GBẸZAN KLISTIANI TỌN
Nọ Ganjẹ Jehovah Go Eyin Yè Gbidikọna We
Kọgbidinamẹ hagbẹ lẹ tọn gán zọ́n bọ a na nọ sè vivẹ́ bo jẹflumẹ. Jehovah sinsẹ̀n tlẹ gán vẹawuna we, eyin a joawuna obu to whenue mẹlẹ diọnukunsọ sinsẹ̀n towe. Eyin a pehẹ kọgbidinamẹ, etẹwẹ a gán wà?
Jehovah-sẹ̀ntọ susu wẹ ko penugo bo duto kọgbidinamẹ ji, na yé ganjẹ ewọ go wutu. (Slm 18:17) Di apajlẹ, Ẹsteli ma whleawu nado dọho bo de sébibla dawe ylankan he nọ yin Hamani tọn gbà. (Ẹst 7:1-6) Amọ́ jẹnukọnna enẹ, e blanù, ehe dohia dọ Jehovah go wẹ e ganjẹ. (Ẹst 4:14-16) Jehovah dona vivẹnu he e do lẹ bo whlẹn ewọ po omẹ etọn lẹ po.
Jọja lẹ emi, e gán pà mìlọsu eyin mì biọ alọgọ Jehovah tọn bosọ dọho hẹ mẹhe whèwhín de, vlavo mẹjitọ mìtọn lẹ. Jehovah ma jo Ẹsteli do, e ma na jo mìlọsu do gbede. Nudevo tẹlẹ wẹ mì gán sọ wà?
PỌ́N VIDEO LỌ NUE AFLANMẸ LẸ NỌ PEHẸ—NAWẸ N’GÁN DUTO KỌGBIDINAMẸ JI GBỌN? ENẸGODO NA GBLỌNDO NA KANBIỌ HE BỌDEGO LẸ:
Etẹwẹ jọja lẹ gán plọn sọn apajlẹ Charlie po Ferin po tọn mẹ?
Nawẹ nuhe Charlie po Ferin po dọ gán gọalọna mẹjitọ lẹ gbọn to whenue ovi yetọn lẹ pehẹ kọgbidinamẹ?