Be E Yọnbasi Dọ Akọ̀ Voovo lẹ Ni Wá Sọzẹn Gbede Ya?—Etẹ Biblu Dọ?

Na mẹsusu, linlẹn lọ dọ akọ̀ voovo he tin lẹpo na wá sọzẹn gbẹ́ yin odlọ de poun.

•  Wekantọ Daho ONU tọn, António Guterres dọmọ: “To awà aihọn lọ tọn lẹpo ji, akọ̀ ṣinṣinyan taidi adí ylankan de, he fọ́n bo to nuhẹngble to azọ́nwhe lẹ, to ogbẹ́-ta voovo lẹ po nuwiwa egbesọegbesọ tọn gbẹtọvi lẹ tọn po mẹ. Aṣa ehe wẹ zọ́n bọ zẹ́nmasọ he to gbẹtọvi lẹ ṣẹnṣẹn to nukọnzindo.”

Be akọ̀ lẹpo na wá jẹ zẹnzẹn gbede ya? Etẹ Biblu dọ?

Nukun he Jiwheyẹwhe nọ yí do pọ́n akọ̀ voovo lẹ

Biblu dọ nukun he Jiwheyẹwhe nọ yí do pọ́n mẹhe wá sọn akọ̀ voovo mẹ lẹ na mí.

•  “[Jiwheyẹwhe] hẹn akọta gbẹtọ tọn lẹpo wá sọn mẹdopo mẹ, nado nọ nọ̀ nukunmẹ aigba tọn pete ji.”—Owalọ lẹ 17:26.

•  “Jiwheyẹwhe ma yin mẹnukuntahopọntọ gba, ṣigba to akọta lẹpo mẹ, mẹhe nọ dibusi i bo nọ wà dodo wẹ e nọ kẹalọyi.”—Owalọ lẹ 10:34, 35.

Biblu dehia dọ whẹndo dopolọ wẹ gbẹtọvi lẹpo yin, podọ mẹhe wá sọn akọta lẹpo mẹ wẹ Jiwheyẹwhe nọ kẹalọyi.

Lehe akọ̀ lẹpo na wá jẹ zẹnzẹn do

Ahọluduta Jiwheyẹwhe tọn, enẹ wẹ gandudu olọn mẹ tọn etọn wẹ na de zẹ́nmasọ akọ̀ lẹ tọn sọn aimẹ. Gandudu enẹ na plọn gbẹtọ lẹ lehe yè nọ yinuwa hẹ mẹdevo lẹ to aliho dagbe mẹ do. Gbẹtọ lẹ na plọn lehe yé na nọ duto linlẹn akọ̀ ṣinṣinyan tọn depope he yé gán tindo ji do.

•  “Mẹhe nọ nọ̀ aigba ji lẹ [na] plọnnu gando dodowiwa go.”—Isaia 26:9.

•  “Ale he dodowiwa nugbo na hẹnwa wẹ jijọho, podọ sinsẹ́n he dodowiwa nugbo na detọ́n wẹ vivomẹninọ po hihọ́ he na dẹn-to-aimẹ po.”—Isaia 32:17.

To egbehe, gbẹtọ livi susu lẹ to nuplọn sọn Biblu mẹ gando lehe yè nọ yinuwa hẹ mẹdevo lẹ po sisi po bosọ nọ doyẹyigona yé do go.

•  Eyin a jlo na yọ́n nususu dogọ, hia hosọ linlinwe Fọ́n! tọn lọ “Be Nuvẹun Gán Busẹ Ya?”

•  Hia hosọ lọ “Comment parler de racisme à votre enfant” nado mọ lehe mẹjitọ lẹ gán dohọdo whẹho ehe ji to whégbè do.