Ohàn Yọyọ lẹ Na Sinsẹ̀n-Bibasi!
1 To opli whemẹwhemẹ tọn Watch Tower Bible and Tract Society of Pennsylvania tọn he yin bibasi gbọngodo to 4 octobre 2014 whenu, e yin lilá dọ tito ko yin zizedai nado basi vọjlado to ohanwe mítọn mẹ. Owẹ̀n ayajẹ tọn daho de wẹ ehe yin! Mẹhe wá opli lọ lẹpo wẹ yè flinnu gando otẹn vonọtaun he ohàn Ahọluduta lọ tọn lẹ tindo to sinsẹ́n-bibasi mítọn mẹ go.—Ps. 96:2.
2 Hiẹ sọgan kanse dewe dọ, ‘Naegbọn e do biọ dọ vọjlado ni yin bibasi to ohanwe lọ mẹ?’ Whẹwhinwhẹ́n susu wẹ zọ́n. Jẹnukọn whẹ́, nukunnumọjẹnumẹ mítọn gando Owe-wiwe lẹ go to wunhọ́n dogọ, podọ enẹ sọgan yinuwado hogbe ohàn mítọn lẹ tọn ji. (Howh. 4:18) Whẹwhinwhẹ́n devo he wutu vọjlado yin bibasi wẹ yindọ: To ogbè susu mẹ, susu hogbe he tin to ohanwe mítọn mẹ lẹ tọn wẹ yin didesọn zinjẹgbonu hoho Lẹdogbedevomẹ Aihọn Yọyọ Tọn hoho lọ mẹ. Enẹwutu, hogbe enẹlẹ dona yin didiọ sọgbe hẹ hogbe yọyọ he tin to Lẹdogbedevomẹ Aihọn Yọyọ Tọn agọe tọn mẹ lẹ. Na vọjlado ehelẹ bibasi na biọ azọ́n susu wutu, nudide ko yin bibasi nado yí ohàn yọyọ delẹ dogọ to ohanwe mítọn mẹ.
3 Ṣigba, be mí dona nọte dọ ohanwe yọyọ de ni yin zinzinjẹgbonu whẹpo mí nido jihàn yọyọ lọ lẹ wẹ ya? Lala. Homẹ mítọn hùn nado lá na mì dọ to osun he ja lẹ mẹ, ohàn yọyọ delẹ na yin zizedo nọtẹn Intẹnẹt tọn mítọn jw.org ji. Eyin ohàn yọyọ de yin didetọn, e na nọ sọawuhia to vivọnu tito-to-whinnu Opli Sinsẹ̀nzọn tọn, po ohia lọ “ohàn yọyọ” po.
4 Lehe A Sọgan Plọn Ohàn Yọyọ lọ lẹ Do: E sọgan vẹawu nado plọn ohàn yọyọ de. Etomọṣo taidi Psalm-kantọ lọ, ojlo mítọn wẹ ‘ma nado nabọẹ,’ ṣigba nado jihàn to opli agun tọn lẹ ji. (Ps. 30: 12) Nado plọn ohàn yọyọ lọ lẹ, hodo anademẹ he bọawu ehelẹ.
• Dotoaina nuhiho ohàn lọ lẹ tọn whlasusu. Ohàn lọ lẹ na yin zizedo nọtẹn Intẹnẹt tọn mítọn ji. Lehe hiẹ nọ dotoaina nuhiho lọ sù sọ, mọ wẹ e na bọawu na we nado nọ flin in do niyẹn.
• Plọn hogbe ohàn lọ tọn lẹ bo tẹnpọn nado hẹn yé do tamẹ.
• Hò ohàn lọ bo ji i po hogbe etọn lẹ po. Wàmọ kakajẹ whenue a na penugo bo jihàn lọ po awubibọ po.
• To sinsẹ̀n-bibasi whẹndo tọn whenu, nọ yí ojlẹ de zan nado jihàn yọyọ lọ lẹ po hagbẹ whẹndo towe tọn lẹ po kakajẹ whenue mì na penugo bo jihàn lọ lẹ po awubibọ po.
5 To osun he na bọdego lẹ mẹ, eyin ohàn he sọawuhia to vivọnu tito-to-whinnu Opli Sinsẹ̀nzọn tọn yin ohàn yọyọ de, ohàn lọ na yin hihò whladopo bọ agun lọ na dotoai whẹ́. Enẹgodo, mẹlẹpo na hodo nuhiho lọ do jihàn lọ dile mí ko nọ wà do to paa mẹ.
6 Na nugbo tọn, hànjiji to opli mítọn lẹ ji nọ hùn dotẹnmẹ dote na mí nado yí ayajẹ do kọ̀n ogbè mítọn lẹ dopọ bo pà Jehovah. Enẹwutu, mí ma dona tindo aṣa lọ nado nọ tọ́n matin whẹwhinwhẹ́n dagbe de to whenue ojlẹ sọ̀ nado jihàn to opli Klistiani tọn mítọn lẹ ji.
7 Mí sọgan dohia to aliho devo mẹ dọ mí yọ́n pinpẹn ohàn sinsẹ̀n-bibasi wiwe tọn mítọn lẹ tọn. To plidopọ mítọn lẹ ji, ohàn delẹ nọ yin hihò jẹnukọnna tito-to-whinnu afọnnu po whèmẹ po tọn. Whla awe to owhe dopo mẹ, mẹmẹsunnu po mẹmẹyọnnu ojlo dagbenọ lẹ po sọn agosu ẹnẹ aigba lọ tọn lẹ nọ yí akuẹ yetọn titi do dohún yì Patterson to New York nado wleawuna ohàn dagbedagbe he mí na yizan na sinsẹ̀n-bibasi mítọn lẹ. Enẹwutu, to whenue azinponọ plidopọ lọ tọn basi oylọna mí nado wá sinai bo dotoaina nuhe nuhogbẹ́ lọ wleawuna, mí dona wàmọ. Mọwiwà na gọalọna mí nado wleawuna ahun mítọn na nuplọnmẹ he mí na mọyi lẹ.—Ẹzla 7:10.
8 To egbehe, mí na dotana opli mítọn po ohàn yọyọ he hosọ etọn yin “Ahọluduta lọ Ko Yin Didoai—Na E Ni Wá!” po. Ohàn ehe yin jiji to opli whemẹwhemẹ tọn he wayi lọ ji bo yin awuwlena nado dohiagona owhe 100tọ gandudu Ahọluduta lọ tọn.
9 E họnwun dọ ohàn yọyọ lọ lẹ yin “onú dagbe lẹ” sọn Jehovah dè. (Mat. 12:35a) Mì gbọ mí ni magbe nado plọn ohàn yọyọ ehelẹ bo nọ ji yé sọn ahun mẹ wá bo gbọnmọ dali na pipà gọna gbégbò he Jiwheyẹwhe mítọn jẹna!—Ps. 147:1.