Nọ Gọalọna Biblu Plọntọ Towe lẹ Nado Kẹalọyi Nugbo Lọ

1, 2. (a) Naegbọn Biblu plọntọ delẹ nọ whleawu nado kẹalọyi nugbo lọ? (b) Etẹwẹ mí na gbadopọnna to hosọ ehe mẹ?

BE NUDELẸ zọ́n bọ a whleawu nado lẹzun dopo to Kunnudetọ Jehovah tọn lẹ mẹ wẹ ya? Vlavo a dibu dọ azọ́nwatọgbẹ́, họntọn kavi hagbẹ whẹndo tọn towe lẹ na diọnukunsọ we. Kavi vlavo a tindo numọtolanmẹ lọ dọ emi ma na penugo bo nọgbẹ̀ sọgbe hẹ nujinọtedo Jiwheyẹwhe tọn lẹ pọ́n gbede. Eyin mọ wẹ, a gán mọnukunnujẹ numọtolanmẹ Biblu plọntọ he gán to awuwhle nado kẹalọyi nugbo lọ lẹ tọn mẹ.

² Jesu yọnẹn dọ obu wunmẹ enẹlẹ gán glọnalina nukọnyiyi gbigbọmẹ tọn mẹde tọn po awubibọ po. (Mat. 13:20-22) Amọ́, agbọ́ mẹhe whleawu nado lẹzun hodotọ etọn lẹ tọn ma pé e. Kakatimọ, e dohia devi etọn lẹ lehe yé na nọ gọalọna omẹ mọnkọ lẹ do nado (1) doayi nuhe nọ glọnalina nukọnyiyi yetọn lẹ go, (2) hẹn owanyi yetọn na Jehovah siso deji, (3) basi vọjlado gando nuhe to otẹn tintan mẹ na yé lẹ go, podọ (4) nado duto avùnnukundiọsọmẹnu yetọn lẹ ji. Nawẹ mí gán yí nuhe Jesu dọna devi etọn lẹ do yizan mẹ dile mí to owe lọ Duvivi Ogbẹ̀ Tọn Kakadoi! yizan nado gọalọna Biblu plọntọ de nado wá kẹalọyi nugbo lọ gbọn?

GỌALỌNA NUPLỌNTỌ TOWE NADO DOAYI NUHE NỌ GLỌNALINA NUKỌNYIYI ETỌN LẸ GO

3. Etẹwẹ gán ko glọnalina Nikodẹmi nado lẹzun devi Jesu tọn de?

³ Avùnnukundiọsọmẹnu de wẹ e yin na Nikodẹmi, yèdọ nukọntọ Ju lẹ tọn nukundeji de nado lẹzun dopo to devi Jesu tọn lẹ mẹ. Nudi osun ṣidopo poun to whenue Jesu bẹ lizọnyizọn etọn jẹeji godo, Nikodẹmi yọnẹn dọ Jesu wẹ yin afọzedaitọ Jiwheyẹwhe tọn. (Joh. 3:1, 2) Etomọṣo, Nikodẹmi basi dide nado mọ Jesu to nuglọ, na e “to budina Ju lẹ wutu.” (Joh. 7:13; 12:42) E gán ko lẹndọ nususu wẹ na gú emi, eyin emi lẹzun devi Jesu tọn de.a

4. Nawẹ Jesu gọalọna Nikodẹmi nado mọnukunnujẹ nuhe Jiwheyẹwhe to nukundo sọn e si mẹ gbọn?

⁴ Nikodẹmi yọ́n Osẹ́n lọ ganji, amọ́ e do hudo alọgọ tọn nado mọnukunnujẹ nuhe Jehovah to nukundo sọn e si mẹ. Nawẹ Jesu gọalọna ẹn gbọn? Jesu nọ desọn ojlo mẹ nado yí whenu etọn zan dopọ hẹ mẹlẹ, etlẹ wàmọ po Nikodẹmi po to zánmẹ. Podọ, Jesu dọna Nikodẹmi madoadúdẹji nuhe e dona wà nado yin devi de: enẹ wẹ nado lẹnvọjọ sọn ylando etọn lẹ mẹ, yí baptẹm to osin mẹ bosọ do yise hia to Visunnu Jiwheyẹwhe tọn mẹ.—Joh. 3:5, 14-21.

