Hẹn Lizọnyizọn Towe Pọnte Dogọ—Azọ́npinplọn Mẹyọyọ Lẹ

Nuhewutu E Do Yin Nujọnu: Devi yọyọ Jesu tọn lẹ dona plọn nado ‘payi nuhe e degbe etọn lẹpo go,’ ehe bẹ nugbo lọ pinplọn mẹdevo lẹ hẹn. (Mat. 28:19, 20) Susu to mẹyọyọ lẹ mẹ ko pegan nado nọ tindo mahẹ to Wehọmẹ Lizọnyizọn Yẹwhehọluduta Tọn mẹ, podọ yé sọgan ko nọ dekunnu mayin aṣa tọn na hagbẹ whẹndo tọn yetọn lẹ kavi họntọn lẹ. Ṣigba, dile yé to nukọnyi to nuhe yé to pinplọn lẹ mẹ bo wá mọnukunnujẹemẹ dọ Jehovah jlo dọ gbẹtọ lẹpo ni sè wẹndagbe lọ, yé sọgan dọ ojlo yetọn nado tindo mahẹ to sinsẹ̀nzọn kunnudegbe tọn mẹ. (Lom. 10:13, 14) To whenue mẹyọyọ lẹ ko yin alọkẹyi taidi wẹnlatọ he ma ko yí baptẹm godo, azọ́nplọnmẹ dagbe nina yé na gọalọna yé nado tindo adọgbigbo dogọ dile yé to afọdide titengbe ehe ze nado yinukọn to gbigbọ-liho.—Luku 6:40.

Lehe Mí Sọgan Wàmọ Do:

Gọalọna wẹnlatọ yọyọ lọ nado yí owe he e na tindo nuhudo etọn lẹ nado dọyẹwheho podọ nado plọnmẹ. Do lehe a nọ tó owe he a na yizan to kunnudegbe lẹ do saki towe mẹ do hia ẹ, bo basi zẹẹmẹ lẹndai owe he a hẹn lẹ dopodopo tọn na ẹn.
To pọmẹ, mì de nuzedonukọnnamẹ dopo to Lizọnyizọn Ahọluduta Tọn Mítọn mẹ bosọ basi zepọn etọn. Na tuli mẹyọyọ lọ nado dọ nuzedonukọnnamẹ lọ to hogbe etọn titi mẹ. Mì basi zepọn aliho nuzedonukọnnamẹ tọn lẹ he tin to owe Mọaleyi mẹ weda 82 tọn, he yè nọ saba dukosọ hẹ to aigba-denamẹ mìtọn ji. Zinnudo nujọnu-yinyin nusisọ́ po aṣọ́dido he to jlẹkaji tọn po ji.—2 Kọl. 6:3, 4.
Nọ to azọ́nplọn ẹn nado to nukọnyi vudevude. Do kalti aigba-denamẹ tọn de hia wẹnlatọ yọyọ lọ, bo plọn ẹn lehe yè nọ yí kandai whédegbè jẹ whédegbè tọn de zan do. Dohia ẹ lehe yè nọ basi kandai mẹhe do ojlo hia lẹ tọn do. Plọn ẹn lehe e sọgan yí jw.org zan to lizọnyizọn lọ mẹ do po lehe alọnuwe lọ Une bonne nouvelle pour des gens de toutes nations nọ yin yiyizan do po. Gọalọna ẹn nado nọ fọ́n ojlo mẹhe e nọ dukosọ hẹ lẹ tọn dote.—1 Kọl. 3:6.
Nọ fahomẹ bosọ nọ na ẹn pipà. (Howh. 25:11) Nọ ze apajlẹ dagbe dai. Zohunhun towe gọna ojlo nujọnu tọn he a tindo to wẹnlatọ yọyọ lọ mẹ na hẹn ale susu wá na ẹn to owhe lẹ godo.

Tẹ́n Ehe Pọ́n to Osun lọ Mẹ:

Wazọ́n hẹ nuplọntọ towe to lizọnyizọn whédegbè jẹ whédegbè tọn mẹ, plan ẹn yì gọyìpọn kavi plọnmẹ Biblu towe de. Eyin hiẹ ma ko tindo nuplọntọ de todin, biọ to wẹnlatọ he ma ko tindo numimọ sọmọ de si nado wazọ́n hẹ we.