Etẹ Biblu Dọ Gando Ninọmẹ Aimẹ Tọn He Nọ Diọ lẹ po Ṣogodo Mítọn po Go?
“Ninọmẹ aimẹ tọn he nọ to didiọ lẹ ko wá lẹzun nugbajẹmẹji de. ‘Gbẹ̀ lọ mẹ ninọ ko jẹ awuvẹ ji na gbẹtọ lẹ,” wẹ linlinwe he nọ yin The Guardian dọ.
Nuhahun he gbẹtọvi lẹ yí alọ yetọn do dọ̀n sin yaji wẹ yé te. Susu to weyọnẹntọ lẹ mẹ wẹ dọ dọ, nuyiwa gbẹtọvi lẹ tọn wẹ nọ hẹn yozò sinsinyẹn wá. Yozò he fọ́n bo to sinsinyẹn deji ehe ko zọ́n bọ ninọmẹ aimẹ tọn nọ diọ bosọ nọ hẹn kọdetọn ylankan lẹ wá. Delẹ to kọdetọn ylankan lọ lẹ mẹ die:
Ninọmẹ aimẹ tọn lẹ taidi yozò sinsinyẹn, akúdido po yujẹhọn po he nọ saba wá aimẹ nọ zọ́n bọ otọ̀ nọ gbà filẹ, podọ zungbo lẹ nọ jimiyọ́n whẹwhẹ.
Osin-agó daho po dehe nọ nọ̀ tọ̀sisa he nọ fá taun lẹ nukunmẹ po nọ yọ́.
Ohù nọ fọ́n yiaga zẹjlẹgo.
Ninọmẹ aimẹ tọn he nọ hẹnnugble lẹ ko yinuwado ogbẹ̀ lọ blebu ji. To whenue linlinwe de he nọ yin New York Times ko dọhodo ninọmẹ otò voovo 193 tọn ji godo, e na linlin dọ: “Planẹti mítọn do hudo alọgọ tọn.” Na okú po yajiji he ninọmẹ aimẹ tọn he nọ hẹnnugble lẹ po ko hẹnwa wutu, Pipli He Nọ Penukundo Agbasalilo Go Lẹdo Aihọn Pé (OMS) dọ dọ, “owùnu daho wẹ e yin na agbasalilo gbẹtọvi lẹ tọn.”
Etomọṣo, mí gán gbẹ́ do jide dọ sọgodo na yọ́n. Biblu ko dọ dọ nujijọ he mí to mimọ to egbehe lẹ na jọ, e sọ dọ nuhewutu mí gán donukun dọ Jiwheyẹwhe na yinuwa po nuhe e na wà nado bayi hihọ́na mí to sọgodo po.
Be ninọmẹ aimẹ tọn he nọ to didiọ lẹ hẹn dọdai Biblu tọn di wẹ ya?
Gbau. Yozò sinsinyẹn he nọ hẹn ninọmẹ aimẹ tọn he nọ hẹnnugble wá lẹ sọgbe hẹ nuhe Biblu dọ dọ e na jọ to ojlẹ mítọn mẹ lẹ.
Dọdai: Jiwheyẹwhe na “hẹn vasudo wá na mẹhe to aigba vasudo lẹ.”—Osọhia 11:18, nudọnamẹ odò tọn.
Biblu dọ dọ ojlẹ de na wá bọ nuyiwa gbẹtọvi lẹ tọn na dibla và aigba sudo. Na yozò sinsinyẹn he nuyiwa gbẹtọvi lẹ tọn nọ hẹnwa wutu, yé ko to planẹti mítọn husudo hugan gbede pọ́n.
Dọdai ehe do whẹwhinwhẹ́n dopo hia he wutu mí ma gán donukun dọ gbẹtọvi lẹ na bayi hihọ́na aigba. Doayi e go dọ Jiwheyẹwhe na yinuwa to whenue gbẹtọ lẹ na “to aigba vasudo.” Enẹwutu, mahopọnna vivẹnu he gbẹtọ ahun dagbenọ lẹ sọgan do nado wà nuhe na zọ́n bọ ninọmẹ aimẹ tọn lẹ ma na nọ diọ, yé ma gán penugo nado hẹnalọdotena gbẹtọvi lẹ ma nado hù aigba sudo.
Dọdai: “Nujijọ dobu lẹ na tin.”—Luku 21:11.
Biblu dọ dọdai dọ “nujijọ dobu lẹ” kavi nujijọ ylankan lẹ na wá aimẹ to ojlẹ mítọn mẹ. Ninọmẹ aimẹ tọn he nọ to didiọ nọ hẹnnugble lẹdo aihọn pé taun. To egbehe, mẹdelẹ nọ to sijọsijọ ji na yé nọ to budi dọ aimẹ gán diọ bo hẹnnugble jẹ obá he ylan taun mẹ.
Dọdai: “To azán godo tọn lẹ mẹ, ojlẹ awusinyẹn tọn he vẹawu nado pehẹ lẹ na wá tin. Na gbẹtọ lẹ na yin wanyina mẹdetiti tọ́, wanyina akuẹtọ, . . . nugbomadọtọ . . . gbigbọ gbekọndopọ tọn matindotọ, . . . mẹdehiatọ, tasinyẹntọ.”—2 Timoti 3:1-4.