5. Nawẹ mí gán gọalọna Biblu plọntọ de nado doayi nuhe to aliglọnna nukọnyiyi etọn lẹ go gbọn?

⁵ Etlẹ yin whenue Biblu plọntọ de mọnukunnujẹ nuhe Owe-wiwe lẹ dọ mẹ ganji, e gán do hudo mẹde tọn he na gọalọna ẹn nado doayi nuhe to aliglọnna nukọnyiyi etọn go. Agbasazọ́n kavi nukundiọsọmẹ whẹndo tọn gán fẹayihasẹna ẹn sọn yanwle gbigbọmẹ tọn lẹ ji. Enẹwutu, nọ mọ whenu na nuplọntọ towe. A gán basi oylọna ẹn nado wá dùnú kleun de hẹ we kavi nado disa dopọ. To ninọmẹ mọnkọ mẹ, a gán penugo nado gọalọna ẹn nado hùn ede do nùvo bo dọ avùnnukundiọsọmẹnu etọn lẹ na we. Na tuli nuplọntọ towe nado basi diọdo depope he jẹ, e ma yin nado hẹn homẹ towe hùn amọ́ nado do owanyi etọn na Jehovah hia.

6. Nawẹ a gán gọalọna nuplọntọ de nado wleawuna adọgbigbo nado kẹalọyi nugbo lọ gbọn? (1 Kọlintinu lẹ 16:13)

⁶ Eyin Biblu plọntọ de kudeji dọ Jehovah na gọalọna emi nado nọgbẹ̀ sọgbe hẹ nujinọtedo Biblu tọn lẹ, e na wleawuna adọgbigbo nado yí nuhe plọn e te lẹ do yizan mẹ. (Hia 1 Kọlintinu lẹ 16:13.) Adà he yiwà a te gán yin yiyijlẹdo mẹplọntọ wehọmẹ tọn de go. Eyin a lẹnnupọndo whenue a to wehọmẹ yì ji, mẹplọntọ tẹwẹ a yiwanna hugan? Vlavo e gán yin mẹplọntọ he nọ yí homẹfa do gọalọna we nado dejido nugopipe towe lẹ go. Mọdopolọ, Biblu plọnmẹtọ dagbe de ma nọ plọnmẹ nuhe Jiwheyẹwhe jlo dọ mí ni wà lẹ kẹdẹ gba, amọ́ e nọ hẹn nuplọntọ etọn deji dọ po alọgọ Jehovah tọn po e gán basi diọdo he yin dandan tọn lẹ to gbẹ̀mẹ. Nawẹ a gán wàmọ gbọn?

GỌALỌNA NUPLỌNTỌ TOWE NADO HẸN OWANYI ETỌN NA JEHOVAH SISO DOGỌ

7. Nawẹ Jesu gọalọna todoaitọ etọn lẹ nado hẹn owanyi yetọn na Jehovah sinyẹn deji gbọn?

⁷ Jesu yọnẹn dọ owanyi na Jiwheyẹwhe na whàn devi etọn lẹ nado yí nuhe yé plọn lẹ do yizan mẹ. E nọ saba plọn devi etọn lẹ nuhe na gọalọna yé bọ owanyi yetọn na Otọ́ olọn mẹ tọn yetọn na sinyẹn deji. Di apajlẹ, e yí Jehovah jlẹdo otọ́ de he nọ na onú dagbe ovi etọn lẹ go. (Mat. 7:9-11) Delẹ to todoaitọ Jesu tọn lẹ mẹ gán ko nọma tindo otọ́ awuvẹmẹtọ mọnkọtọn. Yí nukun homẹ tọn do pọ́n lehe e dona ko ṣí na yé whenue Jesu na apajlẹ otọ́ awuvẹmẹtọ he dokuavọna visunnu etọn he ko danbú bo lẹkọ lọ do tọn. Yé sọgan ko mọ awuvẹmẹ he Jehovah tindo na ovi aigba ji tọn etọn lẹ.—Luku 15:20-24.

8. Nawẹ a gán gọalọna Biblu plọntọ de nado hẹn owanyi etọn na Jehovah siso deji gbọn?

⁸ Hiẹ lọsu gán gọalọna Biblu plọntọ de nado hẹn owanyi etọn na Jehovah sinyẹn deji eyin a nọ zinnudo jẹhẹnu Jiwheyẹwhe tọn lẹ ji to mẹpinplọn towe whenu. To nupinplọn dopodopo ji, gọalọna ẹn nado mọ kanṣiṣa he to nuhe plọn e te po owanyi Jehovah tọn po ṣẹnṣẹn. Whenue mì to hodọdo ofligọ lọ ji, zinnudo lehe e gandego do ji. (Lom. 5:8; 1 Joh. 4:10) E yọnbasi dọ nuplọntọ de ni yin whinwhàn nado yiwanna Jehovah dile e to nulẹnpọndo owanyi he Jehovah tindo na ewọ lọsu titi ji.—Gal. 2:20.

