Yí Baptẹm Madọngbàn

1. Etẹwẹ yin whẹwhinwhẹ́n dagbe delẹ nado yí baptẹm?

BE A yiwanna Jehovah Jiwheyẹwhe, yèdọ mẹlọ he na we nudagbe lẹpo, etlẹ yin ogbẹ̀ lọsu ya? Be a jlo na do owanyi towe hia ẹ ya? Aliho dagbe hugan lọ nado wàmọ wẹ nado klan dewe do wiwe hlan ẹn, podọ nado do klandowiwe towe hia gbọn baptẹm yíyí to osin mẹ dali. Afọdide ehelẹ na zọ́n bọ a na biọ whẹndo Jehovah tọn mẹ. Taidi kọdetọn de, Otọ́ towe podọ Họntọn towe na nọ deanana we bo na nọ penukundo gowe, na a ko lẹzun etọn wutu. (Salm. 73:24; Isa. 43:1, 2) Klandowiwe po baptẹm po nasọ na we todido lọ nado duvivi ogbẹ̀ tọn kakadoi.—1 Pita 3:21.

2. Etẹwẹ mí na gbadopọnna to hosọ ehe mẹ?

² Be nude to aliglọnna we nado yí baptẹm wẹ ya? Eyin mọ wẹ, e ma yin hiẹ ji wẹ e bẹsọn. Jẹnukọnna hiẹ, gbẹtọ livi susu lẹ ko diọ walọyizan yetọn lẹ gọna aliho nulẹnpọn tọn yetọn nado sọgan pegan na baptẹm. To alọnu din, yé yí ayajẹ po zohunhun po do to Jehovah sẹ̀n. Etẹwẹ a gán plọn sọn mẹhe yí baptẹm to owhe kanweko tintan whenu delẹ dè? Gbọ mí ni gbadopọnna aliglọnnamẹnu he yé pehẹ lẹ bo pọ́n nuhe mí gán plọn sọn apajlẹ yetọn mẹ.

SAMALIANU LẸ YÍ BAPTẸM

3. Etẹwẹ yin delẹ to diọdo he Samalianu lẹ dona basi whẹpo do yí baptẹm lẹ mẹ?

³ To azán Jesu tọn gbè, Samalianu lẹ yin apadewhe sinsẹ̀n klandovo de tọn, ehe to lẹdo Ṣekẹmi po Samalia po tọn lẹ mẹ, yèdọ to agewaji Jude tọn. Whẹpo Samalianu lẹ nido yí baptẹm, yé dona tindo oyọnẹn Ohó Jiwheyẹwhe tọn to gigọ́ mẹ. Na Samalianu lẹ, owe atọ́n tintan Biblu tọn lẹ kẹdẹ wẹ yin gbigbọdo sọn Jiwheyẹwhe dè—enẹ wẹ Jenẹsisi jẹ Deutelonomi—podọ vlavo owe Jọṣua tọn. Amọ́ na nugbo tọn, Samalianu lẹ nọ donukun dọ Mẹsia lọ na wá, sọgbe hẹ opagbe Jiwheyẹwhe tọn he tin to Deutelonomi 18:18, 19 mẹ. (Joh. 4:25) Nado sọgan yí baptẹm, yé dona kẹalọyi Jesu taidi Mẹsia dopagbe lọ. Nuhe “susu Samalianu lẹ tọn” wà pẹẹ niyẹn. (Joh. 4:39) E gán ko sọ biọ dọ mẹdevo lẹ ni duto nuvẹun sinsinyẹn he tin to Samalianu lẹ po Ju lẹ po ṣẹnṣẹn ji.—Luku 9:52-54.

