Do Owanyi Towe Na Jehovah Hia Gbọn Baptẹm Yíyí Dali

1, 2. Sọgbe hẹ Owalọ lẹ 8:27-31, 35-38, etẹwẹ whàn ojọ̀ Etiopianu lọ nado yí baptẹm?

BE A jlo na yí baptẹm bo lẹzun devi Klisti tọn de ya? Owanyi po pinpẹn-nutọn-yinyọnẹn po ko whàn mẹsusu nado basi nudide enẹ. Pọ́n lehe apajlẹ ahọluzọnwatọ de he wazọ́n na ahọsi Etiopia tọn do enẹ hia do.

² Etiopianu lọ yinuwa to afọdopolọji sọgbe hẹ nuhe e ko plọn sọn Owe-wiwe lẹ mẹ lẹ. (Hia Owalọ lẹ 8:27-31, 35-38.) Etẹwẹ whàn ẹn? E họnwun dọ ewọ yọ́n pinpẹn Ohó Jiwheyẹwhe tọn; adà owe Isaia tọn de hia wẹ e te dile e to yìyì to osọ́-kẹkẹ de mẹ. Podọ whenue Filipi dọho hẹ ẹ, dawe lọ wleawuna pinpẹn-nutọn-yinyọnẹn na nuhe Jesu ko wà na ẹn lẹ. Ṣigba, etẹwutu ahọluzọnwatọ lọ do zingbejizọnlin yì Jelusalẹm? Na e yiwanna Jehovah wutu wẹ. Naegbọn mí do dọ mọ? E ṣẹṣẹ yì basi sinsẹ̀n hlan Jehovah to Jelusalẹm bo lẹkọ wẹ. E yọnbasi dọ dawe ehe ko jo sinsẹ̀n etọn do, bo to awukọndopọ hẹ akọta dopo gee lọ he yin kinklandowiwe na Jiwheyẹwhe nugbo lọ. Owanyi na Jehovah wẹ sọ whàn ẹn nado ze afọdide nujọnu tọn devo, enẹ wẹ nado yí baptẹm bo lẹzun devi Klisti tọn de.—Mat. 28:19.

3. Etẹwẹ sọgan glọnalina mẹde nado yí baptẹm? (Pọ́n apotin lọ “Etẹwẹ to Ahun Towe Mẹ?”)

³ Owanyi na Jehovah sọgan whàn we nado yí baptẹm. Etomọṣo, owanyi sọgan sọ glọnalina we nado wàmọ. Gbọnna? Doayi apajlẹ delẹ go. A sọgan tindo owanyi he siso na hẹnnumẹ po họntọn towe mayisenọ lẹ po, bo gán nọ hanú dọ eyin emi yí baptẹm, yé na gbẹwanna emi. (Mat. 10:37) Kavi vlavo a yiwanna aṣa he a yọnẹn dọ Jiwheyẹwhe gbẹwanna lẹ, bo nọ mọdọ e vẹawu nado dealọ sọn yé mẹ. (Salm. 97:10) Kavi a sọgan ko nọ tindo mahẹ to whedudu sinsẹ̀n lalo tọn delẹ mẹ sọn ovu whenu. Podọ vlavo a yiwanna awuvivi he hùnwhẹ enẹlẹ nọ hẹnwa na we. Enẹwutu, a sọgan mọdọ e vẹawu nado jo aṣa he Jehovah gbẹwanna enẹlẹ do mlẹnmlẹn. (1 Kọl. 10:20, 21) Kanbiọ he a dona kanse wẹ, “Mẹnu kavi etẹ wẹ n’yiwanna hugan?”

