“Mì dọnsẹpọ Jiwheyẹwhe, ewọ nasọ dọnsẹpọ mì.”—Jakọbu 4:8
Be Jiwheyẹwhe Nọ Sè Odẹ̀ Mítọn lẹ Ya?
Be a nọ lẹn to whedelẹnu dọ Jiwheyẹwhe ma nọ sè odẹ̀ towe lẹ wẹ ya? E ma yin hiẹ ṣo wẹ nọ lẹnmọ. To adángbòmẹ lẹ whenu, gbẹtọ susu lẹ wẹ nọ hodẹ̀ hlan Jiwheyẹwhe dọ ni gọalọna emi, ganṣo nude ma nọ diọ. Be Jiwheyẹwhe nọ dovọ́na mí whenue mí to dẹ̀ho wẹ a? Paali! Biblu dohia dọ Jiwheyẹwhe nọ sè odẹ̀ mítọn lẹ eyin mí hodẹ̀ dile ewọ jlo do. Mí ni pọ́n nue wefọ Biblu tọn delẹ dọ.
E NỌ SÈ ODẸ̀.
“Hiẹ Sisètọ odẹ̀ tọn E, dè we wẹ gbẹtọ wunmẹ lẹpo na nọ wá.”—Salmu lẹ 65:2.
Mẹdelẹ nọ hodẹ̀ na e nọ zọ́n bọ yé nọ vò sọn ayiha mẹ, eyin e tlẹ di na yé dọ mẹde ma to sisè. Amọ́, e ma yin nado de ayiha sọn nuhahun mítọn lẹ ji kẹdẹ wutu wẹ mí do nọ hodẹ̀. Biblu dohia dọ ‘Jehovaha ma dẹn do mẹhe nọ dawhá ylọ ẹ lẹpo, yèdọ mẹhe nọ dawhá ylọ ẹ to nugbo mẹ lẹpo. E nọ sè awhágbe yetọn na alọgọ bo nọ whlẹn yé.’—Salmu lẹ 145:18, 19.
Enẹwutu, deji dọ Jehovah Jiwheyẹwhe nọ sè odẹ̀ mẹhe nọ sẹ̀n ẹn lẹ tọn. Na e yiwanna omẹ etọn lẹ wutu, e dọmọ: “Mì na ylọ mi bo na wá bo na hodẹ̀ hlan mi, yẹn nasọ dotoaina mì.”—Jelemia 29:12.
E JLO DỌ A NI NỌ HODẸ̀ HLAN EMI.
“Mì nọ sinyẹnlin to odẹ̀ mẹ.”—Lomunu lẹ 12:12.
Biblu na mí ayinamẹ dọ mí ni “nọ hodẹ̀ to whepoponu.” E sọ dọ dọ ‘to ninọmẹ lẹpo mẹ, mí ni nọ gbọṣi odẹ̀ mẹ.’ E dohia dọ Jehovah Jiwheyẹwhe jlo dọ mí nọ hodẹ̀ hlan emi.—Matiu 26:41; Efesunu lẹ 6:18.
Etẹwutu? Mẹjitọ lẹpo wẹ e nọ vivi na eyin vi yetọn pẹvi dọna yé dọ, “Papa, mì jaale bo bayi na mi.” Otọ́ lọ gán ko yọ́n nue dín vi etọn te kavi nue to wiwà ẹ to gàn lọ mẹ, amọ́ eyin vi lọ kẹnù bo biọ alọgọ, otọ́ lọ nọ mọdọ vi emitọn dejido emi go bọ emi vẹ́ na ẹn. Nudopolọ wẹ na Jehovah Jiwheyẹwhe lọsu. To whenue mí hodẹ̀ hlan ẹn, mí nọ dohia dọ mí dejido e go bọ e vẹna mí.—Howhinwhẹn lẹ 15:8; Jakọbu 4:8.
E NỌ HÒ TOWE PỌ́N.
“Mì to magbọjẹ mìtọn lẹpo bẹ dlan ewọ ji, na e to mìtọn hòpọn wutu.”—1 Pita 5:7.
Jiwheyẹwhe jlo dọ mí ni nọ hodẹ̀ hlan emi, na e yiwanna mí bo nọ hò mítọn pọ́n. E yọ́n nue to ahun ji na mí po adán he to gbigbò mí lẹpo po bo jlo na gọalọna mí.
To whenue Ahọlu Davidi togbẹ̀, whlasusu wẹ e hodẹ̀ hlan Jehovah Jiwheyẹwhe bo dọ homẹ na ẹn. (Salmu lẹ 23:1-6) Be Jiwheyẹwhe siọ Davidi ya? Na Jiwheyẹwhe yiwanna ẹn wutu, e sè odẹ̀ voovo he e hò hlan ẹn lẹ. (Owalọ lẹ 13:22) To whenue mílọsu hodẹ̀, Jiwheyẹwhe nọ dotoaina mí, na e nọ hò mítọn pọ́n wutu.
“YẸN YIWANNA JEHOVAH, NA EWỌ NỌ SÈ OGBÈ ṢIE”
Dopo to mẹhe kàn owe Salmu tọn lẹ mẹ wẹ zan hogbe enẹlẹ. E yọnẹn dọ Jiwheyẹwhe nọ sè odẹ̀ emitọn lẹ, bọ enẹ wà dagbe na ẹn taun. Na e vẹ́ po Jiwheyẹwhe po wutu, e do adọgbigbo nado jugbọn adán he gbò e to gbẹ̀mẹ lẹ mẹ.—Salmu lẹ 116:1-9.
Eyin mí yọnẹn to ahun mítọn mẹ dọ Jiwheyẹwhe nọ sè odẹ̀ mítọn lẹ, dẹ̀hiho ma na pé agbọ́ mí. Nue Pedro he nọ nọ̀ Espagne wà niyẹn. Vi etọn do whe 19 bo bayi asidan bo kú. Ninọmẹ lọ dán Pedro taun bọ e hodẹ̀ hlan Jiwheyẹwhe whlasusu bo dọ homẹ na ẹn. E nọ biọ Jiwheyẹwhe dọ ni gọalọna emi bo miọnhomẹna emi. Nawẹ nulẹ yì do? Pedro dọ dọ: “Jehovah siọ mi bọ yisenọ hatọ mítọn lẹ nọgodona yẹn po asi ṣie po bosọ miọnhomẹna mí.”
Eyin mí hodẹ̀, Jiwheyẹwhe gán gbọn họntọn mítọn lẹ ji bo miọnhomẹna mí
Nugbo wẹ dọ odẹ̀ ma gọ̀ visunnu Pedro tọn wá gbẹ̀. Amọ́, e gọalọna ewọ po whẹndo etọn po taun. Asi etọn he nọ yin María Carmen bayi zẹẹmẹ dọ: “Odẹ̀ he n’hò lẹ gọalọna mi to adángbòmẹ lọ whenu. N’nọ mọdọ Jehovah Jiwheyẹwhe yọ́n nue to gbigbò mi, na eyin n’hodẹ̀, ayiha ṣie nọ jai bọ n’nọ vò.”
Nue Biblu dọ po otàn mẹsusu lẹ tọn po dohia dọ Jiwheyẹwhe nọ sè dẹ̀. Amọ́, e ma yin dẹ̀ lẹpo wẹ e nọ sè. Naegbọn Jiwheyẹwhe ma nọ sè odẹ̀ delẹ?
a Jehovah wẹ yinkọ Jiwheyẹwhe tọn.—Salmu lẹ 83:18.