4. Sọgbe hẹ Owalọ lẹ 8:5, 6, 14, nawẹ Samalianu lẹ yinuwa gando yẹwhehodidọ Filipi tọn go gbọn?

⁴ Etẹwẹ gọalọna Samalianu lẹ nado yí baptẹm? To whenue Filipi wẹndagbe-jlatọ lọ ‘dọyẹwheho Klisti tọn na yé,’ Samalianu delẹ “kẹalọyi ohó Jiwheyẹwhe tọn.” (Hia Owalọ lẹ 8:5, 6, 14.) Yé ma gbẹ́ ohó Filipi tọn dai na e yin Ju de wutu. Vlavo yé flin wefọ delẹ sọn owe Pẹntateki tọn lẹ mẹ he dohia dọ Jiwheyẹwhe ma nọ homẹnukuntapọn. (Deut. 10:17-19) Depope he whẹho lọ yin, yé na “ayidonugo nuhe dọ Filipi te” gando Klisti go, podọ yé kẹalọyi kunnudenu he họnwun lọ dọ Filipi tindo godonọnamẹ Jiwheyẹwhe tọn. E sọ to ohia susu lẹ basi, ehe bẹ azọ̀n lẹ hinhẹn gbọ po aovi lẹ yinyan jẹgbonu po hẹn.—Owalọ 8:7.

5. Etẹlẹ wẹ a gán plọn sọn Samalianu lẹ dè?

⁵ Samalianu enẹlẹ gán ko na dotẹnmẹ nuvẹun kavi oyọnẹn matindo yetọn nado glọnalina yé nado yinukọn. Amọ́, yé ma dike enẹ jọ. Samalianu lọ lẹ ma dọngbàn nado yí baptẹm to whenue yé ko kudeji dọ nugbo lọ wẹ Filipi plọn yé godo. Kandai Biblu tọn lọ dọmọ: “To whenue yé yí Filipi he to wẹndagbe Ahọluduta Jiwheyẹwhe tọn po oyín Jesu Klisti tọn po lá na yé lọ sè, sunnu lẹ po yọnnu lẹ po jẹ yinyin bibaptizi ji.” (Owalọ 8:12) Be a kudeji dọ nugbo wẹ Ohó Jiwheyẹwhe tọn podọ dọ Kunnudetọ Jehovah tọn lẹ nọ duto nuvẹun ji bosọ nọ dovivẹnu nado do owanyi nugbo, yèdọ jẹhẹnu he nọ dohiagona Klistiani nugbo lẹ hia ode awetọ ya? (Joh. 13:35) Eyin mọ wẹ, ze afọdide nujikudo tọn lọ bo deji dọ Jehovah na dona we.

6. Nawẹ a gán mọaleyi sọn apajlẹ Ruben tọn mẹ gbọn?

⁶ Ruben, he wá sọn Allemagne whẹ́n to whẹndo Kunnudetọ tọn de mẹ. Amọ́ taidi jọja de, e tindo ayihaawe gando tintin Jehovah tọn go. Nawẹ e duto ayihaawe etọn ji gbọn? Na e kẹalọyi dọ emi do hudo oyọnẹn tọn wutu, e basi dide nado yí nude wà. E dọmọ: “To oplọn mẹdetiti tọn ṣie whenu, n’dona dín pọngbọ na ayihaawe ṣie. N’dona plọnnu do nuplọnmẹ nulẹ tin yededenu tọn ji whlasusu.” E hia owe lọ Y a-t-il un Créateur qui se soucie de vous? Owe ehe yinuwado Ruben ji taun. E dọna ede dọ: ‘Etẹ nkọ! Jehovah yin omẹ nujọnu tọn de.’ Podọ to whenue Ruben yì dla tatọ́-tẹnnọ pọ́n, e yọ́n pinpẹn azọ́njiawu pipli mẹmẹsunnu tọn mítọn he topọ lẹdo aihọn pé tọn. To whenue Ruben lẹkọyi Allemagne, e yí baptẹm to whenue e do owhe 17. Eyin a nọ do ayihaawe gando nuhe a plọn go, dín pọngbọ na ayihaawe towe gbọn dodinnanu bibasi to owe mítọn lẹ mẹ dali. “Oyọnẹn he pegan” tintindo gán gọalọ nado duto ayihaawe ji. (Efe. 4:13, 14) Podọ dile a to linlin lẹ sè gando owanyi gọna pọninọ he tin to omẹ Jehovah tọn lẹ ṣẹnṣẹn to awà aihọn lọ tọn devo lẹ ji go bosọ to kunnudenu etọn mọ to agun towe titi mẹ, pinpẹn-nutọn-yinyọnẹn towe na pipli mẹmẹsunnu lẹ tọn lẹdo aihọn pé tọn mítọn na jideji.