MẸHE MÍ DONA YIWANNA HUGAN

4. Onú titengbe tẹwẹ na whàn we nado yinukọn jẹ baptẹm kọ̀n?

⁴ A tindo nuhọakuẹ susu he a yiwanna bosọ nọ yọ́n pinpẹn yetọn. Di apajlẹ, whẹpo a tlẹ do jẹ nuplọn hẹ Kunnudetọ Jehovah tọn lẹ ji, a sọgan ko nọ yọ́n pinpẹn Biblu tọn taun. Podọ, a sọgan ko yiwanna Jesu. Todin he a wá yọ́n Kunnudetọ Jehovah tọn lẹ, vlavo a yiwanna gbẹdido hẹ yé. Amọ́, e ma yin owanyi he a tindo na onú dagbe enẹlẹ wẹ na zọ́n dandan bọ a na jlo nado klan dewe do wiwe na Jehovah bo yí baptẹm gba. Onú titengbe he na whàn we nado yinukọn jẹ baptẹm kọ̀n wẹ owanyi he a do na Jehovah Jiwheyẹwhe lọsu. Eyin a yiwanna Jehovah hú nudevo depope, a ma na dike nude kavi mẹdepope ni glọnalina we nado sẹ̀n ewọ. A sọgan pọ́n owanyi na Jehovah hlan taidi họngbo de he nù a na gbọn do jẹ baptẹm kọ̀n, podọ taidi dòtin de he go a na hẹn nado gbọṣi aliho Jiwheyẹwhe tọn ji.

5. Kanbiọ tẹlẹ wẹ mí na gbadopọnna?

⁵ Jesu dọ dọ mí dona yí ahun, alindọn, ayiha po huhlọn mítọn lẹpo po do yiwanna Jehovah. (Malku 12:30) Nawẹ a sọgan plọn nado nọ yiwanna Jehovah bosọ nọ tindo sisi na ẹn jẹ obá he siso mọnkọ mẹ gbọn? Nulinlẹnpọn do owanyi he Jehovah tindo na mí ji nọ whàn mí nado yiwanna ewọ lọsu. (1 Joh. 4:19) Eyin a wleawuna owanyi na mẹhe a dona yiwanna hugan lọ, onú devo tẹwẹ enẹ na whàn we nado wà, podọ numọtolanmẹ tẹwẹ a na tindo to jọwamọ-liho?b

6. Sọgbe hẹ Lomunu lẹ 1:20, etẹwẹ yin aliho dopo he mẹ a gán plọnnu gando Jehovah go te?

⁶ Plọnnu gando Jehovah go sọn nudida etọn lẹ dè. (Hia Lomunu lẹ 1:20; Osọ. 4:11) Lẹnayihamẹpọn do lehe atin po kanlin he Jehovah dá lẹ po nọ do nuyọnẹn etọn hia do ji. Plọnnu vude do aliho jiawu he mẹ agbasa towe yin didá te ji. (Salm. 139:14) Sọ lẹnnupọndo huhlọn he Jehovah na owhè ji, bo doayi e go dọ owhè yin dopo poun to sunwhlẹvu liva susu he tin lẹ mẹ.c (Isa. 40:26) Dile a to mọwà, sisi he a tindo na Jehovah na siso dogọ. Ṣigba, nado yọnẹn dọ Jehovah tindo nuyọnẹn po huhlọn po yin apadewhe dodonu he ji haṣinṣan towe hẹ ẹ sinai do tọn de poun. Nado wleawuna owanyi sisosiso na Jehovah, a dona gbẹ́ yọ́n nususu gando ewọ go.

7. Nado yiwanna Jehovah sisosiso, nujikudo tẹwẹ a dona tindo?

⁷ A dona kudeji dọ Jehovah nọ hò towe pọ́n. Be e nọ vẹawuna we nado yise dọ Didatọ olọn po aigba po tọn yọnẹn dọ a tin bosọ nọ hò towe pọ́n wẹ ya? Eyin mọ wẹ, flindọ Jehovah “ma dẹn do dopodopo mítọn.” (Owalọ 17:26-28) E “nọ dindona ahun lẹpo,” podọ gbọn hogbe Davidi tọn lẹ hlan Sọlomọni gblamẹ, ewọ dopà na we dọ ‘eyin hiẹ dín emi, emi na dike bọ hiẹ na mọ emi.’ (1 Otàn. 28:9) Na nugbo tọn, a to Biblu plọn todin, na ‘Jehovah ko dọ̀n we dogo’ kẹdẹdile e dọ do wutu. (Jel. 31:3) Lehe a to pinpẹn nuhe Jehovah ko wà na we lẹpo tọn yọnẹn sọ, mọ wẹ owanyi towe na ewọ na siso dogọ do niyẹn.

