GBẸZAN KLISTIANI TỌN

Gọalọna Mayisenọ lẹ Nado Wá Yọ́n Mẹdatọ Yetọn

Be a nọ whleawu to whedelẹnu nado dekunnuna mayisenọ lẹ, na a nọ lẹndọ yé ma na dotoai wutu wẹ ya? Flindọ, susu mẹhe ma nọ yiwanna sinsẹ̀n-hó lẹ tọn, kakajẹ mẹhe ma yise dọ Jiwheyẹwhe tin lẹ ji, wẹ ko lẹzun Kunnudetọ Jehovah tọn. To paa mẹ, kunnudenu he na gọalọna yé nado yise dọ Jiwheyẹwhe tin lẹ sin hudo wẹ yé do.—Lo 1:20; 10:14.

PỌ́N VIDEO LỌ FLIN—MẸHE MA DO YISE LẸ SỌGAN WLEAWUNA YISE!—MAYISENỌ LẸ, ENẸGODO NA GBLỌNDO NA KANBIỌ HE BỌDEGO:

Nawẹ apajlẹ Tommaso tọn gọalọna we nado mọdọ alenu wẹ e yin nado nọ dekunnuna mayisenọ lẹ gbọn?

Gblọndo towe

Nuhe a gán wà

Eyin mẹde dọ dọ emi ma yise dọ Jiwheyẹwhe tin, jọmẹ hẹ ẹ bo yinuwa po zinzin po. Podọ, tẹnpọn nado mọnukunnujẹ linlẹn po numọtolanmẹ etọn lẹ po mẹ. (2Ti 2:24) Dọhodo hosọ he e gán yiwanna lẹ ji. Be e yigbe dọ mì ni dọhodo kunnudenu he ko zọ́n bọ mẹsusu do wá yise dọ Mẹdatọ de tin lẹ ji ya? Eyin mọwẹ, yí owe po video he yin didetọn do hosọ enẹ ji lẹ po zan.

To tintan whenu, a gán whleawu nado dekunnuna mẹhe ma yise dọ Jiwheyẹwhe tin de. Naegbọn a ma na biọ alọgọ wẹnlatọ numimọnọ de tọn? Sọ flindọ Jehovah gán gọalọna mí nado jẹ ahun mẹhe tindo ninọmẹ ahun mẹ tọn he jẹna ogbẹ̀ madopo lẹ tọn mẹ, eyin yé ma tlẹ yise to bẹjẹeji dọ Jiwheyẹwhe tin.—Ow 13:48.