Dagbe po Oylan po: Mí Gán Dejido Nuhe Biblu Dọ Go

ANADEMẸ HE MÍ DO HUDO ETỌN LẸ

To Biblu mẹ, Jehovaha Jiwheyẹwhe basi zẹẹmẹ dọ ojlo emitọn wẹ yindọ gbẹtọvi lẹ ni nọ lẹhlan emi nado mọ anademẹ, kakati nado nọ deanana yede kavi wà nulẹ na yede. (Jelemia 10:23) Enẹwutu wẹ e do na anademẹ lẹ gando walọyizan mítọn go to Biblu mẹ. E yiwanna gbẹtọvi lẹ, podọ e ma jlo dọ mí ni basi nudide he na wá gbleawuna mí bosọ hẹn gbẹninọ vẹawuna mí lẹ. (Deutelonomi 5:29; 1 Johanu 4:8) Humọ, taidi Mẹdatọ mítọn, e do nuyọnẹn po oyọnẹn susu po nado na mí anademẹ dagbe hugan lẹ to walọyizan-liho. (Salmu lẹ 100:3; 104:24) Etomọṣo, Jiwheyẹwhe ma nọ hẹn gbẹtọ lẹ gánnugánnu nado nọgbẹ̀ sọgbe hẹ nujinọtedo etọn lẹ.

Jehovah na Adam po Evi po, enẹ wẹ sunnu tintan lọ po yọnnu tintan lọ po nuhe sin hudo yé do nado do ayajẹ nujọnu tọn lẹpo. (Jenẹsisi 1:28, 29; 2:8, 15) E sọ na yé anademẹ he ma vẹawu lẹ he e jlo dọ yé ni setonuna. Amọ́, e jlo dọ yelọsu ni basi dide eyin vlavo yé na setonuna anademẹ enẹlẹ kavi lala. (Jenẹsisi 2:9, 16, 17) E blawu dọ Adam po Evi po basi dide nado wà nuhe jlo yé, bọ e ma yin nuhe Jiwheyẹwhe jlo. (Jenẹsisi 3:6) Etẹ mẹ wẹ e dekọtọn do na yé? Be ninọmẹ gbẹtọvi lẹ tọn pọnte dogọ, na yé basi dide nuhe yin dagbe po oylan po tọn na yede wẹ ya? Paali. Whenuho ko dohia dọ eyin mẹde dovọ́na nujinọtedo Jiwheyẹwhe tọn lẹ, mẹlọ ma gán do jijọho po ayajẹ he na dẹn-to-aimẹ po.—Yẹwhehodọtọ 8:9.

Mahopọnna fie mí nọ nọ̀ kavi whẹndo he mẹ mí wá sọn, Biblu na mí anademẹ he mí do hudo etọn nado basi nudide nuyọnẹn tọn lẹ to walọyizan-liho. (2 Timoti 3:16, 17; pọ́n apotin lọ “Owe de Na Gbẹtọ Lẹpo.”) Mì gbọ mí ni gbadopọnna lehe Biblu nọ wà ehe gbọn.

Plọn nususu dogọ gando nuhewutu e sọgbe dọ Biblu ni yin yiylọdọ “ohó Jiwheyẹwhe tọn” go. —1 Tẹsalonikanu lẹ 2:13. Pọ́n video lọ Mẹnu Wẹ Yin Dowatọ Biblu Tọn? to jw.org ji.

LEHE BIBLU NỌ DE ANADEMẸ JIWHEYẸWHE TỌN LẸ HIA DO

Biblu yin kandai dejidego de gando lehe Jehovah yinuwa hẹ gbẹtọvi lẹ do go. Nuhe to e mẹ lẹ nọ gọalọna mí nado yọ́n nuhe Jiwheyẹwhe nọ pọnhlan taidi nudagbe kavi nuylankan, nuhe nọ wà dagbe na mí kavi nọ gbleawuna mí lẹ. (Salmu lẹ 19:7, 11) Mí nọ plọn nunọwhinnusẹ́n he ma nọ dohó gbede lẹ, bọ yé nọ gọalọna mí nado basi nudide nuyọnẹn tọn lẹ to walọyizan-liho to gbẹzan egbesọegbesọ tọn mítọn mẹ.

Di apajlẹ, lẹnnupọndo ayinamẹ he to Howhinwhẹn lẹ 13:20 mẹ ji he dọmọ: “Mẹhe nọ zinzọnlin hẹ nuyọnẹntọ na yọnnuin, ṣigba, mẹhe nọ dogbẹ́ hẹ nulunọ ma na tindo kọdetọn dagbe.” Nugbo enẹ yọ́n-na-yizan to egbé dile e yindo to hohowhenu. Nunọwhinnusẹ́n he họakuẹ bosọ yọ́n-na-yizan mọnkọ lẹ wẹ gọ́ Biblu mẹ.—Pọ́n apotin lọ “Nuyọnẹn He to Biblu Mẹ Ma Nọ Dohó Gbede.”

Amọ́ a gán kanse dewe dọ, ‘Nawẹ n’gán kudeji gbọn dọ anademẹ he Biblu na gando walọyizan go lẹ gbẹ́ nọ wazọ́n to egbé?’ Hosọ he bọdego na apajlẹ jọnun delẹ he do enẹ hia.