9. Etẹwẹ gọalọna dawe de he nọ yin Michael nado diọ aliho gbẹninọ tọn etọn?

⁹ Lẹnnupọndo apajlẹ Michael he wá sọn Indonésie tọn ji. E yin pinplọn whẹ́n to nugbo lọ mẹ, amọ́ e ma yí baptẹm. Whenue e do owhe 18, e tlọ́n Indonésie nado yì wazọ́n taidi mọto daho-kùntọ. To nukọn mẹ, e lẹkọwa Indonésie nado wlealọ, amọ́ to enẹgodo e jo whẹndo etọn do bosọ lẹkọyi tògodo nado yì wazọ́n. To gblagbla ojlẹ enẹ tọn mẹ, asi etọn po viyọnnu etọn po jẹ Biblu plọn ji bo basi nukọnyiyi. To okú onọ̀ Michael tọn godo, e basi dide nado lẹkọwa whé nado penukundo otọ́ etọn go, podọ e yigbe nado plọn Biblu. To whenue Michael gbadopọnna adà lọ “Dindonanu Dogọ” to nupinplọn 27​tọ owe lọ “Duvivi Ogbẹ̀ Tọn Kakadoi” mẹ, e yinuwadeji sisosiso. Dile Michael to nulẹnpọndo lehe e na ko ṣí na Jehovah nado mọ Visunnu Etọn to yaji ji, dasin wayi do e. E wleawuna pinpẹn nutọn sisosiso na ofligọ lọ, bọ ehe whàn ẹn nado diọ aliho gbẹninọ tọn etọn bo yí baptẹm.

GỌALỌNA NUPLỌNTỌ TOWE NADO BASI VỌJLADO GANDO NUHE TO OTẸN TINTAN MẸ NA ẸN LẸ GO

10. Nawẹ Jesu gọalọna devi dowhenu tọn etọn lẹ nado basi vọjlado gando nuhe to otẹn tintan mẹ na yé lẹ go gbọn? (Luku 5:5-11) (Sọ pọ́n yẹdide lọ.)

¹⁰ Devi dowhenu tọn lẹ yawu kẹalọyi Jesu taidi Mẹsia dopagbe lọ, amọ́ yé do hudo alọgọ tọn nado ze lizọnyizọn lọ do otẹn tintan mẹ. Pita po Andle po ko yin devi lẹ e ko yì ojlẹ de whenue Jesu basi oylọna yé nado hodo e na whenu-gigọ́. (Mat. 4:18, 19) Yé nọ wàjọ whèhuhu tọn he to nina ganji de, vlavo to pọmẹ hẹ Jakọbu po Johanu po. (Malku 1:16-20) Whenue Pita po Andle po “jo odọ̀ yetọn lẹ do,” e yọnbasi dọ yé na ko basi tito nado penukundo whẹndo yetọn go dile yé to hihodo Jesu. Etẹwẹ gọalọna yé nado basi vọjlado gando nuhe to otẹn tintan mẹ na yé lẹ go? Kandai he to owe Luku tọn mẹ dọna mí dọ Jesu wà azọ́njiawu de, ehe hẹn jidide yetọn to nugopipe Jehovah tọn nado penukundo yé go mẹ sinyẹn deji.—Hia Luku 5:5-11.

11. Nawẹ mí gán yí numimọ mítọn titi lẹ do hẹn yise nuplọntọ de tọn lodo gbọn?

¹¹ Mí ma gán wà azọ́njiawu dile Jesu wà do, amọ́ mí gán má numimọ lehe Jehovah nọgodona mẹhe ze Ewọ do otẹn tintan mẹ to gbẹzan yetọn mẹ lẹ do tọn hẹ mẹdevo lẹ. Di apajlẹ, be a flin lehe Jehovah gọalọna we do whenue a jẹ opli lẹ yì ji ya? Vlavo a dona dọho hẹ azọ́nmẹyimẹdotọ towe bo basi zẹẹmẹ nuhewutu a ma gán sọ wà gàngodo-zọ́n ba tọn na ẹn eyin enẹ glọnalina we nado yì opli. To whenue a to numimọ towe lẹ má hẹ nuplọntọ towe, basi zẹẹmẹ lehe yise towe lodo dogọ do tọn na ẹn dile a mọ bọ Jehovah nọgodona nudide he a basi nado ze sinsẹ̀n-bibasi etọn do otẹn tintan mẹ.

