Hẹn Lizọnyizọn Towe Pọnte Dogọ—Kunnudide to Aigba-Denamẹ Ajọwiwa Tọn Ji

Nuhewutu E Do Yin Nujọnu: Na mẹsusu nọ wazọ́n na gànhiho susu lẹ wutu, aliho dagbe hugan nado hẹn wẹndagbe Ahọluduta lọ tọn jẹ yé dè nọ saba yin nado yì dekunnuna yé to azọ́nwatẹn yetọn. Kunnudide to aigba-denamẹ ajọwiwa tọn ji sọgan hẹn ayajẹ po kọdetọn dagbe po wá, na to finẹ, mí nọ mọ mẹhe mí ma nọ mọ to whégbè lẹ podọ azọ́nwatọ lẹ nọ jọmẹ na yé nọ lẹndọ ahisinọ lẹ wẹ mí yin wutu. Nado sọgan tindo kọdetọn dagbe, wẹnlatọ lẹ dona nọ yí wuntuntun zan, bosọ yin apajlẹ dagbenọ to aṣọ́dido po nusisọ́ yetọn po mẹ. (2 Kọl. 6:3) Enẹwutu, nugopọntọ sinsẹ̀nzọn tọn dona nọ yí sọwhiwhe do deanana obá he mẹ yè to azọ́nwa gbọn aigba-denamẹ ajọwiwa tọn lẹ ji jẹ po mẹhe to azọ́nwa to e ji lẹ po.

Lehe Mí Sọgan Wàmọ Do:

Wleawuna nuzedonukọnnamẹ kleun de. Eyin mí dù whenu susu sọn whenu azọ́nwatọ lọ tọn mẹ, e ma na dike bo sèhó mítọn to whedevonu.
De whenue gbẹtọ ma sù to ajọwatọ lọ lẹ dè nado yì dla yé pọ́n, taidi whenue yé ṣẹṣẹ hùnhọ̀n.
Tẹnpọn nado dọho hẹ ogán lọ whẹ́. Jọmẹ bosọ nọ yawudomẹ. A sọgan dọmọ: “Mí to dlapọn kleun de basi na gbẹtọ lẹ to azọ́nwatẹn yetọn lẹ na e nọ vẹawu nado mọ yé to whégbè.” Ze nuzedonukọnnamẹ kleun de donukọnna ẹn bo do alọnuwe pẹvi, linlinnamẹwe lẹ, kavi owe devo de gbonu na ẹn. Na yé nikaa lẹndọ nusàtọ wẹ mí yin, e na yọ́n hugan ma nado donù tito nunina tọn go, adavo yelọsu kanse lehe azọ́n mítọn nọ yin nukunpedego to akuẹzinzan-liho do.
Eyin ogán lọ jọmẹ, biọgbè e nado dọhona azọ́nwatọ he pò lẹ to kleun mẹ. To ajọwatẹn delẹ, e na yọ́n hugan nado kanse ogán lọ eyin a sọgan jo owe delẹ do na azọ́nwatọ lọ lẹ nado hia to gbọjẹ whenu.
Nọ yí wuntuntun zan bo nọ diọalọ. Di apajlẹ, eyin azọ́nwatọ de to hodọna ahisinọ de kavi alọnu etọn ján, nọte kakajẹ whenue e na vò whẹpo do dọnsẹpọ ẹ.

Tẹ́n Ehe Pọ́n to Osun lọ Mẹ:

To sinsẹ̀n-bibasi whẹndo tọn mìtọn he na bọdego whenu, basi zepọn nuzedonukọnnamẹ kleun de tọn he a sọgan yizan eyin a to kunnude to aigba-denamẹ ajọwiwa tọn de ji.