Mí Yiwanna Otọ́ Mítọn Jehovah Sisosiso

1, 2. Naegbọn Jehovah do hùn dotẹnmẹ dote na mí nado yin apadewhe whẹndo etọn tọn, podọ nawẹ e wàmọ gbọn?

JEHOVAH basi oylọna mí nado yin hagbẹ whẹndo etọn he bẹ sinsẹ̀n-basitọ etọn lẹ hẹn tọn. Oylọ-basinamẹ vonọtaun nankọ die! Whẹndo ehe bẹ mẹhe ko klan yede do wiwe hlan Jiwheyẹwhe bo do yise hia to avọ́sinsan ofligọ Visunnu etọn tọn mẹ lẹ hẹn. Whẹndo ayajẹnọ de mẹ wẹ mí te. Mí nọ duvivi gbẹzan he tindo zẹẹmẹ de tọn todin, podọ mí nọ yí ayajẹ do to nukundo ogbẹ̀ madopodo, vlavo to olọn mẹ kavi to Paladisi mẹ to aigba ji.

² Mahopọnna dọ e biọ nususu to Jehovah si, owanyi whàn ẹn nado hùn dotẹnmẹ dote na mí nado yin apadewhe whẹndo etọn tọn. (Joh. 3:16) “Ahọ́ daho de ko yin súsú nado họ̀” mí. (1 Kọl. 6:20) Gbọn ofligọ lọ gblamẹ, Jehovah hẹn ẹn yọnbasi na mí nado tindo haṣinṣan pẹkipẹki de hẹ ewọ. Mí tindo lẹblanulọkẹyi lọ nado nọ dọhona Mẹhe klohugan to wẹkẹ lọ mẹ, taidi Otọ́ mítọn. Podọ, dile mí mọ do to hosọ he wayi mẹ, Jehovah wẹ yin Otọ́ dagbe hugan lọ.

3. Kanbiọ tẹlẹ wẹ mí sọgan nọ kanse míde? (Sọ pọ́n apotin lọ “Be Jehovah Nọ Doayi Go E Ya?”)

³ Kẹdẹdile Biblu-kantọ de wà do, mílọsu sọgan nọ kanse dọ: “Etẹ yẹn na yí do suahọ Jehovah na dagbe he e ko wà na mi lẹpo?” (Salm. 116:12) Gblọndo lọ wẹ yindọ, mí ma gán suahọ Otọ́ olọn mẹ tọn mítọn gbede. Etomọṣo, owanyi he e tindo na mí nọ whàn mílọsu nado yiwanna ẹn. Apọsteli Johanu wlan dọmọ: “Mí tindo owanyi, na ewọ whẹ́ wẹ yiwanna mí wutu.” (1 Joh. 4:19) Aliho tẹlẹ mẹ wẹ mí sọgan dohia Otọ́ olọn mẹ tọn mítọn te dọ mí yiwanna ẹn?

NỌ DỌNSẸPỌ JEHOVAH

4. Sọgbe hẹ Jakọbu 4:8, naegbọn mí dona dovivẹnu nado dọnsẹpọ Jehovah?

⁴ Jehovah jlo dọ mí ni dọnsẹpọ emi, bo nọ dọhodopọ hẹ emi. (Hia Jakọbu 4:8.) E dotuhomẹna mí nado “nọ sinyẹnlin to odẹ̀ mẹ,” podọ e sọ nọ to gbesisọ mẹ to whepoponu nado dotoaina mí. (Lom. 12:12) Alọnu etọn ma nọ ján zẹjlẹgo gbede nado dotoaina mí, mọjanwẹ agbọ́ ma nọ pé e nado wàmọ do niyẹn. Podọ mílọsu nọ dotoaina ẹn gbọn Ohó etọn Biblu gọna owe he nọ gọalọna mí nado mọnukunnujẹemẹ lẹ hihia dali. Mí sọ nọ dotoaina ẹn eyin mí ma nọ yin ayihafẹsẹna to opli Klistiani tọn lẹ ji. Kẹdẹdile hodọdopọ dagbe de nọ zọ́n bọ ovi lẹ po mẹjitọ yetọn lẹ po nọ vẹ́ dogọ do, hodọdopọ hẹ Jehovah whẹwhẹ nọ zọ́n bọ mí nọ dọnsẹpọ ẹ.