8. Nawẹ a sọgan dohia dọ a yọ́n pinpẹn owanyi Jehovah tọn gbọn?

⁸ Aliho dopo nado dohia dọ a yọ́n pinpẹn owanyi Jehovah tọn wẹ nado nọ dọhona ẹn to odẹ̀ mẹ. Owanyi towe na Jiwheyẹwhe na jideji eyin a nọ dọ ahunmẹdunamẹnu towe lẹ na ẹn bosọ nọ dopẹna ẹn na nuhe e nọ wà na we lẹpo. Podọ, dile a to mimọ aliho he mẹ e nọ na gblọndo odẹ̀ towe lẹ tọn te, haṣinṣan he to hiẹ po Jehovah po ṣẹnṣẹn na yin hinhẹn lodo. (Salm. 116:1) A na kudeji dọ e nọ mọnukunnujẹ ninọmẹ towe mẹ. Ṣigba, nado vẹ́ po Jehovah po, a dona nọ mọnukunnujẹ aliho nulẹnpọn tọn etọn lẹ mẹ. Podọ, a sọ dona yọ́n nuhe e nọ donukun sọn asi we lẹ. Aliho dopo gee he mẹ a na yọ́n enẹ te wẹ gbọn Ohó etọn Biblu pinplọn dali.

9. Nawẹ a sọgan dohia dọ a nọ yọ́n pinpẹn Biblu tọn gbọn?

⁹ Plọn nado nọ yọ́n pinpẹn Ohó Jiwheyẹwhe tọn, yèdọ Biblu. Biblu kẹdẹ mẹ wẹ a gán mọ nugbo lọ te gando Jehovah po lẹndai etọn po go. A sọgan dohia dọ a yọ́n pinpẹn Biblu tọn eyin a nọ hia ẹ egbesọegbesọ, nọ wleawuna oplọn towe whẹpo mẹplọntọ towe nido wá, bosọ nọ yí nuhe plọn a te do yizan mẹ. (Salm. 119:97, 99; Joh. 17:17) Be a tindo tito Biblu hihia tọn mẹdetiti tọn de ya? Be a nọ hodo tito enẹ nado hẹn ẹn diun dọ a nọ hia Biblu to azán lẹpo ji ya?

10. Etẹwẹ yin dopo to adà vonọtaun Biblu tọn lẹ mẹ?

¹⁰ Dopo to adà vonọtaun he Biblu bẹhẹn lẹ mẹ wẹ kandai mẹhe yí nukun do mọ Jesu lẹ tọn. Biblu wẹ yin owe dopo gee he sọgbe lọ, he basi zẹẹmẹ nuhe Jesu ko wà do ota towe mẹ lẹ tọn. Dile a to nuplọn gando nuhe Jesu dọ bosọ wà lẹ go, e yọnbasi dọ enẹ ni whàn we nado jihọntọn hẹ ẹ.

11. Nawẹ a sọgan plọn nado nọ yiwanna Jehovah gbọn?

¹¹ Plọn nado yiwanna Jesu, podọ owanyi towe na Jehovah na sinyẹn deji. Etẹwutu? Na Jesu nọ do jẹhẹnu Otọ́ etọn tọn lẹ hia to aliho pipé mẹ. (Joh. 14:9) Enẹwutu, lehe a to nususu plọn gando Jesu go sọ, mọ wẹ a na yọ́n Jehovah bosọ tindo pinpẹn-nutọn-yinyọnẹn na ewọ dogọ do niyẹn. Lẹnnupọndo awuvẹmẹ he Jesu dohia mẹhe mẹdevo lẹ nọ yí nukunpẹvi do pọ́n lẹ ji, yèdọ wamọnọ, awutunọ po agbátọnọ lẹ po. Sọ lẹnnupọndo ayinamẹ yọ́n-na-yizan he ewọ nọ na we lẹ, gọna lehe gbẹzan towe pọnte do ji to whenue a setonuna ẹn.—Mat. 5:1-11; 7:24-27.