12. (a) Naegbọn mí dona basi oylọna wẹnlatọ voovo lẹ wá plọnmẹ Biblu de tẹnmẹ? (b) Nawẹ a gán yí video lẹ zan nado plọnnu nuplọntọ towe lẹ po kọdetọn dagbe po gbọn? Na apajlẹ.

¹² Nuplọntọ towe nasọ mọaleyi eyin e sè lehe Klistiani devo lẹ basi vọjlado gando nuhe to otẹn tintan mẹ na yé lẹ go do. Enẹwutu, nọ basi oylọna yisenọ hatọ he wá sọn ninọmẹ voovo mẹ lẹ nado kọnawudopọ hẹ we to oplọn lọ whenu. Nọ biọ to yé si nado basi zẹẹmẹ lehe yé mọ nugbo do tọn gọna nuhe yé wà nado ze Jehovah sinsẹ̀n do otẹn tintan mẹ to gbẹzan yetọn mẹ. Humọ, yí whenu zan dopọ hẹ Biblu plọntọ towe nado pọ́n video he nọ sọawuhia to adà lọ “Dindonanu Dogọ” kavi “Nudọnamẹ Devo Lẹ” mẹ to owe lọ Duvivi Ogbẹ̀ Tọn Kakadoi! mẹ lẹ. Di apajlẹ, whenue mì to hodọdo nupinplọn 37​tọ ji, a gán zinnudo nunọwhinnusẹ́n delẹ ji sọn video lọ Jehovah Na Penukundo Nuhudo Mítọn lẹ Go mẹ.

GỌALỌNA NUPLỌNTỌ TOWE NADO DUTO AVÙNNUKUNDIỌSỌMẸNU LẸ JI

13. Nawẹ Jesu gàn devi lẹ dote na homẹkẹn gbọn?

¹³ Jesu dọna hodotọ etọn lẹ pludopludo dọ yé na pehẹ homẹkẹn sọn mẹdevo lẹ dè, etlẹ yin sọn hẹnnumẹ lẹ dè. (Mat. 5:11; 10:22, 36) Dile lizọnyizọn Jesu tọn to vivọnu wá, e na avase devi etọn lẹ dọ yé gán yin hùhù. (Mat. 24:9; Joh. 15:20; 16:2) E dotuhomẹna yé nado yin zinzintọ to lizọnyizọn yetọn mẹ. E na yé ayinamẹ ma nado dọnnu hẹ mẹhe diọnukunsọ yé lẹ, podọ nado yin nuyọnẹntọ, na yé nido sọgan zindonukọn bo to yẹwhehodọ.

14. Nawẹ mí gán gọalọna nuplọntọ de nado wleawudai na homẹkẹn gbọn? (2 Timoti 3:12)

¹⁴ Mí gán gọalọna nuplọntọ de nado wleawudai na homẹkẹn eyin mí nọ basi zẹẹmẹ nuhe e gán donukun nado sè sọn azọ́nwatọgbẹ́, họntọn po hẹnnumẹ etọn lẹ po dè tọn na ẹn. (Hia 2 Timoti 3:12.) Azọ́nwatọgbẹ́ delẹ gán nọ ṣàn aliho gbẹninọ tọn yọyọ nuplọntọ lọ tọn kò. Mẹdevo lẹ, etlẹ yin hẹnnumẹ sẹpọmẹ lẹ gán nọ mọhodọdo nuyise sinai do Biblu ji etọn lẹ go. Dile mí yawu gàn nuplọntọ mítọn lẹ dote nado pehẹ homẹkẹn do, mọwẹ yé na pegan dogọ do niyẹn whenue homẹkẹn lẹ na wá.

