GBẸZAN KLISTIANI TỌN

Nọ Yí Nuyọnẹn Do De Ayidedai Towe Lẹ

Naegbọn mí dona nọ yí nuyọnẹn do de ayidedai mítọn lẹ? Na ayidedai depope he mí de, vlavo video, ohàn, nọtẹn Intẹnẹt tọn, owe kavi aihundida video ji tọn, enẹ wẹ na gọ́ ayiha mítọn mẹ. Nudide mítọn lẹ nọ yinuwado walọ mítọn ji. E blawu dọ susu to ayidedai egbezangbe tọn lẹ mẹ wẹ nọ bẹ nuhe Jehovah gbẹwanna lẹ hẹn. (Slm 11:5; Ga 5:19-21) Enẹwutu, Biblu dotuhomẹna mí nado nọ lẹnnupọndo nuhe nọ hẹn yẹyi wá na Jehovah lẹ ji.—Flp 4:8.

PỌ́N VIDEO LỌ AYIDEDAI WUNMẸ TẸWẸ N’SỌGAN DE? ENẸGODO NA GBLỌNDO NA KANBIỌ HE BỌDEGO LẸ:

Nawẹ aihundida danuwiwa tọn he nọ wá aimẹ to Lomu hohowhenu tọn lẹ taidi ayidedai egbezangbe tọn delẹ gbọn?
Nawẹ hagbẹ agun tọn lẹ gán gọalọna jọja lẹ nado nọ yí nuyọnẹn do de ayidedai lẹ gbọn?
Nawẹ Lomunu lẹ 12:9 gán gọalọna mí nado nọ de ayidedai he sọgbe lẹ gbọn?
Ayidedai tẹlẹ wẹ sọgbe to lẹdo mìtọn mẹ?

AYIDEDAI TOWE NỌ BIỌ AZỌ́N WẸ KAVI AISINSIN TO FẸẸMẸ?

Susu to ayidedai he gbayipe to egbehe lẹ mẹ wẹ nọ plọnmẹ nado sinai to fẹẹmẹ to fidopo kakati nado zan agbasa. Video lẹ pinpọn, owe lẹ hihia kavi televiziọn pinpọn nọ yin aihun mẹdevo tọn pinpọn bo ma nọ biọ azọ́n de to mẹlọ lọsu si. Nugbo wẹ dọ ayidedai he nọ biọ aisinsin to fẹẹmẹ lẹ nọ yọ́n to whedelẹnu, etomọṣo mẹsusu mọdọ ayidedai he nọ biọ dọ yé ni zan agbasa nọ hẹn ale wá hugan. Di apajlẹ, mẹdelẹ nọ yiwanna hànjinu de hihò kavi nado de yẹdide. Mẹdevo lẹ nọ yiwanna aihundida devo lẹ taidi wezunhinhọ̀n, zọnlinzinzin kavi sadidi yì fide. Ayidedai depope he mí de, mí ni “nọ wà nulẹpo na gigo Jiwheyẹwhe tọn.”—1Kọ 10:31.