah tọn, mí sọ dona to mahẹ tindo to “walọ wiwe lẹ po nuyiwa mẹdezejo na Jiwheyẹwhe tọn lẹ po mẹ.” (2 Pita 3:11, 12) Homẹfa Jehovah tọn nọ hùn dotẹnmẹ dote na gbẹtọ lẹ nado lẹnvọjọ. (2 Pita 3:9) Enẹwutu, mí nọ setonuna tudohomẹnamẹ Biblu tọn nado hodo apajlẹ homẹfa tọn yẹwhegán lẹ tọn.—Jak. 5:10.
3. Naegbọn mí dona nọ vẹ̀ Jehovah nado na mí gbigbọ wiwe etọn?
3 Nọ Ganjẹ Huhlọn Jehovah Tọn Go: Nado sọgan hẹn azọ́ndenamẹ sinsinyẹn he e tindo lọ di, Mika lẹhlan Jehovah dè nado mọ huhlọn yí. (Mika 3:8) Abajọ Biblu do dotuhomẹna mí nado nọ ganjẹ huhlọn Jehovah tọn go. Ewọ nọ gbọn alọtútlú dali na huhlọn mẹhe nuṣikọna lẹ na yé nido sọgan hẹn azọngban yẹwhehọluduta tọn yetọn lẹ di. (Ps. 84:5, 7; Isa. 40:28-31) Be hiẹ lọsu ko tindo numimọ enẹ tọn to sinsẹ̀nzọn wiwe towe mẹ ya? Be hiẹ nọ vẹ̀ Jehovah whẹwhẹ nado na we huhlọn gbọn gbigbọ wiwe etọn gblamẹ ya?—Luku 11:13.
4. Nawẹ gbẹzan Mika tọn yin apajlẹ dagbe de na mí to egbehe gbọn?
4 To gbẹzan Mika tọn lẹpo mẹ, ojlo Jiwheyẹwhe tọn wiwà wẹ yin nujọnu na ẹn hugan. E magbe nado hẹn nugbonọ-yinyin etọn go mahopọnna walọ gblezọn he lẹdo e lẹ. Mọdopolọ, tenọgli mílọsu tọn nọ yin whiwhlepọn egbesọegbesọ. Enẹwutu, mì gbọ mí ni hẹn gbemima mítọn lodo nado nọ “zinzọnlin to oyín [Jehovah] Jiwheyẹwhe mítọn tọn mẹ kakadoi podọ doidoi.”—Mika 4:5.