5. Nawẹ mí sọgan hẹn odẹ̀ mítọn lẹ pọnte dogọ gbọn?

⁵ Lẹnnupọndo aliho he mẹ a nọ dọhodopọ hẹ Jiwheyẹwhe te ji. Jehovah nọ jlo dọ mí ni hùn ahun mítọn na ẹn to odẹ̀ mẹ. (Salm. 62:8) Mí na wà dagbe nado nọ kanse míde dọ: ‘Be odẹ̀ ṣie lẹ nọ taidi wekanhlanmẹ mọmọ tọn he yè nọ to vivọ́ zinjẹgbonu po maṣinu po lẹ wẹ ya, kavi yé nọ taidi wekanhlanmẹ he yè nọ lẹnnupọn ganji whẹpo do yí alọ do kàn lẹ?’ Ayihaawe ma tin dọ a yiwanna Jehovah taun, podọ a jlo na hẹn haṣinṣan towe hẹ ẹ sinyẹn. Eyin enẹ na pà we, a dona nọ dọhodopọ hẹ ẹ whẹwhẹ. Nọ dọ homẹ na ẹn. Nọ dọ nuhe nọ hẹn ayajẹ wá na we po nuhe nọ hẹn awufiẹsa wá na we lẹ po na ẹn. Deji dọ a sọgan lẹhlan ẹn nado mọ alọgọ.

6. Etẹwẹ mí dona wà nado dọnsẹpọ Otọ́ olọn mẹ tọn mítọn?

⁶ Nado dọnsẹpọ Otọ́ olọn mẹ tọn mítọn, mí dona yin pinpẹn-nutọn-yọnẹntọ. Mí kọngbedopọ hẹ salmu-kantọ lọ he wlan dọmọ: “Lehe nuhe hiẹ ko wà lẹ sù sọ, Jehovah Jiwheyẹwhe ṣie E, yèdọ azọ́njiawu towe lẹ podọ linlẹn towe lẹ gando mí go. Mẹdepope ma sọgan yin yiyijlẹdo gowe; eyin yẹn tlẹ tẹnpọn nado slẹ yé kavi dọho gando yé go, yé na sù hugan nuhe sọgan yin sislẹ!” (Salm. 40:5) Mí ma nọ tindo numọtolanmẹ pinpẹn-nutọn-yinyọnẹn tọn na Jehovah poun gba; amọ́ mí sọ nọ do pinpẹn-nutọn-yinyọnẹn enẹ hia ẹ to ohó po walọ po mẹ. Ehe nọ hẹn mí gbọnvona mẹsusu to egbehe. To aihọn he mẹ mí to gbẹnọ te, gbẹtọ lẹ ma nọ yọ́n pinpẹn nuhe Jiwheyẹwhe wà na yé lẹpo tọn. Na nugbo tọn, dopo to nuhe dohia dọ mí to gbẹnọ to “azán godo tọn lẹ” mẹ wẹ yindọ gbẹtọ lẹ yin mayọndagbenọ. (2 Tim. 3:1, 2) Mì gbọ mí ni ma wleawuna jijọ enẹ gbede blo!

7. Etẹwẹ Jehovah nọ jlo dọ mí ni wà, podọ etẹwutu?

⁷ Mẹjitọ lẹ ma nọ jlo dọ ovi yetọn lẹ ni nọ to nudọn to yedelẹ ṣẹnṣẹn, ṣigba dọ yé ni yin họntọn. Mọdopolọ, Jehovah nọ jlo dọ ovi emitọn lẹpo ni tindo haṣinṣan dagbe hẹ ode awetọ. Na nugbo tọn, owanyi he mí tindo na ode awetọ nọ do mí hia di Klistiani nugbo lẹ. (Joh. 13:35) Mí kọngbedopọ hẹ salmu-kantọ lọ he wlan dọmọ: “Lehe e yọ́n bo vivi do sọ dọ mẹmẹsunnu lẹ ni nọ nọpọ́ to kọndopọ mẹ!” (Salm. 133:1) Eyin mí yiwanna mẹmẹsunnu po mẹmẹyọnnu mítọn lẹ po, mí nọ dohia Jehovah dọ mí yiwanna ẹn. (1 Joh. 4:20) Lehe e vivi do sọ nado yin apadewhe whẹndo de tọn, he mẹ mẹmẹsunnu po mẹmẹyọnnu po, he nọ yin “homẹdagbenọ hlan ode awetọ bo gọ́ na awuvẹmẹ sisosiso” lẹ tin te!—Efe. 4:32.

NỌ DO OWANYI TOWE HIA GBỌN TONUSISE DALI

8. Sọgbe hẹ 1 Johanu 5:3, whẹwhinwhẹ́n titengbe tẹ wutu wẹ mí do nọ setonuna Jehovah?

⁸ Jehovah nọ donukun dọ ovi lẹ ni setonuna mẹjitọ yetọn lẹ, podọ e nọ donukun dọ mí ni setonuna emi lọsu. (Efe. 6:1) E jẹna tonusise mítọn, na ewọ wẹ Mẹdatọ mítọn, Mẹhe nọ hẹn ogbẹ̀ mítọn dote, podọ mẹjitọ he yọnnuin hugan lọ. Ṣigba, whẹwhinwhẹ́n titengbe he wutu mí nọ setonuna Jehovah wẹ yindọ mí yiwanna ẹn. (Hia 1 Johanu 5:3.) Dile etlẹ yindọ whẹwhinwhẹ́n susu wutu wẹ mí dona nọ setonuna Jehovah, ewọ ma nọ hẹn mí gbọ́gúngún-kangúngún nado wàmọ. Jehovah na mí mẹdekannujẹ nudide bibasi tọn, enẹwutu homẹ etọn nọ hùn eyin mí de nado setonuna ẹn na mí yiwanna ẹn wutu.

