Naegbọn Jiwheyẹwhe Ma Nọ Sè Odẹ̀ Delẹ?
Otọ́ mítọn Jehovah Jiwheyẹwhe sin homẹ nọ hùn taun to whenue mí hodẹ̀ sọn ahun mẹ. Amọ́, nudelẹ gán zọ́n bọ e ma na sè odẹ̀ mítọn lẹ. Etẹwẹ yin nulọ lẹ, podọ etẹwẹ mí dona nọ hẹn do ayiha mẹ to whenue mí jlo na hodẹ̀? Pọ́n ayinamẹ Biblu tọn ehelẹ.
‘Eyin mì to dẹ̀ho, mì dọ dọvọdọ nudopolọ lẹ tọn blo.’—Matiu 6:7.
Jehovah ma nọ yiwanna dọ yè ni hodẹ̀ he yè ko plọn do tamẹ lẹ kavi dọ yè ni hia yé sọn wema mẹ gba. Amọ́, e nọ jlo dọ mí ni dọhona emi sọn ahun mẹ. Be e ma na vẹna we eyin a do họntọn de bọ eyin e jlo na dọhona we, hogbe dopolọ lẹ janwẹ e nọ zan to whelẹponu ya? Họntọn-họntọn lẹ nọ voawu bo nọ dọ homẹ na yede. Mí nọ dohia Otọ́ mítọn he to olọn mẹ dọ mí yiwanna ẹn eyin mí nọ voawu do nọ dọhona ẹn.
“To whenuena mì biọ, mì ma mọyi, na mì nọ biọ na lẹndai he ma sọgbe wutu.”—Jakọbu 4:3.
Mí ma gán biọ Jiwheyẹwhe nue mí yọnẹn gán-án dọ e gbẹwanna bo donukun dọ e na sè dẹ̀ mítọn. Di apajlẹ, mí ni dọ dọ mẹde hò akọ̀ bo biọ Jehovah dọ ni bayi na emi nido dù. Jiwheyẹwhe gbẹwanna nukunkẹn bo ma jlo dọ mí ni nọ lẹndọ mí gán do tadagbe. (Isaia 65:11; Luku 12:15) Enẹwutu, Jehovah ma gán sè odẹ̀ enẹ. Whẹpo ewọ na sè odẹ̀ mítọn, nuhe biọ mí te lẹ dona sọgbe hẹ gbedide etọn he to Biblu mẹ lẹ.
“Mẹhe nọ gbẹ́ nado setonuna osẹ́n—osùnú de wẹ odẹ̀ etọn lọsu nọ yin.”—Howhinwhẹn lẹ 28:9.
To hohowhenu, Jiwheyẹwhe ma nọ sè odẹ̀ mẹhe nọ vẹtolina ẹn lẹ tọn. (Isaia 1:15, 16) Ewọ ma ko diọ. (Malaki 3:6) Eyin mí jlo dọ ni siọ mí, mí dona dogán bo nọ yìn osẹ́n etọn lẹ. Eyin mí ka o ṣí nudelẹ wà wayi lo? Be enẹ dohia dọ Jehovah ma gán sọ sè odẹ̀ mítọn lẹ gbede ba wẹ ya? E ma yinmọ. Otọ́ owanyinọ mítọn na jona mí eyin mí diọ jijọ bo dogán nado wà nue sọgbe.—Owalọ lẹ 3:19.