SAULU TALSU TỌN YÍ BAPTẸM

7. Pọndohlan tẹwẹ Saulu dona jlado?

⁷ Lẹnnupọndo apajlẹ Saulu Talsu tọn ji. E ko to nukọnyi taun to sinsẹ̀n Ju lẹ tọn mẹ bosọ jẹakọ hẹ osẹ́n Ju lẹ tọn ganji. (Gal. 1:13, 14; Flp. 3:5) To ojlẹ de mẹ, mẹsusu pọ́n Klistiani lẹ hlan taidi atẹṣitọ lẹ, enẹwutu Saulu dohomẹkẹn yé sinsinyẹn. E gbọn nuṣiwa dali lẹndọ ojlo Jiwheyẹwhe tọn wà wẹ emi te. (Owalọ 8:3; 9:1, 2; 26:9-11) Nado kẹalọyi Jesu bo yí baptẹm taidi Klistiani de, Saulu lọsu dona wleawufo nado pehẹ homẹkẹn.

8. (a) Etẹwẹ gọalọna Saulu nado yí baptẹm? (b) Sọgbe hẹ Owalọ lẹ 22:12-16, nawẹ Ananias gọalọna Saulu gbọn? (Sọ pọ́n yẹdide lọ.)

⁸ Etẹwẹ gọalọna Saulu nado yí baptẹm? To whenue Oklunọ Jesu he yin gigopana lọ sọawuhia Saulu, e ba nukunnu pò. (Owalọ 9:3-9) Na azán atọ̀n, e blanù podọ ayihaawe matin dọ e lẹnayihamẹpọn do numimọ he e ṣẹṣẹ tindo lọ ji. Mọwẹ, Saulu wá kudeji dọ Jesu wẹ Mẹsia lọ bọ hodotọ etọn lẹ wẹ to sinsẹ̀n nugbo lọ basi. E na ko vẹna Saulu taun dọ e doalọ to okú Stefani tọn mẹ! (Owalọ 22:20) To vivọnu azán atọ̀n lọ lẹ tọn, devi de he nọ yin Ananias dọnsẹpọ Saulu bo hunnukun etọn lẹ bosọ na ẹn tuli nado yí baptẹm madọngbàn. (Hia Owalọ lẹ 22:12-16.) Saulu gbọn whiwhẹ dali kẹalọyi alọgọ lọ bo bẹ aliho gbẹninọ tọn yọyọ de jẹeji.—Owalọ 9:17, 18.

9. Etẹlẹ wẹ a gán plọn sọn apajlẹ Saulu tọn mẹ?

⁹ Nuplọnmẹ delẹ tin to kandai Saulu tọn mẹ na mí. E gán ko na dotẹnmẹ goyiyi kavi obu gbẹtọ tọn nado glọnalina ẹn nado yí baptẹm. Amọ́, e ma dike enẹ ni jọ. Saulu gbọn whiwhẹ dali diọ aliho gbẹninọ tọn etọn to whenue e kẹalọyi nugbo lọ gando Klisti go. (Owalọ 26:14, 19) Saulu wleawufo nado lẹzun Klistiani de dile etlẹ yindọ e yọnẹn dọ emi na pehẹ homẹkẹn. (Owalọ 9:15, 16; 20:22, 23) To baptẹm etọn godo, e zindonukọn nado nọ ganjẹ Jehovah go nado mọ alọgọ etọn yí nado doakọnna whlepọn voovo lẹ. (2 Kọl. 4:7-10) Eyin a yí baptẹm bo lẹzun Kunnudetọ Jehovah tọn de, enẹ gán zọ́n bọ a na pehẹ whlepọn yise tọn lẹ kavi mẹtẹnpọn lẹ, amọ́ a na mọ alọgọtọ. A gán dejido godonọnamẹ tẹgbẹ tọn Jiwheyẹwhe po Klisti po tọn go.—Flp. 4:13.