12. Whenue a plọnnu gando Jesu go, etẹwẹ enẹ sọgan whàn we nado wà?

¹² E yọnbasi dọ owanyi towe na Jesu ni sinyẹn dogọ, dile a to nulẹnpọn sisosiso do avọ́sinsan he e basi na ylando mítọn lẹ nido sọgan yin jijona ji. (Mat. 20:28) Whenue a wá mọnukunnujẹemẹ dọ Jesu desọn ojlo mẹ nado kú do ota towe mẹ, enẹ sọgan whàn we nado lẹnvọjọ bo biọ jona Jehovah tọn. (Owalọ 3:19, 20; 1 Joh. 1:9) Podọ dile a to wanyina Jesu po Jehovah po, to jọwamọ-liho a na dọnsẹpọ mẹdevo he nọ yiwanna yé lẹ ga.

13. Etẹwẹ Jehovah na na we?

¹³ Plọn nado yiwanna whẹndo Jehovah tọn. Hẹnnumẹ towe mayisenọ lẹ po họntọn towe dai tọn lẹ po sọgan nọma mọnukunnujẹ nuhewutu a do jlo na klan dewe do wiwe na Jehovah mẹ. Yé tlẹ sọgan diọnukunsọ we. Ṣigba, Jehovah na gọalọna we gbọn whẹndo gbigbọmẹ tọn de nina we dali. Eyin a gbọṣi whẹndo gbigbọmẹ tọn enẹ mẹ, a na duvivi owanyi po godonọnamẹ he sin hudo a do po tọn. (Malku 10:29, 30; Heb. 10:24, 25) To nukọn mẹ, hẹnnumẹ towe lẹ sọgan wá hopódona we nado sẹ̀n Jehovah bo nọgbẹ̀ sọgbe hẹ nujinọtedo etọn lẹ.—1 Pita 2:12.

14. Sọgbe hẹ 1 Johanu 5:3, etẹ go wẹ a doayi gando nujinọtedo Jehovah tọn lẹ go?

¹⁴ Plọn nado nọ yọ́n pinpẹn nujinọtedo Jehovah tọn lẹ tọn bo nọ yí yé do yizan mẹ. Whẹpo a do wá yọ́n Jehovah, a sọgan ko tindo nujinọtedo towe titi lẹ, amọ́ todin, a mọdọ nujinọtedo Jehovah tọn lẹ wẹ pọnte. (Salm. 1:1-3; hia 1 Johanu 5:3.) Lẹnnupọndo ayinamẹ he Biblu na asu lẹ, asi lẹ, mẹjitọ lẹ po ovi lẹ po ji. (Efe. 5:22–6:4) Dile a to ayinamẹ enẹ yí do yizan mẹ, be a doayi e go dọ gbẹzan whẹndo towe tọn pọnte ya? Dile a to tonusena anademẹ Jehovah tọn lẹ nado nọ yí nuyọnẹn do de họntọn towe lẹ, be gbẹtọ-yinyin towe pọnte ya? Be a do ayajẹ dogọ ya? (Howh. 13:20; 1 Kọl. 15:33) E yọnbasi dọ gblọndo towe na kanbiọ enẹlẹ ni yin mọwẹ.

15. Etẹwẹ a sọgan wà, eyin a do hudo alọgọ tọn nado nọ yí nunọwhinnusẹ́n Biblu tọn lẹ do yizan mẹ?

¹⁵ To nukọn mẹ, a sọgan mọdọ e vẹawu nado yọ́n lehe a na nọ yí nunọwhinnusẹ́n Biblu tọn he a to pinplọn lẹ do yizan mẹ do. Enẹwutu wẹ Jehovah to titobasinanu etọn yizan nado wleawuna owe sinai do Biblu ji lẹ, he sọgan gọalọna we nado nọ yọ́n dagbe dovo na oylan. (Heb. 5:13, 14) Eyin a nọ hia owe ehelẹ bosọ nọ plọn yé, a na mọ lehe yé yọ́n-na-yizan bosọ sọgbe do, podọ e yọnbasi dọ a ni dọnsẹpọ titobasinanu Jehovah tọn dogọ.