15. Etẹwẹ gán gọalọna Biblu plọntọ de nado duto homẹkẹn whẹndo tọn ji?

¹⁵ Eyin nuplọntọ towe to pipehẹ nukundiọsọmẹ whẹndo tọn, na ẹn tuli nado lẹnnupọndo nuhe gán ko hẹn homẹgblena hẹnnumẹ etọn lẹ ji. Yé gán lẹndọ, yè ko blẹ ẹ dù, kavi e gán yin poun dọ yé do linlẹn agọ̀ de sọta Kunnudetọ Jehovah tọn lẹ. Jesu lọsu tlẹ pehẹ nuyiwahẹmẹ agọ̀ sọn mẹhe e yiwanna lẹ dè. (Malku 3:21; Joh. 7:5) Plọn nuplọntọ towe nado fahomẹ bo nọ yí zinzin do yinuwa hẹ mẹdevo lẹ, ehe bẹ hagbẹ whẹndo tọn etọn lẹ hẹn.

16. Nawẹ mí gán gọalọna Biblu plọntọ de nado má nuyise etọn lẹ po zinzin po gbọn?

¹⁶ Etlẹ yin whenue hẹnnumẹ lẹ do ojlo hia, nuplọntọ de nọ yinuwa po nuyọnẹn po ma nado basi zẹẹmẹ nulẹpo tọn to afọdopolọji. Eyin e ma yinmọ, onú na ṣikọna hagbẹ whẹndo tọn etọn lẹ bọ yé na whleawu nado dọhodopọ hẹ ẹ to whedevonu. Enẹwutu, na tuli nuplọntọ towe nado nọ má nuyise etọn lẹ to aliho he na jla aimẹ do na hodọdopọ to whedevonu mẹ. (Kol. 4:6) Vlavo e gán biọ to hẹnnumẹ etọn lẹ si nado dla nọtẹn intẹnẹt tọn jw.org pọ́n. Ehe na hùn dotẹnmẹ dote na yé nado plọnnu dogọ gando Kunnudetọ Jehovah tọn lẹ go sọgbe hẹ lehe yé penugo do.

17. Nawẹ a gán plọnazọ́n nuplọntọ de nado duto nukunnumọjẹnumẹ agọ̀ he mẹdevo lẹ gán tindo gando Kunnudetọ Jehovah tọn lẹ go ji gbọn? (Sọ pọ́n yẹdide lọ.)

¹⁷ A gán yí hosọ debọdo-dego lọ “Kanbiọ He Mẹsusu Nọ Kanse Lẹ” he to jw.org ji zan nado gọalọna nuplọntọ towe nado wleawuna gblọndo kleunkleun lẹ na kanbiọ he hẹnnumẹ lẹ kavi azọ́nwatọgbẹ́ lẹ gán kanse. (2 Tim. 2:24, 25) To vivọnu nupinplọn dopodopo tọn, gbadopọnna adà lọ “Mẹdelẹ Nọ Dọ Dọ” to owe lọ Duvivi Ogbẹ̀ Tọn Kakadoi! mẹ. Na tuli nuplọntọ towe nado nọ basi zepọn nuhe e na gblọn na mẹlẹ tọn to hogbe etọn titi mẹ. Ma nọ whleawu nado na ẹn ayinamẹ do lehe e gán hẹn gblọndo etọn pọnte do ji blo. Zepọn ehelẹ bibasi na gọalọna ẹn nado yiavùnlọna nuyise etọn titi po jintli po.

18. Nawẹ a gán na tuli nuplọntọ de nado má yise etọn hẹ mẹdevo lẹ to lizọnyizọn lọ mẹ gbọn? (Matiu 10:27)

¹⁸ Jesu dotuhomẹna devi etọn lẹ nado lá wẹndagbe lọ to gbangba. (Hia Matiu 10:27.) Lehe nuplọntọ de yawu jẹ yise etọn má hẹ mẹdevo lẹ ji do, mọ wẹ e na yawu plọn nado nọ ganjẹ Jehovah go do niyẹn. Nawẹ a gán gọalọna nuplọntọ de nado yí ehe do basi yanwle gbọn? Whenue nulila nujijla yẹwhehodidọ tọn de yin bibasi to agun mẹ, na tuli nuplọntọ towe nado lẹnnupọndo lehe e gán pegan taidi wẹnlatọ de do ji. Basi zẹẹmẹ nuhewutu mẹsusu nọ mọdọ e bọawu nado bẹ yẹwhehodidọ jẹeji to ojlẹ nujijla tọn mọnkọ lẹ whenu tọn na ẹn. E gán sọ mọaleyi sọn hodidọ gbangba tọn he nọ plọnazọ́nmẹ, he nọ yin nina to opli osẹ ṣẹnṣẹn tọn whenu lẹ mẹ. Dile e to afọdona yanwle ehe, e na plọn nado nọ basi zẹẹmẹ nuyise etọn lẹ tọn po nujikudo po.