10. Nawẹ a gán mọaleyi sọn apajlẹ Anna tọn mẹ gbọn?

¹⁰ Anna whẹ́n to whẹndo Kurde-nu lẹ tọn de mẹ to whèzẹtẹn-waji Europe tọn. To whenue onọ̀ Anna tọn ko yí baptẹm godo, ewọ lọsu jẹ Biblu plọn ji po gbekọndopọ otọ́ etọn tọn po to whenue e do owhe ṣinẹnẹ. Amọ́, ehe hẹn nuhahun susu wá ewọ po hẹnnumẹ sẹpọmẹ etọn lẹ po ṣẹnṣẹn, he popolẹpo yetọn nọ nọ̀ fidopo lọ hẹ whẹndo Anna tọn. Hẹnnumẹ lọ lẹ mọdọ winyannu de wẹ e yin dọ mẹde ni jo sinsẹ̀n tọgbo lẹ tọn do. Whenue Anna do owhe 12, e biọgbè otọ́ etọn nado yí baptẹm. Otọ́ lọ jlo na yọnẹn eyin ewọ lọsu wẹ de nado wàmọ kavi eyin mẹde wẹ to kọgbidina ẹn. Viyọnnu lọ gblọn dọ, “N’yiwanna Jehovah.” Otọ́ etọn kọngbedopọ dọ ni yí baptẹm. Enẹgodo, Anna pehẹ mẹṣanko po nuyiwahẹmẹ agọ̀ wunmẹwunmẹ lẹ po. Dopo to hẹnnumẹ etọn lẹ mẹ dọna ẹn dọ, “E na pọnte na we hugan nado nọ zan gbẹzan mawé bosọ nọ nù azọ̀ hú dọ a ni yin Kunnudetọ Jehovah tọn de.” Nawẹ Anna duto ninọmẹ lọ ji gbọn? E dọ dọ, “Jehovah gọalọna mi nado yin huhlọnnọ, podọ onọ̀ ṣie po otọ́ ṣie po ma jo mi do paali.” Anna basi kandai ojlẹ tangan he mẹ e ko mọ alọ Jehovah tọn to gbẹzan etọn mẹ te lẹ tọn. E nọ yìnnukunpọn kandai enẹ sọn ojlẹ de mẹ jẹ devo mẹ ma nado wọn lehe Jehovah ko gọalọna ẹn do wayi. Eyin a nọ dibuna nukundiọsọmẹ, nọ flindọ Jehovah na gọalọna hiẹ lọsu.—Heb. 13:6.

KỌNELIỌSI YÍ BAPTẸM

11. Naegbọn Kọneliọsi gán ko dọngbàn nado yí baptẹm?

¹¹ Biblu sọ bẹ apajlẹ Kọneliọsi tọn hẹn. “Mẹkanwekowhàngán de” wẹ, yèdọ awhàngán de he nọ deanana nudi awhànfuntọ 100 to awhànpa Lomunu lẹ tọn mẹ. (Owalọ 10:1, Odò.) Enẹwutu, e gán ko yin omẹ nukundeji de to lẹdo etọn mẹ podọ to awhànzọ́n mẹ. E “nọ basi nunina lẹblanu tọn susu na gbẹtọ lẹ.” (Owalọ 10:2) Jehovah do apọsteli Pita hlan nado lá wẹndagbe lọ na ẹn. Be Kọneliọsi dọngbàn nado yí baptẹm na otẹn he mẹ e te wutu wẹ ya?

12. Etẹwẹ gọalọna Kọneliọsi nado yí baptẹm?

¹² Etẹwẹ gọalọna Kọneliọsi nado yí baptẹm? Mí hia dọ e “nọ dibusi Jiwheyẹwhe, to pọmẹ hẹ whédo etọn pete.” Podọ Kọneliọsi nọ basi ovẹvivẹ hlan Jiwheyẹwhe to gbesisọ mẹ. (Owalọ 10:2) Whenue Pita lá wẹndagbe lọ na Kọneliọsi, ewọ po whẹndo etọn po kẹalọyi Klisti bo yí baptẹm to afọdopolọji. (Owalọ 10:47, 48) Ayihaawe matin dọ Kọneliọsi wleawufo nado basi vọjlado he yin dandan tọn depope nado sọgan sẹ̀n Jehovah to pọmẹ hẹ whẹndo etọn.—Jọṣ. 24:15; Owalọ 10:24, 33.

13. Etẹlẹ wẹ mí gán plọn sọn Kọneliọsi dè?

¹³ Taidi Saulu, Kọneliọsi gán ko na dotẹnmẹ otẹn he mẹ e tin te nado glọnalina ẹn nado lẹzun Klistiani de. Amọ́, e ma dike enẹ jọ. Be alọkikẹyi nugbo lọ na biọ dọ a ni basi diọdo ayidego tọn lẹ to gbẹzan towe mẹ ya? Eyin mọ wẹ, Jehovah na yin Alọgọtọ towe. E na dona gbemima towe nado sẹ̀n ewọ to kọndopọ mẹ hẹ nunọwhinnusẹ́n Biblu tọn lẹ.