9, 10. Naegbọn e do yin nujọnu nado yọ́n nujinọtedo Jiwheyẹwhe tọn lẹ bo nọ nọgbẹ̀ sọgbe hẹ yé?

⁹ Mẹjitọ lẹ nọ jlo dọ ovi yetọn lẹ ni to hihọ́ glọ. Enẹwutu wẹ yé nọ ze nujinọtedo walọyizan tọn lẹ dai, ehe nọ hẹn ale wá na ovi yetọn lẹ. Eyin ovi lẹ setonuna anademẹ enẹlẹ, yé nọ dohia dọ yé dejido mẹjitọ yetọn lẹ go bosọ tindo sisi na yé. Lehe e yin nujọnu hugan do sọ dọ mí ni yọ́n nujinọtedo Otọ́ olọn mẹ tọn mítọn tọn lẹ bo nọ nọgbẹ̀ sọgbe hẹ yé. Eyin mí wàmọ, mí nọ dohia Jehovah dọ mí yiwanna ẹn bosọ tindo sisi na ẹn, podọ enẹ nọ hẹn ale wá na mílọsu. (Isa. 48:17, 18) To vogbingbọn mẹ, mẹhe gbẹ́ Jehovah po nujinọtedo etọn lẹ po dai lẹ nọ hẹn kọdetọn vẹadi lẹ wá yede ji.—Gal. 6:7, 8.

¹⁰ Eyin mí nọ nọgbẹ̀ to aliho he nọ hẹn homẹ Jehovah tọn hùn mẹ, mí nọ yin hihọ́-basina sọn nuhe na gbleawuna mí to agbasa-liho, numọtolanmẹ-liho podọ to gbigbọ-liho lẹ si. Jehovah yọ́n nuhe na wà dagbe na mí hugan. Aurora he nọ nọ̀ États-Unis dọmọ: “N’yọnẹn dọ tonusisena Jehovah nọ dekọtọn do gbẹzan he yọ́n hugan mẹ to whepoponu.” Mímẹpo wẹ na kẹalọyi nugbo ehe. Nawẹ tonusisena anademẹ owanyinọ Jehovah tọn lẹ ko hẹn ale wá na we gbọn?

11. Nawẹ odẹ̀ nọ gọalọna mí gbọn?

¹¹ Odẹ̀ nọ gọalọna mí nado nọ setonu eyin mọwiwà ma tlẹ bọawu. To whedelẹnu, e na nọ vẹawu na mí nado setonuna Jehovah, amọ́ mí dona nọ hoavùn to whepoponu sọta ayilinlẹn lọ nado waylando. Salmu-kantọ lọ vẹ̀ Jiwheyẹwhe dọmọ: “Fọ́n ojlo lọ dote to yẹn mẹ nado nọ setonuna we.” (Salm. 51:12) Denise he yin gbehosọnalitọ whepoponu tọn de dọmọ: “Eyin n’mọdọ e vẹawuna mi nado setonuna gbedide Jehovah tọn de, n’nọ biọ huhlọn to odẹ̀ mẹ nado wà nuhe sọgbe.” Mí sọgan kudeji dọ Jehovah nọ na gblọndo obiọ mọnkọ lẹ tọn to whepoponu.—Luku 11:9-13.

NỌ GỌALỌNA MẸDEVO LẸ NADO YIWANNA OTỌ́ MÍTỌN

12. Sọgbe hẹ Efesunu lẹ 5:1, etẹwẹ mí dona nọ wà?

¹² Hia Efesunu lẹ 5:1. Taidi “ovi yiwanna” Jehovah tọn lẹ, mí nọ wà nuhe go mí pé lẹpo nado hodo apajlẹ etọn. Mí nọ do jẹhẹnu etọn nkọ lẹ hia gbọn owanyi, homẹdagbe po jonamẹ po didohia dali to nuyiwa mítọn hẹ mẹdevo lẹ mẹ. To whenue mẹhe ma yọ́n Jiwheyẹwhe lẹ doayi walọ dagbe mítọn go, yé sọgan yin whinwhàn nado plọn nususu dogọ gando ewọ go. (1 Pita 2:12) Mẹjitọ Klistiani lẹ tindo whẹwhinwhẹ́n dagbe nado nọ hodo apajlẹ Jehovah tọn to aliho he mẹ yé nọ yinuwa hẹ ovi yetọn lẹ te. Eyin yé nọ wàmọ, ovi yetọn lẹ sọgan yin whinwhàn nado wleawuna haṣinṣan mẹdetiti tọn de hẹ Otọ́ owanyinọ mítọn.