Biblu dọ dọdai gando jijọ po walọ he gbẹtọ lẹ na nọ zan po go, ehe na zọ́n bọ ninọmẹ aimẹ tọn sinsinyẹn lẹ na nọ wá aimẹ. Tohọluduta lẹ po ajọwatọ lẹ po nọ ze ojlo yetọn nado mọ akuẹ donukọn bo nọ dovọ́na lehe gbẹninọ na ṣí na mẹlẹ to sọgodo. Eyin yé tlẹ tẹnpọn nado wazọ́n to pọmẹ, yé ma gán kọngbedopọ nado doalọtena nuhe nọ hẹn yozò sinsinyẹn wá lẹ.
Dọdai ehe dohia dọ mí ma gán donukun dọ gbẹtọ lẹ ni diọ jijọ yetọn bo bayi hihọ́na aigba. Kakatimọ, Biblu dọ dọ gbẹtọ ṣejannabinọ lẹ “na to yinylan deji dogọ.”—2 Timoti 3:13.
Nuhewutu mí gán deji dọ Jiwheyẹwhe na yinuwa
Biblu dohia dọ onú planẹti mítọn po mẹhe nọ nọ̀ e ji lẹ po tọn nọ duahunmẹna Mẹdatọ mítọn, Jehovaha Jiwheyẹwhe. Pọ́n wefọ Biblu tọn atọ̀n poun he dohia dọ Jiwheyẹwhe na yinuwa.
1. Jiwheyẹwhe “ma dá [aigba] to ovọ́ mẹ, ṣigba [e] dá ẹ na yè nido nọ nọ̀ e ji.”—Isaia 45:18.
Jiwheyẹwhe na hẹn ojlo etọn na aigba di. (Isaia 55:11) E ma na dike ni yin vivasudo kavi jẹvọ́.
2. “Homẹmimiọnnọ lẹ wẹ na dugu aigba tọn, yé nasọ nọ mọ awuvivi susu to jijọho susugege mẹ. Dodonọ lẹ wẹ na dugu aigba tọn, yé nasọ nọgbẹ̀ to e ji kakadoi.”—Salmu lẹ 37:11, 29.
Jiwheyẹwhe dopà dọ gbẹtọvi lẹ na nọ aigba ji to jijọho mẹ kakadoi.
3. “Na mẹylankan lẹ tọn, yé na yin sinsánsẹ sọn aigba ji.”—Howhinwhẹn lẹ 2:22.
Jiwheyẹwhe dopà dọ emi na de mẹhe zindonukọn to ylanwiwa mẹ lẹ sẹ̀, etlẹ yin kakajẹ mẹhe to aigba husudo lẹ ji.
Nuhe Jiwheyẹwhe na wà to sọgodo
Nawẹ Jiwheyẹwhe na hẹn opà he e do gando aigba go di gbọn? Gandudu etọn he yin yinyọnẹn lẹdo aihọn pé bo nọ yin Ahọluduta Jiwheyẹwhe tọn wẹ e na yizan nado wàmọ. (Matiu 6:10) Olọn mẹ wẹ Ahọluduta ehe na dugán sọn. E ma na biọ dọ ni dọho hẹ gandutọ gbẹtọvi lẹ tọn gando aigba po lẹdo etọn lẹ po go. Kakatimọ, Ahọluduta Jiwheyẹwhe tọn na diọtẹnna gandudu gbẹtọvi lẹ tọn.—Daniẹli 2:44.
Ahọluduta Jiwheyẹwhe tọn na wà nudagbe na gbẹtọvi lẹpo, podọ e na jla lẹdo he yin hinhẹngble lẹ do. (Salmu lẹ 96:10-13) Pọ́n nudelẹ he Jehovah Jiwheyẹwhe na yí Ahọluduta etọn do wà.
E na vọ́ lẹdo lẹ jlado
Nuhe Biblu dọ: “Danfafa po aigba-klo po na jẹaglin, bọ dankló na jaya bo na gbàsẹ́ di vounvoun gbémẹ tọn.”—Isaia 35:1.
Nuhe e zẹẹmẹdo na sọgodo mítọn: Jehovah na jla planẹti mítọn do, etlẹ yin fihe gbẹtọvi lẹ ko hẹngble taun lẹ.
E na dohuhlọn do ninọmẹ aimẹ tọn he nọ hẹnnugble lẹ ji
Nuhe Biblu dọ: ‘Jehovah nọ whiwhẹ yujẹhọn; agbówhẹn ohù tọn lẹ nọ nabọẹ whii.’—Salmu lẹ 107:29.
Nuhe e zẹẹmẹdo na sọgodo mítọn: Jehovah dohuhlọn nado doalọtena nue nọ hẹnnugble lẹ. Gbẹtọ lẹ ma nasọ jiya na ninọmẹ aimẹ tọn he nọ hẹnnugble lẹ wutu ba.
E na plọn gbẹtọ lẹ nado nọ penukundo aigba go ganji
Nuhe Biblu dọ: “Yẹn na na we wuntuntun bo na plọn we aliho he hiẹ dona gbọn.”—Salmu lẹ 32:8.
Nuhe e zẹẹmẹdo na sọgodo mítọn: Jehovah deazọ́nna gbẹtọvi lẹ nado penukundo aigba go. (Jenẹsisi 1:28; 2:15) E na plọn mí lehe mí gán penukundo nuhe e dá lẹ go do bo nasọ nọ nọgbẹ̀ to aliho de mẹ ma nado hẹn awugblenu de wá lẹdo mítọn mẹ.
a Jehovah wẹ oyín Jiwheyẹwhe tọn. (Salmu lẹ 83:18) Hia hosọ lọ “Mẹnu Wẹ Yin Jehovah?”