Azọ́nwanu Mẹpinplọn Tọn Mítọn Lẹ

1. Nawẹ Klistiani he nọ lá wẹndagbe lẹ taidi anazọ́nwatọ lẹ gbọn?

¹ Azọ́nwanu voovo lẹ wẹ anazọ́nwatọ lẹ nọ zan. Azọ́nwanu delẹ ma nọ yin yiyizan sọmọ. Ṣigba, devo lẹ nọ yin yiyizan whẹwhẹ. Anazọ́nwatọ numimọnọ lẹ nọ saba tindo azọ́nwanu he yé nọ zan whẹwhẹ ehelẹ to alọji, podọ azọ́nwanu ehelẹ wẹ yé nọ yọ́n zan hugan. Biblu na tuli Klistiani dopodopo nado yí ede zan to lizọnyizọn lọ mẹ podọ nado yin “azọ́nwatọ de he ma nọ kuwinyan nudepope tọn.” (2 Tim. 2:15) To azọ́nwanu mítọn lẹpo mẹ, detẹ wẹ yin nujọnu hugan? Ohó Jiwheyẹwhe tọn wẹ, yèdọ azọ́nwanu tangan he mí nọ yizan nado “hẹn gbẹtọ lẹ . . . zun devi.” (Mat. 28:19, 20) Enẹwutu, mí dona dovivẹnu nado lẹzun mẹhe “nọ yí ohó nugbo tọn lọ zan to aliho he sọgbe mẹ.” Etomọṣo, azọ́nwanu devo lẹ tin he mí nọ yawu yizan nado plọnnumẹ, podọ Klistiani lẹpo wẹ dona plọn nado nọ yí yé zan po azọ́nyinyọnẹn po nado plọn nugbo lọ gbẹtọ lẹ.—Howh. 22:29.

2. Etẹwẹ yin azọ́nwanu tangan mítọn lẹ?

² Azọ́nwanu Tangan Mítọn Lẹ: Gbọnvona Biblu, azọ́nwanu devo tẹlẹ wẹ mí dona nọ yizan? Azọ́nwanu tintan he mí nọ yí do plọn nugbo Biblu tọn gbẹtọ lẹ wẹ Etẹwẹ Biblu Plọn Mí Taun? To whenue mí fó oplọn to owe enẹ mẹ, mí nọ yí owe lọ Mì Gbọṣi Owanyi Jiwheyẹwhe Tọn Mẹ zan nado plọn mẹlọ nado nọ yí nunọwhinnusẹ́n Biblu tọn lẹ do yizan mẹ to gbẹzan egbesọegbesọ tọn mẹ. Enẹwutu, mí dona bikan to owe awe ehelẹ yiyizan mẹ. Mí sọ dona bikan to alọnuwe delẹ yiyizan mẹ ga. Wẹndagbe de sọn Jiwheyẹwhe Dè! yin dopo to azọ́nwanu tangan he mí nọ yizan nado bẹ plọnmẹ Biblu jẹeji lẹ mẹ. Eyin mẹhe ma yọ́n wehia sọmọ lẹ kavi mẹhe nọ do ogbè he mẹ owe mítọn lẹ ma sù te kavi ma tin te lẹ tin to aigba-denamẹ mítọn ji, mí sọgan nọ yí Dotoaina Jiwheyẹwhe kavi Dotoaina Jiwheyẹwhe bo Nọgbẹ̀ Kakadoi zan. Azọ́nwanu tangan de nado deanana nuplọntọ lẹ wá titobasinanu lọ mẹ wẹ Mẹnu lẹ Wẹ to Ojlo Jehovah Tọn Wà to Egbehe? Video he bọdego ehelẹ sọgan gọalọna mí nado hẹn gbẹtọ lẹ zun devi: Naegbọn Mí Dona Plọn Biblu?, Etẹwẹ Nọ Jọ to Plitẹnhọ Ahọluduta Tọn? po Dieu a-t-il un nom? po. Mí dona nọ yí azọ́nwanu ehelẹ zan ganji.

3. Etẹwẹ zinjẹgbonu Lizọnyizọn Ahọluduta Tọn Mítọn devo he na tọ́n to nukọn mẹ lẹ na gọalọna mí nado wà?

³ Zinjẹgbonu Lizọnyizọn Ahọluduta Tọn Mítọn devo he na tọ́n to nukọn mẹ lẹ na gọalọna mí nado bikan to nuplọnmẹwe tangan mítọn lẹ yiyizan mẹ. Gbọn vivẹnudido nado yí azọ́nwanu ehelẹ zan ganji dali, mí to tonusena ayinamẹ gbọdo ehe dọmọ: “Nọ payi dewe po mẹpinplọn towe po go to whepoponu. Nọ tẹdo onú ehelẹ go, na gbọn ehe wiwà dali, hiẹ na whlẹn dewe po mẹhe nọ dotoaina we lẹ po gán.”—1 Tim. 4:16.