DEJIDO NUPLỌNTỌ TOWE GO

19. Nawẹ Jesu dohia dọ emi dejido devi emitọn lẹ go gbọn, podọ nawẹ mí gán hodo apajlẹ etọn gbọn?

¹⁹ Whẹpo Jesu do yì olọn mẹ, e dọna devi etọn lẹ dọ yé na nọpọ́ hẹ emi. Yé ma wle dọ Jesu to hodọ gando olọn mẹ yìyì yetọn go wẹ. Etomọṣo, e na ayidonugo nugbonọ-yinyin yetọn, e ma yin ayihaawe yetọn. (Joh. 14:1-5, 8) E yọnẹn dọ yé do hudo whenu tọn nado mọnukunnujẹ nudelẹ mẹ, taidi todido olọn mẹ tọn. (Joh. 16:12) Mílọsu gán dohia dọ mí deji dọ nuplọntọ mítọn do ojlo nado hẹn homẹ Jehovah tọn hùn.

20. Nawẹ mẹmẹyọnnu de to Malawi dohia dọ emi dejido nuplọntọ emitọn go gbọn?

²⁰ Mí gbẹ́ nọ tindo todido dọ nuplọntọ mítọn jlo na wà nuhe sọgbe. Pọ́n apajlẹ Chifundo tọn, yèdọ mẹmẹyọnnu de to Malawi. E jẹ Biblu plọn hẹ nawe Katoliki-nu de he nọ yin Alinafe ji to owe Duvivi Ogbẹ̀ Tọn Kakadoi! mẹ. To whenue yé dotana nupinplọn 14​tọ, Chifundo kanbiọ nuplọntọ etọn nuhe e lẹn gando yẹdide lẹ yiyizan to sinsẹ̀n-bibasi mẹ go. Po numọtolanmẹ sinsinyẹn po, Alinafe gblọn dọmọ: “Nudide mẹdetiti tọn wẹ enẹ!” Chifundo jẹ ayihaawe tindo ji eyin Biblu pinplọn lọ na zindonukọn. Amọ́, e yí homẹfa do zindonukọn to oplọn lọ mẹ hẹ Alinafe, po todido lọ po dọ to nukọn mẹ e na wá họnwun na ẹn. Osun kleun delẹ godo, Chifundo kàn kanbiọ he to nupinplọn 34​tọ mẹ biọ nawe lọ dọ: “Nawẹ nuhe a ko plọn sọn Biblu mẹ podọ gando Jiwheyẹwhe nugbo lọ, Jehovah go lẹ ko hẹn ale wá na we gbọn?” Chifundo dọ lehe Alinafe na gblọndo do tọn dọ: “E donù nuagokun dagbedagbe susu go, dopo to yé mẹ wẹ yindọ Kunnudetọ Jehovah tọn lẹ ma nọ doalọ to aṣa he Biblu jẹagọdo lẹ mẹ.” E ma dẹn bọ Alinafe doalọtena yẹdide lẹ yiyizan bo pegan na baptẹm.

21. Nawẹ mí gán hẹn ojlo he nuplọntọ de tindo nado nọ adà nugbo lọ tọn mẹ sinyẹn deji gbọn?

²¹ Dile etlẹ yindọ Jehovah wẹ mẹlọ he “to hinhẹn ẹn whẹ́n,” azọngban mítọn wẹ nado gọalọna Biblu plọntọ de nado yinukọn. (1 Kọl. 3:7) Mí nọ wà nususu hú pinplọn ẹn nado wà nuhe Jiwheyẹwhe jlo dọ ni wà lẹ poun. Mí nọ gọalọna ẹn nado wleawuna owanyi sisosiso na Jehovah. Mí sọ nọ na ẹn tuli nado do owanyi etọn hia gbọn nuhe tin to otẹn tintan mẹ na ẹn lẹ gbigbejepọn dali. Podọ mí nọ plọn ẹn lehe e gán ganjẹ Jehovah go do whenue e pehẹ avùnnukundiọsọmẹnu lẹ. Eyin mí nọ dohia dọ mí dejidego, mí na hẹn nujikudo etọn sinyẹn deji dọ ewọ lọsu gán nọgbẹ̀ sọgbe hẹ nujinọtedo Jehovah tọn lẹ bo nọ adà nugbo lọ tọn mẹ gligli.