‘Paulu Dopẹna Jiwheyẹwhe bo Mọ Adọgbigbo Yí’

To whenue agun he to Lomu sè dọ Paulu ja yé dè, mẹmẹsunnu delẹ zingbejizọnlin na kilomẹtlu 64 plipli nado yì pé e. Nawẹ owanyi mẹde-yido-sanvọ́ tọn yetọn yinuwado Paulu ji gbọn? “To whenue Paulu mọ yé, e dopẹna Jiwheyẹwhe bo mọ adọgbigbo yí.” (Ow 28:15) Dile etlẹ yindọ Paulu wẹ nọ na tuli agun he e dlapọn lẹ, ewọ wẹ yin tulina to ojlẹ ehe mẹ, na gàntọ de wẹ e yin to whenẹnu. —2Kọ 13:10.

To egbehe, nugopọntọ lẹdo tọn lẹ nọ yì sọn agun de mẹ jẹ devo mẹ nado na tuli mẹmẹsunnu po mẹmẹyọnnu lẹ po. Dile e nọ yindo na omẹ Jiwheyẹwhe tọn lẹpo, onú nọ wá ṣikọna yelọsu to whedelẹnu, bọ yé nọ yin magbọjẹnọ bo nọ gbọjọ. To whenue nugopọntọ lẹdo tọn po asi etọn po na wá dla agun towe pọ́n to whedevonu, etẹwẹ a sọgan wà na yé nido mọ adọgbigbo yí bọ “tulinina ode awetọ” nado tin?—Lo 1:11, 12.

• 

  Nọ yì opli sinsẹ̀nzọn kunnudegbe tọn lẹ. Tulinamẹnu wẹ e nọ yin na nugopọntọ lẹdo tọn eyin wẹnlatọ lẹ dovivẹnu nado duvivi osẹ dlapọn tọn lọ to gigọ́ mẹ. (1Tẹ 1:2, 3; 2:20) Be a gán basi gbehosọnalitọ alọgọtọ tọn to osun he mẹ e na wá dla agun towe pọ́n ya? Be a gán basi tito nado yì kunnudegbe hẹ ewọ po asi etọn po kavi na dopo to yé mẹ nido hodo we yì plọnmẹ Biblu towe de ya? Homẹ yetọn nọ hùn nado wazọ́n hẹ wẹnlatọ voovo lẹ, etlẹ yin mẹyọyọ lẹ kavi mẹhe ma ko yọ́n azọ́n sọmọ to lizọnyizọn lọ mẹ lẹ.

• 

  Nọ hẹjó yé. Be a sọgan na yé adọtẹn kavi wleawu núdùdù tọn na yé ya? Enẹ na dohia dọ a yiwanna yé. E ma yin dandan nado wleawuna onú daho de.—Luk 10:38-42.

• 

  Nọ dotoaina anademẹ po ayinamẹ etọn lẹ po bo nọ yí yé do yizan mẹ. Nugopọntọ lẹdo tọn nọ yí owanyi do gọalọna mí nado hẹn sinsẹ̀nzọn mítọn hlan Jehovah pọnte. E sọgan biọ dọ ni na ayinamẹ sinsinyẹn to whedelẹnu. (1Kọ 5:1-5) Homẹ etọn nọ hùn eyin mí setonu bosọ litai.—Heb 13:17.

• 

  Nọ dopẹ́. Dọna nugopọntọ lẹdo tọn po asi etọn po dọ a duvivi osẹ lọ tọn taun. A sọgan dọna yé tlọlọ kavi kanwehlan yé.—2Kọ 13:10.