Nọ Dogbẹ́ hẹ Mẹhe Yiwanna Jehovah Lẹ

Naegbọn mí dona nọ dogbẹ́ hẹ mẹhe yiwanna Jehovah lẹ? Na mẹhe mí nọ dogbẹ́ hẹ lẹ nọ yinuwado mí ji to aliho dagbe kavi ylankan mẹ. (Hwh 13:20) Di apajlẹ, Ahọlu Jehoaṣi nọ wà “nuhe sọgbe to nukun Jehovah tọn mẹ” to whenue e to gbẹdo hẹ Yẹwhenọ Daho Jehoiada. (2Ot 24:2) Amọ́ to whenue Jehoiada kú, Jehoaṣi jo Jehovah sinsẹ̀n do, na ogbẹ́ ylankan wutu.—2Ot 24:17-19.

To owhe kanweko tintan W.M., apọsteli Paulu yí agun Klistiani tọn jlẹdo “owhé daho de” go, bọ hagbẹ agun lọ tọn lẹ taidi “núzinzan” lẹ to owhé de gbè. Mí na to “núzinzan de na lẹndai yẹyi tọn” yin zọnmii eyin mí nọ dapana gbẹdido pẹkipẹki hẹ mẹdepope, etlẹ yin hagbẹ whẹndo tọn kavi agun lọ tọn, he nọ wà nuhe Jehovah gbẹwanna. (2Ti 2:20, 21) Enẹwutu, mì gbọ mí ni nọ jihọntọn hẹ mẹhe yiwanna Jehovah bo nọ na mí tuli nado sẹ̀n ẹn lẹ.

PỌ́N VIDEO LỌ PLỌN NADO GBẸ́ OGBẸ́ YLANKAN LẸ DAI, ENẸGODO NA GBLỌNDO NA KANBIỌ HE BỌDEGO LẸ:

• Nawẹ mí gán dogbẹ́ ylankan to mayọnẹn mẹ gbọn?

• To video lọ mẹ, etẹwẹ gọalọna Klistiani atọ̀n lọ lẹ nado doalọtena ogbẹ́ ylankan dido?

• Nunọwhinnusẹ́n Biblu tọn tẹlẹ wẹ gán gọalọna we nado de họntọn dagbe lẹ?