13. Etẹ ji wẹ mí dona nọ ze ayiha do?

¹³ Jọja de nọ doawagun gando otọ́ etọn go, podọ homẹ etọn nọ hùn nado dọho gandego. Mọdopolọ, mí nọ doawagun gando Otọ́ olọn mẹ tọn mítọn Jehovah go, bo nọ jlo dọ mẹdevo lẹ ni wá yọ́n ẹn. To ahun mítọn mẹ, mímẹpo wẹ nọ tindo numọtolanmẹ Ahọlu Davidi tọn nkọ, mẹhe wlan dọmọ: “Yẹn na nọ doawagun to Jehovah mẹ.” (Salm. 34:2) Ṣigba, etẹwẹ lo eyin mí nọ kuwinyan? Nawẹ mí sọgan wleawuna adọgbigbo gbọn? Mí gán wàmọ eyin mí nọ ze ayiha do lehe mí sọgan hẹn homẹ Jehovah tọn hùn do, gọna ale susu he mẹdevo lẹ na mọyi sọn nupinplọn gando ewọ go mẹ ji. Jehovah na na mí adọgbigbo he sin hudo mí do. E ko gọalọna mẹmẹsunnu mítọn owhe kanweko tintan tọn lẹ nado wleawuna adọgbigbo, podọ e na gọalọna mílọsu ga.—1 Tẹs. 2:2.

14. Whẹwhinwhẹ́n tẹlẹ wutu wẹ e do yin nujọnu nado nọ tindo mahẹ to azọ́n mẹhẹnzun devi tọn lọ mẹ?

¹⁴ Jehovah ma nọ homẹnukuntapọn, podọ homẹ etọn nọ hùn eyin e mọ bọ mí to owanyi dohia mẹdevo lẹ mahopọnna ninọmẹ yetọn kavi fie yé wá sọn. (Owalọ 10:34, 35) Aliho dagbe hugan de nado do owanyi hia mẹdevo lẹ wẹ nado nọ lá wẹndagbe lọ na yé. (Mat. 28:19, 20) Kọdetọn tẹwẹ azọ́n ehe sọgan hẹnwa? Mẹhe dotoaina mí lẹ sọgan vọ́ gbẹzan yetọn jlado todin bosọ tindo todido lọ nado duvivi ogbẹ̀ madopodo tọn to sọgodo.—1 Tim. 4:16.

WANYINA OTỌ́ MÍTỌN NỌ HẸN AYAJẸ WÁ

15, 16. Whẹwhinwhẹ́n tẹlẹ wẹ mí tindo nado nọ jaya?

¹⁵ Jehovah yin mẹjitọ owanyinọ de, enẹwutu e nọ jlo dọ whẹndo etọn ni yin ayajẹnọ. (Isa. 65:14) Whẹwhinwhẹ́n susu wutu wẹ mí sọgan gọ́ na ayajẹ todin, mahopọnna dọ mí tlẹ sọgan to pipehẹ nuhahun lẹ. Di apajlẹ, mí kudeji dọ Otọ́ olọn mẹ tọn mítọn yiwanna mí sisosiso. Mí tindo oyọnẹn he pegan Ohó Jiwheyẹwhe tọn, Biblu tọn. (Jel. 15:16) Podọ mí yin apadewhe whẹndo vonọtaun de tọn, he bẹ mẹhe tindo owanyi na Jehovah, na nujinọtedo walọ dagbe tọn he yiaga etọn lẹ, podọ na ode awetọ lẹ hẹn.—Salm. 106:4, 5.

¹⁶ Mí sọgan hẹn ayajẹ mítọn go, na mí tindo todido dolido lọ dọ osọ na yọ́n. Mí yọnẹn dọ to madẹnmẹ, Jehovah na de mẹylankan lẹpo sẹ̀, podọ to Ahọluduta etọn glọ, aigba na yin hinhẹn zun Paladisi. Mí sọ tindo todido jiawu lọ dọ mẹhe kú lẹ na yin hinhẹngọwa ogbẹ̀ bo na nọpọ́ hẹ mẹyiwanna yetọn lẹ whladopo dogọ. (Joh. 5:28, 29) Lehe enẹ na yin ayajẹnu do sọ! Podọ hú popolẹpo, mí deji dọ to madẹnmẹ, mẹhe na nọgbẹ̀ to olọn mẹ podọ to aigba ji lẹpo na nọ na gbégbò po pipà po Otọ́ owanyinọ mítọn bo nasọ nọ sẹ̀n ẹn, yèdọ nuhe ewọ jẹna lẹ.