Apotin Kanbiọ Tọn

◼ Etẹwẹ ovi lẹ dona plọn nado sọgan jẹ whinwhẹ́n gbigbọmẹ tọn kọ̀n?

Mẹjitọ Klistiani lẹ nọ wazọ́n susu nado plọn ovi yetọn lẹ whẹ́n “to mẹplọnlọ po anademẹ Jehovah tọn po mẹ.” (Efe. 6:4) Di apajlẹ, mẹjitọ lẹ ko mọdọ alenu wẹ e yin nado nọ gbadopọnna wefọ egbesọegbesọ tọn hẹ ovi yetọn lẹ to afọnnu lẹpo. To sinsẹ̀n-bibasi whẹndo tọn kavi nuwiwa devo lẹ whenu, whẹndo lẹ sọgan nọ pọ́n video de bo dọhodeji, dọhodo hosọ tangan de ji sọn Kanbiọ He Jọja lẹ Nọ Kanse mẹ, basi wadohia otàn Biblu tọn de tọn, kavi basi zepọn lẹ. Ṣigba, na ovi lẹ nido sọgan “dovivẹnu bo lẹzun mẹhe whèwhín,” mẹjitọ lẹ dona plọn yé nugbo Biblu tọn he siso lẹ.—Heb. 6:1.

Lẹnnupọndo nuhe mí nọ plọn mẹhe tin to aigba-denamẹ mítọn ji lẹ ji. To dlapọn tintan kavi gọyìpọn he bọdego whenu, mí nọ saba dovivẹnu nado bẹ plọnmẹ Biblu de jẹeji to Etẹwẹ Biblu Plọn Mí Taun? mẹ. To whenue mí dotana owe enẹ, mí nọ bẹ “Mì Gbọṣi Owanyi Jiwheyẹwhe Tọn Mẹ” jẹeji. Etẹwutu? Owe Biblu Plọn Mí nọ gọalọna nuplọntọ lẹ nado tindo oyọnẹn dodonu tọn de do Owe-wiwe lẹ ji. Owe “Owanyi” nọ gọalọna yé nado yọ́n lehe yé sọgan yí nunọwhinnusẹ́n Biblu tọn lẹ do yizan mẹ to gbẹzan egbesọegbesọ tọn yetọn mẹ do. Dogbigbapọnna owe awe enẹlẹ nọ gọalọna mẹyọyọ lẹ nado “doadọ̀do” to Klisti mẹ bo “lodo to yise mẹ.” (Kọl. 2:6, 7) Be owe ehelẹ ma na hẹn ale wá na ovi mítọn lẹ ga ya? Ovi lẹ lọsu dona yọ́n nugbo lọ gando ofligọ lọ, Ahọluduta lọ, po ninọmẹ oṣiọ lẹ tọn po go. Yé dona yọ́n nuhewutu Jiwheyẹwhe do jotẹnna yajiji bosọ penugo nado tunwun azán godo tọn titonu ehe tọn lẹ go. Yé dona kudeji dọ Kunnudetọ Jehovah tọn lẹ dè wẹ nugbo lọ te. Jọja lẹ sọ dona mọnukunnujẹ nunọwhinnusẹ́n Biblu tọn lẹ mẹ gọna lehe yé na “plọn huhlọn wuntuntun tọn yetọn” do. (Heb. 5:14) Na nugbo tọn, mẹjitọ lẹ dona lẹnnupọndo owhe ovi yetọn lẹ tọn po obá he mẹ yé sọgan mọnukunnujẹnumẹ jẹ po ji. Etomọṣo, ovi susu wẹ tindo nugopipe lọ nado jẹ nugbo Biblu tọn he siso lẹ plọn ji, etlẹ yin to whenue yé gbẹ́ pò to ovu.—Luku 2:42, 46, 47.

Nado gọalọna mẹjitọ lẹ, anademẹ oplọn tọn lẹ sinai do owe Biblu Plọn Mí ji na sọawuhia to jw.org ji. Whẹndo lẹ sọgan mọ anademẹ enẹlẹ to nọtẹn Intẹnẹt tọn mítọn ji to LA BIBLE ET VOUS > ADOLESCENTS glọ. To nukọn mẹ, anademẹ oplọn tọn devo lẹ na yin awuwlena sinai do owe “Owanyi” ji. Na nugbo tọn, vọkan owe ehelẹ tọn lọsu sọgan yin yiyizan. Mẹjitọ lẹ sọgan de vlavo nado yí owe ehelẹ zan to adà sinsẹ̀n-bibasi whẹndo tọn yetọn tọn de mẹ, to whenue yé to anadena oplọn ovi yetọn de tọn, kavi to whenue yé to nuplọn ovi de gando lehe e sọgan nọ basi oplọn mẹdetiti tọn etọn do go.