Ovi lẹ po Alokan po—Apá 2: Plọn Ovi Towe Nado Nọ Zan Alokan Ganji

Azọ́nwanu dagbe de wẹ alokan yin—e yin yè zan ẹn ganji, e gán wà dagbe namẹ, podọ e gán hẹn nuhahun wá eyin yè ṣì i zan. Nawẹ a gán plọn ovi towe nado nọ bayi nudide dagbe lẹ to whenue e to alokan zan gbọn? Di apajlẹ, ojlẹ nẹmu wẹ a na jlo dọ ovi towe ni zan alokan na to gbèdopo?a

• Nuhe a dona yọnẹn

• Nuhe a gán wà

• “Mẹjitọ he do owanyi nọ ze osẹ́n lẹ dai”

Nuhe a dona yọnẹn

• Alokan gán hẹn mẹhe to zinzan ẹn biọ owù mẹ. Hosọ lọ “Ovi lẹ po Alokan po—Apá 1: Be E Ko Jẹ Dọ Ovi Ṣie Ni Do Alokan Ya?” dohia mí dọ alokan gán zọ́n bọ yè na mọ nuhe to Intẹnẹt ji lẹpo, vlavo nudagbe kavi nuylankan.

  “E bọawu nado wọnji dọ alokan gán dike bọ ovi mítọn lẹ na jẹakọ hẹ gbẹtọ ylankan lẹ po linlẹn agọ̀ lẹ po.”—Brenda.

• Ovi lẹ do hudo anademẹ tọn. Sọn pẹvi gbọ́n wẹ jọja lẹ ko to alokan zan, amọ́ agọe wẹ mẹho delẹ wá jẹ alokan zan ji. Enẹ ma dohia dọ mẹjitọ lẹ ma yọ́n nude gando alokan go, e masọ zẹẹmẹdo dọ ovi lẹ wẹ do nugopipe hugan nado magbe lehe yé na zan alokan do po whenue yé na wàmọ do po tọn.

  Nugbo wẹ dọ ovi towe lẹ gán yọ́n alọ alokan tọn hugan we, amọ́ enẹ ma dohia dọ yé yọ́n lehe yé gán yí nuyọnẹn do zan ẹn do. Ovi he tlẹ yọ́n alọ alokan tọn ganji lẹ gbẹ́ do hudo anademẹ mẹjitọ tọn nado yọ́n lehe yé na zan alokan dile e jẹ do.

  “Eyin a ze alokan na ovi towe bo ma ka plọn ẹn lehe e na zan alokan lọ do, e nọ taidi dọ yè ni ze ovi mẹtọn do mọto mẹ bo dozò na mọto lọ bo wá dọna ẹn dọ, ‘jaale wà dẹẹdẹ mọ’, to whenuena e yindọ e ma ko plọn mọto kùnkùn.”—Seth.

Nuhe a gán wà

• Yọ́n nuhe to alokan ovi towe tọn mẹ lẹ. Jẹakọ hẹ nuhe na gọalọna ovi towe nado zan alokan lọ ganji lẹ. Di apajlẹ:

  Etẹwẹ a gán zín nado de whenu nẹmu he ovi towe nọ zan to alokan ji pò, podọ nado yọ́n nọtẹn Intẹnẹt tọn he ji e nọ yì lẹ?

  Be a yọnẹn dọ nuhe nọ glọnali ma nado mọ nuhe ma sọgbe to alokan ji lẹ ma nọ wazọ́n whelẹponu ya?

  Eyin a yọ́n alokan he zan ovi towe te ganji, a na penugo nado gọalọna ẹn gando lehe e na zan alokan lọ ganji do go.

  Ayinamẹ Biblu tọn: “Gbọn oyọnẹn dali wẹ mẹde nọ hẹn huhlọn etọn jideji.”—Howhinwhẹn lẹ 24:5.

• Ze dogbó delẹ dai. Magbe nue a na kẹalọyi po dehe a ma na kẹalọyi lẹ po tọn. Di apajlẹ:

  Be a na dike bọ ovi towe na nọ ze alokan wá núdùdù whèjai tọn tẹnmẹ kavi dọ ni to alokan zan whenue mì jlo na yì pọ́n hagbẹ whẹndo tọn lẹ kavi họntọn lẹ ya?

  Be alokan ovi towe lẹ tọn dona nọ nọ̀ yé si jẹ wunkẹngbe wẹ ya?

  Aplikasiọn tẹlẹ wẹ a na jlo dọ yé ni zan?

  Ojlẹ nẹmu wẹ a na jlo dọ yé ni zan alokan na to gbèdopo?

  Be a na ze dogbó gànmẹ de tọn dai ya?

  Hẹn osẹ́n towe lẹ họnwun na yé bo wleawufo nado dọ̀n otó na yé eyin mẹde gbàsẹ́n.

  Ayinamẹ Biblu tọn: “A dọ̀n alọ mẹplọnlọ tọn dogodo na jọja de blo.”—Howhinwhẹn lẹ 23:13, Odò.

• Nọ pọ́n nuhe to alokan ovi towe tọn mẹ. Tẹnpọn bo yọ́n nue ovi towe nọ zín do nọ hùn alokan etọn bosọ nọ pọ́n nuhe to e mẹ lẹ, enẹ wẹ wekanhlanmẹ, aplikasiọn, fọto po nọtẹn Intẹnẹt tọn he ji e nọ yì lẹ po sọn ojlẹ de mẹ jẹ devo mẹ.

  “Mí dọna viyọnnu mítọn dọ mí na nọ pọ́n alokan etọn mẹ matin avase jẹnukọn. Eyin mí mọdọ e ma to alokan etọn zan po nuyọnẹn po, mí gán de whenu he e nọ zan alokan lọ na pò.”—Lorraine.

  Taidi mẹjitọ de, a do jlọjẹ lẹpo nado yọ́n lehe ovi towe to alokan etọn zan do.

  Ayinamẹ Biblu tọn: “Etlẹ yin yọpọvu de wẹ, gbọn nuyiwa etọn lẹ dali wẹ e nọ yin yinyọnẹn, eyin walọ etọn lẹ wé-ṣeke bo sọgbe.”—Howhinwhẹn lẹ 20:11.

• Plọn walọ dagbe ovi towe. Gọalọna ovi towe nido nọ wà nue sọgbe. Naegbọn enẹ do yin nujọnu? Na eyin ovi de jlo na whlá nude do mẹjitọ etọn lẹ nugbonugbo, e na dín aliho de nado wàmọ mahopọnna nudepope he mẹjitọ etọn lẹ wà.b

  Enẹwutu, plọn ovi towe nado do jijọ dagbe delẹ taidi nugbodidọ, mawazẹjlẹgo podọ nado nọ kẹalọyi nuṣiwa etọn lẹ. E yọnbayi dọ ovi he do walọ dagbe ni nọ zan alokan etọn po nuyọnẹn po.

  Ayinamẹ Biblu tọn: “Mẹhe ko whẹ́n lẹ . . . ko plọn huhlọn wuntuntun tọn yetọn gbọn yíyí i zan dali nado nọ yọ́n vogbingbọn to dagbe po oylan po ṣẹnṣẹn.”—Heblu lẹ 5:14.