14. Nawẹ a gán mọaleyi sọn apajlẹ Tsuyoshi tọn mẹ gbọn?

¹⁴ Tsuyoshi, he wá sọn Japon dona basi diọdo de gando azọ́n etọn go nado sọgan pegan na baptẹm. E yin alọgọtọ na ogán wehọmẹ Ikenobo tọn he nọ plọnmẹ nukunpipedo vounvoun lẹ go. Eyin wehọmẹ-gán lọ ma penugo nado yì hùnwhẹ ṣiọdidi tọn lẹ tẹnmẹ, Tsuyoshi nọ saba ze afọ etọn dai bo nọ do mahẹ to nuwiwa Bouddha-sẹ̀ntọ lẹ tọn mẹ. Amọ́, whenue Tsuyoshi plọn nugbo lọ gando okú go, nuwiwa ehe lẹzun aliglọnnamẹnu de na baptẹm yíyí etọn. E basi nudide mẹdetiti tọn ma nado nọ do mahẹ to nuwiwa Bouddha-sẹ̀ntọ lẹ tọn mẹ. (2 Kọl. 6:15, 16) Tsuyoshi dọhodo whẹho lọ ji hẹ wehọmẹ-gán lọ. Etẹwẹ yin kọdetọn lọ? Azọ́n ma gbledo Tsuyoshi dile etlẹ yindọ e masọ nọ do mahẹ to nuwiwa lọ lẹ mẹ ba. E yí baptẹm to nudi owhe dopo godo sọn whenue e jẹ Biblu plọn ji.a Eyin e biọ dọ a ni basi diọdo de gando azọ́n towe go nado sọgan hẹn homẹ Jiwheyẹwhe tọn hùn, kudeji dọ ewọ na wleawu nuhe sin hudo hiẹ po whẹndo towe po do tọn.—Salm. 127:2; Mat. 6:33.

KỌLINTINU LẸ YÍ BAPTẸM

15. Etẹlẹ wẹ gán ko glọnalina Kọlintinu lẹ nado yí baptẹm?

¹⁵ Tòdaho Kọlinti hohowhenu tọn yin yinyọnẹn na agbasanu lẹ bibẹpli po walọ gblezọn po. Susu mẹhe nọ nọ̀ finẹ lẹ tọn wẹ nọ doafọna aliho gbẹninọ tọn he Jiwheyẹwhe ma kẹalọyi lẹ. E họnwun dọ lẹdo mọnkọ yin avùnnukundiọsọmẹnu daho de na mẹdepope he na kẹalọyi wẹndagbe lọ. Etomọṣo, whenue apọsteli Paulu wá tòdaho enẹ mẹ bo lá wẹndagbe lọ gando Klisti go, “susu Kọlintinu lẹ tọn he sè sọ yise bo yin bibaptizi.” (Owalọ 18:7-11) Enẹgodo, Oklunọ Jesu Klisti sọawuhia Paulu to numimọ de mẹ bo dọmọ: “Yẹn gbẹ́ tindo mẹsusu to tòdaho ehe mẹ.” Enẹwutu, Paulu zindonukọn nado to yẹwhehodọ to finẹ na owhe dopo daa.

16. Etẹwẹ gọalọna mẹdelẹ to Kọlinti nado duto nuhe gán ko glọnalina yé nado yí baptẹm lẹ ji? (2 Kọlintinu lẹ 10:4, 5)

¹⁶ Etẹwẹ gọalọna Kọlintinu lẹ nado yí baptẹm? (Hia 2 Kọlintinu lẹ 10:4, 5.) Ohó Jiwheyẹwhe tọn po gbigbọ wiwe huhlọnnọ etọn po wẹ gọalọna yé nado basi diọdo ayidego tọn lẹ to gbẹzan yetọn mẹ. (Heb. 4:12) Mẹhe to Kọlinti bo kẹalọyi wẹndagbe lọ gando Klisti go lẹ penugo nado jo walọyizan po aṣa delẹ po do taidi ahànnumu, ajojijẹ po zanhẹmẹ to vijinu dopolọ lẹ ṣẹnṣẹn po.—1 Kọl. 6:9-11.b