16. Nawẹ Jehovah basi titona omẹ etọn lẹ gbọn?

¹⁶ Plọn nado yiwanna titobasinanu Jehovah tọn bosọ nọ nọgodona ẹn. Jehovah ko basi titona omẹ etọn lẹ do agun lẹ mẹ; podọ Visunnu etọn Jesu wẹ ota yemẹpo tọn. (Efe. 1:22; 5:23) Jesu ko de pipli pẹvi de he bẹ sunnu yiamisisadode lẹ hẹn, he na deanana nulẹ bo basi titona azọ́n he ewọ jlo dọ mí ni wà to egbehe lọ. Jesu dohia dọ pipli sunnu ehelẹ tọn wẹ “afanumẹ nugbonọ podọ nuyọnẹntọ lọ,” podọ yé nọ ylọ azọngban yetọn nado penukundo mí go bo basi hihọ́na mí to gbigbọ-liho dọ nujọnu. (Mat. 24:45-47) Dopo to aliho he mẹ afanumẹ nugbonọ lọ nọ gọalọ nado penukundo gowe te wẹ, nado hẹn ẹn diun dọ mẹho he pegan lẹ yin dide nado nọ deanana we. (Isa. 32:1, 2; Heb. 13:17; 1 Pita 5:2, 3) Mẹho lẹ nọ wleawufo nado yí yede zan do ota towe mẹ, nado miọnhomẹna we, podọ nado gọalọna we na a nido dọnsẹpọ Jehovah dogọ hugan gbede pọ́n. Ṣigba, dopo to onú titengbe hugan he yé sọgan wà na we lẹ mẹ wẹ, nado gọalọna we na a nido nọ plọnnu mẹdevo lẹ gando Jehovah go.—Efe. 4:11-13.

17. Sọgbe hẹ Lomunu lẹ 10:10, 13, 14, naegbọn mí nọ dọhona mẹdevo lẹ gando Jehovah go?

¹⁷ Nọ gọalọna mẹdevo lẹ nado wá yiwanna Jehovah. Jesu dọna hodotọ etọn lẹ nado nọ plọnnu mẹdevo lẹ gando Jehovah go. (Mat. 28:19, 20) E yọnbasi dọ a ni nọ setonuna gbedide enẹ, na a mọdọ emi to dandannu glọ nado wàmọ wutu. Amọ́, dile owanyi towe na Jehovah to jijideji, a na wá tindo numọtolanmẹ dopolọ taidi apọsteli Pita po Johanu po he dọmọ: “Mí ma sọgan nọma dọ nuhe mí ko mọ bosọ sè lẹ.” (Owalọ 4:20) Alọgigọna mẹde nado wá yiwanna Jehovah nọ hẹn ayajẹ daho wá hugan nudevo depope. Yí nukun homẹ tọn do pọ́n lehe ayajẹ Filipi wẹndagbe-jlatọ lọ tọn na ko sù sọ, to whenue e gọalọna Etiopianu lọ nado plọn nugbo he tin to Owe-wiwe lẹ mẹ bosọ yí baptẹm! Eyin a hodo apajlẹ Filipi tọn bo nọ setonuna gbedide Jesu tọn lọ nado dọyẹwheho, a na dohia dọ a jlo na yin dopo to Kunnudetọ Jehovah tọn lẹ mẹ. (Hia Lomunu lẹ 10:10, 13, 14.) To whenẹnu, e yọnbasi dọ taidi Etiopianu lọ, hiẹ lọsu ni kanse dọ: “Etẹwẹ glọnalina mi nado yin bibaptizi?”—Owalọ 8:36.

18. Etẹwẹ mí na gbadopọnna to hosọ he bọdego mẹ?

¹⁸ Afọdide titengbe hugan he a na ze to gbẹzan towe mẹ wẹ nado basi nudide bo yí baptẹm. A dona yí sọwhiwhe do lẹnnupọndo nuhe ehe bẹhẹn ji, na afọdide nujọnu tọn de wẹ. Etẹwẹ a dona yọnẹn gando baptẹm go? Etẹwẹ e biọ dọ a ni wà jẹnukọnna baptẹm, podọ to baptẹm godo? Mí na mọ gblọndo kanbiọ enẹlẹ tọn to hosọ he bọdego mẹ.