17. Etẹwẹ a gán plọn sọn apajlẹ Kọlintinu lẹ tọn mẹ?

¹⁷ Doayi e go dọ mahopọnna dọ to Kọlinti, mẹdelẹ dona duto walọyizan he mẹ yé ko peve te delẹ ji, yé ma wá tadona kọ̀n dọ e na vẹawuna emi gbau nado lẹzun Klistiani. Yé dovivẹnu sinsinyẹn nado hẹ ali jinján he nọ planmẹ yì ogbẹ̀ madopodo mẹ lọ ji. (Mat. 7:13, 14) Be e to awuvẹ na we nado duto walọ kavi aṣa ylankan de ji nado sọgan yí baptẹm wẹ ya? Ma hònúpla gbede blo! Nọ vẹ̀ Jehovah nado na we gbigbọ wiwe etọn nado gọalọna we na a nido nọavùnte sọta ojlo lọ nado wà nuhe ylan.

18. Nawẹ a gán mọaleyi sọn apajlẹ Monika tọn mẹ gbọn?

¹⁸ Monika, he wá sọn otò Géorgie tọn mẹ dovivẹnu sinsinyẹn nado jo hogbe mawé po ayidedai he ma sọgbe lẹ po do nado sọgan yinukọn jẹ baptẹm kọ̀n. E dọmọ: “Whenue n’to aflanmẹ, nuhe nọ na mi huhlọn wẹ dẹ̀hiho. Jehovah yọnẹn dọ n’jlo na wà nuhe sọgbe, podọ e nọ to alọgọna mi whepoponu bosọ nọ to anadena mi.” Monika yí baptẹm whenue e do owhe 16. Be a dona dealọ sọn walọyizan delẹ mẹ nado sọgan sẹ̀n Jehovah to aliho he ewọ kẹalọyi mẹ ya? Zindonukọn nado nọ biọ huhlọn lọ nado basi diọdo lẹ. Jehovah nọ yí alọtútlú do namẹ gbigbọ wiwe etọn.—Joh. 3:34.

YISE TOWE GÁN SẸTẸNNA OSÓ LẸ

19. Etẹwẹ gán gọalọna we nado duto aliglọnnamẹnu he taidi osó lẹ ji? (Sọ pọ́n yẹdide lọ.)

¹⁹ Kudeji dọ Jehovah yiwanna we bosọ jlo dọ a ni yin apadewhe whẹndo emitọn tọn. Nugbo wẹ enẹ mahopọnna nudepope he gán to aliglọnna we nado yí baptẹm. Jesu dọna pipli devi etọn lẹ tọn de to owhe kanweko tintan whenu dọmọ: “Eyin mì tindo yise he sọ okún mutaldi tọn de, mì na dọna osó ehe dọ, ‘Sẹtẹn sọn fi yì dọ́n,’ bọ e na sẹtẹn, podọ nudepope ma na glo mì.” (Mat. 17:20) Mẹhe to finẹ bo sè ehe lẹ ko nọpọ́ hẹ Jesu na owhe delẹ poun, enẹwutu yise yetọn gbẹ́ dona jideji. Amọ́ Jesu hẹn yé kudeji dọ eyin yé wleawuna yise he lodo, Jehovah na gọalọna yé nado sẹtẹnna aliglọnnamẹnu he taidi osó lẹ. Jehovah nasọ gọalọna hiẹ lọsu nado wà nudopolọ!

20. Nawẹ apajlẹ Klistiani owhe kanweko tintan whenu tọn gọna egbezangbe tọn he yin nùdego to hosọ ehe mẹ lẹ whàn we gbọn?

²⁰ Eyin a doayi nuhe to aliglọnna we nado yí baptẹm lẹ go, ze afọdide lẹ nado de yé sẹ̀ madọngbàn. Nọ mọ homẹmimiọn po huhlọn po yí sọn apajlẹ Klistiani owhe kanweko tintan whenu tọn po egbezangbe tọn lẹ tọn po mẹ. Na apajlẹ yetọn ni na we tuli bosọ whàn we nado klan dewe do wiwe na Jehovah bo yí baptẹm. Nudide dagbe hugan he a gán basi niyẹn!